MI LU LAK CHEM. BUNG 10&12 NA.

MI LU LAK CHEM
BUNG 10---12 NA.

Muantea Muantea Khiangte

Rokhuma chuan Kawlte, U cheu kan lawm hle mai, a chhe thei angber dawna ngaihtuahna mumal pu hman lek lo a, ka lo Arpui mitchhin laia mang lam pawh a ka man phak lek loh kara in hmai eng ka han hmu zet zawng, Vanzau Lalpa chuan min lo la hre ve reng a ni tih ka hriat hian in chungah leh kan Lalpa chungah lawmthu ka sawi mawlh mawlh ni se an ti dam diai a.
.

Cheua chuan khaih khaih, ti khan an tlak duah ngai lo, hei zingkhua te pawh a rawn var ṭan a chha chu a ni tawh si a, tah hian Tukṭhuan in rel nghal i la a ṭhat dawn hi, tlangval huaisen te u kan chawhmeh ken a piang kha hei changel ah hian han bun khawm ila thing ṭangro chhem tur i buaipui nghal ang u khai, Runther hei hi maw i farnu chu? A hmel lah chu Ramhnuai Lalnu ianga mawi a nih hi tiin an fak luam a.
.

Runthera mitmeng chik taka lo en kar tu Kawltea chuan Runa tiang hun hi kan la tawk leh lovang tun nge sawi thei? Nun khawchhuahnan chuan kan beih let a ngaifo reng a ni, Vanzau khua hian Pasalṭha a neih belh leh a, chu chu nang hi i ni, Chhingzoi maw i farnu hming chu a mawiin a hming pawh a puzo ngei mai, an tih chuan Runthera chuan ka lawm e, tia chil an lem khalh khalh chuan Cheua chuan an ni pathum kaw ruah tur zia chu hria in an duh lo chung cung chu tukṭhuan bar hmasaah a ṭantir ta a.
.

Puar pang maia ṭhut khawmuan pah a an dul an chul an chul lai chuan chung Pasalṭha ho mit chuan khawdang reng a hawi thei mawlh lo a chha chu a ni, an kiangah nula hmelṭha leh pianthiam a awm ve miau avang leh an chawei na vel phur leh thothang taka a tihfel laia a puanbih lar a a mal no nalh tak lo lang paq leh phek ṭhin te chuan an mit an len sawn phal reng reng lo a chha chu a ni.
.

Cheua chuan Rokhuma te chet thawh dan vel chu chipchiar takin an zawt a, Runthera chuan an sawi zung zung hnu chuan an hruaitupa ber Cheua chuan kan hah te a dam tawh chuan kal zai te i rel tlang ang u hmiang, kan Lalpa pawn tlumtea thlir in min lo thlir reng dawn a nia, Rokhum nang kan nula hmelṭhai chu rawn chhawm mai la, an tih chuan Chhingzoi chu a lai deuh ṭet ṭet a, a rilru chuan he Rokhuma hi a vawikhat hmuhnaah khan a thinlung kawngkhar kha lo kik hawngtu ni se a duh em em a ni. Mahse chutoang lam hawia han in rel hran chi ni lah si lo le, Diktaka sawi chuan Rokhuma pawh hian a duh ru ve em em a ni, mahse a vawikhat hmuhnaah tiang maia rilru a put chuan mi pa laktlak loh takah a chhuah mai a hlau bawk si nen a, mahse, Pawih ho in an hual hma kha chuan in haw lo tih hriat ngawih ngawih khan mitkhap kar chhunglek in hun an hmang kha a nia, chung zawng zawng chu Runthera hian a hai mawlh si lo.
.

Cheua chuan fiamthu han thawh nuah nuah pah hian a bula tlangval ho chu an nui ri leh hak zel a, Kawltea lah pek chuan kan kawmchhak nuthlawi kha hei U Cheua hian zankhat kha chu a lo zen ni ngei tur a ni, Kan Lalpa hnen kha a zan a zan khan a thlen a, mahse a lo uksak vak lem lo a ni awm e, U Cheu a nawm dan a dang em tia an zawt leh chiah mai chu an nui ri ham ham hlawm a.
.

Cheua chuan mai mai ṭhin a, a nauṭam uaifual phir ralh kha Mankaia thlamah i zen e an tih kha maw le tiin an fiam zui nghal zat a.

Chhingzoi chuan Rokhuma melh ralh pah hian khua kan hnaih tawh em an tih chuan Rokhuma chuan zawi sap hiam hnaih tawh e, i chau deuh em ni la puak i duh em an ti fiamthu a, Chhingzoi chuan chau lo ve, Pasalṭha rual zinga hmeichhia lo kal tel ve hi zahthlak ah kan la deuh alawm maw le, ka paw zawk dawn che em ni an ti heu mai a.
.

Rokhuma chuan min paw zo awm lo em mai a, zahthlak lah lo ve, nula hmelṭha tak kan chhawn haw a ni tih hi hre ngat se chuan khaw mipuiho zawng zawngin min lo hmuak ngei ang an tih chuan Khaw chhung luh nan kawi thum chiah an bak ta .

Cheua chuan hei le khua kan lut hnai dawn tawh bawk a, kan nula hmelṭhai chu kan zawn haw mai dawn em ni an tih fiamthu chuan tlangval ho chuan Zanin na na na chu Chhingzoi runsang kan kai ang chu le tiin an nui ham ham a, chutah Kawltea chuan Siamliani runsang kai tur nen chu in va indaih awm lo ve le, Rokhuma hnungzui tur kha inthlang fel mai dawn em ni an ti khauh mai zawng, Rokhuma chu za lo tak mai hian a nui hul hak a, chuthu lo hretu Chhingzoi chuan Rokhuma melh ralh pah hian a rilru chuan a kianga kal hian Lawmnu a nei em ni? Tih ringawt chu a rilruah a awm a.

