THLA BIAL ZAN. BUNG 9- NA.

.

THLA BIAL ZAN


BUNG 9-NA


Luanghmun lalin boruak rit ru tak karah chuan Luanghmun pasalṭha Mausela chuan a ep chiah ṭhu, Khawkulha chu melh ding ngar chung hian U Kulha tlemte chauhin i danglam mai ka ti, engti tiha kan khua lo chuangkai nge in nih tak le tiin a thinlung chhunga rilru pai chu phawrh chhuak duh hauh si lo chuan hre lawksa vek mah se an chhimbudawi a



Khawkulha chuan Sela, i pianṭo reng a ṭha e. In lal pawh hawisang thei khawpa pasalṭha chhuanawm nei na na chu hei a hnung min chhawn lo chauh zu nia. Lengsir lalpa thu kenga in khua lo dai lut te nena remna saui in tanna thukhawchang bengdawha ngaithla turin hei a ṭulna in min ur thlu ngang a ni ang chu in khua kan rawn dai lut a ni an ti chhuak chhak a.




Mausela chuan lal sutpui ding awn diaia inkuangkuah thana ding tlangval la naupang tak leh pianṭo dik zet chu melh leh kawkin vala, i hmel hi ka mikhual lo tawp mai ka ti, chutih rual erawh chuan kan lalpa hian Lengsir khua nena remna saui a tanpui thu khaw changah chuan sawi tur ka nei hauh lo va, Phulzau nena in ramvalh chin in a huam phak loh Zawnglui kam ram changṭha chung changa in buaina hian Lusei khua a fan chhuak rang hle mai a.






Ṭanpuina dila kan lal awp khua lo dailutte hi kan lal hian a enliam dawn hauh lo tih hi in lo hriat atan ka sawi lang hram ni se an tih chuan lalpa chuan Zawnglui fin thlaa Runlui thlenga ram awl khu engtiang chiaha awhawm nge a nih zawng kan va hriat phak va ni suh. Chutih rual erawh chuan ṭanpuidila ka khua leh tui lo chuangkaite hi hnunglam chhawn turin min duh vanga nangni lo lawi lutte hian thubul han sawi ta mai ula an ti a.



Khawkulha chuan khu Zawnglui kam ramchang ṭha zet khu tu khua leh tui kutah mah a awm kan phal dawn lo va, a awm ngai hek lo vang. Duham chin nei lek lo va, mi nek duhna thinlung neilian khua ho hian kan khua meivapa a chan pawh an duh hial ang. Lengsir lal pamham leh duham zet vanga in khua lo dai lut theiloa min siamtu khua hian ka ralthuam an hmachhawn ngei bawk ang.



Mipa fa hian damrei kan thlahel lo ve. Lalpa, Lengsir khaw buainaah hian i pasalṭhate meizanghlaptuah i rin lut dawn tih na em ni? Chu chiah chu ka hre duh an ti a. Lalpa chuan ṭanpuingaia min ngentute thinlung chu a ni lo zawnga sawi danglam ka tum lo va, an tan theihtawp ka chhuah ngei ang an ti chhuak chhak a.



Khawkulha chuan a chuti zawnga i rilru sukthlek i kuaiher dawn a nih chuan in tan leido kan ni dawn tihna a ni mai a, i tlangvalte lrh i pasalṭhaten pialral kawng an zawh phahna tura hmalam pantir i nihna hian inchhirin tlailuat a nei hauh lo vang. Mahni pawha ral bei ngam lo khawpa dawizep khua te hian an tum ram lamah chuan ke rawn pen rawh se, lalpa, ti hian i khua hi kan chhuahsan nghal mai ang. Dam lo hauh la, i tlangvalte khan min hel dan kawng lo dap rawh se. Chuti lo chu Khawkulha hian chawl hauh lo vin a hriam a lek chhuak dawn si a an ti chang fak a.




Lalpa chuan uai, chuti zawnga ṭawngka i len fo mai le. Thei berah in ngai hauh suh. Ka dinhmunah hian ding ve ni ta la, Lengsir khuate hi i ṭanpui mai lo"ng maw an ti chhuak leh a. Khawkulha chuan i tan lawmman ṭhatawk tak an tawktarh che tihna a ni mai lo maw? I tana ṭangkaina nei miah lo leh buaina pawh i khua leh tui tana siam ngai hauh lo vah i pasalṭhate hmatheh ah hmangin ring i rawlh tir dawn a, lal hmasial tak i nihna hi bansan a hun tawh asin an ti piap piap a.



