PÛMAH MI LU. BUNG 28- NA

PÛMAH MI LU.

BUNG 28- NA.


Thantlang lalin aṭanga Saizingliana te ṭhiandun an chhuah hnu chuan lalpa chuan a nupui chu en ha chung hian an ni unau zet hi zawng ka khua leh tui ni tur hian ka rin lut sual lo ve. Thlahtubul erawh hre hauh lo mah ila a pa an khum hle in ka hria an tih chuan lalnu pawh chuan khuanu hian a ven bik mibik nihna an pai tlat a, i khua leh tui muantu atana an ni unau baka awh hi an awm lo ve tiin an lo tui hnih ve a.



Lalpa bawk chuan kan Biakbuka ṭawngka hlah dan lah chuan ngaih lam lam te pawh a ti ṭha lo mang teh e. Kumin vaihlo zet hi zawng kum dang zu tluk lo tlata kan hriat chu le, min han lak kai sak ta che chemtei nu tiin an tir nghal zat a.



Ṭek den kawn an thlen thlak thlak chuan Biakbuka chuan Zinga," thlang kawl sei chamdur lam saw hawi mah teh, chhimbal zam raih lam chu an kawk va a, Zinga chuan khawṭha tur in mung ṭan in kawrruam a vel a nih saw, sawlai ram hring ngulh te saw nakin lawka kan ramchuanna hmun tur a nih saw, dam hauh la, dam rrng turin bei ang che an ti sap a.



Biakbuka chuan kan thudang alai chuan Siamkungi hi i belchiang ve tawh reng reng em? Nula ti tau rawn pu chho ṭanin khual a la kai khawp ang le tiin hmelṭha a tih thu chu an sawi zauh a. Zinga chuan belchiang em em hran lem nang. Mi sawi erawh ka hre leh zauh ṭhin a, Vanzau lal fanu chhuankite iang phak reng an awm lo ve tiin an nui hak a.


Murlen lalin ah ve thung chuan lalpa chuan khawthum pasalṭha rual ṭhiau pasarih te chu zu a khawn pui a, chutah ti hian thu an sawi dap dap a. Thantlang khua leh tuia chengte sawn ka rah chin a piang ka pasalṭhate tuallenna tur a ni tih hi an thinlunga an vawng reng theih nan chet in thawh naah pawh tim hauh suh ang che u.



Naktuk varṭianah in chhuak ang nga, ka makpa thu leh hla hi in kallai khan in ngaichang dawn nia, Mualnuam pasalṭhate leh Lentlang pasalṭhate hian silai fung zat leh zat in an insem ang nga, keini lamin ro thil hlu kan chang thung ang. Sal in kaih te lrh an ran rual te pawh zat leh zat in in sem thei ang an tih chuan an thu a in hmu tlang bawka an lu an bu nghat nghat hlawm a.



Ralvawn pasalṭha ralhrat Dozarem leh Sinanga te chuan a naute ho chu Thantlang khaw lam hawiin ke an rawn penpui ve mek bawk a.


Chutih rualin lusei leh lusei thihngsm lu pu a in nuai tur thawm chuan Lusei tlang hrang hrang changte lal beng leh an pasalṭhate beng a verh hle mai a. Chung zingah chuan awmhle hle thiam map lo, lal pawn tihngaihna vak a hriat loh Hmunhlui pasalṭha Kawlzika chuan lalpa," hei hi kan tana hun remchang tak a ni dawn a," an ni inbeih lai chu pelpawl tlang aṭangin kan thlir ang nga, an ni khawthum ṭangrual zet zawng Thantlang khua te tan lo dan ngaihna a awm dawn hauh lova, tu emaw zawk zawk pawh an in hloh nual ang nga chutah keini an rilru kalbuai lai takin kan tlazep ve nghal ang nga lalpa lusei lal ram hrang hranga hausa ber i ni mai dawn asin an ti a.



Lal Lengdaia chuan ka pasalṭha nge nge i thu a fing in beng lah a ti tlai narawh e. Chutih rual erawh chuan ṭul loah in lu in va hloh ve thei tho tih kha i chhut tel ve ang chu maw? An ni buainaa ring rawlh ve hi ka duh hauh lo na chungin nangber ka khaw daingulin an chak lohna lai zu man i tum tlat a hnu dan ka tum hauh lo che.



Chutih rual erawh chuan Thantlang khuaa Sawiluaia leh Thlahtea pem thu khan i beng a luh ve chek ang chu maw? Thantlang khuate hi an mahni maia an ṭan bik ring hauh suh ang che. Fanai pawih lal fanu pasal hi Sawiluaia a ni tih hi i thinlung khan vawng reng ang che an ti a.



Kawlzika chuan nuih hak pah hian lalpa," a uai thla lam an ni tawh a," kan lak ah chuan satel pawh a la rang zaw phian ang chu maw le tiin lal zupui tui tling eng nguk chu an leh nawn leh sak a.



Lalpa chuan khual pang zin thu thang aṭang chuan thlabial zan velah Thantlang khua hi an pan dawn niin ka lo hriaa, chutianga inrawlh ve i duh a hnu naktuk varṭianah chhuak mai ula, hei erawh hrereng ang che. Ka thu ni lovin i thua chhuak tur in ni tih hi an ti chang fak a. Kawlzika chuan lalpa lo ngai tal rawh hausakna namen loin i vangkhua hi kan lo lawi lut ngei ang tiin pai chhan chhan chungin lalin chu a chhuah san a.