Rokhuma chuan khaih khaih, kan Lal fapa Kawlkhama huhang kan zo nem maw, chan loh tur melh reng aichuan Zawlbuk meihnungpuak pah a, Valupa ti ti ngaihthlak ka nap e an ti liam puat a.

Kawltea chuan Rokhum kan Lal fapa i rawn sawichhuah takah chuan tu hi nge a chhun lam lam le ka ti, tia sawi leh tura a ka an an zuaih laitak chuan Cheua chuan a mitmeng chuan lo khap thuaiin Cheua chuan ngaih khat ah i ngai mai teh ang u tiin an thu kallai chu a rawn hliahkhuh a. Cheua chuan Zahlir, Aithanga nen khan Lalpa hnenah lo han kal ula him dan takin kan lo let leh thu hi in lo zai dawn nia, tin Pawih nena kan inkar thu hla erawh hei mi lu kan khai haw lo nen sawilan loh a ṭha zawmah ang nge tiin a tir nghal a.
.

Vanghmun Lungdawh chuangkai in an thlansa ti daiin thlithaw heuh heuh lo leng chuan Chhingzoi sam sei bu chhah tak chu rawn chhem leng siau siau in an hui leh heuh heuh ṭhin a, Cheua chuan hei le khua pawh a lang ta uarh mai le, khuannu venhimna a zarah ko kim takin mahni run ṭheuh kan pan dawn zu nia, a ṭhen ten fanu thar duhawm tak nen hun an hmang dawn bawk nen, a engpawh chu ni se, Kawlte, Chhingzoi run i kai ang aw zanin zet chu zan tumtawi pah fawm in  an tih chuan Chhingzoi chuan ui ha, in lo leng duh phawt te chuan keia lo hnar phak rual in ni lo ve tiin an nui leh har har a.
.

Kawltea lah pek chuan mi duhlai runsang kai tur hian an mi dip a na fu lavang maw? Keizawng Sairam chhuah a, kan ṭhenawm ramri pel rawt khawpa vanglai nun am tak mai a han hman te lam lam hi zu chak zek zek a, an tih chuan Rokhuma chuan Kawlte, keipawh ka rilrua riak tlat zu nia, awllen te han thleng dam chho phawt ila U Cheua ho hian han bei teh tak ang u hmiang anctih chuan Cheua chuan ni ang hmiang, hawh u le kalzai in rel leh dawn ila chhungte ngaih lam lam te hi a lo ṭha lo dah ang nge tiin kalzai an  rel ta a.
.

Khua an han lut chu mipuiho chuan lo hmuakin Runthera farnu chu tlangval leh putar naupang chen chuan hmelṭha an tih thu hlir an sep rawtui an a tling hial a ni, a then ten Siamliani nge ṭha ti ten an lo in hnial leh laih laih ṭhin.

Hun leh ni te chuan Vanzau khua chu herliampui ve bek bek in mitin mai chuan mahni hna ṭheuh thawkin mahni seh seh mual lamah an lian nitin a, a ṭhen ten beai thangte kam in a thawkmawh deuh te chuan hnuhhram lamah an hma sial ve bek bek in ni tla vanvuai thleng thlengin an thawk nasa hle mai a, Rokhuma pawh an lo awmna bing hle e ti lo chuan a thawk sawt in kar lovah a lo lama buh hmun te chu thlo zoin a nun chu a hlim ve veng veng mai a.
.

Chutih lai chuan Zarpui Khua chuan buaina tawk mek an khuaa feh kal haw feh kawnga lubung a lo let leh ringawt ṭhin chuan Zarpui khua chu a ti ral muang lo hle mai a, An Lal Tawnliana chuan a upa te ho hnenah chuan Vanzau khaw Pasalṭha Cheua leh Zamana leh Kawltea chu beiseina sang tak nen pur tawp turin thutlukna an siam nghal hmiah a.
.

A valupa te leh a tlangval te chu zing varṭiana chhuak turin a ti nghal hmiah a, hetia Zarpui buaina bulṭanna chu an Lal fanu hi Phulzau khaw Lal Lalthangtinhawla fapa, Zahawla a nupuia han dil hlawhchham an Lalpa thintim in a ruk a rala a pasalṭha chhuantawlawl khualkai pha ngat pathum , Aidenga, Lengsira leh Zaduna rawng taka chet han lak tir kha a nia, in malbeihah Zarpui pasalṭha te hian an ngam hlawl si lo, Rokhuma khuanu vohbik chu la kawl ngat ni se tiang dinhmunah hian an ding lo chiang viau ang.

Vanzau Pasalṭha Cheua, Zamana, Kawltea, Runthera, Rokhuma te hi eng ang chiah in nge an chet dawn le? Rokhuma chu Zarpui khaw tan ke pen in a mi lu lak chem nen a kal chhuak dawn em le? Hmuhsitna vawrtawp dawnga thinlung hliamtu khua hi ṭanpui tur in ke a pen dawn em le? Hr in beihna nasa tak lo thleng tur hian Lusei khuaah hian chhiatna nasa takin a nghawng dawn tih reng tuman an hre lawk bik si lo, Cheua leh Zamana thihna chuan engtiang chiah in nge nge Mihrangval pathum Rokhuma leh Kawltea leh Runthera a den nat dawn le? Sailo Lal Saithangpuia lu la tur a thisen a chal hnawm ngat Vanzau mihrangval pathumte hian Sailo lu lak an tumna kawnga Sailo mihrang, sa leh ral hmaa zam ngai lo, Sailo hnam thlah te zinga an hming dai tawh ngai lo tur Pasalṭha Saitawna, Sailosuaka, Raldawna te paltlang a ngai miau dawn si.

