PÛMAH MI LU. BUNG 44- NA.

PÛMAH MI LU.

BUNG 44- NA.


Murlen tamvalh chin, kawr ruama mihrangvalte chungnun dyh vanga in ep ran te chu Ni lu chuan a rawn chhun det det a.



Hramthiam chitinrengte chuan an thiam ang tawkin an aw an chhuah. Phengphehlep leh Khauchherte chuan an kawppui ṭuanna mual lam an pan. Kawrte tui luang ri her her chuan mihrangvalte in ep ṭhap te chu ngaipawimawh hauh lovin luanzai a rel zel a.




Laiking pawn bel rawh turin lungawina tlang lam a pan, hringfate hmuh loh tur chuan hmar lam hawi chuan a vak chho zel a. chulai ruam chu chengrang zen rim chuan bawk khat luk mahse, mihrangvalte chuan khawdang hawi chi a ni lo tih hria in an kianga an hmelmate ṭheuh chu inring rakin an melh ran hlawm a.




Biakbuka chuan Zinga chu melh kal chung hian hei chu ka chanpual tiin penkhat a rawn pen. Murlen pasalṭha hruanghrau nazet chuan Thantlang tlangval hmel la naupangtakte chu thlek ha hian a kawlhnam sei reng ruang chu nghet taka hum chung hian ka hmaah hian in zam chhe mai em ni? Nge ka hmaah bawkkhupa ngaihdam min dil turin in rilru in kalding tir le tiin an nui huah huah a.




Zinga chuan, lawmpa, kan pasalṭha hliam khan ziaawm lam a pan leh pan loh lo ngaichang la, khi pasalṭha khi kan dahṭha ang nge tih leh hmalam pan an rual a. An inbeihna tur awih pangper takah chuan chetsual hlau dun takin an in veh ta ṭhem ṭhem mai le.



Chutah Murlen pasalṭha chuan rang taka tlankawi chungin Zinga chu a rawn bawh ta puat puat mai le. Zinga chuan a ke chheh chu uluk zeta lo zir chiangin a ke zungpui chuan lei nem lai chu pir tawkin an chhoh hlawi ṭhawt a, mahse a tum a ṭhelh chiang hle mai. Murlen pasalṭha chuan naua i tawnhriat a la tlem lua e tia nuih hak pah chuan a mawnglama awm Zinga chu an chhuk nawr let a.



Chutah Zinga hnungtawlh chu nangchin in Zinga dinglam sira petek nawlhin Zinga kawlhnam hum lohna lamah chuan a kawlhnam hriamṭha tak mai chu an vai phei puat a. Zinga chu cherang hle lo se chuan a nak chu a thler hawk ang le. Zinga chu eu awrh in a vunpui a rawn tai thler ta tlat mai le.




Murlen tlangvalte chu haw haw in pasalṭha,Thangliana tiin an rawn au a. Chutah Zinga mitmeng thip ram leh thiaen chhuah chaknaa tuihal chuan tha thar pe in Murlen pasalṭha vai fuh phak lohna lamah hmasawn chho zelin a zawn an thlen chuan kha le tih leh vir zawk zawk pah a a kawlhnam vai chhuah an rual a. Murlen pasalṭha chu tawlhhnung harh harhin Zinga thachak zia chu a manchiang ta hle mai le.



Zinga chuan thisen ka chhuah e minti vei maw kha le lo inring rawh le tih lwh bawh phei an rual a. Chutah Murlen pasalṭha chuan ramhrui chu palin an eu awrh a, chulai tak chu Zinga chuan remchangah hmangin Murlen pasalṭha kutphar du chu bawhthlu tawpin thlanglam awihah chuan an lumpui a. Chu ve leh Zinga chuan Murlen pasalṭha kawlhnam humna lam chu khawkherh bet tlatin a kawlhnam hum a thloh tawh si. A tha tawp chuan a nghawngah rekin an han lum dun thial thial mai zawng. Midang tan lah khawdang hawisawn thiang hek lo le.




Zinga leh Murlen pasalṭha chu an pilh nel nual tawh mai a. Chutah Mureln pasalṭha chuan,Zinga kut chu laksawn tumin an elh ve nghek a, Zinga lahin thlah chi a ni tawh lo tih hria in thlah reng a tum tawh lo. Murlen pasalṭha chuan Zinga hnarkawnah chuan thisen chhuak baw zawih chuan an lawk chawrh mai a. Mahse Zinga tan thlah chi a ni lo. A kut a khawkherhna na chu a aia na leh zualin an kut chu a ke pahnih chuan an elh nawn leh a, Murlen pasalṭha chu rak ṭhawt in Zinga bekah a rawn hnek leh ta siah a.




Zinga vanneihna a lo thleng ta, an lunthlakna zawnah chuan thingtuai chuan lo dangin Thingtuai bul lam pawng chuan Murlen pasalṭha hnungzang chu rawn do ri pawp in a ek ṭhawt a, chutah Zinga chuan a thil tih theihnaah tak mai chuan na tak maia ṭham sakin a lu chuan Murlen pasalṭha hnarah chuan an chhuk tauh siah mai zawng, Murlen pasalṭha chu zawi nghal hnuangin an thaw kawk kawk a.



Mengpual ru chung chuan Zinga chu rapthlak tak hmelpu chuan an chhoh melh kur mai chu Zinga pawh chuan a rap lek lek hial a ni. Chutah Zinga chuan a mi beihpuipa chu a che thei lo tih a hriat hnu chuan a awmah chuan tlu hnawkin a bawk hle hle a. An thinphu lah a rang narawh e.




