PÛMAH MI LU. BUNG 38- NA

PÛMAH MI LU.

BUNG 38- NA.



Zing ni chhuak engmawitak chuan Thantlang in za pawh tling lo chu tlangkam aṭanga a lan dan dan chuan a chhung paw ve raih maih a.


Saitea te unau ngawi renga insiam mawlh mawlh chu a nu chuan melh leh zawk ṭhin in a thinlunga hlauhthawnna lian tak nen chuan a fapate pahnih chu an sir melh leh zawk ṭhin a. Saia chuan a nu awmdan hai hauh lo chuan a mitko san ak hian Zinga chu an melh a, chutah an unau chuan a nu kiangah kalin malsawmna an han dil a.



Chutah a nu chuan ka fapa te u, khuanun vengin awmpui cheu rawh se. In chengrang awrawl chhuak ri beng dawhin kan lo ngaichang reng ang. Kal ula kal zel rawh u. Hlawhtlinna chu in kutah a awm e. Lalpa pawn a lo nghakhlel tawh ang che u. Tiin an thlah a.



Saia chuan a nupui duhlai, a hmangaih raipuar lung tawh chu melh zawkin dam lo hauh la ral lu nen ropui takin khawchhung kan lo lut ngei ang. Kan thinlunga sernung thi thei lo min phum saktute hian an chantawk an hmu ang. Tiin lalin lam an pan dun ta a.



Kawtlaia Saia te unau ralthuam famkim nena an chhuak an han hmuh chuan an leihka sang aṭangin a hmu a piangte chuan an lo thlir dauh dauh a. Lal tualah chuan Thlah lova, Lunga leh Biakbuka chuan an lo nghak a. Lalin an han thlen chuan Tinkuala pawh chu a lo in peih at tawh a. Lalpa chuan ka pasalṭhate u lo hnai rawh te u tiin thu an sawi a.



Khuangphah khua hel zawnga kalzai inrel chuan hun in hmang am dawn a, hel loin khawchhung lut zawk ula a ṭhat ka ring e. Khuangphah lalpa in a pasalṭhate inruala kal tura a tih pawhin inhnial tlat dawn nia. Chin hriat va ni suh. Inlalpa hi tlangdang lal changin a demna awm ang tur zawnga ṭawngka an chhah chhuah ka duh lo ve.



Chemtei nu ka pasalṭhate hi malsawmna i hnutchhiah dawn lo em ni an tih chuan lalnu chuan a pasalṭhate kiang a thlen chuan kal ula kal zel ula, huaisen takin ral va bei ang che u. Pialral aṭanga khian kan unau famta ten an lo thlir reng cheu a, an thlarau a hahdam hma loh zawng, chhel takin ral va bei ang che u. Khuanu duhsakna awmzawng zawng in hnenah ka hlan a, khuanun vengin awmpui cheu rawh se tiin TAWLH LOH PUAN an dara suih sakin a mittui an khap per sak a.



Lal fanu hmelṭha chuan a kianga ding ṭawng tlem tak Tinkuala chu melh ralh pah hian midang hriat hlau tak chuan va fimkhur hle ang che an ti sap a. Tinkuala pawh chuan melh sap pah hian nangpawn dam lo hauh ang che an ti let ve a.




Lalpa chuan kawng laka an ei tur faisa leh sarep tam tham tak chuan an iptepuiah ṭheuh ah chuan ah tirin silai zen leh a mu ṭhahnem tak chu an ah tir bawk a. Ti chuan lalin chhuaksanin rawlrala che chhuak tur chuan mihuaisen parukte chuan kawtchhuah lam an panding nghal a.



Hetia an thang chhunga Thantlang khua eng emaw rikrum thila a him nan Khuafo lalpa chuan a tlangvalte Thantlang lama cham turin mi sawmnga zet an cham chhunga tla tur nen Thantlang khaw lam a pantir ve mek bawk a. Khuangphah lalpa lah bang lo. A tlangvalte Thantlang vengkimna kawnga ke pen turin mi sawmhnih lai a lo tirliam ve mek bawk a.