Lo nghak fan fan la, thinnel takin lo dawh hram hram ang che.

BUNG 11 NA.

Vanzau Lalinah chuan Lalpa leh a Khawnbawl upamin chuan Zarpui khua aṭanga ṭanpuina diltute chu an en kar mai a, Zarpui Pasalṭha Mantawna chuan Lalpa kan khaw buaina hi zahthlak leh dawihzep thlakah min lo ngaihsak lo hram la, kan Lalpa mang lah a ang nasa ropui si nen, keinin han do let in han basa ngam ve mah ila, keini aia a tuar nasa tur chu kan khua mi leh sa te an nih leh zel nen, chu loh vah Phulzau khua hi khaw lian leh Pasalṭha huaisen tak nei an ni nen, hma han lak tum teh mah ila, han tih ngaihna vak kan hre lo a ni an ti dam diai a.
.

Lalpa chuan chu in Lalpa chuan ka pasalṭha te beisei in thawk a rawn lak tir che u tihna a ni maw an tih chuan Zarpui pasalṭha chuan Lalpa aw ni deuh ber mai tiin an chhang a. Vanzau Lalpa chuan a lu buk nghat nghat pah chuan chu ka pasalṭha ka khaw daingul te thihna lui ruama an lu rawlh tura in Lalpa in a duhna chhan hi a aia duh chhan ṭha te kam keu chhuah tur in hre mial lo maw an ti leh chuan Zarpui Pasalṭha chuan Lalpa, Lusei leh Lusei inkata buaina chhuak leh ṭhin hi kan Lalpa chuan a duh lo va, ti tawp turin nangni nen a hrui khat vuan chunga hma la turin a duh che u a ni, an tih chuan Lalpa chuan aw le, he thu ah hian thutlukna ka siam thei lo ka pasalṭha te kam chhuak ka lo ngai thla ve phawt ang nge, tiin thu pawhchah pah chuan an mikhualte chu thlenin tur an ruahman sak nghal zat a.
.

Vanzau Lalpa chuan Tlangaupa ka pasalṭha te kha an hming kimin Zanriah khamah ka Lalin hi lo mawi teh se, Runthera tiam in tiin an tir chhuak nghal a.
.

Zanriah eikhama Lalin chhunga ṭhubial ṭaih hlawmin an thurel chu a khun khan tlang ngei mai le. Lalpa chuan Cheua engtia hma han lak chi nge niang? Mi buaina kara ka pasalṭha te Lu rawlh ve tur cheu chuan ka ti lui lo che u a nia, an ti a, Cheua chuan Lalpa, kan,Lal i nia, keini thu lo tihtlukna chi a ni lo ve, Lalpa i remruatna hi lawm taka pawm tur mai zawk lan ni e an ti dam thlap a. Kawltea chuan Lalpa Phulzau Lalpa thu sukthlek dantur pawh i hai ka ring lo, a pasalṭha te lah i hriatchian vek an ni, an ni lam hawi zawnga Mi lu lak chem lek tura min duh a nih pawn keini Vanzau Lal Lalvankhama tlangvalte hi kan zam hauh lo, kan tin therte pawn kan hlau hek lo, Lalpa i thutlukna kan nghak e an tih chuan Lalpa chuan a lu buk nghat nghat pah chuan aw le ka pasalṭha leh ka Vangkhua venghimtute u, ti hian aw niang tiin thu an sawi ta a.
.

Aw le, Zarpui Lalpa meuhin a an buaina ti reh tura ka Pasalṭha te meuh rawn pun chu keia lo hnar chi rual ah lah ka ruat lo ve, Kawla leh Rokhuma leh Runthera hian ka vangkhua hi ka thlazar hnuaiah lo veng se,Cheua leh Zamana hian ka tlangval rual 30 khawm se Zarpui lhaw lam pan turin an ti dap dap a, Kawltea chuan Lalpa kal ve tura rua ka lo hman lai lai a, mahse Lalpa i thu hnial erawh ka tum lo a ni an tih chuan Lalpa chuan engte nge kan hmaah lo thleng dawn lah kan hre lawk lo. Tukkhum mittnei ran a hun lan hman a ṭul a ni, naktul varṭian lamah chhuak turin Cheua hian zawlbuk lam lo zu thawi se la, Tlangaupa nang, kan khuaṭha te lo hrilh mai la a ṭha ang nge, tiin Lalpa chuan thu an pawtchag nghal a.
.

Zing ni chhuak engmawi tak chuan Vanzau khua chu a chhun paw pheu mai a, mitin mi mir te chuan mahni ṭul ṭul hna te khawih in anzing buai hle hlawm a, an Pasalṭha te thihna ruamah an ding dawn tih lah hre lawk lovin hlim takin lamkawia an liam tur ban vai lauh lauhin an thlir liam a.

Zarpui Lalinah chuan Lalpa chuan hei, zah pawh dawn lovin in mi puihna tello chuan eng kan ni si lo a, tiin an khaw ralmuan loh zia chu  an sawi dap dap a, Cheua chuan Lalpa eng nge kan an dawn tih lah va hriat ni suh, mahse theitawp han chhuah ila, kei leh i tlangval sawm rual nen lo awmna bing ber ah zanthum riak turin in buatsaih ta ila, i pasalṭha ten ral piah lamah hma lo la se, theihtawp kan chhuah tlang a niang chu, Lalpa ka remruatdan hian a kaw zawnga a thlen ngei ka beisei an ti charh charh a.
.

