PÛMAH MI LU. BUNG 27- NA.

PÛMAH MI LU

BUNG 27- NA.


Thantlang lalin chhung chu a reh ruih mai a, lalpa chuan Lentlang lal fanu chu en kal chung hian, chemte," i pa te ruahmanna  hi tiang a nih si chuan pawisawi lo tam takin kan tawrh phah dawn a nih hi. Chutih rual erawh chuan lal thisen kai i nihna erawh ka khua leh tui te hian i chungah zah an ngai ngei ang. Kei chuan mahni luseipuite laka hriam lek hi ka duh ngai lo va, mahni khawchhan nan erawh ka hriam lek ngei a ngai ve dawn a nih hi an ti a.



A fanu chuan ka pa," a hnual zawngin ṭawngkau an chhep ngai lo ve". I pasalṭhate hi khuanun a hual bik riau a, keizawng thil thleng tur hi a nih dan ang ang in thleng thuai se ka lo ti zawk asin. Chutih rual erawh chuan tia nuih sakin a bula Lentlang lal fanu chu melh zawk pah hian khuanu hian unaunu min pe ah ka thinlung hian a pawm hmiah asin an ti a.



Lentlang lal fanu chuan Thantlang lal chhungkua leh a aia kum upa hret lal fanu hmelṭha ve zet thinlung thianghlim zia an hriat chuan a pa rorel dan leh a nuṭapa hem thlak dan chuan a ti zak chem chem a.



Tlangaupa a lo thlen chuan tlangaupa chuan lalpa," hun tam zawk kan neih theih nan tunah hian i thlangvalte leh i pasalṭha te chuan ko kim takin Sawiluaia te inah rorel an ṭan ta mai tih hi ka rawn hrilh pah che a ni an tih chuan lalpa chu ngawih vung vung pah hian, zawi sap hian a banglaia a kawlhnam hnum hlarh chu melh kul chung hian a hun a thleng dawn ta. Zawlbuk lama insuan phei turin zu hrilh leh ta la, ka hoin rorel kan ṭan ang an ti chang fak a.




Pasalṭha huaisen, ral leh sahrang hmaa zam ngai lo valrual te chu ko kim takin zawlbuk an mawi kim ṭhap a. Mahni khawchhan nana hlauhawm awmzia hrelote thukhel chu a ro rum in hringnun kalsiam danglam tak mai chuan nun hlut zia pai mahse awmzia a neih tam tir lo kher mai le.



An dam ni kum thui tura an lo suangtuahna pialral chuan a thei fa leh kei ka ni inti chinte kalzai chu engtin tak tidang lam ang maw? Chhumdum chhah takin thla bial ṭantir chu a kal hliah riai riai a, mahni lung D te runsang kai lam a lang lo, khuanu malsawmna dawng chho zelin fanau maltuanchawia duh thusam sam zai reng an rel si lo.


Mahni pasal duhlai te, an fapa an hmangaih em em ten ral rel an han ṭan meuh chuan chhungkaw nu thinling ṭap in a rum e. Khuanu a hualhim em ang chu maw tiin tap hmunah duhthu an sam. Hei hi emni khuanu temruat dan chu?




Zan a ni a, zan reh tak leh vawt ru tak kara Zawlbuk, zan dang ai maha thawm zawi hnuaiah chuan mei eng zandang ai mahin a langsar a. Thantlang lengi runsang lah a rehin nui hlim thawm reng chhuak tur a awm lo ve. Thantlang nula hmelṭha Saihmingliana D inah chuan Biakbuka leh Neihlaia chuan ti ti tui lo ru tak mai hian an han vawrh ve zauh a, an boruak tih daih tum tak mai hian.



Biakbuka chuan," a rilrua a pai ruk reng chu sawi chhuak phawng hian," kan boruak chuan lusei khaw lana khua hrang hrang hi a deng chhuak tawh ngei ang le. Kan pasalṭhate hian rem an tih ngat chuan ral hmatawngah tel ngei ka duh a ni an ti ve fak fak a. Chullovi chuan ui Biakbuk," i ṭawngka chhuak khan ka thuaah zu man tlata maw le. Khuanu hian min venghim em ang chu maw anti chuai raih a.



Neihlaia chuan rumal chung hian, kan khua hian pasalṭha kut thliah tham kan kawl ve bawk e. An ni khawthum ṭangrual pawh ni raw sek sek, keizawng ka zam bik hauh lo mai. Saihminglianate unau kan nei ve bawk e. An ni unau inkawp a ral an han bei tur hi asin ka hmuh chak ni.



