PÛMAH MI LU. BUNG 8- NA.

PÛMAH MI LU.


BUNG8- NA.


Zingkar a ni a, hramthiam chitinrengte'n an aw mawi tak chhuahin he leia chengte hringmi mawina ti famkim turin a bo a bang awm lo'vin an che vel thlir chunga thlawh hualin  an han chiar nak nak hlawm a.


Dam hauh tura an beih let a ngaihnasat zia hrechiangtu mihrangvalte chuan tukṭhuan bar tur buatsaihin an han che sawk sawk hlawm a. Lal fanu hmelṭha zingtho phang mit nuai chat chat chuan zan khawthim hnuaia an awmna chu ni chhip lo lang chuan rawn chhun eng siar siar in vanlam hawi chuan an zi ṭalh ṭalh a.


Chulai hmun mawina ti famkimtu a va ni teh lul em, mautheia an tui chawi ngah sa chuan inthlahtung ru tak chung chuan a hmai hlai ṭha hlep hlawp bial mât chu an phih a. Chiang zeta lo melh kaltu Saia mit chu va melh let ve nghal in lal fanu chuan Saia chu chiang zeta melh kal pah hian a lu chu chet tirin chunglamah an dak chho ha a( eng nge ni ta)



Saia chuan nuih sak pah hian a kut chuan a bek chu an kawk zauh a, chutah lal fanu Thangzuali chuan a hmaiah chuan eng emaw a kai em maw tiin an tuai vat vat a. Chutah midang melh ralh pah hian Saia chuan Thangzuali chu pan in a kiang a va thleng chuan a biang chu a kuta va tawkin eng emaw laksak ang takin a kutzungpui leh zungchal chu an hmehbel a.



Chutah! Thangzuali'n a kut a rawn enlaitak chuan Saia chuan a kut chuan Thangzuali hnar chu an pir zauh mai chu Thangzuali chu tum hmak chung hian lei an chhuah khum a. An chezia ngun taka lo thlithlai ru kartu Thlahtea chuan a vanglai nun liamta te dawnkirin hmangaihna hlutzia chu an chhui kir leh a.



Tukṭhuan puar taka an han ei kham chuan tuibur hmuamda vel an han puar tlafel tura an han ṭhut khawmuan hnu chuan Pherpui khaw lam an han pan nghal a.



Pherpui khua an han lawi luh chuan Saia chuan Thlahtea chu bek bawr sar sar pah hian Danglova hi a chin kan hriat hmasak a ngai tiin khaw chhunga lo awm hmasa ber chu kal pel in lalin lam an han panding nghal a.



Lalin an han thlen chuan lalnu leh lalpa chuan phul hlut hian taite, ka tupa," himdam takin i lo let leh maw ka va lawm em tiin Saia chu an nupa chuan an kuah thlawp a. Chutah lalpa chuan Lentlang lalfanu hmelṭha zet chu melhin ka fanu lo hnai teh an tih chuan Thangzuali chuan lalpa lam chu an pan nghal a.



Lalpa chuan nula hmelṭha tak i ni e. Ka khua leh tui mawitu atan ka va duh che em an tih chuan Thangzuali chu zak sen deuh ṭan ṭan hian lalpa," kei nula derdep satliah hian i khua leh tui ka mawi pha ve meuh dawn em ni? I khua leh tuia nula ho hi ka chung en vek te an nia sin tiin a thinlung leh rilrua in ngaihthlawmna nun chu an chhak chhuak zoh a.



Lalpa chuan ka fanu," i pa chuan a va chhuang dawn tak che em tiin an kal dan zawng zawng leh hun an va hman dan chu an zawt a, Thlahtea chuan thiam taka an sawi hnu chuan lalpa chuan a tupa chu chhuang takin an melh ralh a.



Thangzuali chuan chutia lalpa in a mipa hmangaih awmchhun Saia chu ka tupa an ti chu mak a tiin Saia lah khan Murlen khua leh tui an nih thu a ka aṭangin a hre tawh bawk nen Saia chu ringhlel ti tih  mit meng chuan an melh si sap a.



Lalpa chuan hei awllen lai a ni bawk a in cham ve rih turah ka lo ngai rawk cheu a an tih chuan Thlahtea chuan lalpa," cham chu a chakawm in i khua leh tui leilung rawn rah hi kan kham hauh lo mai. Chutih rual erawh chuan englai pawha fimkhur a ngaih avang leh leido nei ru reng an nih thu chu an chhak chhuak zoh a.



