THLA BIAL ZAN. BUNG 6- NA.

THLA BIAL ZAN

BUNG-6 NA.



Lengsir lal fapa chuan a hnunglam aṭanga rawn vau tu chu ngaihthah mai chi a ni lo tih leh at so chi a nih loh zia hria in Kulha lam chu muangchangin an hawi a. Kulha chuan U Dun, he khuaah hian in him lo ve. He khua hian a mamawh tawh lo che, in chhung khan min zui rawh u in him ang tiin a silai chuan an lal fapa nghawngah tak mai chuan an hawlh chilh nghal rap a.




Zaduna chuan a pa chu mitmei pah hian ka pa kan mamawh tur  kha fawmkhawm ula he khua hi hawikir leh tawh ngai lo turin i chhuahsan vat teh ang u. Zahmuah, ka lam hawiin i chengrang i lek vei maw, lo hre rawh kan in tawng leh khawp ang. Hrima, dam lo hauh la, a ni lo zawngin ke pen hlek suh ang che, ka mizia hrechiangtu ber i nih kha an ti a

Pu Thawma chuan an lal fapa chu thip zeta melh pah hian, zangkhua pawn bungbut hun a nei ngai e. Ti rawh le chemte Phulzau pasalṭha kiangah hian kan him ang tiin a fanu chu an chelh nghal a.



Lengsir pasalṭha Thanghrima chuan Kulha chu melh bing bik tak chung hian, he i thil tih vang hian mangchhia i mang anga, buaina chuan a umzui zel tawh ang che. Ti rawh u le naute u zalen tak khan an tumram pantir ula, tunah chuan an chan a ṭha rih e, khaw eng chu zan thimin a thlak leh mai ṭhin. Tiin nakin huna tum nei ran chung chuan an nuih let sak a.



Kulha chuan pu a, engpawh hmachhawn huamin ka in peih reng e. Ka hmaa i din leh hun chuan pialral i hnaih hle tawh ang. Tiin Lengsir valrualte chu hnungtawlh zawngin an hlat tial tial a, kawtchhuah lam panin kal zai an rel ta a.



Kulha chuan kalpah hian kan boruak hi a saisa ta nuaih mai zawng a nih si chuan U zalut, nangin hma lo va hruai la, Pu Thawma te hi muang fanin i lo va kalpui bek bek dawn em niang an tih chuan Zaluta chuan Kulha, â tak hian chet an thawh ngai lo a nia aw, tiin Kulha thil tum chu a lo man chiang ru ran a.



Kulha chuan U Zalut, min ngaihtuah suh. Hnung Dengria nen hian kan lo dawl zel ang, tukkhum pawh hian mit nei ranin hmaih nei lo se, kawngruh lai zel kha in zawh dawn nia. Tirawh le Ria kawi thum vel i let leh lawk ang hmiang an ti a, Zaduna chuan in kiangah hunawl ka lo hnawhkhat ve ang chu. Tunah chuan in tan ding turin ka rilru ka siam tawh e tiin an bulah din an rual nghal a.



Lengsir lalin chhungah ve thung chuan lalpa chuan ka khaw daingul leh ka innghahna tia ka lo chhuang ruk fo che hian awlsam takin an duhthlanna i kaltlang tir a maw? An ti vin deuh ṭhat ṭhat a. Thanghrima chuan lalpa, a fawng chelhtu an ni a, nawrluiin an thu hnial ni ila a tu ber hian nge pialral kawng zawh dawn lah hriat va ni suh. Engchena thui nge ke ka pen ngam dawn tih hi an la hre dawn alawm an ti charh charh a.



Lal fapa pang zawk Zachuha chuan ka pa saw ram Zawnglui kam vanga leido neih a thin thia mutmu kan tuah theih loh ai chuan kei chu saw ram saw it na leh awhna ka nei thei hauh lo mai an tih chuan lalpa chuan Chuha, i pa hi a nem zawnga min thlem tum hauh suh. Lal ka ni a, ka rorel min thlawp theilotu chuan he ka lalna khua hi in chhuahsan thei ang.



I pu te ram chuanna saw la let leh turin theihtawp ka chhuah ang. A ni lo zawnga ka kawngdaltu chuan ṭek khamphei a dawng ngei ang. Zumura te pawh an lo thleng hnai dawn tawh ang. Hrima, i naute ho nen lo inbuatsaih ru deuh la, rawlrala che chhuak turin in peih ang che u. Phulzau khawtui tlan a piang an lu in la dawn nia. Phulzau tlangval tuai lakah erawh fimkhurna kha pai bik riau ang che u.




