PÛMAH MI LU. BUNG 37- NA.

PÛMAH MI LU.


BUNG 37- NA.



Khuafo pasalṭha Tinkuala chuan Thantlang lal fanu  hmelṭha chu thlir nin har ti zetin bet lo zet hian a vaibel an pak khu tual tual a. Tap lama ngawi renga ṭhu, a nu kianga bang nghenga ṭhu lal fanu chu a va thlek leh zawk ṭhin. Lal fanu pawh chuan Khuafo pasalṭha chu a haw bik hauh lo.




Lal fanu Thangpuii chuan a bula ṭhu a ni leh Khuafo lal fanu hmrlṭha chu hlim hmel pu sarh chung hian an be seuh seuh reuh a. Chutia a nuih zawnga a biangsum lo lang leh kalh ṭhin te chuan Khuafo pasalṭha mit chuan changdang reng a kan thei lo chu a ni e.



Khuafo lalpa chuan, hei naktip mai hian kan khawlam panzai kan rel dawnta reng chu a nia. Thangpuii pa," min mamawhna a awm phawt chuan ka lakah inthlahrung hauh lo u la," a ṭul dan ang zelin hma kan la dun ang chu. Nangni Lusei nen hian inrem taka awm hi ka duh a, kawng engkimah inban tawnin ni tla tur i vuiliam ho ang u hmiang an ti a.



Thantlang lalpa chuan Khum hmelṭhai pa," ka laka i ngilneihna hi ka damchhungin ka rul seng ngai lo vang. I mi hriat angin he khua leh tuia rorel ve mai hi ka nia. Nang leh kei hi pasalṭhate hlutzia hrechiangtute kan nih ngei ka ring. Mang lam pawha kan mangphak ngai loh chhiatna tapthlak tak in min han man takah chuan ngaiawh thei a chha pawh kan awm lo zu nia.



Ka mi leh sa ten pialral aṭangin min rawn thlir renga kan lakah phut an neih pawh kan la hlenchhuak thei lo chu a ni e. Thlasik vawihnih vel han hmachhawn leh ila, ka pasalṭhate hian hmalam pan turin inbuatsaihna hun thawl pawh an nei mahna tiin an sawi chhuak zawk a.



Khuafo lalpa chuan chumi hun a lo thlen hunah chuan ka pasalṭhate hian i pasalṭhate an rawn zui ang. Chutih rual erawh chuan hei hi hre tel bawk la ka duh asin an ti a, Thantlang lalpa chuan a eng chu maw tiin an zawt ha a.



Khuafo lalpa chuan, dam hauhin khawnuam tak khawthar in din tawh a. I khua leh tuia chengten nunthar nen nunphung tharin hunbi an chhiar mek laia phuba lak duhna thinlung i pu hi dah bo rih la ka duh a ni. Mihringte chin hriat loh karah hian tu ber hian nge pialral kawng zawh leh dawn?



Hei hi ngun takin lo ngaithla la, ka fanu avanga harsatna ka tawh hnemzia hi a tun min hriatpui hlei lo"ng nge. Chuti chung chung pawhin leido nei lo hram hram turin ankanem ka ka aṭangin ka chhuah a, hei hi ka hlauh vang a ni lo a, ka khua leh tuia chengte hlimna ka duh vang zawk a ni an ti a.



Thantlang lalpa chuan a upa ruatthar, Sawia leh Thlahtea chu an melh zawk a. Lalpa chuan chungthuah chuan rilru hi a lo kal thui ve hle tawh asin. Ka upa te thu leh hla vuak thlak danin a hril zel ang chu an ti sap a. Sawia chuan ti hian a lo sawi a. Lalpa Khuafo lalpa sawi kha ka ril rem zawng tak a ni.



Leido nei thei dinhmunah pawh kan la ding loh kara rawlrala che chhuak tur chuan tu nu leh pa in nge an fapa chin hriat loh a tirliam phal ang le? Kan pasalṭhate chuan lalpa i thu leh hla a kawi a ngil in an zawm ngei ang. Nunna hi a hlu a tuma pek theih a ni lo. Tunah khawthar kan luah tir chauh a, chutah i khua leh tuia chengte thinlungah thlamuana kawng a in hawng ve ṭan dawn ek ek a, Lusei leh Pawi leh Paite kar cheh khua kan nih hi kan vawng reng a ngai a ni.



