BUNG 2 NA.
Khamsang Lalpa chuan a mitmeng fiah fai fel fak-a melh ran pah chuan in chhiahkhawn khua ka'n ni tih erawh ka beng ka hriat tluk zetin ka hria e, a rilru pelhe lama min nek' in Lalpa hian a tum hi kei Khamsang Lal hian ka ngaithiam thei lo a ni tia Thangzika kaiṭen a ke pen thawm Paihte pahnihte chuan an hriat lohnan a aw ki chu an san zual deuh hlak a.
Khumpui lama Lal fanu hmel duhawm zet leh pian inkhaithli zaih mai chuan hlauthawng takin a pa mikhual duhawm lem loh tak in be mek lai chu khur ru deuh dar dar hian a lo ngaithla kar mai a. Lal kawngka hnung chhawn zawnga Paihte pahnih ding dun ran te chuan Lalpa a ni lo zawnga min nek zawk hi tum duh ting suh, in khua meivapa kan pasalṭha ten an chantir vaih chuan i chan hian maian chan pawh a iang pha lo hlauh dah ang nge an tih chuan an hnunglam aṭang hian Thangzika chuan Tuivai kang ngai lo, lo daikaia duham chin tawk nei lo a Lusei ram lo pal chhen hi duhtawk chin neih in va hasat awm ve le, tiin aw dam dap si, a thinlunga thinrim rukna in pumru kar, a aw phawia danglamna awm eih lo, dam dap hian an ti a.
Khamsang Lalin kawngka bianga thla engin chiang taka a chhun pian dik zaih leh in khaithli zaih mai che map lo va an mahni ngun leh chik zet a thlir rantu chu Khamsang Lalpa nen chuan thlek tawn zak zakin Paihte pa chuan tu nge i nih? Nangni kan chhiahkhawn khua te hian zah lo takin min be tur a ni lo asin, nawm a maka, muangleia in mawng kan hun tir hnu che'u pawh a, a kawisawi zawnga kan thu leh hla in lak zel dawn chuan kan chhiahkhawn khua mai ni lovin kan Leido in ni tihna a nia, a reng reng thuah nang kha In lal kan biak laia i lo inrawlh ve na tur a awm lo ve an ti khawl a.
Khamsang Lalpa chuan Muangleia kan awm a kan hnar mutna chhan te hi Lal leh a khawnbawlte vang a ni lo a, ka pasalṭha zam nain a man tel loh, hlauhawm awmzia hre lo te hi an ni asin, Lal leh khaw mipuite venghimtu chu, tiin a rilrua Thangzika a dah chungnungna leh a pasalṭhate rau rau zingah pawh a lo ngainat bik ni tel chu a chhuan zia entirnan Lal kamchhuak chuan an fak chhuak zauh a.
Chutia ngawirenga Thangzika an melh kar lai chuan, Khamsang Pasalṭha Saikhama chu lo lang ve nghalin uai, a ruk a rala khaw eng pawh hmu ngamlo ang hrima kan vangkhua lo lut a, kan Lal mutui lai meuh kaitho tu thu kam chhuak chu a pawimawh hle ang maw? Tiin a chempui chu an hum ruh nghal pang mai a.
Lalpa chuan, ka fanu vhungchangah a ni hei chen chen a thim hnuaia an lu an rawn rawlh ni, an tih chuan Thangzika chuan Lalpa, ka ṭawng lo ngai dam la, an ni ho avanga thin thia i khua leh tui te mutmu pawh tuah thei lo a awm leh hlauh rukna an thinlung chhunga in phumru tlat hi tih reh saka a awm hun hi ka va nghakhlel em tia, an Leido ni tura cho chi kima a cho na thu chu an chhak chhuak zauh a.
Pasalṭha Saikhama chuan Lalpa ka sangawi zawnpui thu kam chhuak kha hman aṭang tawha ka ngaihdan a ni e tih pah chuan Paihte pahnih chu rum ul hian an melh kar a. Lalpa chuan Paihte chhiah khawn khua an nih hi hreh hle mahse a khaw mipuite himna tur a nih dawn phawt chuan pawi a tih lohna chu a thinlungah chuan a lang lian zawk fo ṭhin reng kha a nia.
