THLA BIAL ZAN. BUNG 11- NA.

.

THLA BIAL ZAN


BUNG 11- NA.



Leizo pasalṭha Mungkhansiam chuan, a naute bulah chuan an khawpa in sapui a tawng fuh tih hriat renga a ruang pawh hlawm tlak loh khawpa chhia chu bih ngur chung hian, kan bengtawia mai mai chuh, ṭek khamphei i la dawng mawlh ang maw le. Tiru ni pawh a la vanlaizawl em hleinem, Pu Ṭiala ruang lah hlawm tlak a ni si lo, khawnge sa therhlo i beisei law law ang u hmiang. Runlui dung zawhin Lusei ho nena kan inrina kam vel i zu chuan ang u tiin hma an hruai nghal a.




Chutia thui fe an chhuk hnu chuan mihring kehniak danglam tak an hmu ta tlat mai le. Mungkhansiam chuan hei zet zawng nizan lam hniak a ni ngat mai, he hniak hian khawilam nge a pan tih hi kan chian nghal ang. Kan khua a rawlrala lo bihthlatute hniak a ni ngat ang. Fimkhur tak zel khan aw tiin chawhma zet hnu chu an chhui zar zar a.




An lal fapa Mangherha chuan Khansiam, ngaih lam lam te pawh a ṭha lo zawmah mah mai ka ti. Ruang chhe hneh tak Pu Ṭiala ang nga kan rin luh khi a lo ni lo hlauh thei bawkin ka hria an tih chuan Mungkhansiam chuan chu chiah chu, tih nghut pah in hnu chu an chhui leh zar zar a.




Ni pawn khaw thlanglam panin tumah reng nghak tang nge tih zai pawh rel lo in a ral tial tial a. Runlui tui in khak fawn ri lrh pawp ṭhin pawh chu Leizo pasalṭhate chuan an hre thuaia. Mungkhansiam chuan hei le, he hnu hian Lusei ramvalh chin a pan ngat mai. Runlui thlen nan kawihnih bak a awm tawh lo va, fimkhur tak khan aw. In silai cheng kha kau sa in dah rawh u an ti a.



Runlui an han thleng thla. Ṭiaupho lian vak lo lo in chap pharh chu chuangkaiin lui tui so ri bulh bulh lam chu thlek in Mungkhansiam chuan Luipui lai taka tui a chin phak loh china Lungpui lian zet chunga Vaibel phak khu hlat hlat chu a va hmu thuai a.



Rang taka pan in an han hnaihzel chuan maktihna chuan an thinlungah bu khuarin an han in en hrek hrek a. Chutah le. Lungpui chunga thlamuan hmel taka ṭhu a bawp khawkherha Vaibel pak khu hlat hlat chu Mungkhansiam chuan sawlai thlenga hruaitu sawn a zem â hneh hle a nih dawn saw, hnaih salh ang u hmiang, biak tlak a ni dawn hauh lo a, huaisen takin aw an ti chher chhak a.




Chutia lui kam, lui tuiin a rawn chim phak chin an han thlen phei chuan Khansiama chuan Pu Ṭial an tih chuan Ṭiala chu hawikual vut vut in Khansiama an hmuh chuan nasa mangkhengin an nui kiah kiah mai chu a naute phei chuan an rap lek lek zawk hial a ni.




Khansiama chuan kan Ṭiala mai mai chuh, tih leh hui lauh lauh pah chuan an ko nawn leh a. Ṭiala lah chuan chhang ta nge tih zai pawh rel lo chuan vanlam hawi chuan a vaibel chu an pak khu leh hlat hlat a. Chutah leh Ṭiala piaha Lusei mau tlawn pali suih zawma a kut veilama tuiin a len loh nan Ṭiala lam pana rawn in chhek phei an hmu thuai a.




