PÛMAH MI LU. BUNG 40- NA.

PÛMAH MI LU.


BUNG 40- NA.



Lalin chhung boruak chu a ṭang ṭha at at bawk a. Lalpa chuan a khual valte chevel chu chik ru tak chung hian a sir dinglama ṭhu ngawi ngal Zinga chu an thlek leh zauh a. A hmel la naupang tak leh hmaifanf ṭha zet te, a hmel en ai maha a pian dik zaih maite chuan a mit a la hle mai le.




Lalpa chuan pasalṭhate u, hring  in chan loh nan let leh zawk mai teh u. Lentlang lal fapa lah sawn khual thangin an chheh vel khuaah na na na chuan a hming pawh a chher ve tawh asin. A ni pawh saw deh khirh tak tur zu nia. Nunna hi a hlu asin an ti chhuak leh sap a. Chutah Zinga chu tho tharh in tap lam panin a Vaibel chu  lak kai an tum a, lal fanu chuan Zinga chu lo melh ralh pah hian khawinge keiman kan lak kai sak ang che tih leh ban an rual a.




Zinga chuan ka lawm e tih sap pah chuan mei chu an hnungpuak nghal a. Hei in khua chu a nuam hle mai. In tui tlanin a zir a niang nula hmelṭha pawh in kat nuk dawn hi a. Rawn in ben bel hial a nia ka nap an ti a. Lal fanu chuan nuih hak pah hian nula hmelṭhate chu kat ve nuk e le. In khaw nula ho erawh kan tluk lo nasa ang anti a. Zinga chuan khawilamah nang anga nula hmelṭha hi Lusei ho zingah an piang leh tawh kher lo vang an tih chuan lal fanu chuan ka rei maw nasa viau teh suh. Kei ve mai mai te zawng, a laktlak loh ber ka ni ngei ang an ti a.



Chutia lal fanu leh khual val in nel taka an han inkawm thawm an han hriat chuan lalpa pawh chuan a fanu hlim thawm chu ngaithlak nuam a ti zawmah zawk a. Ngaihtuah chhuah nei tih hriat zeta Saia melh pah chuan kan thudang alai chuan khawnge i nau? Saizingliana an tih ve fo, kum naupangtea pasalṭhaa rin luh ve a u a pgawk fuh e an tih huai huai ṭhin kha an ti a.




Saia chuan lalpa kan zingah hian, tap lama saw meihnungpuakin a ṭhut vung saw an ti sap a. Chutia an ti ti mial mial lai chuan lal tual aṭang hian meichher eng nen Lentlang lal fapa chuan lalpa i lalin mawi turin min chhawn dawn em? Lentlang khawtui tlan Lentlang lal fapa ka ni e an tih chuan Zinga chuan lal fanu hnenah chuan kan minghah te an lo thleng e. An lo thlen hun erawh in a zir lo a ni e.



Lemchan a ngai tih leh si chat hian an ṭhut hnaiha. Zinga chuan lalpa min lo hrethiam a ni ang chu. Tih pahin an mitmei zauh a. Saia chuan Zinga muang hman kan ni lo. Lunga Zatuak, Kuala nen hian lalin hi lo mawi ula, lal fanu i nunphung kha ti danglam hauh suh ang che. Tih leh lalpa pawh rawn lo chuan khumpui lam an han pan tlang a.



Lentlang lal fapa leh an pasalṭha Mangnova leh tlangval pakhat chu lalin chhungah chuan an rawn lut a. Lal fapa chuan Zohmun lal fanu chu nuih sak pah hian Vaibel chu an deh nun tir nghal zat a. Lalpa chuan tun ang hun hunah te, in lo tluang maw an ti ha a. Lentlang lal fapa chuan tluang a ni mai ang chu, lalpa, mikhual in nei tih ka lo hriaa, engti tura lo kal nge an nih le an ti ha a.



Lalpa chuan ranngo zawnga khual pang zin mai mai zu nia. An tih chuan Lentlang lal fap chuan a nih chu maw le. Khuangphah khua leh tuite an ni tih pawh ka lo hriaa, an lal fapa tana rangngo zawng pawh an ang zawmawh ka ti. Tiin lal fanu chu an melh sak a. Lalpa chuan a nimahna le. Kan khual valte lah chu an in ngaitlawmin biak lah an nuam narawh e an tih chuan Lentlang lal fapa chuan nuih hak pah hian lalpa, chu meikhup zul chungin a ni maw i khua leh tui an lo chuankai le. An hmel hmai te pawh hmuh a chakawm in an lo kalchhan dik tak te pawh han hriat ve reng reng a chakawm alawm maw le an ti a.



