THIH NGAM LU PU TEN HMALAM AN PAN. BUNG 1 NA

THIH NGAM LU PU TEN HMALAM AN PAN

BUNG 1 NA.


Thla bial zan a ni a, Lengi run kai tlangvalte'n an nula rim ngaihtuah chang lek lovin lengi te run leikapuiah thlaeng lawm in hlim zai an vawr. Lal Darkhuma chuan a leikapui aṭang chuan a Lalna khua chu an thlir vang vang a, Tlangaupa khawmaw thla eng lawm nan lu kai chhalhin ka thlathum bela a tui tling ngei mai kha kamsir liam khawpin in inleh chhawk ang u hmiang, lung lam lam te pawh a leng dawn dawn a lawm maw le, Laihnuni pa(Berema) lam hawi chuan an khi hui a.


Khawnbawl upa Berema chuan an Lalpa chu chik zet in an melh leh khai khai ṭhin, a thinlunga helh liantak a hmel hmaia lang chhuak chu a Khawnbawl upa mit fing zet chuan a hmuh hmaih hauh lo mai. Duh ni se, an Lalpa hian Pasalṭha chhuan tawlawl pathum lai a kawl ve a,  Khamsang khaw in nghahna Pathumte hi Lusei Lalna khaw hrang hrang Pasalṭha te aiin an nep bik chuang hlei lo'ng nge.

Lalpa chuan a upa min chu melh zauh pah hian hei kumin chu kum ṭhat kum ah puang ila, Kan khaw ram hauhnan ka pasalṭhate tirin natip nakthai hian Perh va tar se a ṭha mai ang a an tih chuan Berema chuan Lalpa nang berin i tih te chuan a ṭhaah ngai i la, kan chi khur pawn kam lam a pan dawn dawna hriatna kan neih tlat chu le, zawlbuk ti ti aṭangin an tih chuan Lalpa chuan Laihnuni pa khaw khat lal ve meuh si, nek rawn theih a ka awm hi Lusei lal zawnga Lal vanduai ber nih ka fawmkem ta zu nia, tia sehchilh deuh rap rap a ṭawngin a mit meng leh a chezia aṭang chuan a lu a kai tawh a ni tih chu hai rual lah a ni lo awm e.


Lalin chhunga aṭanga Lalpa lo thlir rengtu nu lian ṭha thelh thawlh hmel nungsarh mai Khamsang Lalnu chuan Zokaii pa i vawi zing lulai mang teh e, duhtawk chin an nei ngai e an ti nem duai a, Lalpa chuan khik vung vung pah hian Laihnuni pa, Zokaii nu zet hi zawng engtik khap dai tihni reng a awm dawn lo a nih hi, nang zawng fanau enkawl thiam leh Pasalte zahder thiam i thlang thiam narawh e, an ti hlak a, Lalnu lah lo duai lo, Laihnuni pa te zawng, khap ngaiin khawsa ve hek lo i, mi zing zinga khap duh che khawpa â ka ni bik lo ve an tih chuan Berema chuan khaih khaih khaih, khaw nge hei zan te a rei lam lam tawh e, ṭinzai kan rel ta nge, Tlangaupa mawng hung ning zantin hmuh zawng a em em lutuk hlauh dah ang nge tiin an tho uiah a.


Lengi run kai te pawn khuan hnuhnung nghak bik lo leh Zawlbuk kai tlai bik nih hlau takin Zawlbuk lam an pan sang sang a. Zawlbuk tuala Val upa leh an khaw pasalṭha te zinga nupui la nei lo awmchhun Thangzika chuan an mei chhep alh de hlap hlap chu hnungpual chung chuan aiin ti ti an lo vawrh mek bawk a.


Thangzika

A hmela inchhuanna awm miah lo, cher ti dawn ila cher ni miah si lo, hang lam pawl lek lek, hna a thawkrim a ni tih hriat ngawih ngawih, mei eng kara a hmel hmai sen uk kharh, hnar ngul sang lampang mitmeng zim san, a taksa en aia a dar hlai fu si, a malpui vawng ṭha tak mai te chu a hnunglam aṭang ringawt pawn Zawlbuk lam pante chuan tu nge a nih tih an hre chiang hle a ni. Chu ai mah chuan a ṭawngka chhuak dam dap, a mi dip na ru hle si, a thinrim thei lo hial ang nga an chhal na te chuan mi ngainat rawn a hlawh hle nghe nghe a.


