PÛMAH MI LU. BUNG 41- NA

PÛMAH MI LU.


BUNG 41- NA.


Zohmun lalpa chuan ka ho hian zawlbuk i mawi ang u hmiang. Chuti ang taka Pasalṭha khualkai chin ten ngaihṭhat lohna lian tak an pai a nih si chuan beng tih thlep hun a ni lo ve. Tih leh chhuah vut an an rual nghal a.



Zawlbuk an zu thlen rual chuan leng haw ar an khuang al al a. Tlangvalho te pawn zawlbuk lam panin an khaw boruak rit tu tak chu ṭi dak in an lal thuchhuak ngaichang ranin hun an hmang hlawm a. Chutia an lal meuhin zawlbuk ningkhawng hre tura a ring a rawn fan an han hmuh chuan ngaihdan tawk an lo nei thiam nghal mai a.



Lalpa chuan Val upa Bela hnenah chuan i tlangvalte an haw kim tawh hlawm em an tih chuan Bela chuan zawlbuk chhung chu melh kual in an kim thu an hrilh chuan lalpa chuan Saia hnenah chuan Lentlang khaw tana ke han pen an awm lo a nih hmel e. Khawnge kan pasalṭha huaisen vunpui pilh pawh khawsik man tham pawh ni lo mahse buaipuia ngaihven a phu e, ti teh u i let ang u hmiang tiin lalin lam an pan ta a.



Lalin chhunga nula leh tlangval hlim nuiri chuan Zawlbuk aṭanga lo kir leh te beng a thleng chiang hle mai. Lalpa chuan nuih sak pah hian ka fanu hlim nui thawm hi ka hre khat tawh khawp asin tih leh rip chhunga Lentlang lal fapa a huatna chu zual sauh in a kut awng aṭanga lo rawlh chhuak chu an chhuih pawp mai zawng Lentlang lal fapa chu a ṭe ṭhawt thei hial a ni.




Lalin chhung an han chuankai leh chuan lalpa chuan ," Lentlang khaw mi leh sa te hi in kutah ka dah e." Tih pah chuan Saia chu an melh nghal a. Lalpa bawk chuan eng emaw thu hlaah chin va hriat ni suh, ti hian zawlbuk lam kai lo ta mai ula in lenna khawp chu ka lalin hian a zo em em ang che u an ti a.



Saia chuan Zohmun lalpa ṭharzia leh ngilneihzia chu mak hi a ti zawk hial a ni. Zingkhua a lo var. Mihrangval, Saia, Zinga, Tinkuala, Zasira, Lunga leh Thlahlova te chuan an thinlung hliama sernung tuh saktute khua Lentlang pan turin an ralthuam famkim nen rip chhunga an mi man te chu dim  na tel hauh lovin an chhuahpui nghal a.




Dai an pelh hnuah chuan Saia chuan a kawlhnam phawi chhuah pah chuan   Zasira leh Kuala chu melh kal pah hian kan chetdan hi a rawva mah mah in tih pawn ka dem lo che u. Tin nangni pawn hian min dem loh hram ka beisei. Pawisawilo nunna hlu tak suat in kan mit hmuhlai ngeiin kan lo seilenna khuaah lal an hrawt a. He mi laktlak loh hi a ni a bul tum tu chu tih leh zawi sap hian kan unaute tan tih leh vir zawk rualin Lentlang lal fapa nghawng chu an chhawk zawk mai a.




Lentlang tlangval la damchhun chuan leiah ṭhingṭhi hnawk in kunchal hian ka huntawp a thleng dawn e. Na rei tak min tuartir lo u la, tiang hun hi engtikah nge ka chungah a lo thlen ve ang tiin ka suangtuah fo ṭhin. In unaute hlarau a damna tur a nih phawt chuan ka lu hi la rawh u an ti vin ṭhawt a.



Zinga chuan a u chu melh kar chung hian a thinlungah chuan chu tlangval thih hlauhna nei miah lo chu ngaisan rukna lo langin a nun zuah chu a duh hle mai a. Chutih rual erawh chuan khawngaihna lantir chuan a zel a kai dawn tih a hrechiang thung lawi si. Saia chuan tim hauh lo chuan hei hi kan unaute leh kan thlahtute tan tih leh a nghawng chhawk zawk chu an rual a.



Ti chuan Lentlang khawlam pan chuan an kal leh ta vang vang a. Khaw kar kawngah zanhnih an han riah leh chuan losul haw hun awm velah Lentlang khawram chin chu an dai lut ta. An lo hruahman tawh angin Zasira leh Lunga chu Lentlang khawchhungah an lut dawn a ni.



