BUNG 8 NA. MUANTEA KHIANGTE.
Khawchhak lam aṭanga ni chhuak lo lang det det chuan Khamsang khaw kawtchhuaha, ralthuam kim nen a, mihrangval sawmpakhat thathauna in a bual khah, hlauhna pianpui ve lo, thih ngam lu pu a hmalam pan tur te chu a chhun siar siar a. Laiveta leh Thangzika leh an Val upa chauh chuan silai an keng a.
Heng hun lai hian Khamsang khuaah hian Silai 20 ṭha chauh an kawl a, ralkaivthei chin hi an vaiin mi 180 vel awrh chauh an awm a ni. Val upa chuan Laivet nangin hma hruai la a ṭha ang an tih chuan Laiveta chuan ni ang hmiang, zai ngai takin hmalam i pan ang aw, tiin hma an hruai zat a.
Chawhma ṭha zet an kal hnu chuan Mauhak tam chhung chu an thleng ta mai reng a, an chhak a kawngṭum lo in phan riak chu Laiveta chuan kawh zauh pah hian, khi kawngṭum te khi kan chhal ral Hualzasela Lalna ram, Leithum khaw panna a ni.A ni khi Lal chak tak leh huaisen tak a nia, pasalṭha pawh khualkai khawpa mihrat khawkheng Hualngama, Keitawna, Ṭhaseia te a nei a, kan Paihte ho pawh hian an tlawh pawh ngam meuh lo chu a ni e.
An ni nen khian kar a hlat tham avangin kan in tlawhpawh lem lo a tiin a sawi dap dap a.
Kal zelin Hruikhawng ngawpui chu an lut ta a, Laiveta chuan thawm kha i dim hram hram ang u aw, tiin a hma lawk a, sahnu lian ṭha tak tharlam tak chu an melh ralh a, eng ang chiahin nge an nau hruaite chu chhawr tlak leh rintlak an nih tih fiah duhna thinlung chu pu in Thangzika chu an mitmei ralh a.
Khua lah chu a thim zui chhulh mai tawh nen, an ram huamchhung a nih tawh lohna chuan mihrangvalte thawm chu a dim tir hle nghe nghe a. Laiveta chuan aw le, naute-u, tah hian tiahbuk kan sual ang. Kan thlang lawk khu Run lui a nih tawh avangin hahdam taka chawlh kan mamawh dawn a, kan khawram chin kan pel fel tawh bawk a, zanin chu am taka mutmu kan tuah a ngai a ni, naktuk hi in tan ni chhinchhiah tlak ni a nih dawn avangin in rilru leh in taksa khan hahdam a mamawh a ni, Piandenga, Aivela, Papawnga, mautheiin tui chawitur zawng ula a bak zawngin changel hnah leh thingtuai leh chhem tur kan lo buaipui ang tiin mahni hmaa tihtur awm chu hlen ngei tumin an han phe chhuak sang sang a.
Thangzika chuan Piandeng tih leh silai pek rualin, in mamawh takin, mahse, a theih hram chuan hman loh in tum dawn nia an ti nghal zat a. Piandenga ten Lui mawnglam an han zawh thla ṭan chauh tih chuan an hmaah hian Sakei lian ṭha zet hian sa bawp hi a lo khel ri bap bap mai chu lo ni in, an phuzawk hial a ni.
Piandenga chuan, silai cheng chu kau ri rap in, tumah tlanchhe su aw. In ring reng khan awm rawh u, tiin a silai ken kaw hmawr chuan Sakei lian ṭha zet chu a tin vang mai a. Piandenga chuan Aivel, Papawng, hlamhnih danah aw, tiin a ke bula thingro ṭang chu lain sakei hnungzangah tak mai chuan a zu vawm fuh a. Sakei chuan thinrim tak mai hian Piandenga te lam chu rawn melh kae chung hian an hahum mai zawng, Ramhnuai pasalṭha thawm chu a ringin chulai ngaw khawk rum rum a an hahum zet chu hlauhawm tham tak a ni.
An chhak lawk a, Silai cheng kausa a hnim pik kara lo ṭhu reng Laiveta chu an hmu hauh lo mai le. Piandenga chuan i sa bawp khel lai kha la la, kal kiang rawh, nang nena buaina neih kan duh lo ve an ti fak mai a. Sakei chuan a thusawi chu a ngai pawimawh lem lo khawp mai, muangchanga lo pan hnaiin Papawnga chuan mai mai che chuan tiin a chempui nen chuan veh a rual ta mai, Piandenga chuan e heu leh Silai tel lo hian aw niang, Aivel che ang le, Khamsang mihrangval rual kan ni ngai e tih pah chuan an veh ṭhem ṭhem a.
Papawnga chu Sakei chuan zuan nghal zat in Papawnga chu rang taka lo persawn nalh pah chuan Sakei tukkhumah chuan an sat ngheng mai zawng Sakei pawh chu a ṭe tuar thei hial a ni, chutia Sakei na tuar thinrim vir zawk chuan Piandenga chu thinrim taka en ngar chung hian an awp hniam sut a, a zuang leh chiah mai chu Laiveta silai lo puak chuan Sakei chu leiah chuan tla thum dup in a tawp chawih thei hial a ni.
Sakei chaldar taka Silaimu luhna kaw phat aṭanga thisen lo chhuak nguai nguai chu hnaihchilh pah hian Piandenga chuan Laiveta kahna bul set ah chuan an sat siah siah mai zawng, reilote ah chuan chalchangin a thizui ta nghal a.