Lalpa chuan Vanzau pasalṭha nge nge i thu a fing e, engtikah nge chhuah zai rel ila kan tih ang? Tia Lalin chhunga a mi koh te chu an enkual dan dan a. Cheua bawk chuan naktuk Varṭian hi kan tinzaqn mai dawn em ni? Tia Lalpa an zawh chuan Lalpa chuan khaih khaih khaih, hah te lam lam a dam hman nang, nilhat te zawng aqmni khama hahdam ni ah kan hmang ve bawk ang chu an tih chuan Cheua chuan Lalpa kan hah lo ve, an tih ṭalh chuan Lalpa chuan chuti a nih chuan nak zing lama chhuahzai rel turin kan in buatsaih a niang chu khawnge i lo kalna lam lam te a hla tham sia Mutmu teh pawh han tuah hma ula a ṭha ang nge tiin ṭin zai an rel hlawm ta a.
.

Vanzau lamah ve thung chuan zan lam chu zan dang ang lo tak mai hian a reh hian a reh ṭhiap mai a, Runthera te in a Chhingzoi rima nui ri leh dar dar ṭhin tih loh chu thawm dang vak hriattur a vang hle mai, Siamliani te inah ve thung chuan Siamliani pa pum nuam lo Lalin aṭanga lo haw chuan Rokhum, Kawla, keizawng Zarpui ho buainaa ring lo rawlh ve ngawt hi buaina zakhua min thlentu ni dawn tlat a kan hriat tlat pek chu an ti nuah nuah a, Rokhuma chuan Pu Tuak ngaihtuahna a kal ding duh riau mai ka ti, mahse eng em thleng lo turah ngai ila an ti bah niai a.
.

Siamliani chuan ui ha, keipawh ka rilruah a riak reng mai, kan khaw awmdan te lam lam hian ka ngaih lam lam a ti ṭha lo mang teh e, khawimaw Kawlte i vaihlo kha a no a nih kha tih leh lak kai sak an rual nghal zat a.
.

Kawltea chuan Khaih khaih khaih ngaihṭha khan awm rawh u, U Cheua hmalakna hi a hlawhchham khat a nia tia a sawilai chuan Lenghaw ar a lo khuang al al a, Kawltea chuan Ṭhianpa Khum ṭin zai kan  rel mai dawn em niang? An tih chuan Siamliani chuan a mak mang teh e, Tuibur hmuamda te tal an ṭhu khawmuang ngai e, nge lengi runsang dang kan leh in tum zawk an ti zauh a, Rokhuma chuan nei lah lo ve, Zawlbuk val upate an zahawm ngai e, tih leh thawh an rual nghal a.
.

Rokhuma chu mutmu pawh tuah thei mumal lo hian a let a let mai a, Runthera lah chuti bawk, chutah Khuma chu ṭhuchhuak hlawl hian a piah thim tham deuha Runthera lo ṭhu chhuak chuan a lo melh lar bawk nen, Rokhuma chuan Zawi sap hian Thera, zanin zet zawng maimiziala kan awm chu le an ti thawp sat a, Thera chuan nia keipawh hi eng tih tih nge ni mutmu pawh kan tuah theih loh reng reng le an ti bal bal a. Rokhuma chuan mutmu tuah i han tum leh ang hmiang tihpah chuan an mu ṭha ve leh mai a.

Rokhuma mangah chuan tlangsang lai tak a lu nei lo va mipakhat lo let reng leh, chiang taka melh ngar tu tu tih a hriat loh Pasalṭha hian tu emaw nghawng hi a lo zai thi baw hawk hawk bawk a.

Rokhuma chu tho chhuak hluaiin Kawltea chuan kha Khuma, i mutui meuh maw tiin nuisang hian an zawt a, Khuma chuan mutui e le, mumang bo ṭhaka kan mut chu le an tiliam puat a, Runthera chu Zawlbuk bawhbel bawhliam pah hian kha nangni pahnih chu eng thuchhia a ṭha nge in lo sawi a? Tiin an zawt a, Rokhuma chuan thutak hmel fe hian a mumang chu an sawi chhuak phawng mai a, Runthera chuan buk nghat nghat pah hian vawin chu kan pathum hian Tum tluk mual lamah i herliam mai ang u hmiang, thil ṭha deuh tihtur kan nei a nia an tih chuan Kawltea chuan en he haw hian Runa engthil maw an ti ha a, Runthera lah chuan kan kal hunah chauh ka sawi ang, a tihlai mek chuan Tlangaupa chu rawn thleng chawpchilhin  Tlangaupa chuan in lo awm remchang hlauh mai ka ti kan Lalpa in a rang lama hmuh che u a duh a ni an tih chuan Lalin lam chu an pan nghal a.
.

Lalin an han thlen chuan Lalpa chu Lalin chhunga vei tawn sek chung chuan leihkapui lam chu an hawi leh zauh zauh ṭhin a, chutia a mi duh te an lo thlen chuan Lalpa chuan in mawng hung rawh u tiin an ngawi leh ngul a.
.