Khansiama chuan Lusei a ni ngat mai. Pu Ṭiala saw ṭanpui a tum a nih hmel a. Naute u mau sat u la, ramhruiin a pit lohnan nghet takin tlawn thum kha in suih zawm dawn nia. Muangchang hman kan ni lo e an tih chuan an phe nghal vat vat hlawm a.




Kulha chuan Ṭiala bul a thlen chuan ka pu, lo kal rawh le. Saw i tlangvalte pawn an lo nghak che asin. Lo haw tawh rawh le tiin chu pa upa lam mitmeng buai nak chu hrilh hranpa ngai lo chuan a awmdan tur engkim chu a hre thiam nghal thuai a.



Ṭiala chuan Lusei tlangval la naupang tak chu melh kur chung hian an nuih sak a. Kulha chuan a kiang an thlen chuan ka pu lo kal rawh le. He lui tui thuk tak hi kan him nan kan daikai vat a ngai a nia tiin a kuta an ban chuan Ṭiala pawh chuan lo ban ve maiin ṭawngzai reng a la rel lo. Khansiam chuan mau pathum a nauten an ṭawnzawm chu tuiah chuan rawn hawlh phei zelin Kulha chuan ka pu min chelh talt rawh aw tiin mau chungah chuan an hlang kaia.




Sairengliana te pawh chuan Kulha tih ang chuan rawn ti ve in fimkhur takin chu Runlui mau tlawn tluk sawm leh pakhat zeta sei chu in veng tawnin an rawn hleuh phei ve mek bawk a. Kulha chuan Khansiam mau hmawr chu man nghal chatin Khansiam leh a nau te chuan muangchang si hmanhmawh ru tak mai chuan an pawt phei ve zel a. ṭiau pho an thlen dawn chuan Khansiam leh a naute ho chuan lo chelh nghal vatin Kulha chu chau tih hriat zet hian ṭiau phoah chuan an bawk hle hle a.




Nakinah chuan Sairengliana te pawh chu lo thleng pheiin Lusei leh Teizang hnam paite pasalṭhate nen chuan in melh tawn hrek hrek in an han in ep ran a. Kulha chu muangchanga lo ṭhut chhuah pah hian Khansiama en vang vang pah chuan Pasalṭha, in lal khua leh tuiah hian zankhat lek riak a rem a ngem an ti a. Khansiama chuan rem loh na tur a awm lo ve. Chutih rual erawh chuan buaina siam zawnga in khawsak loh a ngai ngei ang an ti a.



Kulha chuan chung lamah chuan venthawn kan ngai hauh lo vang. Ti hian in khawpa hian ziaawm lam a pan ve hret hret mai ang. Zem at in a awm mek a. Biak tlak a la ni dawn hauh lo an tih chuan Leizo pasalṭhate chuan an hmaa tlangval la naupang tak, thuneihna sang tak nei lawi si chu chhuang rilru tak chung chuan an han melh leh hrek hrek ṭhin.




Ti chuan khaw lam an pan nghal vang vanga leng len ar a khuang al al hnu chuan khawchhung lutin lalin lam an han pan ta a. Khaw mipui te chuan zui dul dul in Pu Ṭiala pawh chu lalin lam an pan pui a. Lalin an han thlen chuan Khansiam chuan thil awmzia an sawi zar zar a. Lalpa chuan a ep chiaha ṭhu Kulha chu melh bing bik tak chung hian Lusei pasalṭha te u, ka khua leh tuiah hian in duh chen chen in cham thei ang. Chutih rual erawh chuan kawhmawhbawl zawnga in khawsak ka remti dawn hauh lo a ni an ti a.




Kulha chuan lalpa kan lawm e. Buaina hi kan duh lo va, keimahni aṭang chuan a chhuak lo vang an tih chuan lalpa chuan chemte kan pasalṭhate hian zanriah pawh an la kil dawn hauh lo mai. Han buatsaih ta che tiin an tir a. Leng haw ar a khuan al al hnu lawk chuan ṭanriah chu tlai takin an kilho a.




