THLA BIAL ZAN


BUNG 5- NA.



Vanzawl pasalṭha Zathanga chuan, naua i theihna pholang tur em chuan min kiansan zawk mai ta che, pialral kawngzawh tur atan chuan khuanu hualna i la mamawh asin tiin a hmaa tlangval tuaitirte, a mitmenga zamna chhiar tur awm hauh si lo leh a pianṭo dik zet chu ding kawisawi takin an thlek ha a.




Kulha chuan hei leh chen nang um in zanthim hnuaiah ke ka pen tawh, U Vawmkunga thlarau a chawlh hahdam hma loh zawng hmalam ka pan zel ang an ti chang fak a.



Lal leihkasanga lal chhungkua leh a upa te teh a pasalṭhate chuan an khaw lalin tuala kei ka ni inti ve ve in hmachhawn ran chu an melh tawn chhen a.



Lengsir lalpa chuan keini buaina tur a awm lo ve, tumah khan in chengrang a tu lam ve ve hawi zawngin lek hauh suh u. Kulha melh kal pah chuan khu nau khuan a pialral kawng a zawh ngei ang, a hmachhawn atan chuan a sang lua e an ti sap a. Zaduna chuan lalpa khu nau khu a dingchang zawk ngei ang, Zawnglui kam ramchang ṭha chung changa kan chet ti ṭhuanawptu tur a la nih khu an ti let sak a.




Lalpa chuan pakhat vang mai maia chet fum tur a ni ngai lo e. In ngam loh a hnu in hel zel a ni ang chu tiin Zaduna chu ngei hmel zetin an melh a.




Kulha chuan khawkhat pasalṭha khual kai ve meuh si chet i va thawh har ve le, min helna kawng i dap zawk dawn em ni an ti leh chiah chu Zathanga chuan a nih aw lo in veng rawh khai, ka kawlhnam bil lam pawh hi i dawl hauh lo vang tiin an daqk chhuak zawk a. Kulha chuan hnungtawlh deuh dawrh pahin Zathanga kawlhnam sei reng ruang in a awm zawn a a rawn vai phe vuai chu lo a mit chak zeta lo hmu hmanin an ip zawk a, chutah a ip pah a a ke dinglam khai kang vawhin a taksa rihna hmang chuan Zathanga lama awn let thutin Zathanga nghawng zawnah chuan a kawlhnam chu an vai tle ve zawk a, mahse Zathanga pawh khual thang hat khawpa pasalṭha a nihna leh a lung finna chu hmang ṭangkaiin lo bum hman hram in Naua," i beih tham ve dawn e tiin an nuih sak a.




Kulha chuan beihtham loh hlir i hmachhawn vanga khualthang em ni i nih le, kha le ka ni ve aw tiin zik zaka tlankawi zak zakin a chang leh ding thutin Zathanga hawi kual lai, a ke dinglam insiamrem hma hret hunṭha chu chuhin Kulha chuan a kawlhnam dinglama a hum chu thlak thutin a a a kut veilam chuan a fawng a chelh rualin an vai phe vuai mai zawng, na tuar ṭe ṭhat ri in rawn zawm nghalin Zathanga ban veilam chu a uai ta hnawp mai le.



Chumi na tuar ṭe ri in a rawn zui laitak chu chuh in leiah in binin Kulha chuan Zathanga kaihza tha chu an chhat sak ta zauh mai chu, Zathanga chuan eng tihzai a rel thei lo. A hmaa tlangval la naupang tak chu mak tihnaa khatin a thlir tlawk tlawk mai a. Zathanga chuan vala, pialralah ka lo nghak reng ang che tih leh leia ṭhingṭhit an rual nghal a.