Chutah an kianga dingreng Zathanga, Biakchhawna, Lianhrima kan la kawl cheu e. U Zazawna leh U Bengkaia kan la kawl, pem pasalṭha Pa Sawiluaia leh Pa Thlahtea, Pa Thangkunga kan la kawl cheu, an ni pathum hi Saia te unau hian an awl hneh em vanga tap lam tap deuh an ni mai a, tlangkam aṭanga an sawidanah phei chuan an tlangrel a sual ngai lo ve. An ni pahnih saw an ti e an ti siam siam a.



He indona rapthlak tak lo chhuak tur hian Lusei khaw hrang hrang zin vei vak ka aṭangin a thang chhuak hneh kher mai le. Ralvawn  lalinah ve thung chuan lalpa chuan a pasalṭha brk samzial pahnih Dozarem leh Sinanga chu melh kul chung hian ka makpa te chhungkua hi an him ngei tur a ni. Lusei leh Lusei in harlaknaah hian ka buai hauh lo. Kei chuan ka fanu chhungte hi him dam taka an,awm ka duh e.




Ka tlangval sawmhnih ho ula, Thantlang khuate a ṭul dan ang zelin in pui dawn nia. Ka tupa te hmel pawh ka la hmu lo ve. Tlangkam aṭanga tupa pasalṭha ka neih thu chiah hi thu chauh a hriat ka duh lo ve. Ka mit a chhin hma ngeia hmuh ka duh a ni an ti fak fak a.



Dozarem chuan lalpa," i thu ang ni rawh se." Thei tawp kan han chhuah a ni ang chu. Chutih rual erawh chuan ṭiau lui kana Mual arh lam kan pan a ngai dawn a, hun erawh kan duh deuh a ngai ang. Kawng awlsam tak a ni dawn hauh lo va, lalpa, " i fanu pawn a nau hi a la hmu bik hauh lova Liangeuha hi kan kiangah tel ve se tiin tap lama an thurel ngawi ngala lo ngaithla khiau tu tlangval tuai tir te, kum sawm leh paruk mi lek, Sawiluaia nupui nau, a hmel a a u Kawizingi phawk fuh em em an khaw pasalṭhate pahnih hian a ruka a nungchang an lo zirchian mek, tlangval hmelṭha tak, sa inphut mawi tawk tak, mitmeng fiah kak leh hnar ngul sang vah chu an melh zauh a.



Lalpa chuan ka pasalṭhate changrel ka hnial hauh lo vang an tih chuan Liangeuha chu ding chhuak nghal zat in ka pa ka lawm e anti sap a. Lalpa chuan fimkhurna kha va hloh ngai suh ang che. Ka thachhang dawltu tur i ni tih hi vawng reng ang che an ti a.



Lalnu chuan ka fapa," kan pasalṭhate hnungzui tur em chuan i ruh a la no mah mah a ni. Tiin hlauhthawn rukna a thinlunga a pai chu an chhak chhuak zoh a. Lalpa chuan, khaih khaih khaih, Chemtei nu," tlangval a ni ve tawh e. Ka pasalṭhate thlazarna hnuaiah a him em em ang. Tupa ralhrat khawkheng pahnih i nei alawm tiin han hnem ve mah se, nu thinlung chhungril aṭanga chhuak hlauhthawnna chu a bo tak tak chuang hlei lo va.



Thantlang lalpa chuan zawlbuk reh ruih hnuaiah chuan kan khaw dinhmun derthawn zia in hai lo ve. Thingse mual leh Tumtluk mual lam leh Tuikhur mual ah kan inzarpharh anga, ral lo lut tur kan lo dang chat ang. Khaw mipui nu nau leh tar chak lo ho hi tlangchhip Sele mualah kan thukru vek ang nga, in tin ten mahni kham khawp tur ṭheuh faisa paipawn chhuah ni se. Tlangchhip ah ni thum leh zan thum tal hun an hmang a ngai dawn avangin kan tlangval sawmhnih rualin veng se. Mei rim a na lo thei ang bera an chhuah a ṭul bawk ang tiin ro rel an ti tawp nghal a.




Murlen khua chu a rik hian a ri hulh hulh a, khawlaiah phei chuan khual tlangval leh khawtualmi te chu insulpel zut zut in Thantlang khua an run tur chu an phur hle hlawm mai a. Chutih rual erawh chuan Ralvawn mihrangvalte hi an thinlungah rin luhna chang an hre hauh lo.  Ralvawn lal fapa ralhrat leh ral beih thiam khawkheng mihrangval thar lo chhuak tur hmaah leh Saihmingliana te unau hmaah an nun hlu tak an chan dawn a ni tih hi an chhui phak mawlh si lo.