Kulha chuan lalpa i chungah kan lawm hle mai. Keini hi Phulzau khua Sailopuia khaw mi leh sa te kan ni a. Hei hi kan lal fapa Sairengliana a ni e an tih chuan lalpa chuan a ni tak maw. Pasalṭha pawh in kat nuk ta ve ang chu maw an ti a. Kulha chuan lalpa pasalṭha kut thliah tham kan awm lo ve, kan tlang Zawng lui kama ram chang khu kan perh tar chin hian huam lo mahse kan pi leh pu te lo bawh ram a nih tawhna chuan kan thinlung chhungah tur tu awmin hauh kan han pena hle a, Zawnglui kam ram changṭha avang khuan kan piah rala kan Luseipuite nek kan hlawh nasa hle mai a, nakin zelah pawh chhuahsan hun a la awm ngei ang an ri chhuak sap a.




Lalpa chuan a nih tak chu maw le aw, tuma ramvalh china awm lo na na na chu a hauh lamah pawh in hauh nat dawn chu maw le. Chung thu ah chuan keia lo sawi ve tur a awm hauh lo mai a. Mahni hnampuite lungmuang taka an awm hmu thei hauh lo lal te hi zawng an lal a kha a ni e. Ka pasalṭha Ginzalian leh Mangkela ka hnampui pasalṭhate lak ah ka chan tawh a, tunah hian ka pasalṭha pathum te erawh chan hi ka duh tawh lo a ni. Kan piah ral ka khua aṭanga ni thum kal ah sawn Tedim hnam Mangchuha lal huaisar leh hruanghrau na zet khua leh tui an awm a. Kan perh tar pawh zah pah lek lo in hmasial takin min rawn nek hrer hret zel a.



An pasalṭhate lah sawn min hnuai en in khua an rawn chuan lah hian kan nulate lak ah an hlei em em leh ta nghal a. Kan chheh vel khuaah na na na chuan an hming a thangin khuatin pasalṭha an khum lah tak a. Chuta karah an lal Mangchuha lah sawn a fapa tan ka fanu hi a pasalṭhate hma thehah hmangin a rawn hel fo mai a. Ka pasalṭhaten han khing dawn se, ka pasalṭhate pialral kawnga han thawnliamtu lal nih ngawt mai zawng, ka duh bau bawk si lo an ti a.



Kulha chuan lalpa, i hnenah thil pakhat chiah ka ngen duh che an ti a. Lalpa chuan sawi ta che ka theih chhun leh phak chinah Lusei an ni em maw an ni lo emaw ah ka tlanchhe ngai lo a nia an tih chuan Kulha chuan beiseina thar neiin lalpa in piah rala pasalṭhate ho in tana mi hnawksak ho chu pialralah thawnliam ta ila, keini Lusei nen hian lei leh van kawkin inremna saui kan tan thei a ngem? Tin lo hneh ta ila, i fanu hi kan lal fapa tan min pe thei a ngem an ti a.



Lalin chhung chu a reh tlawk tlawk mai a. Lalpa chuan tlangval, Lusei piang tawh zawng zawnga ka mi hriat lar ber pasalṭha ralhrat phanih an awm a, chungte chu Tuithum pasalṭha Hualzasela leh Luanghmun pasalṭha Khawkulha kha a ni. Tin kan piah ral Tedim pasalṭha,ralhrat Lunthanga , Phawkherha, Thangtinlian em tuk dawl tur chuan i la nau em a ni, beiseina beidawnthlak mai mai zu nia an ti a.



Kulha chuan mipa te chu rei tak dam turin khuanu hian min duang lo va, chutih rual erawh chuan kan hmaa ding sukiang turin kan hriam kan lek ṭhin. Lalpa ka,duhthusam chuan i ril a rem zan lo em ni an ti a. Lalpa chuan i theih phawt a hnu an lu pawh,an rawn rawlh leh thuai ang an ti a.



DUH TAWK PHAWT ANG.