Zathanga ṭhian sabeng Raltawna chuan tlangval a tawk e, i hriam kha leiah paih thla rawh mi tlawm tawh hnu kut an thlak ngai lo tihri lo chhuahna lam chu an hawi ṭhup a. Kulha chuan aw lo chhuahna lam an hawi chuan pasalṭha tih hriat ngawih ngawih, khur map lo va a lam hawia chengrang chawi chu melh kar pah hian, Kulha chuan ka tum ka ṭhulh ngai lo ve. I ngenmu pakhat tuara pialral kawng zawh hman ka ni lo an ti let sak a.




Raltawna chuan tlangval a fawng chelhtu thu an zawm ngai e. Dam i la duh a nih ngai chuan ka thu zawm mai rawh tih leh penkhat a lama pen an rual nghal a. Lalin hnuai aṭang chuan Zaluta chuan i ngam a hnu i silai khan ṭek khamphei han chhuah se, pialral kawng i zawh nghal ang a rawn ti chang ve fak a.




Pu Thawma kianga a ruka silai lo lek kawh ve va, Kulha ṭhian sabeng Dengria chuan mipui kar aṭang chuan  Vanzawl pasalṭha, i ngam a hnu i silai kha hmetpuak ta che. Pialral kawng i zawh na ni a inher chhuak a ni mai tih leh Taikulh," i tih turin a hmuak che." Rei tak na kha tawrh tir suh, khual thang pasalṭha a nih kha an tih chuan Kulha chuan leia a mahlam hawia ṭhingṭhi, thisen tharlam takin a bual kawi zuih lam chu panin a kawlhnam chu an vai phe viau a, Zathang lu leh taksa chu a hrang ta nalh mai.




Kulha chuan a mah tintu lam chu hawiin min kap ta che. I ngenmu pakhat vang khan pialral kawng ka zawh hauh lo vang. Nge ni in khua leh kan khaw buaina hi tah hian kan chingfel law law dawn zawk an ti chher chher mai chu. Lengsir lalpa chuan rang takin nangni khawhnih khan ka khua hi chhuahsan rang rawh u an ti chang khawl a.




Vanzawl pasalṭha Raltawna chuan tunah chuan a fawng chelhtu in nih avang hian kan tlawm a ni lo va, nakin hun dawnin kan kir san ang che u. Kan pasalṭha lu leh taksa khan kan khua lut rawh se an ti leh a. Kulha chuan hnai lo ve. In pasalṭha lu hian kan khua a lut anga, pum ah ka dah ang nga diriam takin ka lam anga malchaw ka pe ang.




Tin hei hi lo hre rawh se in lalpa khan, saw Zawnglui kam saw in rawn dai luta in hniak in hnutchhiah leh a nih chuan inbuzawl ka rawn luhchilh ang, min liamsanta kan thlahtute ram lo bawh sa a nihna ang ngeiin tu kutah mah kan hlan ngai lo vang tih hi in lal khan lo hre rawh se an tih chuan Raltawna chuan tlangval, bul kan ṭan dawn chauh, lei leh van kawkin ka tiam a che, kan in tawng ve ngei ang tiin a naute nen chuan khua an chhuah san nghal a.



Lal tualah chuan Kulha thlawp zaih hian Phulzau pasalṭha ho chuan Lengsir mipuite chu inring takin an han melhkual dan dan a, chutah an tana hlauhawm a awm tawh lo a ni tih an hriat hnu chuan Kulha chuan U Zalut, nangin hma hruaila Lengsir lal hi i be dawn em niang an ti sap a. Zalut chuan sam et hian bul i ṭan tawh a a tawp pawh i khar ang chu le an tih chuan Kulha chuan aia u zawk te in awm alawm an tih pawh chuan Zaluta chuan pasalṭha nunkawng zawhtur chuan engkim hi hmachhawn a ngai fo ṭhin tiin lehlam anhawisan hmak a.



Kulha chuan lalpa lam chu hawiin lalpa pawi ka ti khawpmai, lohtheih lohnain min nang ta sia, min hrethiam a ni ang chu ti hian i khua hi kan chhuahsan nghal ang an tih chuan lalpa chuan rang takin chhuak ula in hmel erawh rawn inlan tawh ngai suh ang che u an ti vin ṭhat a.