Chutih rual erawh chuan lal fing leh remhria, a ngaihna hria kan nei che hi khaw vannei ber kan ni asin. Lalpa," i thutlukna erawh a kawi a ngila zawm tur kan ni e an ti a. Lalpa chu ngawi vung vungin a hnuah ti hian a rawn sawi chhuak a.



Chung thuah chuan in thu ni rawh se. A mah erawh chu khaw khat lal ve meuh, Lusei khuaa a mala an cho phak loh hian phuba la thei lo a ka hun hnuhnung ka hmang tur erawh kumkhuain ka in  thiam tawh ngai lo vang. Ka thinlunga ser hliam an tuh hian dam ni a nei hauh lo vang. Ka upa te thu erawh ka hnial tihna ni lo se. Luaei lal tlang chang ve meuh do rawna awmin mahni pian leh murna rauh san in khawthar kan kai a, tunah ni se, kualthang pasalṭha unau leh an pa te ka kawl cheu a, a tawlh zawnga ṭawngkau in chheh tlat chuan in thu ni rawh se tiin a rilru a la dam loh thu chu an chhak chhuak a.




Thlahtea chuan lalpa, i dinhmunah khan ding ve ta i la tuna i sawi tur ang tho kha ka sawi ngei ang. Kan lal i ni a, i kam chhuak reng rwng hi hnial tur kan ni lo ve. Tunah pawh , englai pawh in Thantlang, Murlen leh Mualnuam khua te hi rikrap turin kan pasalṭhate hi an in peih reng e an ti let sak a.




Lalpa chuan Saitea te unau kha tlangaupa zu ko teh khai, tin Thlahlova leh Biakbuka khan kan rorel lo ṭawm bawk se. Lunga khan ka lalin lo pan tel bawk se an ti a.



Tuibur hmuamda awm vel ah chuan lalin chu mihrangval panga te chuan rawn chuangkaiin lalin chu an han mawi a. Lalpa chuan an thu leh hla te an han hrilh chian hnuah chuan,Saia chuan lalpa," ka rin phak loh thu in min deng ta tlat mai ka ti. I khua leh tuite thinlunga natna tuhtu te ho bei let tur hian i kam chhuak kan lo ngai chang reng asin.



Pialrala kan unaute sianglawi te thlarau pawh a zahawm em em laia, muang taka hun kan lo hman hian ka ni hman a ti ṭhuanawp fo ṭhin an ti a.


Zinga chuan lalpa," ka u sawi tak ang kuan," chhun a ni em maw, zan a ni em maw, pawh ni  se, tiang hun hi nghakhlel takin kan lo thlir reng ṭhin. Thantlang lal huaisen tak kha a thi tawh a ka ngaih kha a lo nung leh ta, nuih sak pah hian an ni khawthum saw engtianga bei turin nge min duh le? An ti chhuak chhak a.




Lalpa chu a hmela hlimna eng lo lang chhuak nghal in kut an beng te te a, chutah ti hian thu an chhak chhuak a.



Ka pasalṭhate u ral leh sahrang hmaah in ke hniak in hnutchhiah a, hmalam pan in in kal zel tih ka hria, Vauthla a rawn in herchhuak dawn a, in tana hun ṭha a ni e. Thla dinglama Arsi lan hun kan nghak ang nga, nangni panga hian intuaihriam tharna hun ṭha ni thum hun nei ula, chutah tawlhlohpuan bat chungin kan unaute tan ke in pen dawn nia an ti rum al a.



Khuafo lalpa chuan chutianga in tum rau rau a nih chuan Tinkuala hian a zui ang che u. Tin lalpa i pasalṭhate thang hlana i khua lo venghim turin Thlatinkual leh a naute tlangval sawmhnih hian i khua lo luah lum tel se. Khuangphah lalpa pawh hrilh hriat ni se. A chhan chu khawthar dintir in ni a, englai pawha ral lo lut thei reng an ni. Tun hmahun hriat va ni suh, ka thu erawh i zawm ka beisei an ti a.