Kha tlangval khan khuanu duhsakna a dawng zual bik riau a, tumah in in hmachhawn tur a ni lo. A remlai chuhin hnunglam aṭang pawn in sai a ni ang chu. Zahmuak, ti khawp khan a ti thlangtlawm che a, ruahmanna dang min sih hmuh tur i pai em tiin a fa u zawk chu an melh tur khaia.



Zahmuaka chuan ka pa, buaina bul kan ṭan dawn chauh a, U Hrima te ang nun tem tura tawnhriat ka ngah zual a ngai a ni. Ka hlauh vang leh ka zam vang ni hauh lo in, tunah rih chuan kan in danglam hleih a ni. Chu avang taka zirtur ka neih nasat le. Chutih rual erawh chuan kan chhak ral Luanghmun Fanai pawi pasalṭha Tekawla leh a sangawi zawnpui, Mausela han pur mai pawh ka nap e an ti chuak chhak a.



Lalpa chuan rawtna dang nei in la awm em? An tih chuan Thanghrima chuan lalpa Zahmuaka rilrem zawng lah kan bengin a hai hauh lo mai. Chet kan thawhna kawnga kan kawng min sahen saktu tur an nih chuan kei pawn ka hnial hauh lo mai. Chutih rual erawh chuan an thasen man erawh eng hi nge an phut ang tih hi a ni pawimawh ta ber chu an ti chhuak a.



Lalpa chuan a nih a hnu, kan rorel kan thlak danglam dawn zu nia. Hrima Zahmuaka nen hian tlangval sawm ho la, Luanghmun khawlam pan ta mai ula, chutih rual erawh chuan in ka chhuakin a zir hle a ngai ang. A chhan chu Lusei leh Lusei kara buaina hi an lalpa khian min chinfelpui nakawngah aw min lo pawh duh a ngem? An lal a lungawina tur a nih tak mialin ka darbu rauh ber zinga mi hi in paipawn dawn nia. Nili leh zanli in thang dawna, fimkhur takin chet in thawh dawn nia. Tiin rorel an ti tawp nghal a.




Lal fapa pang zawk Zachuha hmela lungawi lohna lo lang chhuak chu a farnu Zatinchhawni chuan lo hmu khiau in ka u hawh teh tuah tur thing khu i ek ang hmiang tih leh hrei nena an tual lam pan chu an rual a. Zachuha lo kal chu lo nuih sak pah hian ka u, ka pa te rorel dan chuan i lung a dum meuh ang chu maw an ti chhuak phawng a.



Zachuha chuan hmeichh hriat chi a ni ngai lo ve, an ti chhuak sap a. A farnu chuan ka u, i hmel awmdan kha ka hai hauh lo asin, he buaina avang hian ka pa lalna khuate hian kan tuar ngei ang. U Duna te chhungkua lah kan chan a ni si a, Fanai Pawi pasalṭha han ṭahawh ringawt pawh chu ka pa tan a thangtlawm thlak mak mak lam chu a ni. Engtiang chiahin nge min en tleu ang le. Sawlai Zawnglui kam ramchang ṭha avanga buaina hian tawpin tai a nei dawn lo zawng a ni e.




Ka u, finrawl chhuahin zah pawh dawn lo in ruahmanna siam la, i ṭhiante nen Phulzau khua pan ta ula, an ni pasalṭha ten ka pa pasalṭhate hi Luanghmun lamah tlankhalh se ti chuan kan pathum khaw himna tur awmchhun a ni chauh ang an tih chuan Zachuha chuan a nau chu chik zetin an melh a, a nau remhriatna leh finna chu makti taka ngaihtuah chungin ka nau ka lo va hrechiang lo chein i fin hi ka va chelh lo tak em an ti ru vawng vawng a a rilru in.




Khawthlang lama ni tla tur chuan Lengsir kawtchhuah lam chu a en sen phut a. Virthlileng ten Lengsir khawtuala vaivut te chu chhem leng siau siau in chungleng sava ten an tuallen duh tawkin riahrun an remna thingzar lam awnin an thlawk delh delh a.



Kulha te pathum pawh chuan umzuitu an tawn tak si lohah chuan Zaluta te hniak zuiin Phulzau khawlam an pan ve par par a. Pu Thawma chuan kan nauate chu eng em harsatna an tawk lo turah ngai ila an ti chhuak sap a. Zaluta chuan Pu Thawm, ngaihtuahawm an ni lo ve. I rilru kha seng hah duh hauh suh ang che an ti a.



