PÛMAH MI LU. BUNG 32- NA.

PÛMAH MI LU.


BUNG 32- NA


Zing ni chhuak êng dul tak mai chuan a tuarpui ve ni awm tak hian Thantlang khaw chhung chu a en ṭha duh lo hle mai a. Lalin la alh khu vut vut khaw mipuite'n an han hmuh meuh chuan an rilru tih no thara awmin an biang aṭangin mittui a rawn hnam chhuak leh zawih zawih a.



Zawlbukah chuan lalpa leh a pasalṭhate chu rorel nghalin lalpa chuan tun dinhmunah chuan eng han ti thei kan ni tawh si lo, ti hian kan leido te thlamuang takin lo awm se, khawthar kan sah en mai a ngai dawn a, khawi ram nge kan bawh tak ang le tiin an enkual den den hlawm a.



Chutia an han ngawih tak duk hlawmah chuan lalpa chuanca aw then kharh kharh pah hian ti hian thu an pawtchat a.


Kan chhak ral kan khua aṭanga nihnih kal vel ah khian Khuangphah khua Lalthansiama rorelna khua a awm a, in zathum nufa inchhal Zadeng lal a awm a, an khaw ram min sahthlak tura kan han bel bul a ngai mai dawn a ni. A ni khi lal ṭha leh fel leh rorel thiam pasalṭha te ngaisangtu a ni a, tukṭhuan,eikhamah hah pawh sawi lo va a khua kan han pan mai a ngai dawn a ni.



Tin hei tun dinhmun chu in hmutlang vek ang nga Ralvawn khaw pasalṭhate u keini chuan in tan pek theih che u kan nei hauh lo a ni. In tana kan tih theih tawh chu Silai fawng sawm te lek hi a ni a hei hi kan laka inrinawm zia leh in nunna pawh chan huam khawpa kan khaw tana in beihna hlawhtlin lawmnana min pawm sak turin ka ngen che u a ni.



Tin Khuangphah lama kal turin pasalṭha Zingliana leh Biakbuka hian tlangval panga ho se kan laka thil an phut erawh kan inbiak danin hril chawp mai rawh se. Ti hian khawchhak lam in pan vang vang anga, Tuivai hrul dinglam zar zarah in  kal dawn nia, Zuk mual hring nghulh in paltlang hnuah changel mual in thleng chho ang nga chuta ṭang chuan khua a hla tawh lo a, fimkhurna kha pai tlat ula lal beng ti thlep zawngin in ka in ang tur a ni lo. Ti hian in thang chhungin khaw thenfai hnatlang kan lo nei ang nga, lal thuchhuak kha in beng ah khan in khung tlat dawn nia.



Tluang takin in tumram in va thleng ang nga, lal ṭha na na na chuan a lo chelh khawtlai ngei ang che u. Kan khaw boruak vanga rei cham thei in nih loh zia in sawi dawn nia. Tiin thu an ti tlu a.




Mittui luangin kir an rel lo, kei ka ni inti chinte dinchan duh luat vanga Lusei khaw hrang hrangin nghawng a neih pawizia chu a tun an hai lo, an hai lo chung chung pawh a hausak duhluat vanga pasalṭhate hmatheh a hmang lal an awm leh ṭhin chuan mittui luangin kirzai reng a rel tir thei lo.



Tichuan le, Zinga te chu Khuangphah lam panin an thang ta vang vang a, a karah zanhnih an han riah meuh chuan Khuangphah khaw chhung chu losul haw hun awm velah chuan an lut ta. In lo ding en reng reng a pasalṭha tih hriat tak an namtawlh lu chunga salu chihrang hrang lo in tar te chu hmuhnawm tiin an han thlek vang vang a.



Khawtualah lah naupang infiam thawm leh tleirawl in bah hlim thawm te, Ar khuang al al thawmte chuan an lung a ti lengin an hnuk a ulh ṭeuh hlawm a. Chu pasalṭha in bang awng aṭanga an mahni chik zeta lo bihthla rengtu Khuangphah pasalṭha Zadawla chuan khawi khaw lal tui tlan nge an nih ang aw tiin rilru a lo seng ve mek bawk a.



Zinga chuan ti hian lalin kan pan phawt ang a, a ṭul dan angzel in thlenin kan dap chawp a ni ang chu, kan ka chhuak danah fimkhur tak zelin aw tiin lalin lam an han pan a.



Lal tuala nula in bah ho chuan khualval la naupang tak ralthuam famkim nena an khaw lei lung rawn dai lut te chu an thil tih chawl meuh in an lo thlir ṭhap a. Zinga chuan hmel hlim tak put tum tur chuan a ṭhiante chu an hrilh sap sap a. Biakbuka chuan enteh lawmpa sawlaia nula kan lam hawia mit la sawn duh miah lo saw i sal nula nen han khaikhin teh tiin an bek bawr sar sar a.



