PÛMAH MI LU. BUNG 43- NA.

PÛMAH MI LU.


BUNG 43- NA.



Murlen lal Lalhauzinga chuan a hma ṭhu kun lap Lentlang khawpa chu melh run chung hian, Thantlang pasalṭhate  hruaitu chu Saihmingliana i ti maw kha tiin an zawtnawn leh a. Chupa chuan aw ni le lalpa, i khaw leilung pawh an rawn dai lut ṭep tawh ang an tih chuan Murlen lalpa chuan tlangau chu tir nghalin lal tualah ralkai thei chin zawng kalkhawm tur tiin an au tir lauh lauh a.




Murlen lalpa chuan a thinlunga hlauhthawn rukna lian tak pai chung chuan aw lawi zet hian kan leido ten kan khua tunah an rawn pan mek a, pasalṭha Zahmuaka leh Thangliana te khan tlangval sawmhnih ve ve ho se. Mualarh kawiah lo chang ula, Thangliana leh a ho ten Khiang mualah awmhmun lo khuar se a bak la bang ten khawchhung veng rawh se. Ka khua leh tui ti ralṭi a kan mang ṭhak duhtute lakah hian zahngaihna in lantir tur a ni lo. An hnung lam aṭang pawhin sai thluk mai tur. Tunah in ralthuam nen dai lam pan nghal rawh u an tih chuan Murlen tlangvalte chu haw haw hluah hluah chungin dai lam an pan ta a.




Saia te pawn Murlen ram chhung dai lut tawh in fimkhurna hloh miah lo chuan kalzai an rel ve mek bawk a. Saia chuan hei le, Murlen ramvalh chin kan dai lut ta der mai a, Murlen khua pawh hian tlangval tih tham an kawl bik dawn hauh lo va, chutih rual erawh chuan pawng basa ngam chi an ni bik hauh lo vang. Fimkhur theihtawp kan chhuah dawn nia.



Lunga, i meichher kha ti mit la, Zasira mei chauh hi kan rin a ngai tawh ang.  Ti hian Khiang mual lam kan pan ang nga, kan sir hel ang nga, kan tihdan ngai bawkin tlang aṭangin lalin kan leh luh ang. Lal chhungkua kan kutah an awm tawh chuan kan chet asam zawk ngei ang.



In kut khan in chengrang hlat lo se, in tukkhum pawh khan mit nei ran rawh se. He hmabak ko tak hi kan hlen chhuah hunah chuan pialral aṭanga kan chetla min lo thlir tu te khian hahdam takin an thlarau an thlah zalen tawh ang tih leh kal an rual nghal a.



Tinkuala chuan Saia," varṭiana chetchhuah kan ti nge zanin la la a chet thawh zai kan rel dawn," an ti a. Saia chuan mut chawlh kan mamawh a, hmunrem lai deuh melh pah zelin hmalam kan pan ang nga, buk kan sual ang. Zinga eng nge i hnar i tun hra hra tiin an zawt a. Zinga chuan a u chu melh pah hian an nui chhuak hak a. Chutah Zinga chuan Lentlang tlangvalte lu vun leh beng hian ka sahmim ip chhung a luah hneh em a ni an tih chuan an nui chhuak hak hlawm a.



Saia chuan aw le, kan hun tawnin a zir lo nen ral beng leh lu vun kan ah hian kan kawchhung kal a ti danglam fawn tlat a, chu avang chuan a rem lai laiah khan hnutchhiah ta mai ila, kan awmna boruak vawt ru tak hi kan zan hmanna tur a nih hmela pachang taka kan tawrh tlan a ngai ngei ang. Tiin kawr ruam hip vawt tak chuan an pangti te chu a rawn ti bawl deuh iarh iarh a.



