PÛMAH MI LU. BUNG 6- NA.

PÛMAH MI LU

BUNG 6- NA



Khankomsiam chuan a hmaa a mah aia naupang mah lusei pasalṭha chu melh kal pah hian a melhna ata a mit chu lasawnin khaw mipui lal tuala pung khawm ho chu an thlek kual dan dan a, mipui ho chuan Lusei tlangval laka an pasalṭha tlawm ta mai chu mak an tih mai bakah chu Lusei pasalṭha lakah chuan huatna thinlung an pai mek bawk a.



Chtah lal leihka sanga ding zum ran Lentlang lal fanu hmelṭha zet chuan a bula ding lalpa che zia chu chik zet a an melh lai chuan Saia mit leh a mit chu intawng siah in Saia chuan mi hriatloh lai tak chu chuhin Lentlang lal fanu chu mitmei zoh in an hnungtawlh tir hret hret a.



Chutah le, mipui kar aṭanga an khaw pasalṭha Khankimsiam aihnah phahpui Chhawlkeua chu rawn pen chhuak in Thlahtea chu au loh loh chung hian nang Luseipa kha he lamah aw tih pah chuan Thlahtea hmachhawn zawng chuan an ding kak ve hah a.



Chhawlkeua chuan Khankimsiam lam chu melh zoh pah hian ṭhiana," i che kha ka lo thlir reng a i tha te kha a ṭhum zo tawh a nih kha," tuna chinah chuan kei Chhawkeua hian ka hmakhalh zel tawh ang che tiin hmuhsitna rawngkai chu a aihnah phahpui lakah chuan an chhak chhuak zoh a.


Lal leihka sang aṭang chuan aw fiak ṭhak ri hi lo chhuak nghal in lalpa chuan," inbeihna a thleng tawh lo vang, mahni inlam ṭheuh pan ula, kha Lusei pasalṭha kha ka bulah lo hnai teh se, chuan Khankimsiam, ka koh loh che chuan ka lalin hi rawn pen lut ngai tawh lo vang che an ti ram hmak a.



Saia chuan zawisap si aw fiah fel fai fak hian lalpa," keini Lusei ho hian i khuaah ngei hian reilote chhung ro kan han rel lawk ang chu tih leh lalpa nghawnga a kawlhnam chuktuah chu an rual nghal zat a. Lalpa chu phu uih chung hian Lusei sawn chhepa," ka lakah hian eng nge i duh an ti vin tuarh a.



Saia chuan i lalna ram rawn dai luttu chuan duh leh mamawh a nei tih hi khawkhat lal ve meuh chuan i hriatthiam ka ring. Lentlang lal fanu hi rawn hruai kir tura lo kal kan ni e. Ka thu reilote i awih phawt a ngai a ni an ti chang fak a.



Chu ve leh lalpa chuan eng nge in ngawih renga? Ka pasalṭha Chhawlkeua chu Lusei lakah a zam chhe mai em ni an tih chuan Chhawlkeua chuan tlangvalte u tumah kha zuah loh tur, Lusei sawn ho khi an ti tuarh mai a. Chu ve leh Khankimsiam chu lal leihka sanga zuan dawk zawk pah hian mipuiho chu khapdai nghal in tumah kha lo hnai suh u. Lusei pasalṭha ho hian an lo kal chhan chu hlen rawh se. Hei hi kan khaw buaina a ni lo.




Chhawlkeu," ṭul lohvah hmalam i ke khan pen suh se," i beih mi a ni lo, a lakah chuan satel  i iang e an ti rum al a, Chhawlkeua chuan, uai," kha leh chen ka aihnah phahpui in tunah min phatsan a maw? Lo ngawi tak rawh ka hlep ral rak ang che an ti tun tun a.



Khankimsiam chuan han tum chhin la, kan lalpa rilru sukthlek dik loh vanga khaw mipuite hian an tawrh ka duh lo ve tia a ka an lai chuan Saia chuan ring leng lawng hian keini hi Murlen pasalṭhate kan ni e. Lrntlang lal fanu hi hruai kir tura lo kal kan ni a, buaina dang kan duh lo ve. Buaina duha in khua leilung rawn rap ni ila chuan in pasalṭha taksa leh lu hi a hrang nalh tawh ang.