Kulha chu nuih sak pah hian mahni luseipuite lakah rilru an pe kha viau ngai lo asin, khawkhat lal meuh si an ti zauh chu a kiang ding pasalṭha thin terat rilru puakchhuak chu lo sa phatin naua ti zawng khan maw i ka i an dawn a, a khamphei zawnga in khua lawi luh i duh a nih loh chuan i ka kha chip hmak ang che tiin a silai cheng chu an kau ri khep a.




Kulha chuan thip zeta melh pah chuan uai, mahni buzawlah chuan lal chhan i pena ve hle mai maw, kan chhuahsan khawp ang. Hei erawh lo hria ang che u. Zawnglui kama in hniak ka hmuh vaih chuan a kham phei zawngin in khua in lawi lut ve ngei ang tih leh hawi let map lo chuan kawtchhuah lam an panding nghal a




Mipuiho chuan khual tlangval la naupang tak leh pa hrak leh hmel duhawm zet chu thlek vang vangin a chetran zia leh hlauhawm awmzia a hriatloh zia aṭang ringawt pawh chuan an leido atan an it lo hle tih an hmelah a lo lang chhuak hial a.




Pu Thawma chuan chemte, hawh le, khuanu vohbik hi zawng an danglam a ni tih leh Kulha chu an melh zawk a. Chutah Kulha chu ding datin Pu Thawma te inlam hawi pah chuan U Zalut," min lo hrethiam lawk mai ta che." Tuibur hmuamda pawh hun ka seng lo vang. Tih leh Pu thawma te inlam pan chu an rual nghal a.




Pu Thawmate in a va thlen chuan Veli chuan luh dila a pa kotu aw chu he khawvela aw mawi ber a ni hial ta ve ang. An leihka sang rang taka pan pah chuan a hmaa a hmangaih em em thisen khal tawh lam a puanvena kai lei luai chu en hrek hrek pah chuan inchhung luh an rual a.



Veli chuan ka pa i chhawn dawn lo em ni? Mahni leido khuaah pawh thih pawisa hauh lo in a rawn pan che khu, tih leh thula a u puanven tur a tah sak tharlam tak chu la chhuak in a pa pawh zah zo lo in Kulha chu an hmehbel nghal a. Kulha chuan ka lawm e tihsap pah hian Veli, lo damṭha ang che. I pa leh i u bulah khan ngaihdam min lo dilsak dawn nia.




Thla bial zanah ka hmel hmuh lo in ring ang che tih sap pahin kawtchhuah lam an pan a. Kawtchhuah lam a thlen chuan Dengria chuan a pawttu a na bawk a ni tiin an fiam zauh a. Zaluta chuan Kulha," bansan turin i huaisenna khan thunun tlat che rawh se. Mahni leido nula lakah rilru an seng ngai lo ve. Buaina belhchhahtu mai an ni. Kan lal beng thleng lo hram se ka ti ang nge an ti chhuah chhak a.




Pu Thawmate in bula putar lal tihlawm tum hrima zualko zat zat fo ṭhin Pianghleia chuan kan khaw nula hmelṭha chu kan Leido val lakah a luangliam ngat mai, a va chak dawn lo rua em tih leh lalin lam pan an rual a.



Ou Pianghleian lalin a thlen chuan an khaw pasalṭha te pawh zah zo lo in lalpa i khua leh tuiah hian phatsantu i kawl tlat mai an tih chuan lalpa chuan rumal hian tu nge sawi vat teh an tih chuan Pianghleia chuan e le lalpa i khawdaingul Zaduna te chhungkua maw le. Nichin lawka rallu i lal tual ngeia lo la tu tlangval leh kan khaw nula chhuanvawr Thangveli hi inhmel duhin a puan ven tur a rawlh ruk lai pawh ka mit ngei in ka hmu an tih chuan lalpa chuan Duna, a heti zawng hian maw in chhungin min lo phiar ruk a an ti ha a.