Khawlar kawngah tibuaitu tawng lo chuan zankhat an han riah chuan chawhnu tlang herah Khuago khaw chhung an han lut a. Lalin lam panding nghalin lalin an han thlen chuan lal fanu hmelṭha eltiang raipuar lang ve ek ek chuan a hmangaih ralthuam famkima an in thuam an hmu zet chu pa hi a ti hliah hliah in a hmangaihna chu a zual zel a.




Lalpa chuan lawmtaka lo hui in kawng laka an phan loh nan sarep leh faisa nen a thlahliam ve nghal a. Lalpa chuan an kal liam tur thlir vauh vauh pah hian, Lusei ho hi ka lo belchiang ngai hauh lo a, tiang em em a hlauhna pianpui ngai lo tur hi an lo piang ngai a ni maw an ti sak a. An lal upa te lah kha an vanglai hun liam ṭan tawh pawh ni se la tawhkhirh tak tur te an la ni asin chemtei nu. Makpa i nei thangmawi dawn e an ti leh sap a.



Mihrangval parukte pawh kal zel in Khuangphah khua lawi lutin chutia an khuaa khual pasalṭha tawlh loh puan nena an khua lo lawi lut te chu an lo hmu duh em em a, an lalpa kamchhuak aṭangin Thantlang pasalṭhate an nih an han ring rilru ngawt a an ring sual lo hle nghe nghe a.



Khuangphah lalin ah chuan an khaw buanchak Zasira chuan ralthuam famkim nen Thantlang mihrangvalte chu lo nghakin lalin an rawn chuankai ve leh chuan an lalpa hnenah chuan ti hian an ti a. Thantlang unaute kianga hun ka hmang tur hi ka vannei hle mai an ti thla rawk a. Lalpa chuan ka pasalṭha, an kianga hun i hman tur leh tur lohah chuan keia rem lo ruat ngawt chi a ni lo va, i ṭawngka chhuakin a zir a ngai ngei ang tia a sawi lai chuan Thantlang mihrangvalte chuan lalin an rawn dai lut ve chiah a.



Lalpa chuan lo chiauau nghal vatin hah zu an lo zuk nghal a. Chutah Zasira chuan pasalṭhate u in kiangah hun ka lo hmang ve ang nge an tih chuan hnial tak te in an han hniala an an ṭawngka chhuak pawh a sang ta lek lek mai le. Chutah Saia chuan tihngaihna dang a hriat loh tak ah chuan ni ang hmiang an ti a. Zasira chuan lalnu zahawm," tawlh loh puan min bah tir ve dawn lawm ni an tih chuan lalnu chuan phur takin ka pasalṭha huaisen takin aw tiin tawlh loh puan chu an bah tir a.




Kal zel in kawr ruam thuk tak zawh in Thantlang khaw hlui kum kha leh chen an lo talna ralvalh chin chu an dai lut ṭan der mai le. Saia chu ding dat in Tinkuala hnenah chuan helai ramte hi kawla ni a liam hnu thlenga kan chuanna ṭhin a ni a, thinlungah a thi thei tawh ngai lo vang an ti chhuak sap a.



Tinkuala chuan chuti si eng a ti nge in lalpa hian khawthar a sah leh lawi si an tih chuan Saia chuan khawthum ṭangrualte do rawn kan ni a, nakin zela kan thlah lo la kal zel turte tan a him lo a ni. Tunah pawh hian kan hna hi a khirh tawh hauh lo vang. A chhan chu kan khua min rawn run khan khawthum ṭangrualte pasalṭha hmahruaitu an mang ṭhak a, chutih rual erawh chuan khawi khawlal aqp chinah pawh pasalṭha huaisen tak tak an chhuak ve zel a fimkhurna erawh kan vawn tlat a ngai ang.




