THLA BIAL ZAN. BUNG 3- NA.

THLA BIAL ZAN.


BUNG 3- NA.



Zan a ni a, zan reh tak a ni. Kulha chu a nghar mut kara, a chhan chu englai pawha in ral rin a ṭulzia hrechiangtu a nih vang a ni. Zingkhua a lo var, Lengsir nula hmelṭha Thangveli tui chuh tur rawn tho chhuak chhuan tap lam panin mei an chhi eng teng teng a, Kulha bangkil lama lo meng tle kar an hmuh chuan," Kulha, mutmu pawh i tuah meuh na nge? Nge ni a, i mutna khan a zir lo lam zawk tiin an zawt a.



Kulha chuan mai mai a, thawh ka hai lek lek alawm maw le. Mang lam ramah lah nang ianga nula hmelṭha han hmuh zet zawng haw kawngte pawh a tawi tak te ve ang an tih chuan Thangveli chu zak sen am am pah hian ui leh, i daw mah mah e, keini ang duang, i mit khawhawi kha a la zim a nih kha, Kulha vawin lamah haw zai in rel ang maw? In thu leh hla te kha in titi kam liam aṭangin beng dawhin ka lo hre ve nual a, in lal chuan pawm thiam har a ti ngawt ta ve ang. Ka huphurhpui hle mai che an ti sak a.



Kulha chuan mai mai ṭhin a, engpawh thleng thei a nia dawnsawn dan tawk lah a thiam turah ngai ang. Tun a chinah chuan hmelma en a kan in en a ngai tawh dawn si a, mipa damchhung lah hi leido nei na na na tan chuan a tawi tak mai si a, pialral aṭang talin i che vel ka lo thlir ṭhin a ni ang chu. Dam hauh la, hlim reng ang che an ti a.



Thangveli chuan Kulha, chutin thu an chhak chhuak ngai lo. Keini aia khawte zawk in nihna a lang a ni mai a, chu chu kan lal hian hreran chungin in thu a benkhawn duh lo te pawh a ni mahna le. Rawl rala che chhuak mai thei turin kan lal hian ka u te hi thu a chah ngei ang, lo him hram i tum dawn nia tiin Kulha chu hmuh leh pawh in beisei lo takin thu an chhak chhuak a.



Kulha chuan ni e, chutih rual erawh chuan kan khaw mi leh sa te sawn an nun an chan chuan a let zelin kan thungrul ngei ang. I u pawh i lo hrilh dawn nia. Khawnge tui te pawh i chuh dawn lo em ni an tih chuan Thangveli chuan chuh dawn e le, hei a la hma alawm, in khaw lam pan hma in duhawm sia, mi hnung kan zui mai a ni ang chu. Kan mamawh tawk thal tur te chu kan chang mahna le an ti nem dam diai a.



Kulha chuan tap lam hnaih in Thangveli bul a va thlen chuan Veli ka ngai dawn hle mai che. Ka ngaina che tih hi i lo vawng reng dawn nia. Hma hun hre lawk lo mah ila, engtikni ah emaw chuan kan in tawng leh ngei ang. Pasal lo la nei miah suh ang che an tih chuan Thangveli chuan i sawi awmzia ka va man lo ve Kulha, tar leng ṭhak turin min duh em ni? Nakin lawkah te chuan pasal a chhia a ṭha te pawh kan la hmu ve ang chu an ti a.




Kulha chuan ka thusawi hrethiam lo rual i ni hauh lo. Veli, ka ngaina che ka tih tawh kha an ti a, Thangveli chuan in ngainatna hi chu chhum reilote lo langa ral leh ang lek chauh  hi a ni a, hunin a liampui anga he leia i hmelhriat satliah ang chauhin min en tawh ngei ang. Fiama bawlzan rual lah ka ni hek lo. Ka thinlung hian duh a thlan tawh chu hmangaihna leh ngainatnain ka thlunzawm tir reng ṭhin.




Thlasik boruak in mung ṭan pawh nghak hman lo va ankanem min hlan dertu vawitam ka lo tawng tawh asin Kulha, fiam mi ka ni lo. Zep hauh lovah chuan khawi khawlal fapa te mitmei pawh vawitam ka hmu ve tawh e, ilaka ka rilru sen nasat ang hian ka la seng ngai lo. A piang ve a ni tih pawh ka hriat miah lo kha mitkhap kar lek in ka hmaah a lo in lana, reilote ah a ni chuan min ngainat thu min hrilh a, Kulha, nula mi tak i ni tih ka hai hauh lo. Mahse ka dem lo che.



Khaw khat pasalṭhate chu in hlu a lal upa te aia a dah chungnun zawk pasalṭha chuan a duh duh a kawp a thiang asin, chutiang mi chu keini hmeichhiate hi kan ni ve lo asin i hrethiam lo a ni Kulha, tluang takin in khua in thleng anga, hmuaktu che leh lo ngai em em tu che pawn hmuh hlan che a nghakhlel ta ve ang.



Nang, pasalṭha fing leh thluak leh khabe sep thiam te chu khawi khaw lal tuitlang duhber i thlang thei ang chu. Kulha, mite aia thil ka lak urhsun bikna hiam min hneh leh ṭhin a min hrethiam dawn nia, i nula hip zawng ka ni ve hauh lo vang tiin a ke chuan tapa vut chu an thai neuh neuh a.