Piandenga chuan U Laivet, ka nunna i chhanhim avangin ka lawm e tia nuih sak pah hian Laiveta Silaimu kha tuar lo mahse, Piandenga chuan a sak hlum theih chu a thinlung chuan a ring ru hle mai a. Mautheia tui te chawiin an buk sualna hmun an han thlen chuan mei te nunin an faisa keng te chhum in an sarep ken te chu an meichhem ah chuan an han thukphum a.
Thangzika chuan nau te u, in thinlung khan hlauhna pai lo se, hmalam pana tumruhna na kha vawngnung zel zawk ang che u. Hlauhna nun neitu chuan thihna a hnaih ṭhin. Fimkhurna kha pai tel reng ula, itsikna nun paihbo in in hmangaihna khan in thinlung kha luahkhat zawk rawh se.
A uai thlalam kan nih hunah meuh chuan in thlazar hnuaia ngaihngam taka leng tur kan ni tih hi in hrenawn fo dawn nia. An tih dap dap a. Zan a ni a, zan reh tak a ni. Khuan hnuhnungawm vel a nih hnu chuan, Thangzika chu a mu meng kar mai a, chutia nghar mut a a mut lai chuan an thlang lam aṭanga vaihlo rim thliin a rawn chhem chhoh rimnam cham cham chuan Thangzika hnar a verh chiang hle mai
Thangzika chuan chhe hei le, an va fimkhur ve le. Meichher pawh chhi ngam lo khawpa kan lam pantute hi khual ṭha a ni aw kawng lo mai ka ti, tiin a bula mu Zakham chu an hrilhru sa sa a. Zakhama chuan U Zik, an lo hnaih tak tak hma hian kan bawhchilh mai dawn em ni an tih chuan Thangzika chuan ni lo ve, engzah nge an nih kan hre si lo, tiin midang tui taka mu te chu an ka hup in an han kaitho sap sap hlawm a.
Ti chuan thawm dim taka buk chu chhuahsanin hmun thumah chuan an han in semdarh ta a. Thla eng chuan thinghnah karah a enna rawn chhuah in mihrang valrual in veh te chu a en relh relh a. Thangzika chuan a silai cheng chu kau ri rap hian Paihte beksam zial fimkhur taka an buk lam lo pan paruk te chu thlaeng hlimthlaah chuan a hmu chiang kher mai le.
Thangzika chuan engzah nge an nih tih a hriat hnu chuan an hruaitupa awm bera lang chu a silaia tin chung hian, hual beh vek in ni tawh i silai kha leiah dahthla rawh an ti chang fak mai zawng, hmeh mih ṭhak tumtu te chu Lusei mihrang val rual thangah an awk zawk a ni tih hrechiang in an hotupa chu an ding khawng lah mai a.
Laiveta chuan in kuanglo in nawr a ni, hmeh mih ṭhak duha min veh tu te chu keini lusei ho hian in lakah dawhtheihna kan nei bik dawn lo tiin an hotupa chu ding kal hah hian a silai chuan che map lo chuan an tin kawh vang mai a.
Chu Paihte pa chuan a hmaa thlaeng hnuaia chiang lo ru taka lang phe ruai pian dik zet chu ngun taka enkal chung hian helai ramah hian engvanga riahbuk sual nge in nih? An tih chuan Laiveta chuan engvanga min lo veh nge in nih? Tih leh pan phei rualin a silai chu dahin a chempui chu an phawrhchhuak zal zal a.
Paaihte pa chuan nuih huah huah pah hian uai khati zawng khan maw tia a sawi zawh rual chuan a sira a nau ngawirenga ding chu Piandenga chuan rang taka rawn dawkchhuak zawkin a lu uaihnawp lhawp chuan an hlawi phei tehreng mai zawng, ṭe ṭhawtin chulai hmunah chuan dingchan zawk tumin kei ka ni in ti chin te chu an han in nuai tak tak mai zawng, mihring na tuar ṭe ri chuan chulai ngawpui chu luahkhatin Teizang pasalṭha pahnih chauh an bang ta.
Chhunhleia chuan an hruaitupa chu a chempuoa thisen kai luaia kawh vu pah hian Paihte mawnghangpa i lu ka la dawn tia a ban puam thler duaih kara thisen far leh fap fap chu melh leh zawkin an pan ding chher chher mai zawng, Khamsang mihrangval rualte chuan Paihte pahnih la dam awmchhunte chu hual in, chu Paihte pahnihte chu an mang a ang takzet a ni
An hawina hmun a piangah Lusei keite rual thinrim hmel an hmu hi a ni ringawt tawh.
Leia tlu tawh la thi chiah si lo, thisenin a bual khat tlat tawh Paihte pakhat chu Chhunhleia chuan a bek samziala pawt che lawp in zawng chhe ho en ru le tih leh a chempui chuan a nghawng an chhawk sak zawk mai chu Paihte la dam awmchhunte chu an zamin an khur chhe lo chauh tawh a chha chu a ni.
Thanṭhianga chuan Paihte pakhat chu a hnungzangah hnangawl chung chuan an tlawh pawp mai zawng, chu mi a tlawh lengphei chuan a lu leh nghawng perhrang nawlh khawpin Thangzika chempui a daqn siah mai zawng, la dam ber chu ṭhingṭhi in khur hlawk hlawk chung chuan ngaihdam an dil a, chutah Laiveta chuan ngaihdam dil ngaiin tun hnuah i awm leh tawh ngai lovang tiin a chempui chu an vai phe zuaih a, Paihte pa, lu leh taksa chu a hrang leh ta nawlh mai le.
Duhtawk ang
No comments:
Post a Comment