Ti chuan lung khawkrawk tak tak chu thleng chho in an piah ah chuan kawrte tui thiangtak chu a luang ri her her a. Saia chuan khua a la hla tham bawk a, fimkhur tak si khan kan riahbuk sualna atana kan mamawh la khawm i la, thawm erawh kan dim a ṭul hle ang. Helai hmunah hian varṭian kan nghak anga, mei khy erawh hmarlam hawi zawngin kan chhuah thung ang, Lunga nang meichher chhikai la mauthei hian kan tla tur lo va chawi la, keiin changel sah tur ka lo dap anga, a bakin mauthei tukṭhuan buatsaihna tur leh thingtuai hlam chenvel a sei in lo dap mai dawn nia. Tin, chawnpuar tiat bak thingro la lo ula, chuti lo chu mei rim aṭangin min rawn chhui fu hlauh dah ang nge tiin an kal nghal vut a.



An tih tur ṭheuh an tih zawh hnu chuan Zinga chu tho nalh in a banphak awm vela thing hring ro zara hnah ho chu la khawm in an buk chungah chuan an chhep darh leh a. Chutah mei nun mausepah changel killi neia ṭawn leh in meikhu chu hmar lam hawi chuan an han zam tir a.



Sa rep thukphum in Lunga chuan an vil ran a, mautheia  chaw a chhum chu thai let in a hmin awmchhun pahnih chu an thur chhuak nalh a. Mauthei dang pathum te chu thawlh leh in a kianga sarep chu thur chhuakin zanriah kil a peih thu an hrilh chuan puar takin an han ei a, vaibel pak khuk laih laih pah chuan Saia chuan Zasir," kan ei bang nawi kha mauthei ruakah khan khung la, a tur  rim a nam loh nan vut khan i phul dawn nia an ti a.



Lunga chuan U Sai," vuta phul te chuan a ngap vek dawn asin an ti ha a. Saia chu nuih hak pah hian Lunga," thlasik i la hmachhawn tlem lam deuh a ni," ti hian ṭamchhawl dalah kan ak ṭha anga, kan bar dawnah tuiah kan chiahpuam leh anga tui chuan a tlengfai leh mai dawn alawm, hahchawl ula eng emaw thu hlaah mei hi ka lo hnungpuak ang e an ti a.



Lunga chuan naute kan awm alawm nangni kha lo va chhing rawh u khai,an tih tak tlat ah chuan hnial enah pawh en duh ting lovin buk lam an pan hlawm ta a. Lunga chuan an meichhem chu hnungpuak ar ar pah chuan thil tam tak ngaihtuah in hun a hmang ve mek a. Buk lama tui taka mu tih hriat taka hnar ri chuan rawn zui nghal zat in zanlai khuan hnunhnung awm velah chuan Zinga chu lo tho chhuak ṭhem ṭhem in Lunga va hahchawl ta che an tih chuan Lunga pawh chuan buk lam an pan ding nghal a.



Thla chuan an buk sualna lai chu rawn chhun eng siar siar in boruak vawr ru tak karah chuan kawm ngal chung chuan an mutui hlawm hle mai. Zinga chuan a lungdi a hmangaih em em chu ngai veng vengin engtin tak hun lo hmang ang maw tiin an intawn dante chu an chhui let leh a.



Chutia ngawi renga meiling chunga a kut hrawl tak a phar du lai chuan an chhak lungpawng lian ṭha tak, a chhip thla engin a chhun chian em em ah chuan mihring hlimthla a hmu ta tlat mai le. Rang taka mautheia tui chuan a meiling ai chu leih hlumin buk lam an pan nghal vat a, chutah Lunga chuan sawi nawk nawk hlawmin ral an hnai e an tih chuan thawhphan pawh nei lo mihrangvalte chuan an chengrang chu kau ri nghal rap in Saia chuan awmkhawm thei kan ni lo. Engzah chiah nge an nih lah kan hre lo. Kan hnu kan inchhui awlsam nan mausep  in kalna chin zelah in vit phun dawn nia.




Kannuna kan hlut a nih ngai chuan hunṭha in min la rawn hmuak ngei anga, tawlh hun a awm tih kha vawng tlat ang che u. An lo hnaih hmain Lunga Zinga kiangah khan awm tlat la, Zasir, Kuala leh Thlahlova te nen hmarlam in pan dawn nia. Biakbuk, ka ṭawngka chhuak ngaichang ang che tunah le. An lo hnai tawh ang tih leh buk chhuahsan an rual a.