Thantlang khua te pawh an in peih at ta. Tlangval ralkai thei chin zawngte chuan mau hlamkhat leh tawng chen vel a hmawr suih zum ve ve in tam tham tak ral lo luh theihna awmah chuan an chhek ṭeuh mai a.



Dozarem leh Sinanga te pawh chuan Ṭiau luitui kang ngai lo chu harsa taka rawn daikaiin Murlen ram valh chin an rawn dai lut ta. Hmar lam aṭanga helin Thantlang khua chu an panding nghal nal nal a.



Thantlang zawlbuk pawh a rik hian a ri hulh hulh reng mai a. Saihmingliana chuan zawisap hian Chullo," hlauthawng mahta che". Khuanu in hun a tih hunah chuan pialral ka lawi bik nang. Thantlang khaw tana ke ka pen thei hi min lawmpui tur zawk asin an ti thawp sat a.


Chullovi chuan mipa ngaihtuahna ringawt hi hmeichhe awmnem tan chuan a tawk zo lo fo ṭhin. Ngaihtuah pakhat in neih lai khan keini hmeichhia te chuan ngsihtuahna tamtak sengin hun kan hmang ṭhin asin. Ral laka lo chesual ta la an ti leh a. Saia chuan hunin a hrilh ang chu tiin far thing buk hnuaia a sam thlaeng in a rawn chhun tlet sat sat chu an chul sak heuh heuh a.



Chullovi chuan mi hi i ngaihtuah ngai ve miah na nge? Nge, khawdang nula lakah i thinlung kha a riak zawk le an ti ha a, Saia chuan chutiang ngaihtuahna chu tuibur hmuamda chhung leh pawh ka la seng ngai lo. Nang i awm a tunah ka kiangah i awm reng a, ral an lo luh hunah pawh nang nula huaisen chuan tar chak lo leh nu naute i thlamuan tur a ni ang an ti a.


Chullovi chuan a sawi hi a awlsam ṭhin viau a, a taka han tih dawn hi chuan aikaihna hian mihring taksa hi a man leh mai ṭhin. Nangpawh fimkhur ang che. A chhe ber ka dawn lo thei si lo va, i tellova hringnun hman ka duh lo a ni tiin an kuah nghet zual sauh a.



Saia chuan khuanu hian min la hualhim zel,ang nga, hliam takin ka kiangah i awm zel dawn alawm, a ṭha lam kawngin thil hi thlir ṭhin ang che. Tiin a nauṭam per bawih khawp chuan an kuah nghet a. Chullovi chuan mipaho tak hi chu aw. Saia," tiang em em hian ka lo hmangaih ang che tih pawh hi ka hre lo asin, ral lakah vanduaiah lo ṭang ta la an ti leh sap a.



Saia chuan hunin a hril ang chu ka lo vanduai ta a nih chuan pialralah tal i fa te chetla ka lo thlir ṭhin dawn nia an ti zauh a. Chullovi chuan nang chan che a pasaldang neih ai chuan tarkum thlenga leng pawh ka thlang ngang nge. Chu lovah an ti zauh a, Saia chuan chu lovah chu eng nge an ti leh a.  Chullovi chuan engmah tiin an nghel talh talh a. Saia chuan chutia leng rei i tum te chuan chin hriat ni si lo a leh, thisena kan induih tlat theih nang inhriatrengnan aw an ti sap a.


Chullovi chuan, a hun hmaa lo thlentir hian kawngro a su kaw kher lo asin an ti sap a. Saia chuan ral hmachhawn tur ka ni a, pialral lo kai ta ila, i mi hriatrengna ata a ni tel in a bo ngei ang an ti leh a.



Chullovi chuan chu chu alawm ka hlauh. Ka hmangaih che a ka hmangaih kumkhua bawk ang che. Ka engkim hi i ta a ni a keia hnial tur che i ni lo. I duhthusam tipuitling turin ka in peih e an tih chuan Saia chuan a hmangaih Thantlang khaw nula hmelṭha chhuanvawr chu an kuai mu riai riai a, fan ngai loh ram fangin hmangiahna ṭawngka maia suihzawm chu a nghet ti tawk lo ve ve in thisen ngeiin an in hmangaihna chu an suhizawm ta.



Chullovi bianga mittui lo luang chhuak ngiai ngiai chu Saia chuan duat taka a kut hrawl puia hruk sakin ka hmangaih che. Ka tan khuanu hnenah lo dil la, kei pawn dam hauh ka lo tum ang tiin Chullovi puan bih la insiam ṭha mang si lo kara a mal nalh tak chu an zut sak heuh heuh a.



Chullovi chuan ka thianghlimna leh ka pasal tana ka mothuam chhawm ṭha ber chu i kawl ta a, lengi runsang dang minkaisan chuan ka mittui luang te hian kir an rel ngai lo vang tiin zawite in khur ru deuh dar dar chung chuan thisen thianghlim tak a mal a kai chu a kut zungṭang chuan an zu khawih zauh a.



Chullovi chuan a kut chu lek kangin hei hian nula thianghlim ka nih zia i lakah a finfiah a, pialral hnulam thleng pawhin ka hmangaihna che hian a umzui reng tawh ang che. Huaisen takin ral bei la pasalṭha, mi tlawm tawh hnu lakah i hriam lek suh ang che. Chu chu hmangaihtu che thupek a ni a vawng tlat ang che aw tiin an kuah chial a.



Duh tawk ang aw.