Murlen makpa Tuaka lahin famkhua a lawi dawn a ni tih reng hre lovin hneh saah in ngaiin a khi hui reng a. Pasalṭha kei ka ni inti chin ten thiangzau zan chu am taka hmangin dai hnaiah Murlen nula te chu an zen awl lo va.



Zing nichhuak engmawi tak chuan Thantlang khaw chhung chu a chhun eng phut mai a, Sawia ho chuan khaw mipui nunau tar chak lo ho awmna tur chu Tlangchhip Sele mual chu samfai hnatlang neiin duhtawk an han ngah hnu chuan khaw lam panzai an rel a. Ralkai thei chin zawngte chuan an hriam hmanthiam te chu hrufaiin ral lo thleng mai thei turte chu hmachhawn in peih at in hma an lo la ve mek bawk a.



Tuikhur lamah ve thung chuan Saia leh a ṭhiante chuan thu khun khan tak an han rel ve mek bawk a.



Saia chuan," kan hmaah hian inbeihna sosang tak a chhuak dawna tumah inphatsan awih loh." Murlen lal makpa saw ka chanpual a ni a, tin pasalṭha,engzah nge kan hmachhawn dawn tih lah hriat ni suh. An chezia zirchiang hmasa lo in pawng basa ngam vanga bawh tur a ni dawn hauh lo. Tun hi kan tan hunṭha a ni a, hetia a ruka nunchan kan lo zir hona hi a hman chhuahna hun tur diktak a lo in her chhuak dawn ta a, tuman fimkhurna hloh hauh lo tur a ni ang.



Kan chet a pheh pawn ṭan ral raih mai tur. Kan u te thu ngaichangin kan beng kan chhi kar ang a, ṭul loah tuman ngenmu sen ral loh tur. Hei indona hi mahni khaw chhan nan, kan chhungte tana bei tur kan nih ang ngeiin kan hmaa ral awm a piang dim hauh loh tur an ti fak fak a.



Saizingliana leh a ṭhiante ve thung chu thli lo thleng tur pawh ngaihtuah lek lo ang mai hian hlim tak mai hian lalin lam an han pan chhat chhat a.



Lalin an han thlen chuan Biakbuka chuan lalpa i lalin ah kan lo lut thei a ngem an tih chuan lalpa chuan aw hawi lo lut rawh u khai, ka tlangval huaisente lah ni reng cheu chuan tiin thiam takin a lo lawm a. Lalpa chuan eng thu leh hla kenga lo kal nge in nih le tiin an lo zawt a. Biakbuka chuan lalpa, kan lal fanu hmelṭha zet zing tho hmai phang hi hmuh kan chak mai mai maw le an ti zauh chu lalin chhunga awmho chu an khi hui ringawt a.



Lalnu chuan kan Biakbuka tak hi chu aw, i piang lo vang tih hi ka hlau hle mai tiin a bengah an pawt zauh a. Biakbuka lah pek zam lo, lalnu zahawm, " Lalpa khua leh tui ni tura ka lo piang chhuak hi vannei ka inti asin," lalpa," hetia inthlahrung hauh lo va i lalna inchhung ropui taka zalen taka ka lo chuangkai chhan chu i khua leh tui tana ralbeihnaa ka vawikhat tellna tur a nih vanga lawmthu hrilh tur che a lo kal ka ni an ti sap a.



Saizingliana chuan a ṭhianpa Biakbuka chu melh ru relh relh chung hian kan ṭhiana hian a hun tawp lam a hnaih tawh a ni tih chu a thinlung chuan a pawm hmiah a, tiang em em a a hmela hlim hmel leh lal chhungkuaa a tlak nel lai reng reng a hre si lo. Lalpa chuan aw hawi," a chuti zawng chuan maw? In lal tlaktlai lo tak laka in rinawmna hi khuanu pawn a zah sak ngei ang che u tiin hlim takin an nuih sak a.



Kil khata Lentlang lal fanu chuan Saihmingliana nau Saizingliana chu melh kal chung hian a rilru te te chuan hmelma en hian a en thei hlawl lo chu a ni. Ti khawp khan an khaw tan a hnawksak a.



Saizingliana chuan lalpa," kei leh ka ṭhiante nen hian Tumtluk mual lama chankhan khu zu zirchian kan han tum a, i thu hmu hmasa lova chet lak kan hreh deuh a ni," an ti a. Lalpa chuan a nih chu maw le. Nang zawng i rilru a fingin khuanu hian a hual bik che,a, zu fimkhur ula tunah pawh hian kan khua hi enthlak reng pawh a lo ni mai thei a nia tiin thu an pawt chat a.



Duh tawk ang.


Nizan Chaltlang veng cheiah ka lam nasa lutuk.