Lalpa chuan ka koh chhan che u hi tun va hria se ka tih loh vang a ni e, nizan lam ka mang lam hian ka ngaihtuahna a ti kalding hle a ni, tiin a pasalṭha rammu a chhuak te an boral vek thu a mumang lama a hmuh chu an sawi chuan Rokhuma chu a ṭhu ngil nghal awt a. Lalpa chuan manglam mah ni se ngaihthah chi ah ka ruat lo tawp mai ka ti, khua hi chhuahsan lo ula awmni kham turin ka duh che u a ni, an tih chuan Kawltea chuan Lalpa i thu ni rawh se, chutia kan Lalpa meuhin a awmni kham tura min duh te chuan a thu kan zawm mai a niang chu, tiin Lal fanu Thangpuii eirawngbawl chu an melh zauh a.
.

Lalpa chuan Ka pasalṭha leh ka in nghshna te u, tunlai chu ka awmdan hian ngaih lam lam a ti ṭha thei thlawt lo ka ti, a ṭul zual te chauh hian lo lam pan se tlangaupa nang vengmawng aṭang khan han au la a ṭha ang tiin an tirliam nghal a.

Ti chuan leh, chhungtin te feh tura lo in ruahman ho chuan phawk deuh duk hian tlangaupa chu an en ho mai a, Khawnbawlpa chuan uai kan Lalpa thu chhuak chu khaw nge kan ngaihven ang nge tih leh Lalin lam pan an rual a, Lalin a han thlen chuan Lalpa chuan nang nge nge ka thachhang i dawl zo bet e, Siamliani pa lo ṭhu teh khai, tiin a mang lam chu an hrilh dap dap a.
.

Tukṭhuan eikham a nih chuan khaw mipui ho nu nau te leh nula leh tlangval tihtur hrelo ho chu Leihkapuiah a chhun pachangah chuan ti ti vawrhin an nui ho dam dam a. Dai hnaiah chuan Kawltea, Rokhuma leh Runthera te chu muk taka ti ti in Kawltea chuan thutak fe hian a kawi a ngila kawng engkima in pui tawn tur kan ni tih hi i vawng reng ang u, Sa kah hnem lam hi pasalṭhatna lam a ni lo va, Pasalṭha diktak chuan a khua leh tui tan engpawh a bei ngam tur a ni, tiin Cheuan an zawlbuk an kai tirh a ta a lo kaihhruai dan zawng zawngte chu an sawi dap dap a.
.

Runthera chuan khulai haipui hnuai hlim ah khuan  Kawlte i nunchan zir hi la hmu fo ṭhin ti teh u kan pathum hian in kawp tlatin nunchan in zir teh ang u khai an tih chuan an chak zawngtak lo ni nen, an pathum chuan Haipui buk hnuai zawlah chuan khawmhma chem lem nen chuan an han in ral sah pawp pawp  mai a, Rokhuma chu khan lo hle mah se, Khuma chuan khawkhat khualkai pasalṭha aia an hnuaihnunna bik a hmu miah lo a ni.
.

Rokhuma chuan Kawlte, i chem i hum khan i kut ṭang khan a fawng hmawr pel suh se, Runther, i ke chheh zawnga i kar zau zawng kha duhaiin a thui mah mah, palh thil thu ah i in veng hman lovang tih leh a kaiza chu an tlawh thlep pawp mai a, i hmu maw, i hnunglam i tukkhum pawh khan mit nei rawh se, Kawlte kha aw tih leh zik zaka tlan pah in Kawlte zawn a thlen hma chuan kuna in bim thutin Kawltea kaihza tha chu khawmhma chem chuan a va zai a. Rla bei tur chuan kan beih tum te mit tak hi enzam a pawimawh hmasa ber a, chumi hnuah an dinglam nge an veilam tha pek na zawk tih kan hriat a ṭha, an ke chheh hian ding lam nge veilam chet tir hmasa tih te hi kan hriat a pawimawh hawh u le, ṭhu chawl lawk ang u hmiang an tih chuan an han ṭhu chawl te te a.
.

Rokhuma bawk chuan Kawlte, i kut dinglam hi i khawr hle a ni tih ka hre thei a, i ke phah nghahna tur lah i ngaihtuah ngai hek lo, a rual rem ṭha em? Khawi hmunah pawh buaina tawk thei vek kan ni, kan lei rah tur a rem em? Kan hmelma te hi kan hmachhawnin an ke chheh dan hi kan en uluk a ngai fo ṭhin an ti dap dap a, Runther, i tha pek kha vawikhatah kal tir vek ngai suh, khek hun a awm ngai a nia, kan mi beihte a zir in, ṭul lovah tha kan pek vak vak chuan kan beihpuite hian min veh chau thei a ni tih hriat a ṭha, an tih chuan an pahnih pawh chuan Khuma sawi chu pawm tih hriat tak hian ngaihsanna nen an bu duh nghauh nghauh a.
.

Rokhuma chuan le, in ti leh dawn chhin i la, tiin an han ṭan leh chu Rokhuma chu a lawm in a khi var var mai a, ti kha chuan Vanzau Mihrangval Pathumte hi tu in nge lo dang ngam ta ang le? An ti lar lar a. Runthera chuan hawh u haw zai i rel ang u hmiang, Lalpa koh theih renga kan awm a ngai a ni tiin khawchhung lam an pan nghal a.
.

Khawchhunga an pathuma an han kal chu Rokhuma chu a lianṭha bawk a a lang lawr ngauh bik a, nula ho lah chuan haw lo tih hriat tak mai hian an lo thlir dauh dauh mai a, chung zingah chuan Runthera farnu Chhingzoi chuan Rokhuma chu mit la sawn lo lek hian a lo thlir veng veng mai a.

Duhtawk ang.

BONUS

Ka thu lo hian tuman Mi lu lak chem hi Whatsapp ah lo post ka phal tawh lo.

