BUNG 6 NA.(MUANTEA KHIANGTE)
Khamsang Lalpa chuan tlangaupa ka pasalṭhate rang takin ko khawm la, rang takin ka Lalin a lo thleng rawh se, an tih chuan Tlangaupa chu a chhuak nghal zat a.
Laiveta leh Saikhama te an lo thlen chuan Lalpa chuan ka pasalṭha leh ka khaw daingul te u, ngun takin ka thusawi tur hi in lo ngsithla dawn nia, hei kan chi khur in ṭawm chu, Hmunzau Lalpa dawihzep luat ah min ṭawm ve dang Paihte ho, Teizang chuan kan ram chhungah ngei mai an rawn vawk lal lén a, hei hi kei Khamsang Lalpa hian ka rem ti lo a ni.
Nakin zela ka vangkhua ti ral ṭi tu an nih theih avangin ka ram chin ah hian an lu lo rawlh lo turin ka duh a, an chhiah khawn khua ka nihna hian eng emaw zawng taka mi rawn nawr an tum dawn a ni tih hi kan hriat a ṭha, chu avang tak chuan engtiang in nge hma kan lak ang? An ti dap dap a.
Laiveta chuan a mitmeng rum ala Lalpa en kal chung chuan, an va ngampa in an kuang lo nawr an va ti na deuh ve maw le, Lalpa rawl rala chet chhuah mai ka duh a ni, ṭiau ral kan rawk khawp a, han chet ka duh tlat mai ka ti kwi zawng an tih chuan Saikhama chuan Lalpa Laiveta sawi kha ka ṭawnpui e, mahni khaw chhan nan hian timna kan tlakchham a ngai ve tawh a ni. An ti a.
Thangzika chuan Huan mawnga tla thin ar la dum thuleh awm hma-in han talh awk ila, tu-mihring mah rawn chhin eih lovin chu kan ar talh chu buh tlem nen bel-ah ngat kan chhum ang.Chu kan ar chhum tui chak lutuk tak mai chu Leh tih awm hman hauh lovin kan hrawkhrui nghal hmiah ang.Chu kan hrawkhrui tui chak takchuan hlet a rawn chhuah dawn taa....'Rul-muk fun ang' maiin a rawn che ta tial tial mai ang nga ! Thil-mak sawi nin theih loh rawn che tial tial-in par a han chhuang vu mai tur chu hmuhnawm thlira thlir a awl.Insual-pui tur zawnga a han phit ri dut dut thawm lo hria Thim Lal Kulhpui Khamsang mihrangte chuan inchapchar a cho thu chu 'vawk-chaw chhum so hlak hlak ri' ang leka zawi-sapin a lo chhawn ang nga Chutah,incho ve ve,huaisar tawpthang te han intauh chu Dullai Sial leh Vankal Sial insi ang maiin a rik hian a ri bup bup thei hial ang.Thlan-tla phunga invaivung hmasa zawk Paihte Lu lian ho chu thawm chhuah nep fe zawk Thim Lal KulhpuiKhamsang Mihrang val rualte chuan an seh zawi der dawn zu nia.
Chu avang taka, an Lak a pawisak ka neih lohna hian ka thisenzam kal lai reng rengte hi khumpui lama boruak siam tum ang hrim a a mi nawr nat zia hi sawi hian ka siak lo ve, tiin Paihte ho a cho zia leh a ngam zia chu hmui khur hlak hlak pah hian a thinlunga a lo pai ruk a rilru kamtu chu an sawi chhuak zauh a
Lalpa chuan khik suh pah hian Thangzik, i thu kam keu duh dan chuan ka tlangvalte tha thauna a pe ngei ang le. Chi ti zawnga kan thu a rual tlang chuan a thawhkhatna'n Thangzika leh Laiveta hian tlangval sawm ho se, hmeichhe derthawng te erawh in zuah dawn nia.
Silai fung 20 ṭha chauh kan kawl a ni mai si a, a tam thei ang ber silai khawm in tum dawn nia, an pasalṭha te lakah fimkhur va chhuah u la, ka khua hian a dai ngul tur zawnna ni pah fawmin hmalam in pan dawn nia, an ti charh charh a.
Lalin chhung; tap lama mei nung khu hlat hlat a, vawkchaw chhum vil mek Lal fanu hmelṭha chuan a rilru zawng zawngin Thangzik, ral ram lam i pan ni chuan vanneihna va chang la, keiin ka lo nghak reng dawn che nia tia Thangzika melh leh ralh pah chuan an ti vawng vawng a.
Lalpa chuan ka pasalṭha te u, ka taksa pengtr in ni a, chak tak leh huaisen takin in rilru khan hmalam pan rawh se, beidawnna hian in thinlungah hmun chang lul suh se, naktuk hian zing varṭianah kal ula, ka pasalṭha thih ngam lu pu te u, hlawhtlinna in neih theihnan duhsakna ka hlan che'u a ni, tiin an thurel chu an ti tawp nghal a.