Pawi leh Lusei ho hian inremna saui tanin lei leh van kawkin  chhe chham meuhin thu an thlunga chu inremna saui tan tawh hnua khawkhat lal ve ve te thu bawhpelhtu chu in lal hi a ni. Tunah a hel kai zawnga ke in pen leh a nih ngat chuan kei Ṭiaural Paite pasalṭha ho suat chimit tu Sawiluaia Murlen pasalṭha fa u zawk hian in khuaah ngei hian thisen tak tak ka luantir ang an ti chang fak a.



Mipuiho chu phun mur mur chungin chutah sawi zawm leh in, kum kha leh chen fahrah nun hun hmangin nu awm tlei lovin ka lo seilian, ka nu leh ka pi nunna la tu te hi nangni chipui ho hi in nia sin, chuti chung chung pawh a kan lam hawia ngenmu rawn sur tirtu Zachima in khaw tlangval pawh a nun kan la zuah asin, inremna hi kan duh a ni. Ṭul lova pawisawilo in nunna an tuar tur hi kan duh lo.




In lal hian kan pawi asawi a, chuti chung chung pawh chuan a nunna hi kan hlutsak ang, a mah erawh chu ka thusawite ngaipawimawh lova at in so dawn chuan in lal hian pialral ah siang a lawi hmasa ber ang nga, a dawh leh tu nge ni ang tiin an melh kual dan dan hlawm a. Chutah mipui chu thum deuh hak chung hian an awmhmunah chuan an in sawh an in sawh a.




Lalpa chuan nau cha hai," tih loh tawp tur i ti a ni, ka mi leh sa te hian an zuah che ring duh suh tiin chil an chhak phurh phurh a. Saia chuan lalpa," kan nun humhimnan kan tih a ṭul miau a ni. Lentlang lal fanu ka kiangah hian lo kal rawh le, khua hi kan chhuahsan vat a ngai tiin a kianga Lentlang tlangvalte chuan an lal fanu chu vengin silai kau sa in an han laitat hlawm a.




Chutia Lentlang lal fanuin a khaw mi leh sa te an hmu chu a hnuk a ulhin a mittui a luang chhuak ngiai ngiai a. Saia chuan a kianga Pawi pasalṭha chu melh kal pah hian ,"tuilairapin i dingkhawng reng dawn em ni? An tih chuan harh chhuak zawkin Murlen khaw leilung rap lut turin ka in peih e an ti a, chutah lalpa chuan aw haw haw, chuti zawng chuan maw? Khankimsiam," pawi nasa tak i khawih in i thutlukna chuan ka ngen a chhun hle mai ka ti. Hei hi a tawp ngai hauh lo vang an ti rum al a.




Saia chuan lalpa kal rawh le, ramhnuaia zantam riak tur hian hun ka mamawh tlem hle a nia, min tih khawtlai chu tum duh ting suh.  I lal tualah hian thisen nena in chiahpiah nuaih a tluk sawp reng i duh lo chuan tih leh a kawlhnam chuan an nawrna zual salh a.


Khaw mipuiho chuan lo hual leh tuau tuau in Thlahtea chuan a lo hnaiber chu a bana pawt thutin tlangval i nunna hi ka kutah a awm e. Luhlul chhuah hauh suh ang che tih leh in phen nan an hmang nghal ve zat a. Chutah Chhawlkeua chuan tlangvalte u kan lalpa khu zui nghal ru an tih chuan tlangvalho chuan thingfak leh hmanraw dang an hmuh ho chu chuh in an lalpa chu chhan chhuah tumin an han zui ve nghal zat a.



Khankimsiam chuan, tlangvalte u kan him zawk nan in ke pen kha tawp nghal rawh u, kan lalpa hi himdam takin a lo let leh ang tih ka tiam a che u. Lo hnai tawh su an tih pawh chuan luhlul chhuahin an rawn la hnai zel tho a. Chutah Saia chuan Lentlang lal fanu vengtu silai kausa chu melh ralh pah hian a lo hnai ber khi a malpuiah kap rawh an tih rual chuan silai a puak nghal a, na tuar ṭe ri chuan chhunzawm nghalin tlangvalho chu thinrim tak in an han thum chhuak hak a.


Chuti maiin an pawh ngam bik si lo, pialral kai hmasatu nih chu an hreh tlang bawk si, leh lamah an lalpa an kawl bawk si, chu mai a la ni lo, an pasalṭha chhuanvawrin Luseiho a pui bawk nen rilru mumal pu thei hek lo le, chutah an pasalṭha in thiam takin a lo fuih ve bawk nen.