Murlen pasalṭha Thangliana leh a hote mi sawmhnih chuan meirim chhuahna lai chu rawn chhui fuh tawhin a naute chu zaizir in an sem darh a. Chutah ram mawng lam pana hnim che laih tla engin a chhun chu Zinga chuan hmu nghal vatin a lo kalna lam tur chu chhut in a dinglamah sir an sawn phei a. Lunga chuan fimkhur tak chunga zui phei ve nghal zat in a mit fing zet chuan an chhak lawk a thawndim taka hnim rawn palthla che laih laih chu tin vang vangin sai an tum a. Chu ve leh Zinga chuan lo khap in a bengbul set ah. Mi engzah nge kan lam lo pan kan hre lo. I nunna kha hlut hle rawh hmabak a la tam. A fal ber khi dahṭhat kan tum ang nge tak khan min lo veng ang che tih leh pan chhoh an rual a.



Chupa lo chhuk dan dan leh kun du chu Zinga chuan leh pawh ti hman lovin a kawlhnam hmawr hriam tak mai chuan a nghawngah tak an chhun tlang pawk mai zawng, tal ri buan buanin a zal raih raih a pialral kawng a zawh ta. Chu tah le thawkleh khatah chengrang vawithum an ri rual nghal zat a, mihring natuar ri chuan rawn zui nghal in Zinga chuan Lunga bul a zu thlen chuan Murlen tlangval lo kalna lamah chuan fimkhur takin an han chho ṭhem ṭhem a.




Chutah an piah lungpui nghenga inring taka Murlen tlangval pahnih lo ṭhingṭhi kunda te chu thla eng hnuaiah a va hmu thei mai a. Chumite chu pasalṭha nun tema ramvachal ni se zawng, an hmelma laka an him nan thla engin a chhun chinah an awm duh hauh lo vang le.



Zinga chuan Lunga," a chhak zawka mi saw aw nangin tih leh tin an han rual nghal a, chutah leh chulai ruam khawk rum rum chuan chengrang an puak de zawk mai zawng Murlen tlangval pahnihte chuan an nuna hlu tak an chan leh ta.



Saia leh Biakbuka pawh chuan an hma lawka fimkhur taka rawn chhuk ṭhem ṭhem tlangval pakhat chu lo melh karin chu tlangval chu pawtding chawttu an awm tih hriat tak mai hian a kal lai chu a tawp chawt a. Saia chuan pasalṭha hruaitu an kawl ṭha ve riau mai ka ti tih sap pah hian chhim lamah le tih leh kawrte lam chu an pan phei ṭhem ṭhem a.



Tinkuala chuan a bula ṭhu kun lap, a dara silaimu luhna na ti si, thawm chhuah ngam si loh chu a diar chuan Zasira ka chu an hnawh sak mawlh mawlh a. Chutah an chhak lawka mipali lai an lam pana lo hnai thla zel thawm chu an han ngaithla vang vang a. Kuala chuan a kianga ngawi renga awm Thlahlova hnenah chuan i tum hlah hauh suh ang che. I kah rualin thlanglam panin i lum thla nghal dawn nia, keiin a sir aṭangin Zasira ven pahin a rilru ka lo la peng ang tunah le an ti a. Chutah Thlahlova silai chu an puak khawk rum rum mai a, mihring na tuar ṭe ṭhawt ri chuan a rawn zui nghal a.




Chu ve leh silai a lam hawia lo puak ve nghalin Thlahlova chhipsam chhawl chu a leng chuaih nghal a, teuh ther ther tak hi a ni. Chutah rawn bawh thla in Thlahlova hnaih ber tu bekah chuan Kuala ngenmu chuan a va deng ve leh ta siah mai la. Mipahnih la damte chu ding chawt in leiah chuan an han bawk a. Chulai tak chu Kuala chuan remchangah la in a silai zen chu sawh mawlh mawlh in a duh tawkah chuan a mu thunin a cheng an kau ri leh khep a.




Kuala chu muangchanga chhak lam pana kal ṭhem ṭhem in a mah rawn pantu bawkvak chunga fimkhur taka rawn bawkvak phei lu keh hawk chuan an kap a. Kuala pawh a him seng ta bik lo. Khawvar tur rawn inṭham leh chhum leivak chuan an awmna lai chu a rawn tuam ṭan ve mek bawk a.