Chutah tak mai chuan le. Zinga chu khumpui lam aṭanga lo chhuak in Lentlang lal fapa kha i malpui ka hliamna kha a dam fel rawh maw. Kan lo nghak reng cheu a nia an tih chuan Zinga hmel Lentlang lal fapa in an hmu zet chu a phuchiang hle mai le. A nun zuahtu kha a ni miau a.



Lentlang lal fapa chuan a pasalṭha chu melh zauh pah hian Thantlang midawihzep ho chu in la dam a ni maw ab ti chang fak a. Zinga chuan i kehniak chhui tur hian khuanu hian min la zuah a ni e. A pasalṭha lam hawi chuan hei hi maw i chhuan em em i pasalṭha,Mangnova an tih chu tih leh melh kawk an rual a. Zinga chuan i inthiar fihlim dawn nge he buainaah hian in hnuk lut ve dawn. In lal fapa hi a nun ka zuah hnu a nih hi. Tunah chuan pialralah ka thawnliam ang. Lal fanu kiang rawh le an tih chuan lal fafu chu rang takin khumpui lam an pan nghal a.



Lentlang pasalṭha Mangnova chuan a mah chiang taka enkal tu chu thip zeta melh pah hian," nauchahai, ka pawisawi zawngin i ka kha ang hlek suh, Mangnova kawlhnam hian mihring taksa a duh teh asin. Mipafa i nih ngai chuan kan sawifel dawn em ni tiin a kawlhnam fawng chu an vuan chat a.



Zinga chuan pialral kawng zawh turin inring ang che. Tumah khan atso suh u. Chuti lo zawnga chet in thawh chuan a che hmasa a piang ngenmu tuarin pialral kawng in zawh ang. Lunga," lal tualah meichher chhi la, helai uicho hian min hmachhawn ngam a nih chuan lal tual rawn pan thla rawh se tiin hnungtawlh zawngin lalin chu an chhuah san nghal a.



Lal tuala lal thu leh hla ngaichanga pungkhawmte chuan lal tual laitaka tlangval la naupang tak kak hah a ding chu an han melh hlawm a. Chutah lalin aṭang chuan Zohmun khua leh tui ten an lo ṭih ruk em em Lentlang pasalṭha huaisen Mangnova lal tual rawn pan thla an han hmuh chuan inbeihna a thleng dawn a ni tih hrilhnawn kher an ngai lo hle mai le.



Meichher chu chhi eng zau zelin lal tual chu a eng ta pum mai le. Chutah Lentlang lal fapa chuan an chan a chhia tih hriain bik bona hun remchang chu an melh ve ngar ngar bawk a. A chezia ngun taka lo thlir ru rengtu Zasira leh Saia chuan rang taka karcheh nghalin Saia chuan aq ngaihnobei lem lo tak mai hian tum duh ting suh. Khua i tlai chhiava e. Buaina bultumtu i nihna khan hlauhna in a umzui zel che a ni.




Mahni khua leh tui tana kepentute lakah rilru kha pu in kha leh chen hun i lo hmang tawh. Tunah chuan i tawpna ni a lo thleng ta a ni e. Tiin a silai chuan an tin teu mai a. Zasira chuan rumala melh pah hian a silai ken chu phih thlaksak laqp pah hian midangte hmuh loh lai changin lalin chhungah chuan luhpuiin an phuar nghal mawlh mawlh a.



Lal tuala kei ka ni inti te in veh ṭhem ṭhem thawm leh in vozam tuma in hrosa thawm chu na hem hem tak a ni. Mangnova chuan bawh thut in Zinga hnungtawlh chu remchanga lak tumin vir zawkin a kawng zawnah chuan a kawlhnam chu an vai phe vuai a, Zinga chu ip zawkin a vunpui chu a tai thi pha hram a. Zinga chuan a beihpuipa chetran zia a hmuh chuan fimkhur a ngai tih hria in fimkhur zet chuan an veh phei ve da da a.



Zinga chuan Mangnova ke chheh chu uluk zeta en kar in a ke dinglam a insiamrem dawna a khaikan hmasak ziah chu man fuh nghal chat in Mangnova thapek lak lawh tawk tur chiah chuan Mangnova dinglam sirah chuan dawk chhuak zawkin Mangnova nak nemah tak chuan a kawlhnam hmawr zum ṭha eltiang chu an thiat lut chat mai zawng. Mangnova kawlhnam vaichhuak pawn Zinga chal vun a hlawi thi ve nghal ṭhawt ta tho va.