BUNG 12 NA.

Rokhuma chuan Kan khaw awmdan vel chuh, Huih chho thli lah hi a thawh leh hak hak ṭhin ka ti, hetianga Huih chho thli a thawt hek hek hi chuan kan pi leh pu te khan Sahrang emaw Ruang emaw hi kan Lalpa Lalna ram chhungah a rawn lut ṭhin e an tih tak kha maw an ti chuar chuar a.
.

Runthera chuan Zarpui khua hian kei zawng, ka ngaihtuahna zu luahkhat tlat pek a an tih chuan Kawltea chuan khaih khaih khaih in ngaih lam lam te kha a ṭha lo hma a nih kha eng em a thleng lovang, UCheua leh Zamana ho a kal an nih kha hrereng ula, khawnge Runthera farnu seih hmuturin mawng in hung tlang ang u hmiang an tih chuan Runthera in lam chu an pantlang ta a.
.

Zarpui Khaw Lalpa chuan eheu leh, tlangaupa khu ka Khual duhawm kan thleng ngei dawn e, ka Lalin an rawn rah rualin kacthathum zu ngei mai khan ka lo hmachhawn teh ang, Pu Liandal khu en mah teh, Vanzau Pasalṭha Cheua ka hmu tel zu nia, tiin a rilru tawt tawh leh a mangan rukna te chu chawp leh chilh chuan an bo duak a.
.

Upamin Liandala chu khi hui chung hian Zamana pawh a tel khu! Ti hi chuan Phulzau khua chu reiloteah kan la thri ngei turah ngai ang an ti thlarawk a, thil hi an hrechiang lo a ni.

He an ruahmana ah hian mi eng angin nge nunna an chan dawn tih reng an hre si lo. Phulzau Pasalṭha Aidenga hian a vua leh vang Lalsaithangpuia pasalṭha chhuantawlawl Saitawna a sawm tel tih hi an hre lo atin ni.
.

Phulzau Lalinah ve thung chuan Lalzahawla chuan Aideng khawnge i aihnahphahpui Saithangpuia Fa chuam Saitawna ral leh sahrang hmaa zam ngai lo khualkai pha ngat chu a awm a? Kei in Lalpa hian hmai hmaa han biak kan duh teh tlat chu le, an tih chuar chuar chuan Pasalṭha Aidenga chuan tun lawk khan a lo thleng ve chawpchilh chauh a, a insil thlandai a nih kha, Lalpa, zanlam ah i Lalin nuam takah hian rawn chuangkai pui ka lo tum ang nge an tih chuan Lalpa chuan aw le, hei kan thudang alai chuan Zarpuiho pawh an fimkhut hle tawhin ka ring a, lu lah an hlauh na rawh, i chet chhuah tawh na te hian ka lung i dum hle mai ka ti, nang nge nge, ka khaw daingul i awm vang hian ka gmai hi a uang leh chawk zel a chha chu a nia tiin an nui khi hui a.
.

Ni a vanlaizawl a, chhum dum chhah tak kal ruai ruai kar a ni lo lang eng leh ut ṭhin chuan Phulzau khua chu mawi takin a chhun eng phak a. Nau ṭah mawh deuh te chu ṭap ri chuar chuar hlawm in an nu te nauṭamtlei ngen in an thiam tawk in an ṭap ri chuah chuah a. Ralmuanna tlanga leng na ngang chu an hmel hmai hmuh lah a nuam narawh, an nula te lah chu tihtur em em hre loin an mal mum nalh tak lang paw phek in naupang tualchai leh inkawibah chu nui ri har har chung chuan an thlir hlawm a. Leihka sang aṭanga Putar hnanghlzi ho lah chuan an vanglainun dawnkirin hmui fawn hlarh hlarh in an ramchhuah dan an sulhnu te sawi chhuakin an vanglainun an ngai a ni tih hriat tak mai hian an sep vei lauh lauh a.
.

Zarpui khaw Lalin ah chuan an Lal Tawnliana chuan thlathum zupui engkuk nena an hah zu lo hluiin kha in lo kal tluang maw? Zarpui Lalpa hian ka lawm a che u, in mawng kha hahdam tak khan hung ula, ka upa te an kim ṭhep ṭhawp bawk a, mi tihdan lo ang tak hian chhun pachang lai lai hian ro i han rel teh ang u khai, khuanu pawn zah lo ngai se, Chemte nang i ṭhiani run va kai teh khai patling rorel rum hi hmeichhe derthawng tan benga luh a nuam lo dah ang nge tih pah chuan a fanu chu a ṭhiani te run kai tur chuan a tirliam nghal a.
.

Cheua chuan Zarpui Lalpa zu nge nge chuan hah lah a tidam narawh e, kamsir daralh khawp a ka lei kan tih sei a liamah pum lam kal dan pawh a dik raih mai ka ti, Lalpa i vangkhua pawh a nuan narawh e an tih chuan Lalpa chuan nuih huah huah pah chuan nia hei ka upate remhriatna a zara thuneitu nih fawm mai mai zawng ka la nih hi, in lo thlen taka lei ah riru kal peng dinglai pawh hahdamna lungpuin a thlak rang teh e khai, tiin an harsatna tawh dan chu an sawi ṭan nghal a.
.