Kuala hnungah chuan che tawh suh. I lu bur hi ka thlawh darh i duh loh chuan tih ri chu ngaihthah chi zia zang a ni lo. Kuala chuan leiah a silai chu theh thlain muangchangin an in her a. Thlahlova Kuala leh Zasira ngaihtuaha rawn chho ru ṭhem ṭhem chuan thla eng hnuaia mihring pahnih inhmachhawn mek chu hmu thuaiin Kuala dinhmun ṭhat loh zia chu hrilh nawn kher a ngai lo hle.




Kap dawn se chupa chu Kualan a hliah tlat bawk si. Ngaihtuah chhuak thut in a veilam sirah in herin a chhak lawk hnim che leh laih laih chu pawh chho in chutah leh, chupa bawkvak hnungah chuan zuanin a silai kawm chuan a kheimitah tak an chhu ngheng mai a. Chupa chu ṭe nghal ṭhawtin Thlahlova chuan bawh bet nghalin a kawlhnam chuan a nghawng chu an chuktuah nghal zat a.



Ring lenglawng hian Thlahlova chuan Murlen tlangval lu hi ka lak lohna chhan tur sawi rawh u. In ngam chuan min rawn hmachhawn thei ang tih leh a kianga thing chu inphen nan hmangin a mi man pa chu an phih tho lawp a.



Murlen pasalṭha Thangliana chuan naute u zam hauh suh ang che u. Leilung a rawn lang ṭan e. Kan hmelma ho hian kan khaw ramvalh chin an rawn dai lut a, tunah hian ka kutah an zinga pakhat a awm e an tih chuan Thlahlova chuan Thantlang mihrangvalte kan zam ngai lo e. Murlen khaw tui liak pasalṭha nunna ka kutah a awm e an ti ve sak a.



Murlen pasalṭha chuan inpe mai rawh u kan tam hneh mah mah cheu a ni. Kan mit tlin tawk hian kan ramvalh chin a bo ngai lo ve. Thlantlang tlangval lu hi ka thlawh darh hma hian in pe rawh u tiin an rawn vau leh khur khur a. Thlahlova chuan U Kual," an zinga mi ka kuta a awmchhung hi chuan i la him tihna. Murlen pasalṭha kha ka mithmuhah rawn inlan ta che. I naute nunna hloh i duh ngai te a nih chuan i kianga ding lakah khan i thal thlah ta che. Nge kei mi hmachhawn dawn le tiin an vau ve khar khar a.



Leilung a rawn lang ṭan, thinghnah kara khaweng rawn in ṭham chuan mihrangvalte sulhnu phe un chu a rawn en chiang telh telh a. An aqmhmun ṭheuh a ta chu rawn dingchhuak hlawmin Zinga chuan an bul lawka Murlen tlangval lo ding chhuak teu an hmuh chuan an lo in hnaih tawh zia chu chawp leh chilh a hre nghalin an chengrang kau ri rap chung chuan an han in tin dun nghal zat a.




Chutah Murlen pasalṭha chuan hei le, nauteu kan ramvalh chin rawn dai lutte hi duh kan thlantir dawn em ni ang an tih chuan Zinga chuan pu a, i â hle mai ka ti. A fawng chelhtu kan nih lai laia chutiang thu te in chhak chhuah tak le. Thlahlo, pasalṭha chuan a thutiam a nemnghet tur a ni. I man pa kha chhuah la, Murlen pasalṭha pawn U Kuala kha chhuah se mal leh malin kan inbei ang an tih chuan Murlen pasalṭha pawh chuan kei Murlen lal fathang awl, kawng engkima hmatawngtu Thangliana hian i mi cho na chu ka pawm e. Tih pah chuan Kuala hnenah chuan i him sen lul e kal mai teh an tih chuan Thlahlova pawh chuan a mi man pa chu nam kat dawrh hian i nunna ka zuah hi i damchhungin i hrereng tawh ang an ti thawp sat a.




DUH TAWK ANG