Murlen pasalṭha chuan khawvel a la chhuahsan lo tih hriat tak mai hian a awm chu  an rawn sep dawrh dawrh a. Chutah a boruak hip a rawn ziaawm hnu chuan a lu chu muangchanga herin a awma bawkphek thlar Thantlang tlangval chu melh leh kur chung hian a tha tawp chuan nam sawn an tum a, chutah Zinga chuan a tha tawpin a kiu chuan a thinhnunah tak an rawt leh tawk a, chu zawng a hnuk feina chuan a tlinta ngang bik lo le. Thei leh thei lo hian Murlen pasalṭha chuan pualralah an ti tham ṭiak a, a awm sep dawt dawtin a zal ta raih raih a.



Chutah Zinga pawh chuan a hnar thisen la luang ngiai ngiai chu a kuta hui puat puatin zawi sap hian nang ang pasalṭha,dehkhirh hi ka la tawng ngai lo ve. Pialralah chuan min lo nghak mawlh ang che tiin thawhzai pawh rel lo chuan a kianga nunna chanta awmah chuan a bei leh thlawp a.




Chutah tuibur hmuamda vel zet an bawh chuan zawimuanga tho chhuak in pai khen khen chung chuan an inbeihna lai chu kalsanin mihrangvalte inep ran nalam chu an pan chho ṭhem ṭhem a. Kawlhnam pahnih chu ringchhan in an hawi let a. An lumna thingtuai lo ding lo dangtu lam chu a ngaipawimawh ngang a ni ange pan thla leh in a kawr an thel a a thlena kawr chu hum ranin zawisap hian ka nunna chanhimtu i ni an ti sak a.



Chutah a bul lawka nunna nei tawh lo Murlen pasalṭha chu thlek vang vangin in lalpa chuan a chhuang ngawt ang che. Pasalṭha dehkhirh tak i ni. I lu hian in khua a thleng ngei ang. Tiin ṭhingṭhi in a mit mengpual ru chu an siamrem sak a.



A ṭhiante kiang a han thlen chuan Murlen tlangvalte chu thip taka melh pah hian in pasalṭha chuan pialral kawng a zawh tawh e. Pasalṭha huaisen tak a ni e. A lu erawh ka zuah a, in pasalṭha lu hian khawchhung lut rawh se. Chutih rual erawh chuan in in pek loh chuan nunnavhlu tak nangni leh kei hian helai hmunah hian kan chan leh ang.




Thantlang tlangvalte hi beidawnga haw leh turin hmalam kan rawn pan lo ve. In pasalṭha ruang khu in hlawm dawn nge an tih chuan Murlen tlangval pakhat mawl fal chuan Zinga lu chu lak tumin acrawn dawk chhuak zawk a. Chutah Zinga bul a thlen dawn chuan Zinga chu thlanglam zirah in sawn zawkin a fuh nge fuh loh tih pawh hriat loh hian a kawlhnam chu an vai puat a.




Chutah mihring ṭe ri ṭhawt ri chu lo chhuak in Zinga chu hawi phei vatin chupa lo lehhawi lai tak chu a bek hek huam khawpin an kawlhnam chuan an vai zet zawng. A ke khaqngri dat dat in khawvel a chhuahsan ve ta. Chutah Zinga chuan ring taka auin midang duh in la awm em tiin a hnaih ber chu an pan leh chheu chheu a. Chu pa a pan pa chu huaisen zawk zawk ni hek lo le. Lo tawlh dawrh in ka tlawm e tiin leiah an ṭhingṭhi rap a.




Chutah Biakbuka chuan chupa ṭhingṭhi pa nghawng chu rang tak mai hian a rawn chhawk leh zawk mai zawng. Murlen tlangvalte chuan an hmachhawnte mizia chu hai hauh lo in an ralthuam dahthla in an inpe ta sap sap mai a.



Zinga chuan Zasira mukawm ngal khawsik sang takin a man lam chu panin a sahmim ipte aṭangin zen la chhuakin a dar silaimu luhna laiah chuan chhungin Biakbuk mei chher buatsaih rang rawh mihring kan inchan lo hlauh dah a nge an tih chuan Biakbuka chuan meichher nunin meiling chuan Zasira nak hliam chu an hliau sen zuai mai zawng, Zasira chu chulai ruam khawk rum rum chuan an ṭe chhuak tehreng a nih kha.



Murlen tlangvalte chu hnungkhirhin an han buaipui sap sap a. Chutah tlu ri daqp thawm chuan a rawn zui nghal, Zasira kianga Zinga tlu hlawm rwng chu pan nghal thuaiin Saia chuan thisen a,seng hnem deuh a nih hi, khua han sang se ziaawm lam a rawn pan mai ang. Lunga mauthei khan tui va la la, Zasira khawtsik hi kan tih reh a ngai a ni. Tiang hi kan nih nuaih avangin hmelma dang paqn min rawn nangchin mai thei a, kan mi mante hi hmathehah kan tawktaeh a ngai a ni. An pahnih hian lo buaipui la, Biakbuk nang tlawmngaiah kan chhak lan theihna kha han mitmei la, kiltin kha i mit khan hmaih nei hauh lovin fang kual rawh se. Chuti lo zawng mahni khaw thlengzo kan awm lo hlauh dah ang nge an ti a.



Ni a rawn tlangsang zel a, hun in a nghak der si lo, rilru bet lo taka hmangte leh an nun hlu tak chan hlaua kawrruama hun hmang mekte hmathlir chu a dangta nuaih mai le.



Engtiang chiahin nge chet an lak zel dawn tih chu lo chang zel ang che. Ka mittui a luang nasa lutuk. Ka ziak thei ngang tawh lo . Min lo hrethiam teh u.