Pu Thawma chuan chu chu thu hranah lo ṭhutbet ta ila, in lal hian min lo pawm duh meuh ang maw an ti chhuak leh a. Zaluta chuan kan lal hi lal fel leh zaidam tak a ni a, a mi rin rawlte kan ni. Kan thu hi a kawi a ngilin a ngaithlaa chumi hnuah thutlukna a vaw chawt mai ṭhin. Hlauthawng duh suh, in chhungkaw khaw hawina khawp awl chu Phulzau khuaah a la awm e.




Kulha kha zawng, midanglam bik tak a ni. Rawlthar chhuak hlim a lo nih khan a tual lim ve ṭan chauh a, a mahah khan thuneihna sangtak a awm a, hotu nihna khuanu hian a thinlung chhungah a pai sak a, thlasik la hmachhawn tlem hle mahse, ral ramah leh ramhnuaiah chuan kan chungen asin. Lengi runsang a kai hma hauhin zawlbukah a thapui a thawh a, kan khaw muantu a la ni ngei ang.




An ni chhungkua chanchin hi kan lalpa hian a zep tlat a,  kan khuaa an lo pem hian thingnawi fawmrual lek a la ni nghe nghe. A pa leh kan lalpa hian inkungkaihna thuk tak an neih ruk hi ka ring hle ṭhin a, a chhan chu kan lalpa hian a pa hi tlangau turin a rin lut nghal hmiah mai a ni. A pa Taimama lah hian a hna a tlinin lal lakah pawh a tla tlum hle a, chik taka han malthlur phei chuan a pa hi mivantlang chunglama leng ang mai hian tlangau nimahse a mi dip a na hle nghe nghe.




A nu lah kan khawnula tam tak aiin a langsar in a no suah maia, an pian leh murna pawh hi a tun chiangkuangin kan hre lo a nih zawng hi. An inchhung han chuangkai ila, ralthuam silai tih loh chu a awmkim vek emaw tih mai tur lah a nia. Pu Taimama hi minamai a ni lovang tih ka rin theihna chhan chu, a fapa zawlbuk pawh a kai hma hian ramlama chetla ngun turin a fuih ru fo ṭhin. A fapa lakah hian sa leh ral hmaah hian thinphut eih pawh a nei hauh lo. Tuna in khawlam kan rawn pan nakawngah pawh kan lalin a fapa in a chhuahsan dawn te khan Kulha pa hmelah danglamna vak hmuh tur a awm lo, lal kiangah thlamuan hmel tak hian vaibel a pak hlat hlat kha a nia.




Hun leh ni te a liamfel hnuah chuan an chanchinte pawh zau zawka hriatdan a la awm mahna le. Ti hian buk kan sual ang nga, Kulha te pawh an lo let dawn hnai tawh ang an ti a.



Zachuha chu a mirin zawngte thlang chhuakin Kulha te umzui tur leh a pa leh a u te thuthlukna engkim hrilh tur chuan hmanhmawhna chuan a tur ta et et mai le. A pa lalna khua ngeia Luanghmun pasalṭha ralhrat ten khua an lo chuan hma ngeia hmakhalh chu a tum ruh hle mai. Engtiang chiahin nge he buaina hian nghawng a neih dawn le? Thil chikmi Phulzau khaw pasalṭha Zaluta chuan Kulha pa Taimama chu Luanghmun pasalṭha ralhrat, Khaw kulha tlang tluana hmingchhet ngei kha a ni tih a hriatchhuah phah dawn em?



Luanghmun nula hmelṭha Kulha nu leh an lal khawnbawl fapa in  an in chuh, Kulha pa a thlan vanga khua aṭanga phiar tuk ni a, an hnawhchhuah tak Taikulha pa Khawkulha hian an inhnuai a cho khuara a chengrang ṭha zet chu chelhin Luanghmun hi a pan leh dawn em le?




Khawkulha hian a sangawizawnpui Tekawla leh Mausela, dam leh tlangkhatah tia pheikhai a vawrpuite hi engtiang chiahin nge a hmachhawn leh ang le. Zia in thupa awmdan hrang laka nunbul ṭantu hian a pasalṭhazia chhuahin an khawhlui lamah chengrang chawiin hmalam a pan dawn em le? Lo chang zel la lo in enkawlṭha ang che u.