Lalpa chuan a nih chu maw le dam han hauh ila khuanu zarah kan la in hmu leh tlang turah ngai ila, ka tupa erawh hi chuan ka lalin hi han hual him se, a nu lu nghahna pawh tlaeh ve ngei turin ka in buatsaih ang nge. Lentlang khua in thlen ve leh in lalpa hnenah chuan ka dam ṭhat thu lo thlen ula, awllen lai ngeiin Lentlang khaw lei lung ka rawh rah tur in lo sawi dawn nia an ti a.



Saia chuan ka pu," Lentlang khaw lalpa mi tirh te kan ni a, cham chu chak hle mah i la, cham thei kan ni lo a ni." Hun remchang hmasa berah i lal na ram ngei hi ka la rawn rap leh ang. Kan thudang a lai chuan i pasalṭha Danglova hmel hmuh in beisei lai lai a an tih chuan, lalpa chuan kurungmual fangin a naute paruk nen tukin zing khan an chhuah tak kha maw le an ti a.



Chu ve leh Thlahtea chuan lalpa," i pasalṭha hi kan miduh awmchhun a ni a, ti hian kan lo nghak ang. Kawlkil thleng pawn a hnu hi kan chhui ngei ang. Phatsantu chuan a tuhrah a seng ngei tur a ni an ti ram hmak a.



Lalpa chuan Thlahtea chu melh kul chung hian a engti zawnga phatsan maw an tih chuan Thlahtea chuan thil nih dan zawng zawng an hrilh hre nghal vek a. Chu ve leh lalpa chuan a ha chang ṭhial rik bap bap pah hian chuti zawng chuan maw ka lakah hem a lo thlak a? Lo ngai tak rawh se. Phanpui kungah a lu ka tar ngei ang an ti chher chhak a.


Lalpa chuan tlangaupa," ka khua leh tuia phatsantute hi an chin chang ngai changin zu thli thlai teh khai tiin an tir liam nghal a. Lalpa bawk chuan," ro thil hlu it vanga kei mi do chuan an phu tawk hremna ka pe mawlh ang. Kha leh chen ka rorel te felhlel in ka hnu hma lo phuai deuh mahse tunah chuan thinlung thar nen a hmalam ka pan lai lai a a ni zawnga  min han phiar ruk chu le tiin thinrim tak mai hian a vaibel chu a biang khuar kawk kawk chung chuan an hip a.


Tlangaupa chu lo let in khua a ruka  zan hmasaa an chhuahsan thu leh a nupui fanaute hruaia khawi khaw lal awp ber nge an belh ang tih pawh sawi duh lovin khua a ruka an chhuahsan thu rawn sawi in lalpa chuan a ṭha e. Kei mido zawnga chet thawh te chu an chep zel ang.



Kurungmual fang turin an chhuak i ti a ni lawm ni? Tiin Tlangaupa chu an melh kul a, Tlangaupa chuan lalpa," ṭhenawmte ti ti phung ka hriat satliah ve chauh a ni. Min ngaidam rawh an tih chuan lalpa chuan a ṭha e. Tunah zet chuan ṭhenawm khaw ho zuam ka hlawh ta sawt dawn zu nia, eng ka  ti ta nge ni dawn le? Kei hi Pherpui lal tlaktlai lo ang maia ka pasalṭhaten min han do tak mai chu le, eng hi nge an lakah tihsual ka neih?


Ramhulaah ka siam a, fathang ka awl bawk a, chutah a se chi ṭha ka puichhuah a, eng hi nge ka lakah a la phut cheu le tiin a thinlunga hlohthawn rukna leh beidawnna lian tak mai chu lalin chhunga awm ho te chuan an hmuh hmaih hauh lo.



Saia chuan muang ban charh leh fiah fai fel fak hian ka pu," Lunngaihna hi in hneh tir ngai suh ang che." Tunah chuan ka tlangval ve tawh alawm. A meizang hlap zawnga dotu te chuan kei hi min do tel tih lo hria se. Ka nu Saizampuii seilenna khua ngei hi tun aṭang chuan ka khua leh tui a ni tawh ang an tih chuan lalnu leh lalpa chuan an tupa tlangval hmelṭha leh huaisen tak mai chu chhuang takin an kuah vawng vawng a.