Chutah Zinga chuan a sawina lam chu an hawi a, Khuangphah nula hmelṭha khualthang hat a ni pha ve khawp ang. Tlemin Lentlang lal fanu aiin a ria sang deuh a, a ti tuai erawh a mam nalh zawk ngei ang le tiin an nui ri hak a. Ti chuan lalin chhunga luh an han dil a, an khaw tlangaupa chuan khawi khua leh tui lal bel nge in nih le an tih chuan Zinga chuan Thantlang lal tui tlan te kan ni e, in lal be tura in khaw leilung rawn dai lut kan ni an tih chuan tlangaupa chuan kan lalpa chu in hmu thei ang. Rinhlelhawm zawnga in khawsak loh hram ka beisei an ti chang fak a.




Ti chuan lalin chhung chu an han dai lut a. Lalpa leh a fapa chuan tlangval chuan khual valte chu chik zet leh uluk zetin an lo melh kar a, lalpa chuan ṭhuthmun awlah chuan ṭhut tirin an lo kal chhan chu an zawt ṭan ta a.



Zinga chuan lalpa, keini Thantlang khua te hian buaina lian tak tawkin Murlen leh Lentlang leh Mualnuam khua te ṭangho chu dang zo lovin kan khuaah inding pakhatmah a awm tawh lo a, i ṭanpuina beisei in kan lalpa in min tir a ni an ti a. Lalpa chuan a ni tak maw, inrun hi a ṭha lo asin aw, Thantlang valrualte danzawh rual ninghal lo chuan in tawrhna chu ka hrethiam nameuh mai. In lalpa chuan engti zawngin nge ka lakah ṭanpuina a phut le? Beng dawh meuhin ka lo ngaithla ang nge an ti a.



Zinga chuan lalpa," kan khaw boruak minhriatpui tawh a, kan khua saw han luah leh na chi pawh va ni suh, khawthar sat turin i ram tlem a zawng min sakthlak thei dah lo"ng maw tiin i ṭanpuina ka rawn dil a ni an ti a. Lalpa chuan a hmaa mitmeng fiah kak leh inkhaithli zaih, hmaitlang ṭha zet la naupang tak si chu chik leh zuala en kul chung hian tlangaupa ka pasalṭhate leh ka upa te zu ko khawm teh tiin an tir liam nghal a.




Chutah lalpa chuan kan rorelna kianga in mawng in hun a rem dawn lo va min lo va chhuahsan lawk mai ta che u an tih chuan Zinga te chuan lalin chu an han chhuahsan nghal a.



Ti chuan a upa te leh a pasalṭha te leh a khaw buanchakte chu kim takin lalin chhungah chuan an han ṭhubial laih a. Lalpa chuan an khaw harsat zia thu an han sawi chuan an pasalṭha Zadawla chu ding meuhin ti hian thu an sawi a.



Lalpa an dinhmunah ding ni ila keini pawn an tih ang hi kan tih ve tho ka ring. Ral nena an inbeihna lamah an in chan ṭeuh ta ve ang. Thantlang tlangval huaisen zia leh pasalṭha kawlhsen an kawlhnem zia tlangkam aṭangin a tun kan hai lo. An pem pasalṭha Sawiluaia leh Thlahtea khualthang khawpa mihuaisen kan ral hriat. Chutah Thantlang valrualte huaisenzia kan hria, tunah pawh lal thachhang dawltute kha an hmel hmaiah la nau deuh mahse in lo chik ve chek emaw deh an khirh tur zia ka lo hmu tlang vek asin.



Chumai a la ni lo, an hruaitupa hmelhmai mawi zet pian to dan te kha in lo zirchiang em? Lalin hruaitu atana a dansan kha minamei a ni hauh lo vang tiin an sawi a. An pasalṭha Kapthanga rawn ding chhuak leh in.



Lalpa," an buaina tawh te hian kianzai a,rel mai angem? I rambawh sahthlak ta la, nakin zela kan tuchhuante tan hian a pawi thei ve tho tih erawh kan hriat tlan a ṭha ang. Leido em em nei lo mah ila, tunah pawh a khat tawkin Khuafo Pawi lal fapa leh a pasalṭha ten i fanu helin kan khaw leilung an rawn dai chhen lehnghal.




Tuivai lama kan perh tarna lam han sahthlak dawn ila Khuafo Pawi ho lakah an lu kan zawrh sak ringawt a ni mai dawn a. Thantlang lal sawn khawi khaw lal mah a bel duh dawn hauh lo a tlangval laia pasalṭha ralhrat an sawi hat hat kha a ni ve miau a.



Keichuan ngaihdan han siam ka harsat tlat. Ka Luseipuite an nihna erawh ah chuan kawng kawhhmuh la ka ti lalpa an ti a. A upa Chalthanga lo ding ve leh in lalpa, Thantlang khaw ropuizia kan hai lo tunah an tluchhia in lalin takngial pawh ral ho in an zuahsak lo a nia. Raldo tham pawh an awm lo ngei ang le. Chutih rual erawh chuan Khuafo pasalṭhate lo dang turin inremsiamna kan neihpui theih mai ka ring.