Lalpa chu ding nghal zat in Khawkulh, ka chawm ka hrailen ni ṭhin khan zahpah lek lovin ka lalin chhungah ti khan min ankhum ngam a maw, ka tlangvalte thinso i hmachhawn hma ngei hian ka khua hi chhuahsan rang rawh, chuti lo chu pialral kawng i zawh ngei ang an ti a.



Mausela chuan U Kulh, kha leh chen min lo enkawl chhoh naah ka zah che. Chutih rual erawh chuan engkim hi a danglam tawh, nang zawng ral han hmachhawn tur chuan thlasik i pal hnem lua tawh e, tap lam mawitu atan chauh i tlak tawh kha an tih chuan Khawkulha mitmeng vamham, a thinlung chhunga thinrimna pai insum tak chung chuan,Mausel, tap lam mawitura min duh chhan hi i hmaa ka din i hlauh vang a nih chuan a hel zawngin ṭawngka chhak chhuak lo la, pawnfen feng tlak pasalṭha i ni an ti a.



Chutah zet zawng, engkim a danglam ta, chuti fakaua hmuhsitna ṭawngka la dawng ngai lo tu Luanghmun pasalṭha Mausela chu ter at chunga ding chhuakin Khawkulha lam an pan chiah chu rang taka Taikulha dawk chhuak zawkin a pa hmaah tak dingin mit khap lek lo vin an in melh dun ran a. Zamna in a man tel loh, chungnun zawk nih tuma hnai taka in dinchilh pasalṭhate pahnih dip chu a na hle ang le.




Mausela chuan tlangval kiang mai teh ka chhawn hian a hem ang che tia nawr sawn an tum chu thingzung nghet taka in kaih kual ang mai hian a lo rinawm in chu tlangval chu a che laih duh chauh a. Mausela chuan kiang mai teh tia a ban dinhlama nawr kian an tum chu Taikulha chuan rang mangkhenga Mausela ban lak rualin lalin tap lama vut an chhek khawl ah chuan a lu chanve phum hmak khawpin a banah la lawkin an theh phei tehreng mai chu Taikulha chuan rang taka a lo thawh chhuah leh hmaa va nagchin leh nghal zatin Mausela hnungzanga a kephah hlai taka rah chu rualin nang ang hmachhawn tur hi chuan ka tha hi ka ui viau asin.




Lalpa Khawkulha fapa Taikulha hian a taksa za a reh hma hauha min hmachhawn ngam i mi rin tawk nunna hi ka kutah a awm tih lo hria ang che. Tih leh Mausela ṭham thawh pah chuan a khabeah tak mai chuan an kuttum chuan an lawk leh bur mai chu. Ka pa ka bengri hriatah han sel leh teh, tih leh chhir an rual leh zat zawng, Mausela chu nikhaw hre loin lalin chhuatah chuan a mu hlawm ta reng mai a.



Taikulha chuan lalpa lam pan pah chuan Ria, i chengrang khan lal hi chu hmachhawn suh se, ti hian an thinlungah min huatna nasa tak kan tuh sak tawh, hnunglam aṭanga min lo bei duh thinlungpu in awm takin i fanu hian kawtchhuah thleng min thlah ang, Phulzau tlangvalte hi i pasalṭhate laka tlawma hnungtawlh chi kan ni lo tih lo hria ang che.



Lengsir khua te chu lo ṭanpui mawlh teh, i tlangvalte kutah kan khaw tlangvalten pialral an pan a nih zawngin in khua hi meivapah ka chantir ngei ang. Lo kal rawh le lal thisen kai kut kan thlak ngai lo i him ngei ang tih leh lal fanu bana chelh rualin lalin an chhuahsan a. Lal fanu chuan a pa chu melh ṭawk ṭawk in a thinlunga hlauhna chuan zual lam pan zelin a chelhtu tha pek lah a na in han tal pit ziazang chi lah a ni si lo.




