PÛMAH MI LU. BUNG 9- NA.

PÛMAH MI LU

BUNG 9- NA.


Saia chuan ngun taka zanriah ei kham zawha a hmalam hun tur an ngaihtuah chuan Murlen a seilenna khua chu a ngaihtuah a, leh lamah ni se a pu lalna chu englai mai pawh a an hriat loh lam aṭanga ral lo lut thut thei an nih zia a hre chiang bawk nen a rilru chu a buai ve hle mai a.



Lal inah chuan upa te ho chu lo chuangkai ṭak ṭak in ṭhuthmun an han rem fel chuan lalpa chuan thutak khunkhan fe hian vaibel pak khuk laih laih pah chuan, tunah zet chuan khawi khua mai pawh hian min zuam sawt tawh dawn a nih hi an ti chuai raih a. Upa Chawngchhuana chuan lalpa," lungngai mah ta che," khuanu hian kan chungah zah a ngai ve chek a niang chu.



Kan piah ral Murlen khan kan chak lrh thlang Pawi ral te pawh remna saui a tan pui tak kha maw le. A pawng a puiin min rawn nawr bik ngam hauh lo vang. Ralvenbuk lam kan thawm ṭhat leh zual pawh a ngai ngei ang, lalpa," i khua leh tui te tana hriat nuam lo i ka aṭang khan chhak chhuak hauh suh ang che. Sailo lal thisen kai i nih kha vawng tlat rawh tiin an hnem a.



Lalpa chuan ka upa Chawnga nge nge i thu lai lak dan chuan min dam tir sawng sawng e. Chutih rual erawh chuan ṭhangkhatlian liamta a MI LU LAK MUAL a inbeihna nasa tak thleng khan nghawng duhawm loh zet vung thar rawn chhuah in Kelzam khaw pasalṭhate sawn an huang lo rawn zauh in ka ram chin ah an hniak an rawn hnutchhiah fo mai saw kei zawng ka beng zu ti kham tlat a.




Han nawr let turin pasalṭha khualkai ten mual an lian tawh si, chu chu remchangah hmangin thawt lawkna awm lek lo hian min rawn chil duh mai lo'ng maw an ti leh te te a.




Khawnbawl upa Hrangvunga chuan lalpa," i thil thlir dan aṭang chuan a awm lo lo ve. MI LU LAK MUAL lam pher zau ṭha zet saw it vanga rawn la nek tu tur che tam tak an la awm ang. Chumi thil lo la thleng tur zawng zawng dang tur chuan kan tlangvalte an thinlunga huaisenna kan phum sak an ngai a ni an ti a.



Lalpa chuan a dik khawp mai. Hun leh ni te a ral ve zel ang nga, hei ka tupa Murlen pasalṭha hian Saihmingliana hi ka khua leh tui te venghimtu atan ka lo tuat thla rawk a, chutih rual erawh chuan kan piah ral Murlen lalpa in kan lusei pui ni lo pawh inremna saui a tanpui theih laia kei mahni lusei puite nena in chap char reng a han awm hi khua pawh min hawi tir ngam dawn lo ve an ti a.




Upa Chawngchhuana chuan," engpawh ni se, i tupa thutlukna hi han ngaichang i la, kan tlangvalte nunchan zirtir tura a in peih hun i lo nghak phawt teh ang u. Hnaṭau ṭheh leh hma ngeia kan in peih a ṭul a ni. An ti a.




Lentlang lal inah ve thung chuan lalpa chuan a upa te chu melh kual dan dan chung hian a ni kua na a ni ta der mai, chanchin rawn thawt lawk chu a hun ta hle mai ka ti an ti chhuak phawng a. Upa Sialmana chuan lalpa," naktuk nileng leh zankhua ngai chang ila chuta a rim a ra hriat tur a awm loh chuan kan pasalṭhate hi che chhuak ve mai se a ṭha lo"ng maw? Kan chheh vel khaw lei lung rap tur hian an ti a.



Lalpa chuan niang chu maw le, khaw nge beiseina thar nen i han nghak leh phawt mai ang u hmiang. Ka pasalṭha Thangkunga pawh hi thehmeh ang mai hian a reh tlawk tlawk mai leh nghal a tiin an sawi chhuak zauh a.



A tuk khua a lo var chuan Pherpui lalin aṭang chuan Lentlang khaw lal fanu leh a tlangval panga leh Thlahtea leh Saia chuan kalzai rel turin an in buatsaih malh malh a. Khankimsiam chuan a rilru siam felin Pherpui khaw mi leh sa ni tur in a in bengbel ve thung dawn a ni.



Darhawih lungdawha an khua thlir vang vangtu pasalṭha ralhrat chuan englai maha a mah thlahthlam ngai lo tu an lal fapa tuai tir Thangdorem chu melh zuk pah hian i pa lalna khua ngei lo dai luttu a Lentlang lal fanu hruaikir lehtu chu mi na mai a ni hauh lo vang.



I pa hi a ngawi mai mai dawn hauh lova, chutah chuan nang leh keia hmalakna pawh a mamawh ngei ang. Pherpui pasalṭha hmalakna chu engmah lo maiah kan chhuah tak si ah chuan Lentlang lal fanu aiah Pherpui pasalṭha lu tal kan khai haw a niang chu an ti rum al a.