Kulha chuan Veli, in dahsanga in dah chungnunga chapo tur hian engmah ka ni lo asin, a va pawitak em, kan leido khaw nula lakah rilru ka lo senga min ngaidam ang che an ti a, Veli chuan Kulha, keia ngaihdamna chhan tur che i awm law, ka hnena i thu vuaktlak khan ka thinlung a sawinghing rualin khuanu hian inkawp rem turin min duang si lo.




Thlangvawngin parmawi tak a chhuah a, khaw thlanglamah ni a tlak dawn leh lengkir kham kara chhimbal a zam changte hian min lo hre ve reng ṭhin dawn a nia. Kulha, ka ṭawngka chhuak i lawm loh zawng a nih chuan ka dem lo che a nia, tiin a kianga tlangval nunnem leh zaidam, hmel pa tak a thinlung chhunga a duh ruk em em chu a mit meng mawi tak chuan an melh ralh a.




Kulha chuan Veli, i sawi chu ka hrethiam a ni ang chu. Khuanu hian intawng lo tur min in tawn tir a nih ber a nih hi. Ka hnuk a chah dawn thleng pawn ka hrereng ang che. Chu chu hmangaihna dik tak ka hlan thiam ve dan a ni tih hi min lo pawm sak dawn nia. Veli i lakah hian thil pakhat ka phut a nia an ti a.



Veli chuan Kulha, keive mai mai lakah phut i neih te chuan sawi ta che. Ka thiam zawng leh theih zawng a nih te chuan ka hnial hauh lo vang an tih chuan Kulha chuan ka liam tur thleng i mitmeng mawi tak khan min thlir ka phut asin an tih chuan Veli chu a nui chhuak hawk a. Kulha naupangchhia ang mai hian che suh. Tiin an chum taih taih a. Chu ve leh Kulha chuan lo kuah thlawp in Veli, ka damchhungin ka hmangaih reng ang che.




I tan engpawh ka huam asin, a rukin nang hmu tur che hian ka lo kal fo ang tih ka tiam a che. An tih chuan Veli chuan Kulha, ka chhungten an hria ang nge min thlah ta mai la, tin kei hmu tura i lo kal chuan mahni luzuar i ni mai dawn asin, thil tih chi lah va ni suh. Kulha min thlah rawh naupangchhia ang mai hian che lo teh, tiin an phun sap a.

Kulha chuan,Veli, ka tana pai nuam i ka aṭanga ka hriat hma loh chu ka thlah lo vang che, i hmelmawina hian min bual â zo vek tawh a nih hi. Ka nupui atan ka duh che asin an ti a. Veli chuan Kulha, i dawnchiang lo a ni. Nang kan leido i ni a, i laka thu ka lo tiam a nih chuan kan lal phatsantu chhungkua kan ni mai dawn asin. A reng rengah ka u hian zah a phu bawk an ti leh a.



Kulha chuan Veli, Ni pawh acrawn mawm ṭan a nia, hun ka nei tam tawh lo, nangpawhin, min hmel duh ve thu sawi rawh an ti a. Veli chuan Kulha, mipa piang tawh zawng zawnga ka ngainat awmchhun i ni. Chutiang taka ka lak aṭanga i phut a nih si chuan ka laka i inhuamna kha vawng reng ang che. Keipawn fimkhur ka lo chhuah anga, i hmel lo lan beiseiin leikapui aṭangin kawtchhuah ka lo thlir ṭhin ang.



Tin hei erawh vawng tel bawk ang che. Kan lal fapa khian min hel fo ṭhin a ni tih hi an tih chuan Kulha chuan ka lo vawng reng ang. I tan pialral kai pawh ka huam. Dam lo hauh lo, i u kha ka ngaina hle bawk a ni tih min lo hrilh sak dawn nia, pasalṭhate anga huaisenna nei turin ka duh che a, kan inkar hi i chhungte chauh in hre rawh se. Kan in hmuh fo theih nan i u kha lo hrilh la, i u bulah Thla bial zan a lo thlen leh ve leh ka rawn tlawh tur thu i lo sawi dawn nia.




I u hmel hmai pawh ka hmangaih vang che in ka hmu ngam meuh dawn em ni? Tiin a chal ah an fawh sak zauh a. Veli chuan Kulha nang pawh i damkhua sei se, fimkhur tak zelin aw, hunlo taka pialral i kai chuan khaw eng ka hmachhawn ngam hauh lo vang. Kulha, ka ngai dawn hle mai che an ti let ve sak a.



Kulha chuan Veli, rinawmna lo vawng la, i taksa pengtin te kha tlangval dang lakah lo veng ang che an tih chuan Veli chuan Kulha, theihtawp ka lo chhuah ang an tih chuan Kulha chuan Veli biang taitek ah piai sak zauh in keipawh ka lo fimkhur hle ang an ti a.



An thusawi zawng zawng Pu Thawma te inhnuai aṭanga lo ngaithla kartu Lengsir pasalṭha ralhrat khawkheng, sa leh ral hmaa zam ngai lo, Lengsir nula hmelṭha Thangveli u Zaduna chuan engtin tak ngai ang maw?



Lo nghak la dam hauh la bungthar a chhuah hma loh zawng lo chhiar nawn zel mai rawh aw. Keimah chu fakin awm rawh se.