Mangnova makti lutuk leh a nak nem laia kawlhnam hriam tak bur vu chu melh tlawk tlawk in a ka an ang a. Thusawi turin chakna reng a nei tawh lo. A hmela mak tihna hlir tih loh chu hmuh chhuah tur reng a awm lo. Mangnova naka thisen tharlam tak lo dir tluk tluk chuan Zinga ke chu a far lum pep pep a.



Lal kaiṭen aṭang chuan Saia chuan Zinga Pasalṭhate hi na rei tak an tuar tir ngai lo ve an tih chuan Zinga chuan a kawlhnam chu phawi dawk zawkin an vir kual pawp a. Mangnova lu leh taksa chu a hrang ta nalh mai le.



Ring taka ṭawng chhuakin Lentlang khua leh tui tana ke pen ngam in la awm em? Tiin mipui lam chu an hawi kual a. Tumah rengin chhan zai an rel lo. An khaw leilung rawn rapa an mi ṭih ruk em em nunna latu chu makti tak mai hian an thlir ngawih ngawih hlawm a. Zinga chuan vanlam hawi pah hian unaute u , min lo thlir reng ang che u tiin a chal aṭanga thisen a hnar kawna lo luangthla ngiai ngiai chu an hui pawk a. Muangchangin leiah chuan a thlu bawkkhup thlawp mai a. A luhai lutuk chu a thidang zui ta a.



Lalpa chuan tlangvalte u kha Lusei pasalṭha kha ka lalinah hian rawn zawn lut teh u khai an tih chuan hrilhnawn leh kher an ngai lo hle mai. Lal sutpui bana Lentlang lal fapa leh an kaihhruai tlangval chu phuarbetin Saia chuan an dinchilh ran a.



Saia chuan lal fapa chu a chhip sama ṭham lawp pah hian nangmah vanga pawisawi lo ten nunna an chan nasat zia hi i hria em? Damtlak pawh i ni nek lo ve. Mahni anpuite laka hlauhna an thinlung chhunga tuh hi i bansan a hun tawh a ni. Lalin chhung chu ni lo se zawng ka chandarh vek tawh ang che. Khua var se se chaih in ka chaih ang che an ti thum chhak a.



Zinga luhai pawn ziaawm lam rawn pan chho in an rawn meng val deuh lap lap a. A kianga lalnu lo ṭhu leh a mah lo en kar tu lal fanu an hmuh chuan zawi sap hian lalnu ka lawm e. A va truh ther ther ngai ve le an ti sap a. Lalnu chuan vala, awmhahdam rawh. Tiin an lo dawm vat a. Zinga chu tawlh hrutin lal bang ngheng chuan an ṭhu thluang duai a. Zinga chuan a u chu va bia in ka u," Lentlang lal fapa kha zahawm taka pialral kawng zawh tlak a ni lo. In ngam loh chuan min bek bawr mai ta u la, an ti chang fak a.



Biakbuka chuan Saia chu biain lawmpa," ti hian an khawdai thlrng chaih phei ila, kha leh chen hrehawm tam tak mintawrh tirtu hi nuamsa taka khaweng hmuh hi a phu hlawl lo an tih chuan Lentlang lal fapa chuan zawi sap hian min ngaidam hram rawh u an rawn ti tham ṭiak a. Saia chuan i pa pasalṭhate khan hunṭha min pe bik hleinem. Tun aṭanga reiloteah hian i pa lalna khua saw meivapah a chang ngei ang.



Chumi hnuah Murlen leh Mualnuam khua ten kan chunga an tih ang kha an hmu let ve ang. Zawldawhna nun nei tura ke pen ṭhin khan timna kan nei hauh tawh lo e. Hei hi i pa lalna khua aṭanga chhuak a ni. I chhungte erawh kan zuah ang. Nang erawh chu ramhnuai pasalṭhaten an pawt darh ngei ang che an tih chuan Ralthankhuma chu hlauh luat vangin zunfep te an thloh a.



Lalpa chuan hetiang khawpa lal thisenkai misual hian ka lalin chhuat rah hi a phu lo ve. Ka pasalṭha rip ah khan zu khung teh khai an tih chuan Zahmuaka lah chu phur tak mai hian Lentlang lal fapa leh a nau chu an phih tho lawp a. Chutah Saia chuan lalpa thil pakhat chiah ka dil duh che an ti a. Lalpa chuan eng nge ni ta an ti ha a. Saia chuan i tlangvalte Zawlbuk kai an kim leh kim loh ka hre duh. Lentlang tana miṭangkai an lo awm mial takin an tih chuan lalpa chuan Saia finzia leh remhriatzia an hriat chuan a ngaisang thar leh zual sauh a.



DUH TAWK ANG.