Feh kawngṭum an pawh chuan feh ho haw rem chu nghakin pik karah chuan an han tawm far a. Saia chuan fimkhur tak khan va che u la. Lunga," lal fanu mizia kha ulutuk zet in va chik ang che." An chunga zahngaihna sangber kan lantir rau rau a nih dawn chuan vengmawng a in awmhmasaber kha thawt lawk ula, in hmelmate kan ni a, in hi kan hal dawn a in lo in thiarfihlim dawn nia in ti dawn nia.


An khawdaiah awmhmun kan khuar anga, Zinga hmahruai la, nang an khaw ramchin hrechiangtu i ni bawk a, feh hawtlai deuh lakah kan beng erawh kan chhit ngun a ṭul ang. Zinga kalzai rel rawh le, kan unaute tana hmalampan kan nihna hian zahngaihna pai hauh suh se an ti a. Zinga chuan hmahruai in lentlang khawlam chu an han pan a.



Nakin ah chuan an hnunga heiha dap dap thawm chu hria in kawngsir hnim  pik lai chu chuh vatin an lo nghak far a, chutah patling pakhat hian leihka thual ṭhatnan tiin raw changṭha zet tel lian ṭhatak chu rawn pu in thlamuan hmel tak hian feh kawng chu an rawn zawh chho a, Saia chuan a bula ṭhu Lunga hnenah chuan he pa hian minti khawtlai dawn tlat. Tunah che chhuak la, i thu a hnial erawh chuan i kap mai dawn nia.



Che rawh le an tih chuan chu pa chu Lunga chuan zui ṭhem ṭhem in an in kar hlam li vel a la awm tihah chuan che tawh suh. Chuti lo chu ka kap ang che an ti chang fak a. Chupa pawh chu a ding nghal chawih a. Chutah a mau put chu muangchanga leia dahthla in Lunga lam chu an hawi a. Chupa chuan tu nge i nih a? Engvanga min lo lambun nge i nih an ti a. Lunga chuan i hmelma ka ni e, leiah khan ṭhingṭhi la, kan hnungah in khaw mi leh sa an la awm em an tih chuan chupa chuan naupang ka chhan che chu beisei duh suh an ti chang fak a.




Chutah Lunga chuan a fawng chelhtu lakah atso duh ting suh. I nunna kha i la hlut a nih ngai chuan min tih khawtlai tum duh ting suh tiin khur map lo chuan a lu zawnah an tin to mai a. Chupa chuan a hmaa ding tlangval la naupang tak, hmai tlang hriam zet leh taksa te lam, fip ṭang chu melh kal pah hian ," Vala, Lentlang leido ni tura khawi khaw lal khua leh tui nge i nih le an ti a," Lunga chuan a thinlung chhunga rilru natna lo lang chhuak in , pawisawi lo nunna hlutak suata, pialral kawng hun lo taka in zawhtir hnu a an in leh lo inhal sak Thantlang khawtui tlan ka ni e.



Chumi rullet tura lo kal kan ni. In khua leh tui hi meivapah a chang dawna, kan loh tawrh hnu hrehawmna tinrengin a umzui tawh ang che u. Mahni pawha raldo ngam lo lal dawihzep khua leh tui nih kha zak hle rawh. I nunna hi ka kutah a awm tih hria la an tih chuan chupa chu phawkhra chung hian a hmaa tlangval chu en ngawih ngawih hian a ni maw, ka nunna la ta ula kan khaw tlangvalten an rawn umzui ngei ang che u an ti a.


Lunga chuan kan hria ang chu, in lal fapa leh in pasalṭha Mangnova pawn pialral aṭangin kan che vel hi min lo thlir reng tawh ang. Hei hi famkhawlawitate tan ni rawh se tih leh silai hmehpuah an rual a, chupa chu hlawm nawkin a ke chu leng fat fatin reirial lovin khawvel a chhuahsan ta a.



Saia te chu lo chhuak in silai ka hmetpuak ta sia engtianga hma han lak chi nge ni dawn? Khawchhung kan luh pawh chu a va him dawn ta lo ve an tih chuan Saia chuan kap tura ka duh chhan che chu a ni hi an rawn zawng ngei dawn a, an rawn zawn chhunga tlang lam aṭanga hel in lal chhungkua kan kuta a awm kha ka thlang ta zawk a ni. An tlangvalte an liamfel ve leh in kan hal ang nga, an buai chhungin kei leh Thlahlova hian lal chhungkua kan lo thunun dawn a ni.



Tuikhur mual lama in awm hmasa ber kha in rawn hal ang nga. A piahah pakai zelin in bitna lai in rawn hal leh ang. An chiai chhungin lal inah ro kan lo rel ang nga, lal chhungkua rawn chhana kan lama rawn hnai a piang tim hauh lovin kan lo sai ang a ruang hi pik karah dah ila a lu hi lak a rem dawn lo va a beng kha tanla Lunga kan chet vat a ngai a ni an tih chuan Lunga chuan a mi thahpa beng chu hlep in an ak ṭha than a a ruang chu hmin pik ah zalhin khawchhung lam an pan nghal a.