Ti hian Lentlang khua kan pan hmasa ber ang nga, an ni khawthum Lentlang, Murlen leh Mualnuam a hmatiamin chhim lam dung zawh in hma kan sawn phei ang. A karah zanthum riah kan bak a, Kan piah ralah sawn MI LU LAK MUAL an tih mai ṭhin chu a awm a. Ka pa te hunlai khan saw mi lu lak mualah sawn in suatna rapthlak tak a lo thleng tawh a ni.




Ka pain a sawi dan phei chuan Tidim pasalṭha te, Lentlang leh Murlen pasalṭhate nihnu hnung, an hun tawpna ni bulṭanna hmun a ni. A tirah chuan ka pa te hi Murlen khua ni in Lentlangte nen hian unau ang chiah in kan in en ṭhin a, an ngawi dat a a thinlung chhunga rilru natna lo langchhuak chu a tun an hai lo.



Chutah sawi zawm leh in ka nu hi Pherpui khaw lal fanu Saizampuii a ni a, ka nu hmingchawia ka hming pawh hi sak a ni nghe nghe. Ti chuan ral lo lianin ka nu chu ṭek khampheiin a deng fuh a pialral kawng a zawh ta a ni.



Ti chuan ka pa a la ṭhalaiin ka tan a hun tam zawk a seng ral raih a. Thingnawi fawm rual pawh ka lo ni si lo. Tlemin ka lo hleikang chho ve zel a, khuanu duhsakna dawngin ka kum phu loh in ka taksa a insiam chak em em a, mi te mak tih pawh ka hlawh ṭhin. Ka pa hian ka nu thlanah a huntam zawk hmangin ka nu thlan bulah chuan min awi mu fo ṭhin.




Hunin kan pafa min liampui ve zel a, khuanu remruat kan dang ding zo chuang si lo. Ka pa lah a la ṭhalaiin khuatin thang pasalṭha a lo nihna chuan khaw hrang hrang deng chhuakin khawdangin kan lalpa harsatna an neih chu an rawn hrilh awl lo va, ka pa chu a hma theh ah ṭang zelin Ralvawn lal fanu tuna ka nu nen hian in neiin Saizingliana hi a lo piang leh ta a ni an tih chuan tumah reng ṭawng zai rel an awm lo. Khawngaihna leh lainatna in Saia chungah ro a relna hmun thingthelh hmunah chuan mihrangval pasarihte chuan Saia chu lainat takin an melh hrek hrek a.



Zinga chuan a u chanchin an hriat meuh chuan unau pianghmun an ni lo a ni tih chu tunah hian a hre ta chiah a. A rilru chuan tiang em em hian a ni maw i lo retheih le tiin a u chu chhuangtakin a en ta tlawk tlawk mai a. A aia nasa in a u chu a ngaisang zual sawt a.




Zanriah buatsaih in silai hmeh puah ngam ni hek lo le, mei pawh a rimna lo ang berin an chhuah a, ti chuan bukte siamin zan an tum tawi a. Mei an chhemna khu pawh vanlam hawia chho turin an meipui chhehna chu tawng chen vel danah changel hnaha hung kualin an mahni leng tawk ṭheuh in an hnungpuak far a.



Saia chuan aw then kharh kharh pah hian ti hian an sawizawm leh a.



Fahrah nun kan tem chho takah chuan mumang mak tak tak nei chho in rawlthar ka chuankai chhoh lai vel hian ka mangah nula hmelṭha em em hi ka hmu fo ṭhin a, a ni chuan min ko awl ngai lo. A bulah hian Sakei ṭankin tawh lian zet hi a bawk zul ṭhin. Ka sawi duh chhan ta ber chu chengrang chawia ni ka hmanliam hunlai khan Sapui thnag rim hian min vel nasa thei hle a, a tirah chuan mintih nat tum em maw tiin ka sahnu chan pawh ka bansan a tam mai.