Thlahtea chuan kut lo beng thak thak in Saia," i duhthlanna piah lamah i nu leh pa an la dam ve a ni tih hi theihnghilh ngai hau suh ang che." Chutih rual erawh chuan i pu lalna khua ngei hi meivapa a chan loh nan i uapna an mamawh tih chu kei ngei pawn ka hmu tlang vek .



He thuah erawh chuan in chhungkaw hnih thu inkar ni se an tih chuan Saia chuan Thlahtea fin zia leh remhriat zia an hmuh chuan a ngaihsanna chu chawp leh chilhin a zual nghal pang mai a.




Zanriah kil a lo hun chuan puar takin lalinah chuan an ei za tlang a. Lalpa chuan ka rorelnaah hian zanin chu in tel ve ka phut dawn a. Tuman ka thu hnial lo turin ka duh cheu a ni. Ka tupa in tuna chinah ka lalin min ṭawmpui se, chuan kan Pawi pasalṭha Khankimsiam hi ramhualah ka siam ang nga, fathang ka awl bawk ang. Ka khua leh tuiah hian silai fung tih tham kan kawl lova, ral leh sahrang hmaa kan ke a phet mai loh nan Lentlang lalpa leh Mutlen lalpa hian a phal tawk se chal kan khuaa awmho nen in thleng ta mai ila ti chuan nunchan zir turin ka tlangvalte thinlungah huaisenna kan tuh thar leh ang an ti a.



Khankimsiam chuan chuti taka Pherpui lalpain a dah chungnun zia an hriat chuan a hnuk te pawh a ulh ru ṭeuh mai a.  Thlahtea chuan lalpa," i tihdan dan ni rawh se. Ti hian a tuk varṭianah kan chhuak ang nga, i thil duh Silai fung zat pawh kan lal bulah ka lo sawi ang nga, Lentlang lal fanu hian a pa bulah lo sawi ve ta mai se. A fanu him dam taka kan hruaihaw na ringawt pawh hian a pa thinlung a ti lawm dawn em em a, chu avang tak chuan kan pasalṭha Saihmingliana nena in in laichin dan zawng zawng hi a hriat a ṭul a ni.



Mahni luseipuite lak ah khawi khaw lal mah hi a tlan chhe dawn hauh lova, keini Murlen khua te tan chuan channa nasa tak ni mahse la, nang a pu ber in i khaw muantu atana i kuangkuah miau chuan kan lalpa pawn tih theih a nei dawn hauh lo. Mahse i makpa Saia pa Sawia thutlukna erawh keini dan rual a ni dawn lova chu chu i lo hriat lawk ah ni se.



Nu tel lova a chawm seilen hi a hmuh phak lovah a awmtir duh hauh lovang le chu tak chu kan buai rukna tur a ni an ti a. Lalpa chu a chawbar lai chawl meuh in a melh ngai an melh vung vung a, chutah lo ṭawng chhuak in," a ni dawn teh tak e a," mahse zantam riak pai tawh lo kut khur hlak hlaka upa te kianga ṭhuthmun rem mai ka nihna hian an thinlung deng tel hlak se, ka ṭah awhna anka te chu an bengah lo hling se engpawh ni se a ṭha lam turah leh thil kaltluang zel turah i rin lut phawt mai ang u aw an ti a.



Zan a ni a, chu zan chu in hmangaihte tana hun ṭha leh hlimawm zan duhawm ni mah sela, a tuk maia in mangṭha turte tan chuan zan huphurhawm tak zan a ni ngei ang le. Leihka sanga ngawi renga ram ngaw thlain a chhun en kalh lam thlira thil tam tak suangtuahtu Lentlang lal fanu hmelṭha biangah chuan mittui a lo luang ngiai ngiai a.



Lal fanu chuan a bula ngawi renga ṭhu Saia chu melh ralh pah hian i nu chanchin hi tuium khirh rual lek ka nih lai khan ka lo hre ve tawh asin mi ti ti kam liamah, a vanglai nun a hmang tlem lutuk chu a pawi khawp mai an ti sap a. Saia chuan khuanu rorel dan hi tuma dan thei a ni si lova, an tih chuan Thangzuali chuan tum bar chung hian i lo in ngaitlawm chapo hle mai maw," tiin an sik hlak a.



Saia chuan chutiang a ni lo asin, kei chu nu tel lova seilian ka ni a, mahni insit a na em a ni. Lal thisen kai ni mah ila, mahni insit hi a na duh em alawm tiin an nghawk zoh a.



Duh tawk phawt ang.