Mahse tunah chuan chhiahkhawn khua nih hi duh lohna lian tak neiin a pasalṭha te hi rin ngam an ni tih hi fiah duhna thinlung lian tak a pu ve tawh a ni tih lantirnan, Lalpa chuan aw le, ka Pasalṭha te u an chungthu chu in kut ah ka dah e tih pah chuan a pasalṭha pahnih a rintawk zia Thangzika ten an han hriat rual chiah chuan Thangzika chuan rang taka a chempui chu vai phe lawp pah chuan Paihte pakhat chu a lu lek taksa hrang nawlh khawp in a nghawng an chhawk sak mai zawng Lalin chhung chu thisen leh thi tur chalchanga ke khawng deuh dat dat ri chuan a zui nghal ta zat mai le.
Saikhama chuan Paihte la dam awmchhun chu pan chheu chheu pah hian Khamsang Pasalṭha zam ngai lo ka ni ngai e. hei hi kan Lalpa khua leh tui tan tih pah chuan a lu chu an chhawk sak ve hmawk mai a. Khumpui pindan dap kara khur deuh hlak hlaka Lalnu leh a fanu in kuah chial chuan Lalin chhunga thil thleng mek chu an rap dun hle mai a.
Chu mai a la ni lo. Lalfanu hmelṭha kum 18 mi, duhawmna zawng zawng neitu, a nuih zawnga a biangsum lo lang leh kalh ṭhin te chuan a van ti lang ṭha leh zual em tia mi te sawi hat kai pha chuan a Pa lalna in chhunga, tlangval pahrak, hnarngul sang vah, a hmela zamna awm eih lo leh mahni in rin tawkna pai tlat tu, hnamchawm tlangval darhlai hlep hlawp chu a thinlunga nulat a hriat ṭantirh a a lo duh rukna chuan zual lam pan zelin a thlir ngawih ngawih a.
Lal tuala Zawlbuk riak ho lo dingkhawm ṭaih hnenah chuan Lalpa chuan Thangzik, kal la, ka tlangvalten Ruang hi lo senghawi rawh se, Saikham, Laiveta zu kai tho se, Zawlbuk riak ho zinga mi khan tunah chawpchilh takin ro kal rel nghal ang an tih chuan Pasalṭha pahnih chuan Lalpa mit taka melh ran chung chuan an Lalpa chuan a ti mai mai lo tih an hriat chian em vang chuan Lalpa thusawi chu an bawhzui nghal zat a.
Zawlbuk riak zinga tlangval panga te chuan Lalin chu lo lut nghalin Lalin chhunga Paihte pahnih lu chhuma let rengte chu dim baksak lo hian an hnuk hrawih mai a, Lalpa chuan kan chunga zahngaihna lantir duhlotute hian an ruang pawh hi ka zah sakna bik tur ka hre lo ve, Ram Pasalṭha hnenah hlan ang che u an tih chuan Tlangvalte chuan an Lalpa rilru sutthlek chu dangta riau hian a mit meng aṭang chuan an hrethiam hle a ni.
A pasalṭha Pathum te chu an kim ta bawk a, Laiveta chuan,Lalpa a zialo hle mai, i Lalna khua leh tuite thinthia an mut loh laiin tiang hun hi in lo tawng ta si a, o thurel ṭawmpui tlak ka ni ve lo in ka in hria a ni tiin in phahhnuai leh in thlahrung takin Lalpa hmaah chuan an kun da a.
Lalpa chuan khaih khaih khaih, Laivet, chuti em em a in phah hnuai tur a ni lah lo ve, a zanrei thilthu hla em vang a ni tihpah chuan Thangzika a chhuanzia chu chhak chhuak chak hle mahse a in sum ta rih a.
Lalpa chuan khumpui lama mu a fanu leh a nupui chu au pheiin mei la de va va chu an chhemalh tir a, Lalpa chuan Chemte tirh hnial rual lovah ka thlathum bel kha han chawithla la ka pasalṭhate hian an duh tawkin han lim tlang teh se tiin a hmela danglaman lang chhuak miah loh leh a tir ai maha hlim hmel pu awm tak mai hian an khi hui a.
Duhtawk phawt ang.
No comments:
Post a Comment