Zan a ni a, zan khawthiang tak a ni. Thangzika leh Laiveta chu ti ti muk tak hian zawlbuk lam an pan nghal a, Thangzika chuan U Laivet, kan nau te hi kei chuan ka ring tawk asin an tih chuan Laiveta chuan nang berin an chunga rinna i nghah ngam a hnu, a rawl ralin kan chet chhuahpui ang nga a ni mai alawm, kan Val upa pawh hian min ho thei se a ṭha ang an tih chuan Thangzika chuan aw le, a ṭha e, zanin chu nang hma han hruai la, Lengi runsang i kai ang hmiang an tih chuan Laiveta chuan nuih rah rah pah hian Laihnuni malvar zia chu an sawi lang zauh a, Laiveta chuan Thangzik, kan khawnbawl upa min fanu mal mawii run i kai ang hmiang. Tih pah chuan Laihnuni te in lam an pan ding nghal a.
Laihnuni te in an thlen chuan tlangval dang te chu lo awm neuh neuh tawh in an khaw fiamthu thiam Beliana kam chhuak chu ngaithlain an lo nui ri leh ham ham ṭhin a, chutia an khaw pasalṭha pahnih lo lang tehnawlh chu tlangval dangte chuan ngun tak leh chik zet hian an lo melh hra hlawm a.
Laihnuni chuan ui tehmial che u chuan kha in mawng hung rawh u, keini run ve ah te in lo chuangkai duh a tih leh in siamrem pah chuan ṭhutna awl lam chu an kawhhmuh zung zung a. Laiveta chuan e khai a, Khamsang khaw mi leh sa nih a nuam ngai a, Kan khaw nula hmelṭha Laihnuni zun hian min phuar deuh tlat a kan hriat chu le, khawnge khuan hnuhnung thlek rawk khawpin aw Zika tih pah chuan ṭhuthmun an rem nghal zat a.
Laihnuni ilah mi â ni bik lo le, u Laiveta ṭhin hi, tuikhur mual lam nula zunin a phuarna viau che a sawi thawm ka hriat tlat chu le, nge ka beng hian a dawh fuh lo zawk le? An tih zauh chuan Laiveta chuan khaih khaih khaih, zan mut tinuamtu chu he tia in lai vel leh in che vel te, i biangsum lo lang leh kalh ṭhin te hi an nia sin, khawnge ka vaibel hi min han lakkai nghe nghe teh an tih zawm zat a.
Laihnuni chu nuih hak hak pah hian, U Laiveta kamlian hi chu aw, a nuih loh theih loh ṭhin zu nia, Thangzika melh ralh pah chuan U Zik, tunlai in thawhhma re eng nge a an le? Tiin a mi ngainat leh an run rawn kai ve tura a lo duh ruk em em ṭhin, tlangval ngawichawi tak leh zakzum tak, an khaw rawltharte ngaihnat rawn Thangzika chu melhralh pah chuan an zawt a.
Thangzika chuan hnuhhram chu kan zo lam lam ta e, mi hnung erawh kan chhoh en deuh chu a ni, thawktu rual lo tan zawng a lian mah mah zu nia an tih chuan Laiveta chu lo intawlh vat pah hian Zika hian Hnuni lawm che chak hian ka bulah hian a sawi leh ṭhin an tih khauh chuan Thangzika chu zak tih hriat ngawih ngawih hian a sen ṭawl ṭawl a.
Laihnuni chuan keini ve zawng, kan ṭuanin midangte ṭuan pha ve suh ei, lawmtu pawh kan hmu zo ve lo a chha chu a ni, ti daih ila, Hmunzau nena kan Chi khur inṭawm khian kaw dangah hlet neiin chu a hlet dang chu Teizang Paite ho sawn an rawn bawh e tih tgawm ka hriat hi a dik chiah em an tih chuan Laiveta chuan Thangzika chu an nghawk zauh a.
Thangzika chuan Laihnuni chu melh zawk pah hian nih te pawh a ni mahna le, mahni khua leh tui tana ke pen na hian kawng hrang hrang a nei ngai e, an tih chuan an khaw tlangval fiamthuthiam Beliana chuan chuti a nih chuan kan khuate te hi rawn hnaih zelin kan vangkhua tan hian a va ralmuang awm lo ve maw le, eng emaw kawngzawng tala dan dan te hi U Laivet a awm lo maw an ti a.
Laiveta chuan Belian, mahni khaw chhan nan chuan engpawh tih huam hun a awm ṭhin. A dam zawnga thil kan thlir tlat hian chhiatna min thlen thei a, thih ngam lu pu a, ke pen na hian rah ṭha min thlen chawk reng a ni, ka sawi awmzia chu, kan theihtawp chhuahin kan dang ang nga, kei ni, Khamsang khaw mi leh sa ralkai chin ho hian huaisenna kan neih a pawimawh a ni, tih pah chuan a hlauh loh zia an sawi chhuak a.
Tlangval ho an ngawih ṭhup lai chuan Laihnuni chuan a thinlunga hlsuhthawnna lian tak nei tih hriat ngawih ngawih hian, kei zawng an kawlhsenin do mi ah pawh ka lo ngai lo asin maw le, thin thia mutmu kan tuahlai te hian ui ka ngaihtuah ringawt pawh hian ka khur ru dar dar thei nia, Hmeichhe derthawng tak ka ni miau sia an ti sep a.
Thangzika chuan Khamsang khua hian mihrangval a neih belh dawn alawm, thih ngam lu pu a hmalam pan a ngaih hun a awm chawk reng a ni, Khamsang khaw tana ke pe tura huaisenna kan neih hi a ṭul a ni raw va taka chet chhuah hun a awm chawk a ni an tih leh lek phei chuan Laihnuni chu a tiril a khur ru deuh dar dar a.
Duhtawk ang
No comments:
Post a Comment