Zanriah kil thlenga an khawpa lo la haw lo chu a chhungte chuan lal hnenah zualko in lal an han pur a, Lentlang lalpa chuan eng em a chungah thleng lo turah ngai ila zanriak kil zawhah tlangaupa ka tlangvalte ko khawm la, Khumtiri pa chu zu ngaihven teh se. Thlamuang tak khan awm rawh u, eng em a thleng lo vang tiin an lo hnem a.




Zanriah kil zawh a lo thlen chuan Lebtlang tlaangaupa chuan tun thlenga an khawpa  ramkal a lo la thlen loh thu chu pang dap dap in tlangvalho chu lal tualah an kal khawm sap sap a. Lalpa chuan a tlangvalte hnenah thu awmzia an sawi chuan meichher nen ram lamah an liam thla nghal a.



Lentlang khaw tlangvalte rwi mawi tak an thang hnu chuan Saia chuan chet a hun e. Min pel kim ta bawk a, tih leh tuikhur mual lam panin in lo awm hmasa berah chuan lutin Putar leh nutling pakhat leh naupang pahnih hi an lo awm a. Chutia an rin loh taka mikhual an hriat ngai loh hmel an hmu thut chu an phawk hra a. Saia chuan ka pu, in khua hi kan hal dawn a in pasalṭha leh in lal fapa pawh kan kutah awmin pialral kawng kan zawhtir tawh. In in hi kan hal dawn a, chiai hauh lo khan lo in thiar fihlim rang rawh u. Chutih rual erawh chuan zualko a lal hnen in thlen chuan in chhungkua hi in mang ṭhak ang. Thutam sawina hun a awm lo ve. Thantlang pasalṭha Saihmingliana ka ni e an ti chang fak a.



Chu hming an han hriat chuan chumite chhungkua chu an hlau in an thla a bar hle mai a. Hlauthawng taka an neih thil hlu te khawma an in aṭanga an thiar chhuah hnu chuan an in chu an han hal sak a. Lentlang vengmawng aṭanga kangmei lo chhuak chuan Lentlang khua chu a ti thlabar ngei mai le. Lentlang lal fanu chuan zawi sap hian a hun a lo thleng dawn ta an ti sap a.




Ti chuan indang pawh kangkai zelin a khawbuai chuan an buai ta. An tlangvalte lah an khawpa zawngin ram lamah hun an hmang mek a ni si. In bitna lai kangkai zelin Lentlang khawchhung laili a kangkai zel a. Ṭap thawm leh lungngaia aw chhuak ri chu Saia te tan pawh ngaithlak hrehawm tham a tling ve ngei ang le.



Lalin lam hualin lalin chhung an han dai lut. Inkang ṭhelh tur pawn tlangval tih tham pawh an awm si lo. Tar leh upate chet a ngai, thingnawi faqm rual chen in an phek buai ta luih luih mai si. Saia chu rang taka lalin chhung luh pah chuan lalpa chu bangsi rawp khawpin a nghawngah an rek bet nghal a. Saia chuan i thil tih pawizia hi i hria em? I fapa pawn pialral aṭangin kan chet dan hi min lo thlir reng ta ve ang.



I pasalṭha Mangnova pawh kha tunah chuan pialralah siang a lawi ta e. Kan chungah khan ṭhat lo chhuah ta la, tiang hi a thleng lo tur. I nun erawh ka zuah ang. Chutih rual erawh chuan hrehawmnain i nun i hmang tawh ang. Thantlang pasalṭhate hi an thinlunga sernung tuh chi kan ni lo ve. Tih leh lalpa bula lo ṭhu kun lap lal fanu chu phih thawh lawp pah chuan lal thisenkai chu ni lo la ka naute kutah i awm tawh ang. Ka kawruak lutuk tur venna che chhuak la, i pa lalna khuaa inkang khu thlir ang che.





Timna nei hauhlova lo penchhuak Thantlang pasalṭhate mit hi ti kham hauh suh ang che. I pa tlangvalte ho hian kan laka chet an thawh duh dan khan rullrt tur an nei eṭ Tih pah chuan lalpa chu a silai kawm chuan an chhu ṭhu hnawk mai zawng lal fanu chu ṭe ṭhatin zahngai rawh u an ti khanglang a. Lalin chhung rawn dai lut chian Zasira leh Zinga chuan Saia chu melh ralh pah hian an tlangvalten khawchhung an rawn pan mek an ti a.



Saia chuan lo pan ang hmiang, an chantawk an hmu ang. Thantlang pasalṭhate pawisawi ṭhat loh zia hi hre rawh se, tia a sawilai chuan Lentlang tlangvalte chuan lalin lo panin an in hrosa kuk kuk hlawm a.



Duh tawk ang