Lalpa chuan ka khua leh tui chungs i inpekna hi a va ropui em' ka upate pahnih hi kan khawhluia kan inbengbel lai khan khualthang pasalṭhate an ni a, an ni pawh hian ka khua leh tuite chu an veng him em em an tih ka ring, chutih rual erawh chuan kan chheh vel khuate pura chaw kaw puar la phang lo mai mai kan ni a, chungah chuan i tlangvalte leh i pasalṭhate buh changrum leh sa in kan hraipuar theih meuh dawn lo va, khuanu hian kan chungah zah a la ngai ve chek ang chu an ti chhuak a.



Khuafo lalpa chuan chung thuah chuan phang hauh suh ang che. Kei Khuafo lalpa hian ka tiam a che. I pasalṭhate thang hlan na na na chuan buh leh balah in phang hauh lo vang an tih chuan Saiate chu nithum hun ṭha pek ni in a ni li naah an Leido te khaw lam pan turin an in buatsaih dawn ta a.



Lalin chhunga lal fanu pahnih in an pate ve ve leh an pasalṭhate thu kam vuak thlak dan an hriat chuan hlauhthawna chuan an taksa chu a rawn man nghal vat a. Mualtinkhumi chuan thinrim ru tak si, mite hmuh hlau tak mai chuan Zinga chu thip zet in an melh nghek mai a. Zinga chuan lo hrethiam in a mah chhan  nan lalpa lam en pah chuan lalpa, tumah hi kan inchan belh lo vang. Hnehna hlado nen ṭek khamphei awrawl kan chhuah ngei ang.




Ral lak thil hlu nen khua hi kan lo lawi lut ang nga kawtchhuahah min lo hmuak dawn nia an ti a.



Leng len ar a rawn khuang al al a, lalpa chuan a rorel ti rawp nghalin Zinga leh Biakbuka leh Lunga leh Tinkuala, Thlahlova te chuan lalin an chhuahsan a.



Sawia chuan a phawk chhuahin Khuafo lal fanu hmelṭha chu bia in ka fanu lo hnai teh le. Hei kan hriat ṭheuh angin ka fapa chu mipa tak tak a lo ni ve ta reng mai a, Saitea nu nen a kan hunliam hnu te pawh min ngaih chhuahtir rum rum a lawm maw le. Tiin lal chhuat laia zutui tling chu an khiat khawlh khawlh a.



Lalpa lukai tawh pawh rawn phur tharin chuti ang nga vanglai liamhnu in koh kor leh a hnu, far thing buk hnuaia chemtei nu mitmeng pawisawi loh zia te kha aw, lengi dang laka a thithuchhiat luat ah lengi dang runsang pawh kan kai pha lo kha a nia an tih chuan lalnu lah lo duai lo.



E he heu, a chuti zawng chuan maw? Min neih loh hlaua ka thingphur tur min zui ni tin kha a ni lawm ni? an tih chuan an nui ho dar dar a.




Khuafo lalpa leh a fanu te chuan an khua pawh thleng leh tawhin lal fanu chuan Thlaeng hnuaiha an leihkapuia ṭhut pah chuan Thlaeng tak chu an thlir a.  A pum che leh ralh ṭhin chu melh zawk pahin an dawm vang vang a, chutah nuih sak pah hian a pum chhunga naute nakin lawka lo piang mai tur chu bia in, pasalṭha huaisen ni la, khuatin thang pasalṭha ralhrat leh hmelmawi tak ni ang che. Hmeichhia i nih erawh chuan khuatin thang hat khawpa hmel duhawm lo ni la, khuanu malsawmna dawngin dam hauh reng ang che an ti sap a.




Thla dinglama Arsi mawi tak chu Mihrangval paruk, rawlrala che tur che chuan dak meuhin an thlir a. A tuk maia che chhuak tur an nih vangin eng emaw tak hian an thinlungah mawlhtu awm tlat hian an in hre ṭheuh hlawm a.



Duhtawk ang.