Zaduna chu a hawihai nasa mai, a hlauhthawn ang ngeiin thil a thleng ta chu a kun ngaih a. Lalpa pawi ka ti ka farnu vanga mi hmai eng ka hmu ngam tawh lo tur hi. Phatsan thuah erawh chuan phahtsan lak lo ve, ka dam ṭek ṭek chhung chu ka phatsan ngai lo vang che an ti chhuak chhak a.




Lalpa chuan a nih a hnu i farnu chunga hremna ka pek tur hi i ngaingam meuh ang maw an ti leh a. Zaduna chuan a nun i zuah phawt chuan ngaingam turah ngai ang tiin a thinlung chhunga rilru natna lo lang chhuak chu a tun an hai hauh lo le.




Lalpa chuan a fapa Zahmuaka chu ko in tlangval sawm ho la, Thangveli chu zu phih chhuak ula silhfen in bel hauh suh se. Tiang ka khua leh tuia leido ngai hi ka khua leh tuia chengte hian ensan ni se. Duna lo hre rawh. Tun a chinah ka khaw daingul atan ka thloh thla che a, fathang pawh midang letin i chhung tawh ang. Lal thupek i zawm dan lo a nih chuan in chhung in mang vek ang an ti chang fak a.



Zaduna chuan tuman ka nau kha khawihna suh ang che u. Keimah ngeiin lalpa ka zu hruai ang nge an tih chuan lalin an chhuahsan nghal a. Chak zetin an inlam a pan a, kalkawngah chuan a nuan lo kaihhruai reng ṭhin Pawnglaia chu hmu hlauh in Phulzau pasalṭha Kulha kha umzui la Thangvelin a lam che. Thi turin a chungthu an rel mek i ti dawn nia an tih chuan Pawnglaia chu i he lo in a tlanliam nghal a.




Lalpa chuan Hrima Duna kha umzui la, a kalh zawnga chet avthawh chuan i sai tlu pawp mai dawn nia tlangval ho bawk la a mizia i hriatchian kha an tih chuan Thanghrima chu silai nen lalin a chhuahsan nghal a.




Zaduna chuan a nau chu huatna leh lainatnaa khatin a thlir tlawk tlawk a. Veli chuan ka u engtizia nge i hmel a va danglam ve an tih chuan Duna chuan kehthei dawma ka dawm ka thisen zawm chuan lungngaihna khur lam min pan tir ta a ni. Lal hnena hek i tawk a, lal hremna i pumpelh hauh lo vang an ti a.



Pawnglaia chuan kawia an liam tur chu au lauh lauh in Kulha te chu an lo ding nghal vat a. Pawnglaia chuan thaw hlawp hlawp hian Thangvelin a lam che. Lal hnenah hekna a luta tunah Thangveli chu thihna kotlangah a ding mek an tih chuan Kulha chuan chhe hei le tih leh lim puat an ruala, Zaluta chuan kan naua mai mai chuh tiru le tih leh Lengsir lama lim phei an han rual nghal a.




Zaduna chuan a leihka sang aṭanga an khaw tlangvalho kawlhnam nena lo dan pah chuan a ngamfa chuan min rawn hnaih rawh u ka farnu hi tuman in tawk lo vang tiin an lo vei thauh thauh a. Lal fapa Zahmuaka chuan Duna, at so hlek suh i lu burah khan ka ngenmu ka luhtir an nge tih leh tlangvalho hnenah chuan meichher siam ula an in hi hal rawh u an ti a.




Hnunglam aṭang chuan Kulha chuan a ngam fa chuan han hal teh u, pialral kawng in zawh nghal ang. Nang lal fapa laktlak loh khan ka pawi i sawi tlat mai. I silai kha i dahthla dawn nge hnunglam aṭang hian ka sai dawn che tiin an tin kawh vah a.




DUH TAWK KEUH ANG.