A rualpui te chuan fa pahnih thum nen chhangchhe taka chhungkua an din lai hian a ni ve thung chuan a kawngtui hmanna tur takngial pawh a hre lo a chha chu a ni e. A hmel hmai chhuan tur nei miah lo mahse, a huaisenna leh a remhriatnate, a ngil neihna leh a zaidamna te hian an khaw nula mitmei tawng ve fo mah se, a ngaihmelh ngai miah lo hian an bei a ti dawng hle nghe nghe a ni.


A chhan awm a lang ta ber chu veng hmawr lama awm, Hmeithai fapa a nih vang te pawh a ni mahna le. He tlangval mi dip na tak, ṭantlang Lasi te pawn zawl chak a an veh hel an veh hel hian engtiang chiah in nge Khamsang tan thih ngam lu pu a hmalam a pan dawn le? A pianna vangkhua hi meivapa chantir phallotu hian engtiang chiahin nge hmalam a pan dawn?


Thangzika mak na em em leh pakhat chu a rualpuite'n nupui fanau nei hlawm in inhrang chang thliah thliah mah se, a ni zawng a hmelhmai a kum upat lam ai mahin a danglam ve thei tlat lo lai tak hi a ni mi pawn mak an tih ṭhin fo chu.


Zan a ni a, zan reh tak a ni, Thangzika thawm hriatchhun lah perpawng chiri ri leh thereng hram ri chauh lo chu a bengah ri dang reng a awm lo, zan a rei tawlh tawlh, a harh tawlh rawlh, tuibur hmuamda awm velah chuan vengthlang aṭanga ui bauh ri lauh lauh chuan a beng a luh hneh hle mai a. An ngaithla zel a, Ui chu Zawlbuk lam pana rawn bauh chho zel in a ngaiṭha zan lo chuan  a awr fanin zawlbuk bawhbel an dak chho dak dak a.


Zan thlaeng hnuaia a mitmeng zim san fiah kak chuan Lalin kaiṭen rap mek thlaeng in a chhun Paihte Samzial pahnih pahnih Lalin luh tum te chu a va hmu ta chat reng a, a bula mu chu a ka hup nghsl vatin thawm chhuah lo turin an be ru sat sat a, Chutah zawlbuk thlanglam melh kual dan danin an khaw run tumte an ni lo tih a hriat chuan a bula mu tlangval chu zawi sap hian kal ta la, U Saikhama zu kaitho nghal ang che, Khual duhawm loh tak pahnih in kan Leilung an rap e i zu ti dawn nia tiin a tirliam nghal a.

Thangzika chuan A lukham Iptepui aṭanga a chempui hlai hlep hlawp chu phawrh in midang tih thawh hlau takin Bawhbel chu a bawhliam thuai a, Lalin lam a panding ve nghal a, Lalin sira thing eh awmna laiah chuan kal phei ṭhem ṭhem in Lalin chhungz ṭawng ṭhawm chu a hre ta vat reng a.


Paihtepa pakhat chuan Lalpa thawm chhuah suh ang che, i fanu hi kan Lal  Lengkhauchhan fapa Kamzarem tan zanin la la hian kan hawn dawn a ni, ti chuan kan chhiah khawn i Lalnaah hian a tawp bawk ang nga, ṭhi leh dar leh Sial leh Silai fawng 10 a pe bawk dawn che a ni an tih chuan Lalpa chuan haw vang vang ula In Lal hnenah chuan ti hian in lo sawi dawn nia, ka fanu hi in Lal fapa nupui atan ka phalloh thu hi in thlen dawn nia tih pah chuan a mitmeng fiah tak chuan a Lalin Bang dap a Thlaengin a chhun kal relh relh mihring hlim thla chu hmu in a chezia aṭang reng chuan a khaw daingul a tana a thinlungin a nemngheh Thanngzika a nih a ring ru nghal zat a.


Duhtawk ang aw.