Mahse ka mang lamah hriattir ka ni leh zel a, tunah pawh hetia rawlrala kan han chhuahnaah hian min rawn la vel hun a lo la thleng ang, tumah chiai lo turin ka duh cheu a ni. Min tihnat tumte hi chu kan lakah an rawn inlan vat zel a, ka mang lama min be ṭhintu hi hmuh chakin ni ka vuiliam fo ṭhin. Mahse a tak takah hmuh tur erawh a awm ngai si lo.




Hmuh hun te pawh an la awm chek ang chu an ti hul hak a. Tinkuala chuan ngun taka lo ngaithla in Saia," ka pa kha a vanglaia chak leh huaisen tak niin a hunlai na na na kha chuan kan khaw per khua hrang hrangah a thang ve hat a, nang ang chiah a ni. Sapui hian a vel a dai nasa thei em em a, kha sapui khan a veng tlat ṭhin asin. Hun a lo kal zel a, khawsikpui nasa tak tuarin ramtuilei lovin hun a hmang ta a, a ke te hi kawm vekin tiang hawl takngial pawn a ding thei ta lo va, a thih dawn khan a mang lama a hmuh fo ṭhin nula hmelṭha tak lakah thu a lo tiam chu ni in chu chu Lasi a ni.




Ti chuan  ka pa chu a boral ta a, ka pa lakah khan hremna pe mahse hmeithai chhungkua kan nih pawh khan buh leh balah kan phang ngai lo. Kan buh leh bal te chu mite ai ai in a ṭha a, mi mak tih pawh kan hlawh reng a ni. Kan lalpa phei chuan khuanu hian Tinkualate chhung hi a vohbik e tiin a upa te hnenah a sawi hial ṭhin an ti a.



Saia chuan kan thudang alai chuan ti hian Lentlang khawdaiah kan inkulh ang nga. Zasira leh Lunga hian khawchhung in lut ang. Khualpang zin angin in in sawi ang nga, cham pawh in cham mahna le. An khaw leilung awmdan leh ralkai chin ho rilru sukthlek in zirchiang ang nga, Khiangphah khua in nih thu insawi mai dawn nia.



An lalpa kiangah hun a tam zawk in hmang ang. Lunga, an lal fanu in khan ka lakah intiamkama a neih tawh avangin engmah a sawi chhuak ngam dawn lo va, i hmel a hmuh ve leh a mah pawh tih danglamin a awm ngei ang. Chumi hun a lo thlen chuan an khua chu meivapah a chan mai tur thu ka hrilh lawk vek tawh.



A rilru sukthlek a dan hlauh palh takah in kut khan in ralthuam hlat hauh suh se. Ti hian kan zan sarihna chiah kan hmangta der mai. Zasir, i lenna kha chhawr hauh lo la, duapzul takin i hawi her ti danglam ang che. In laka an rilru a kawih loh nan at pawh so mai ula, lal fanu erawh chik tlat ang che u.



An tlangval lah a tam zawk pialral kawng an zawh tawh a an hnual ve rawih tawh ngei ang. Hetia kan beih let hi an ring dawn hauh lo va an nemna lai kan man fuh hunah kan che chhuak ang. Ralkai thei chin lakah tumah timna neih awih a ni dawn hauh lo va, kan unaute tana ke pen kan ni tih hi hriat reng tur. Ngam lo va a tim zawnga hriam kan lek dawn a nih chuan tunah hian hunṭha kan neih lai hian let leh ta mai zawk ila an tih chuan an ngawi ta ṭhap a.


Chutah Saia chuan a ṭha e. Pialrala kan unaute khian kan che vel min lo thlir reng dawn a, an duhthusam lah kan hai lo e. An duh thusam ang ngei in aw niang tiin an melh kuala, midangho chuan Saia chu melh ding ngar chung hian an chengreng chu an han beng thak thak hlawm a.



DUH TAWK ANG.