Thangdorem chuan i hmalakna a sual ngai lo ve. Chutih rual erawh chuan Lentlang tlangval kha engtia han tih zui chi nge ni ang an tih chuan Zatinthawnga chuan an lal fanu in an khaw lei lung arap lut ngei tawh ang nga, hrehawm reng rengin hun a hmang tawh ngei ang. Kan unau ten inremna saui an tanpui tawh a hnu kan unaute dinhmun derthawnga dah leh chu i pa hian a remti lo viau mai thei a, chutih rual erawh chuan Khankimsiam vang pawh in hmalakna tur kawng dang hi a dap leh tho in ka ring e an ti sap a.



Thangdorem chuan chutia ro hran a neih leh chuan kan piah rala Luseiho saw a rin lut tel lo thei dawn lova, a ruk a rala chet chhuah nge chi ang an mut rem laia va chi mih ṭhak tiin an zawt a. Zatinthawnga chuan, chu zawng, vut laka vawih ang lek zu nia.



A pawng a puia basa ngam chi a ni hauh lo. I pa hian khawi khua nge a bitum hmasak ber tur kan chian phawta rilru fim taka kan ngsihtuah a ngai. An chak lohna zawn uluk taka kan zirchian hnuah chauh chet kan thawh ang. Pherpui Lentlang, Murlen, Murlen piah ah Leizo khua a awm leh a, chu chu lusei awp khua a ni a, khaw tawp lam aṭanga hma kan lak dawn chuan Ṭiau ral kan kân a ngei ang. Chu  tak chu kan tan pawh a harsa viau ang. Kan Fanai unaute Murlenin nen inremna saui an lo tan tawh bawk nen.



Lungmawi khua leh Ralvawn khua te khuan min thuralpui dawn hauh lova fimkhur taka chet kan lak a ngai a ni. Mualsei khua lahin Murlen khaw pasalṭha ho saw a hluah tak te in an hlau bawk nen. Murlen pasalṭha huasen zia leh kan chipuite an suat mang hneh zia tlangkam aṭangin kan hre tawh. Lentlang pasalṭha ralhrat ho nen in ti unauin an in thawh awl lo vei nen kawng leh lam taka ngaihtuahna sen chuan kan chhiatna tur lam kan pan hawt a ni mai lo'ng maw? I pa lo ti ti pui ve hrim hrim la, a rilru i sawh sawn thei ngang lo a nih tak leh kan chhak ral Murvalen khaw pasalṭhate thlen thluk dan kan ngaihtuah a ni ang chu tiin khaw chhung lam an pan ding nghal a.



Pherpui lalpa chuan ka tupa," i thutlukna ngaichangin kan mit tlin tawkin kawt chhuah aṭangin kan lo thlir reng ang che." Mamawhna a san poh leh kan mi mamawhte hian in lak lulin nan an hmang fova, chung zawng zawng paih thlain khawngaihna tal i rawn lantir a ni ang chu. Tluang takin le tiin kawtchhuah thleng khaw mipuiho nen an thlah liam ta a.




Lentlang khaw kawtchhuah a losul haw hun awm vela feh hawng ṭhenkhat te chuan an lal fanu himdam taka an han hmu kir leh pasalṭha ralhrat tih hriat ngawih ngawih pahnih," Thlahtea leh Saia an kianga an han hmu chu lawm avangin an biangah mittui a luang hial hlawm a.




Lentlang lal inah chuan hlim avanga ṭap ri leh se chal thi tur chalchang awrawl chhuah te. Tlangval leh nu nau chen a lal fanu dam reng rawh se tih thawm te, vawk thi tur chalchang ngek ruai ruai ri, ri chi hrang hrangte chu a in pawlh nuaih mai a.



Lentlang lal fapa chuan Thlahtea leh Saia chu khua chuanpuiin hlim takin an ti ti hlawm a. Lentlang lal fapa Ralthankhuma chuan ka pa pasalṭhate beidawn hnuah nangnin ka farnu him dam taka in han hmu leh mai thei hi a lawmawm hle mai a. Ka pa hian in lakah engpawh a tihsak ang che u, hnar hauh lovin ka pa in ka farnu lawmnana a peh cheu ah lawm takin in pawm dawn nia tiin an sawi fak fak a.




Lentlang khaw mipuite chuan an lal fanu hmelṭha chutia hun rei tak a thi em maw an lo tih himdam taka an hmu leh chu lawm leh hlim takin an an hmangaih zia an lantir a. Puar takin khaw mipui zawng zawngte chuan lal fanu lawm nana ruai an ṭheh zawh chuan zan lamah darkhuang, phenglawng ri nen tlaivar ṭhakin zan hun hlimawm chu am takin an hmang a. In kal pawh rem chiah si lo, in hmachhawn ran chungin mi hmuh hlau tak si in Saia leh lal fanu chu an han in mor sir leh ralh ṭhin a.



Ti zawng hi ni rih se. Ka la buai em mai.
.