An kal chu a sawt lo hle mai le. Khankimsiam chuan, lo hnai tawh suh u, pawi nasa zawk a chhuah hma hian tiin an vau chher chher a. Chutah le, Chhawlkeua chuan naute u Luseiho tih ṭhaih mai maiah khan zam hauh suh ang che u. Kan lalpa kha a him ngei tur a ni tiin a rawn au leh lauh lauh a.



Chutah Saia ning chuan lalpa kaihza chu tlawhthlep sak hnawk pah hian i mite hi lo hnai tawh lo turin hrilh rawh chuti lo chu i nghawng hi ka tan khawp ang tih leh a kawlhnam hriam ṭha zet chuan lalpa nghawng chu an zai thi ser ser mai a, chu ve leh lalpa chuan ka nun hi i zuah dawn tih min tiam phawt loh chuan an ti let ve a.



Saia chuan ka tiam che. Hlim dam takin khua i lut ngei ang. Mahse min lo umzuia hnunglam aṭanga min hmeh mih tir i tum vaih chuan i lu la turin keimah ngei hi ka lo kir leh ang an tih chuan lalpa chuan tlangvalte u duhtawk ru le, lo hnai tawh su, ka lo let leh ang tiin a mit menga thinrimna lo chhuak chu a khaw tlangvalte chuan an hmuh hmaih lo chiang kher mai le.




Zachima leh a nu chuan lo zui ve nghalin lalpa i khua leh tuiah hian ka awm tui tang tawh lo ve. Ral rama lu zuar tur chuan i rorelna hnuaia awm ka tum tawh lo an ti chang fak a. Chutia an khaw tlangval leh an pasalṭha chhuanvawrin Lusei pasalṭhate an han pui ta mai chu an ngaithiam lovin an thin chu a rim tlang hle mai a.



Saia chuan kal rawh le, an lo hnaih leh vaih chuan i lu hi ka la ngei ang tiin kawtchhuah chu an han thleng der mai a. Ti chuan pumpelh lamah chuan kal zai an han rel ta a. Buaina dangin a rawn chim leh ta tlat mai le. Khankimsiam nu tar tawh tak chu an pasalṭha Chhawlkeua chuan man bet in Khankimsiam," i nu nunna hi ka kutah a awm e." Kan lalpa kha himdam takin rawn chhuah la i nu hi a him ang an rawn ti let ve salh a.



Khankimsiam chuan a ngaihtuahna tawi lutuk chu pawi a tiin a in thiam lo hle mai a. Chutah thinrim tak mai hian Chhawlkeu," ka nu kha i kut hmawr pawn tawk hlek suh chuti lo chu i lut tenawm tak kha ka tan ngei ang an ti kuk kuk mai a. Chhawlkeua chu nuih huah huah pah hian mi vau khanglang e law maw? Lo ngai tak rawh, i nu hian pialral a kai khawp ang tih leh a kawlhnam chuan Khankimsiam nu chu a nghawngah an chuktuah nghal hmak a.



Saia chuan i nu chhanhim nan ke ka pen dawn e. In lalpa hi lo veng ang che tih leh ring taka ṭawng chhuak in Saia chuan tarchak lo kutthlak duhtu hi pasalṭhaah ka chhiar ve ngai lo ve. I ngam a nih chuan min rawn hmachhawn rawh le tiin a kawlhnam chuan an kawk vu a.


Chhawlkeua chuan, Lusei naupang," kan lalpa kha rawn chhuah phawt ula ti chuan kan pahnihin kan chingfel dawn nia tiin an rawn au loh loh a. Saia chuan hnai lo ve," kan himna kulh hi zalen taka ṭhiat turin mi mawl kan ni lo ve. I ngam a nih chuan kei hi min rawn hmachhawn ta che. Nge ni min hmachhawn ngam lovin i tlangval te kha in phennan i hmang dawn zawk? A him china rak rak lo khan pasalṭha dik tak angin ka hmaah hian rawn pen chhuak rang rawh an ti vin ṭhawt a.



Chhawlkeua chuan nang Lusei naupang i mi vauna anka leh i chilper kha a thlawn mai mai a ni e. Kan lalpa kha a ni ka duh chu an tih chuan Saia chu let leh in an lalpa chu phih tho lawp chung hian a nghawngah a kawlhnam chu chuktuah ran chung hian a nih leh le, tar chaklo i vawnna a ta kha i kut la sawn rawh le, mipa fa chuan an thu tiam a bawh pelh ngai lo ve. Tiin muangchang hian an pan chheu chheu a.



BONUS


HE KHAWVELA ROSUM TE HIAN CHHUNGKAW HLIMNA A LEI ZO SI LO.

.