Keini aia khaw lian zaqk Pawi ho khian min rawn chimral duhna lak ata an ni pasalṭhate hmathehna leh keini ṭangkawpin kan himna tur a ni tih hi kan chhut tel a ngai ve tlat. Tuivai lam ep a awmhmun an khuar duh a nih a hnu, keini tan Khuafo nena kan buai rukna zakhua leh i fanu himna a ni lel dawn zu nia an ti a.



Lalpa chuan aw le in thu leh hla te beng dawh meuha han ngaihthlak hnuah ti hian thu kan ti tlu ang nge. Ka ramvalh chin a khua an sah dawn ro ro a nih chuan Tuivai lam ram ah ni se. Ka ramvalh chin ka sak dawn ta rau rau a nih chuan silai fawng sawmhnih leh Senufa ka phut a, ṭhifang leh darbu ka phut bawk e. An tih chuan midangho chuan an lu an lo bu tliar tliar hlawm a. Ti chuan an rorel te zo in tlangaupa chuan Zingate chu an ko lut a.




Khuangphah lalpa thutlukna an han hriat chuan Zinga chuan lawmthu sawiin hlim hmel pu sarh hian an khi sak sak a. Chutah lalpa chuan Tuivai lam ka ram,sak tur cheu piah aṭanga nikhat leh chawhma kal vel ah khian Pawi lal ram Khuafo khua a awm a, an pasalṭhate hi an in lulingin pawisak an nei lo hle a an lakah erawh in fimkhur a ngai ang. Khaw inhnaihte in nih dawn avangin an ti a.



Zinga chuan lalpa kan lo vawng reng ang nge. Keihi Sawiluaia fapa pang zawk Saizingliana ka ni e an tih chuan lalpa chuan a ni tak maw, i u erawh kan lo ralhriat a, Saiahmingliana kha a dam maw ral lakah in in chan nual em an ti zawm zat a. Zinga chuan chan nual e tlangval sawmruk vel awrh chauh kan ni tawh kan pasalṭhate chu ṭek khamphei lakah an la him e, min tam hneh em atin ni, inmal beih turin hun min pe lo nen an tih chuan lalpa chuan ti chuan in khua chu ral ho chuan an awp zawm ta tihna em ni an ti a.




Zinga chuan awp zawm lo ve. Khuanhnuhnung a lo thlen rualin ralho chu kan bei let vak a, mahni khawram chin na na na chu bwl zawkah ṭangin kan la let thei hram a ni. Bul han ṭan ṭhat leh nan hun erawh kan duh rei deuh ang nga, kan lalpa in rem a tih chuan Murlen leh,Lentlang leh Mualnuam khuaa rawlrala che turin ka chhuak ang an ti chhuak chhak a.



A kianga pasalṭha ho chuan an kianga tlangval la naupang tak rorum zet chu engtiang chiaha ral beih thiam nge a nih ang aw. Khuafo pasalṭha Thanglunga aia a sihhnipna tur bik chuang an hmu hauh lo.



Tap lama an khual val la naupang tak a ruka lo melh leh hrek hrek ṭhin tu lal fanu hmelṭha Chhingnoi chuan a rilru te te chuan Khuafo lal fapa nen lo tehkhin in Zinga midip a nat dan tur zia te chu a lo suangtuah ve mek bawk a. Ti chuan lalpa chuan Khualthang pasalṭha ralhrat  Sawiluaia fapa chu han belhcian che ka chak hle mai keimah ngei hian ka lo mikhual ang che. Tiin a upa te chuan a ṭhiante chu an inlamah an hruai haw ta a.



Lalpa chuan harsatna an tawh ruk te chu leihkapui lama ti ti vawrh pahin an hrilh siam siam a, Zinga chuan lalpa, min lo ngaikawi lo la, i lakah hian nausen ang mai in zu awm tlat a maw le. Inkungkaihna erawh kan neih hauh in ka ring lo va, i buaina chu ka hriatthiampui khawp mai che. Khuafo pasalṭha te chu kan awmlai hian i khua hi lo dai lut teh se. Kei Sawiluaia fapa leh Ralvawn lal thisen kai Kawizingi fapa hi ka dam hun chhung hian ka zam ngai lo vang an ti a.



Chu ve leh lalpa chu ding hluaiin Ralvawn lal Liangzinga tupa maw i nih a? Chemtei nu tiin an phul hlut a. Lalnu chuan eng kan ti leh pek ta nge ni ngai tiin an rawn dak ha a. En teh i nuṭapa tupa i sawi ve ziah Kawizingi fapa a nih hi an tih chuan lalnu chuan a mittui khap per sakin i hmel kha ka hmuh tirh aṭang khan ka mikhual lo asin. Lo hnai teh tiin an kuah vawng vawng a.




Khuangphah lalnu hi Zinga nu ni a lo ni reng mai. Eng ti tiha Khuangphah lalpa nena in hmelhriat nge an nih aw tih chu hriat chak hle mah se an boruak tawnin a zir loh em vang chuan nakin remchanga zawhah a khek ta zawk a.



BONUS



KA HMANGAIH VEK CHE U.