Zarpui Lalin chhunga rorelna thawm chu a khunkhanin a mi uap a na hle mai, Cheua chuan Lalpa chutiang a nih nak alaia chet in thawh loh a leiah ngampat lamah pawh in ram an rawn bawh zau duai dawn a nih chu, ti hian rem in ruat tlang ila, kei leh i pasalṭha pakhat in kawp in tlangval 40 ho ila, Zaman leh i pasalṭha pakhat in kawp se tlangval 40 ho bawk se, mual lehlam aṭang ve ve in kan nek khawm ang nga an tih chuan Lalpa chuan ngaihtuahna fing tak chu a nih ngei chu, a mah erawh chu Phulzau Pasalṭha Aidenga, Lengsira Leh Zaduna sas khualkai pha ngat an ni tih hi kan hriat loh ka hlau tel bawk a, an ni lak ah sawn fimkhur theihtawp in chhuah dawn nia, kan ṭanhmun a ṭha a nih ngai chuan nu nau leh tar chak lo te nunna erawh in zuah a niang chu, naktuk mai hian zing varṭianah chhuah ta u la a va ṭha awm mang teh e an tih chuan Cheua chuan nia Lalpa chu chu ka duh dan a nia fehrehsan lai taka chet lak hi ka duhthusam a ni, a chhan chu zanthim hnuaiah mahni lam insai palh te lah a hlauhawm bawk nen an tih chuan Lalpa chuan an thurel ti tawpin Thlenin tur ah chuan an khaw tlangval leh upa te leh valupa te chu a sem dan dan a, Cheua leh a nau tlangval pahnihte chu Thingdeng Thanglaia te inah an han thlentir a, a fanu nula hmelṭha khualkai pha ngat chu hmelṭha an ti tlang teh e.

Pu Thanglaia chuan e khai a, Vanzau Pasalṭha te maw zanin chu Sakhi sarep nen leh Artuilai nen kan hlui teh tak ang che u  tiin ṭhutna awl a lo kawhhmuh zung zung a, Cheua chuan khaih khaih khaih a ngai lo ve, hei kawng laka kan eibang Sanghal sarep pawh kan la nei nual alawm tih pah chuan a iptepui ah aṭang chuan an pe nghal a.
.

Pu Thanglaia chuan Cheua, Kawltea hmel lam lam te hian kan vangkhua a lawi ve mial em an tih chuan Cheua chuan a ni zawng tlemin a la nau deuh a Lalpa thlazar hnuaiah eng emaw thut thleng theiah kan khek a nih tak kha maw le, a naupan erawh zawnga enliam mi lah chu a ni hauh si lo, kan tluk lo a chha chu a nih hi an tih zawm nghal zat a.

Pu Thanglaia chuan a nih chu maw le aw, taka kan khaw mi leh sa lo pem ta, Ṭhuamkebaia an tih te kha an dam ṭha meuh maw? An tih chuan a fapa Rokhuma kha tlangval lian ṭha thelhthawlh ni khan ka lo hria a, mahse kan khua a an awmlai kha chuan tlangval tuai tir te chauh a la nia na tih chuan Cheua chuan dawn tak maw in khaw mi leh sa hmasa kha an ni dawn teh tak e a, an damṭhatlai tak a niang chu, lo kal kha a chak ve khawp mai a, mahse kan Lalpa in a hauhbet bur mai sia an tih chuan Pu Thanglaia chuan ngah nge maw a khap beh ṭut a in Lalpa chuan mahse a awm lo hran lo ve, nangni Pasalṭha te hnungzui tur chuan a la nau in a la tuai mah mah ang chu an ti a.

Cheua chuan chek tlak tlak in Rokhuma chanchin chu chuti em em Zarpui khuaa a thangtlawm leh an ngaih pawimawh loh dan chuan a ngen a chhun ta raih mai le.

Cheua chuan khaih khaih khaih Pu Thanglai an tih chuan Thanglaia chuan chemte kha i vawkchaw chhuan a liam dawn tih pah chuan a fanu lasai lai chu an au a. Cheua chuan Rokhuma te ang kan khuain kan kawl hi khawdang lak a kan himna a nia sin, a ni ne te zawng kan phawk chhuak zo lo a chha chu a nih tawh hi, tiin Rokhuma thil tih zawng zawng chu an sawi lang duh chuang lo a, a chhan chu an lo hmuhdan kha hriatzel a chak vang zawk a ni.
.

Pu Thanglaia chuan kan thudang alai chuan Lunglian khaw nula hmelṭha Vanzau Pasalṭha ten an chhuh e tia thutgang hi in Lalpa khan a lo hre ve tawh reng reng em? Min hrilh hriat theih chuan ka lawm hle ang an ti a.
.

Cheuan sawi tuma a ka a an zuaih lai chuan Vanzau tlangval Hranglaia chuan thuthang dik lo tak zawng a nih chu ka pu, kan khaw mi leh sa ngei Runthera farnu a nia kan khuaa a chhungte bula in bengbel tur a Rokhuma leh Runthera han hruai anih kha an tih chuan Pu Thanglaia chuan a nih tsk chu maw le thuleng dik lo vak vel hi a tam khawpa tih leh ngawih a chuh nghal a.
.