Lal leihka aṭang chuan lalpa chuan a fanu thlaphang hmel chu hrehawmti tak chung hian a thlir dauh dauh a. A tlangvalte ho chuan Kulha te chu ralthuam nen fimkhur taka zui in Kulha te pawh chuan lo hnai suh u in lal fanu hi engtin mah kan tina lo vang, kan thu inawih loh chuan in lal fanu hi kan khua thleng kan hruai anga sal ah ka hawn ang an tih takah chuan chu thupe awka chu hnial luih chi a ni lo tih hria in thuawih takin an ralthuamte chu lei lamah an dahthla riai riai hlawm a.




Kawtchhuah an thlen chuan Kulha chuan lal fanu min ngaidam ang che. Kan himna tur kawng kan dap lo thei si lo va, ti khan let leh tawh la, i pa khan a tlangvalte kan khaw lam hawiin ralthuam a lek tir a nih vaih chuan nang ngei pawh hian i tuar tel tawh ang. Kal rawh le an tih chuan lal fanu chuan kan pasalṭha silai kha min pe let dawn lo em ni an tih chuan Kulha chuan nuih sak pah hian a mah ngei khan rawn tlan rawh se kal tawh rawh le an ti a.




Lal fanu chuan mi nunrawng leh pawisak nei lo tak i ni. Tih leh hawi let map lo va khawlam pan an rual a. Roliana chuan lal fanu hmelṭha chu a deh a khirh zek ta ve ang, ti kha chuan an rilru sukthlek pawh a dang mahna le, tiin a kianga ding Kulha chu ngaisang tih hriat tak mai hian an melh a.




Khawkulha chuan ti ru le naute u, a rang lamin hma i sawn teh ang u khai, min umzui duhtu a tam zawk an nih hmel e tiin kal zai an rel ta a.




Luanghmun lalin chhung ve thung chu a reh tlawk tlawk a, Mausela pawh chuan ngai rawn awh leh tawh in ka chengrang a chawi haw a maw, pialral thlengin ka zawng zel ang. Tiin a khabe ruh chu an tuai vut vut a. Lalpa chuan kha nau kha zawng a danglam ngei ang, a lakah i fimkhur hle a ngai ang. A che reng reng kha a rang lulai em mai, Sela, i beih mi a nih loh kha,chutih rual erawh chuan ti khawpa ka lalin chhung ngeia ti thangtlawmtu che chu kan thlahthlam hauh lo vang.




Thla bial zan, thla dinglama Arsi a lan hun kan nghak ang nga, Lengsirah lamkal in tirin Phulzau khua saw ding leh ngai tawh lo turin kan suasam ang. Hei hi kan bulṭanna chauh a la ni e. Tiin a Vaibel chu thinrim tak mai hian a biang khuar kak kak chung chuan an hip tawn tawn a.




Khawkulha te chuan an khaw kawtchhuah an thlen chuan lalin lam an panding nghal zat a. Lalin an han thlen chuan lal chuan thu kal lam haw lam an lo zawt thuaia, hahzu te zukin lal inah chuan an ṭhu bial ṭhaih hlawm a. Lalpa chuan ka pasalṭha chhuanawmte u in thu leh hla te ngaithla turin ka in peih e tih leh Taikulha kut veilamin Chengrang pakhat a hum chu melh sak pah hian thil a nih dan tur chu a chhut thiam thuai a.



Khawkulha chuan lalpa an pasalṭha chhuanvawr pakhat chuan ka naute thin a khei deuh a ni ang chu a nunkawnga a hriatreng turin sernung kan han tuhsak hlak kha, chuti zawng chuan kan buaina inṭan tur in mung ṭan lam hi kan sep rawtui a ngai tawh ngei ang. Vanglainun pawh min chhuikir tir uaih uaih mai ka ti.




Luanghmun pasalṭha Mausela chuan lal banglaia a thiah kha lo hawl chhuak tawh mai se, lalpa, chutih rual erawh chuan fimkhurna kan pai tam lehzual a ngai ngei ang. Lengsir lalpa nen remna saui tanin tunah hian an in buatsaih nasa hle tawh ang. Ralvenbuk lam pawh kan thuam ṭhat lehzual a ngai an tih chuan lalpa chuan buk nghut pah hian, khawnge ka pasalṭhate sah ensa ring chungin vanglainun dawnkir chungin khawnge ka chengrang hi vawikhat na na na chu kan chawi leh teh ang tiin an nui chhuak vur vur a.



DUH TAWK ANG