Zan a ni a, a tuk maia Phulzau khua runtuma tui taka an mut lai chuan Phulzau khaw pasalṭha chhuan tawlawl pathum leh Sailo lal Saithangpuia fapa chhuan tawlawl Saitawna tel in Zarpui khua meivapa chang turin khuan hnuhnung a khuan zawh chuan Zarpui Lal Laltawnliana khaw lungdawh an lo lut ṭan der ta mai le, hmun thumah inswm kualin mi 30 te chuan silai keng vekin Zawlbuk lam an pan a,,Saitawna leh a ho mi 10 chuan Lalin an pan ve thung a a dang zawng chuan vengmawng aṭang leh tuikhur mual mawng aṭangin an rawn hrut chho ṭhem ṭhem ta mai le. Aidenga chuan a naute chu inring turin thu an pe a, chutak leh a kut zungṭang pathum an tih pir chhoh vah hnu chuan Zawlbuk a tlangval ho chu an han kah rawn tak tak mai zawng an thi chiang hlawm hle mai le, mi pathum hliam tuar la thilo te chu phih tho lawp chung hian Cheua dara sialimu luhna kaw phat a kuta hupbet chung chuan Cheua chuan mi inring lo lai bei ngam lek a dawihzep ho tia chil chhak tuarh in Aidenga chuan a naute ho chu Zawlbul tualah meipui a tuah tir nghal a, Lalin lama Silai puak thawm nen vengmawng aṭanga nunau mangan awrawl chhuak chu a rapthlak hle mai le, chutia mei an en ṭhat hnu chuan Aidenga chuan Cheua chu en ha pah hian uai hei zet zawng Vanzau mawitu lah ni reng che chuan a pawi lo ve, Phulzau khaw dal zawnga kepen te chuan an tuhrah an seng mai ṭhin tih leh a mi lu lak chem nen an pan chheu chheu mai a, Cheua chuan nuih sak paha ṭhen deuh chat chat chung hian ka lu hian kan khua thleng rawh se an ti sap a, Aidenga chuan i duh ang chuan le tih leh a chem vai zawk chu raulin Cheua lu leh taksa chu a hrang ta nawlh mai le.

Zarpui tlangval al dam tlemte chu in pe in hmeichhia ho leh mi pa ho te chu a hranga dah hlawm in chung zinga tlangval Vanzau tlangval chuan Cheua lu nei tawh lo let reng leh Zamana tukkhuma silaimu luhna kaw phat aṭanga thisen lo baw nuaih leh nunna nei tawh lo tih hriat ngawih ngawiha bawkkhup ngat chu khawngaih takin a thlir tlawk tlawk mai a.

Aidenga chuan hotu chan changin an Lalpa nghawnga a mi lu lak chema chuktuah chung hian ti hian eng nge kan thi theih i hre tawh viau ang chu maw? I nunna hi ka kut ah a awm tih i hria em? An tih chuan Lalpa chuan pasalṭha ka hria e, khawngaih takin nunau pawisawilo ho hi chuan tuar ve suh se an ti a.

Ka lu  hi a ni lawm ni in Lalpa in a duh ? La la diriam takin ka lu hi bungzarah khai ang che u an tih chuan Aidenga chuan ni lo ve le, i uikawm rah vanga hetiang dinhmun thleng hi i nih hi, i nun kan zuah ang nga tumah hi salah kan hruai hek lovang, in ralthuam kan khawm vek ang nga kan Lal chhiah khawn khua in ni reng tawh ang thi leh dar kan hawn bawk ang tiin an neih rohlute khawm sakin an khaw lam an pan nghal a, Aidenga chuan in pawh hal a ṭul lo e ti hian hun leh ni te hi hrehaqm tamtak tuarin hmang rawh se tiin an khawlam an pan ta a.
.

Ṭap thawm leh na tuar rumri chuan khawchhung chu fanin tlangval tlem la dam nen chuan mi 120 ṭha chauh an ni ta an bianga mittui luang te chuan kirzai reng a rel si lo, an fapa an in nghahna ve te chuan pialralah sianglawi in hun an hmang mek a ni si. Zarpui Lalpa chu kum tlawk tlawkin mang lam pawha a man phak loh thihna kutvawt chuan a vangkhua lo manin eng tihzai reng rel thei lo in a Lalna vangkhuaa nunna nei tawh lo let ngut ho chu mit lasawn lek lo hian a thlir tlawk tlawk a.
.

Vanzau tlangval zawlbuk riak zunzunga a kal laia tlanchhuak ta chuan an khaw ramchin thlengin thaw hlawp hlawp hian mangang tak hian khaw lam a pan mek a. Ti chuan khua chu lutin zing eirel hun awm velah chuan thlengin chutia Lalin pana an khaw tlangval chau tih hriat taka tlan pai ṭuan ṭuang chu an lo enduh hlawm hle a. Lalin a thlen chuan Lalin chhung aṭanga thinrim aw lo chhuak chu a hlauhawm kher mai le. Lalpa chuan ka pasalṭha Kawla leh Runthera leh Rokhuma zu au nghal rawh tiin tlangaupa chu a tirliam nghal a.

Mahse Tlangval chuan Lalpa an pathum chu an awm tawh lovang, hmanhmawh takin Zarpui khua an pan, ka chhawlhalin ka lut a ka hrilh hmasa ta mai a ni an tih chuan Lalpa chuan tlangval lo awm hahdam ang che. Tih leh a vanglainun ang maia a thuam inbelin Cheua te hminglam chung chuan a banglaia a silai tun chu ngun taka enfel chung chuan Tlangaupavhnenah chuan tlangval 40 in min zui rawh se tun ah vat in Tih leh chemtei nu mi pa thu hnial tum duh ting suh, ka vangkhaw chhan nan hian ke ka pen dawn e, kawng laka eitur lo buatsaih rang ang che ti chher chher in a upa te chu a awm loh chhunga a khua leh tuia an duhdana ro lo rel tur chuan an chah nghal zat a.

Ti chuan le, tumah in be lem lo chuan Zarpui khaw lam pan chuan Mihrangval pathum te chu an lim ziai ziai mai a, an u te thihna chuan an nunah pawisak an nei tlem hle tih an mitmeng rapthlak tak aṭang chuan a hriat theih a,

Duhtawk phawt