PÛMAH MI LU. BUNG 4- NA

PÛMAH MI LU.


BUNG 4- NA.


Zawlbuk chhung aṭang chuan thih i hlau lo em ni tih ri leh silai ri chu in rual nghal zatin Saia beng bul chu rawn thaw phei fua in zawi sap hian a teuh ther ther teh e, tih leh chak taka lalin piah lawk a, silai rawn puahna lam a tlankawi zar zara phit phei puat hian lalin sir a hnim che lai lam chu melh zawk pah hian Saia chuan a silai chu an hmet puak nghal ṭhuai a.




Silaimu chuan a tum a hlah a ni tih hriat tak mai hian thawm riva hriat tur leh dang a awm ta hauh lo mai le. Chutah Saia chu lalin hnuaia lalpa vawkpa sutnghak awmnaah chuan bawkin vawk ek te chu a biangah chuan a kai luai mai a. Chutah zawlbuk aṭang chuan tlangval ho chu ting taka haw haw in lal tual lamah chuan an rawn lim phei puat puat hlawm a.



Chutah le, Saia chuan ring taka au ṭe ṭhat chung hian lal leihka sanga hmelmapa hliam kha tumah khan kut lo thlak suh u tia a sawi zo chiah chu Pherpui pasalṭha Danglova chuan nang hian maw a ruk a rala kan lalpa in pawh zahpah lek lova luh chhuah i tum vai tih leh a kawlhnam chuan Pawi pa nghawng chu an chhawk hmawk mai a.



Chutah le, Saia chuan lalin hnuai aṭanga vawk ek kai luai chunga rawn thawh chhuah pah hian Pherpui pasalṭha chu a rinhlehna a zual ta telh telh mai a. Saia thinrim chuan leiah a ke per dawt dawt in fiah fai fel fak chung hian Pherpui pasalṭha chu melh kal chung hian a ni kha in khua leh tui tana mi ṭangkai tur asin an ti a.



Danglova chuan," kan hmelma hi kan khaw tana mi ṭangkai maw a nih a, tlangval i â deuh a ni lo maw an ti ha a. Saia chuan engvanga in khua hi rawn bei nge an nih tih hi a ni hnen aṭang chauha hre thei awmchhun in nia sin an ti a.


Danglova chuan tlangval," kan khaw tana i in pum peknaah kan lawm e, chutih rual erawh chuan kei Pherpui pasalṭha, chet ka thawhnaah hian min dal turin thuneihna i nei lo an tih leh chuan mipui pungkhawm te chuan an khaw pasalṭha chhuanvawr leh tlangval hmelṭha leh pianthiam tak in chhal chu chik zet in an lo melh tawn zak zak a.




Saia chuan, aw vawt raih leh fiah fak mai hian," duh ni ila a lu burah khan ka ngenmu ka chhung lut thei asin, ka hliam mai chauh a nih kha, zawlbuk valrual te thih ngam lu pu a mutmu kan tuah theih loh lai khan  a nih khaw nge i awm ve le an tih chuan Danglova chuan," naua, a chuti zawng chuan maw bul kan ṭan dawn a? Tih leh Saia chu pan an rual nghal zat a.



Saia chuan pu a lo hnai hlek suh," in khuaah hian buaina ti punlun tura lo kal ka ni lo ve," buaina i duh a hnu hlaua tlanchhe ta hi i naute nen khan umzui la ti nia an tih khum leh sak mai chu Danglova chu a sa ta phat mai le. Lalpa chuan," in thu leh hla te kha benga thlun tluk zet a ni e. Buaina chhuak tawh suh se. Heng kan mit ṭhak duhtute hi khawi khua leh tui nge an nih tih hi kan hriat chhuah vat a ṭul a ni an tih takah chuan Danglova chu a in bengdai thei hram a.




Huaisen taka an khaw tana thih pawh hlau lo tu khualval huaisen leh pian thiam leh hmel pa hrak chu khaw mipuiho chuan an thlek ngunin khawi khua leh tui nge a nih tih chu an in zawt sap sap hlawm a.



Saia chuan lalpa lam chu hawi ha chung hian lalpa," kan tana mi ṭangkai an nih ka ring tlat a ni," tinah hian tlanchhuakta te hi ka ṭhiante nen hian kan umzui min phalsak ta che an tih chuan Danglova chuan," lalpa, um hian awmzia a nei thui vak lovang, i lalna khuaah hian mihuaisen kan tamzia ti khan an hria ang nga vawikhatmah an lu an rawn rawlh lawr ngam tawh lovang an rawn ti leh sak a.



Thlahtea chuan," lalpa ka naua ruahmana chu i kutah a awm e, kan lo kal chhan i hriat angin kan tana mi ṭangkai an nih tak mial in an hnu hi kan umzui min phalsak hram ta che an tih chuan lalpa chuan a pasalṭha leh a tupa chu melh tawn zak zakin a ka a an dawn lai tak chuan Danglova chuan," che heu leh! Chutia umzui in duh te chuan kei leh ka naute hian kan han umzui zawk ang nge, khualval te u Pherpui tlangval huaisen zam ngai lo kan awm ve bawk e an ti chang fak mai a.



Saia chuan a pu chu en kal pah hian an mitmei zauh a, lalpa chuan, ka pasalṭha," he buainaah hian kan khual valte nen in kungkaihna an nei pawh a ni mahna le, khawnge an theihna lanchhuahtir hun ni pah fawmin i han chhin ang hmiang," eng teh ual an nih ka ring hauh lo mai, nang iang pha tur che hian an la nau deuh a ni, chuti chung pawha an mawng hlimna tura an ring an rawlh peih a hnu ka remti e, an hnu chu chhui mawlh teh u an ti khauh a.



Hetia Danglova hian a hnial tlatna chhan leh lalpa in Mitlen pasalṭha te Pawi hnu a chhuitirna chhan hi sawilan kher a ngai lo ang chu maw, in lo dream mai dawn nia. Kei ang nga hmelchhe ve tho ho te u. Hi hi.



Danglova chuan lalpa," i khua leh tuiah hian i mi rinrawlber ka ni a," tiang hian zanlaiah hmelmate lo lutin kan mang ṭhak pawh pawisa lo in an rawn che a, a la dam awmchhunte hi kei leh ka naute ho ngeia um ka duh e an tih chuan, Thlahtea chuan a chuti zawng chuan maw? An hnuchhui danah kan lung a rual lo tlang deuh a nih pawn in hriatthiam tawnah aw.



A meizanghlaptu chu kan hre chhuak thuai ang, Lentlang tlangvalte u kan inpeih em an tih chuan an lu an lo bu dial hlawm a. Thlahtea chuan," lalpa kan lawm e, Saia," hma han hruai la keiin hnung ka lo dawl ang nge, tiin lalin kianga ṭul pik laiah chuan luh thlak an han tum a chu ve leh Danglova chuan Saia chu au ṭhawt in naua," min va ti thangtlawm deuh ve le," Pherpui pasalṭhate hi kan zam hauh lo a nia, lo awl rawh u tiin lal pawh zah zo lo khawp chuan an ṭawng vin ṭhat a.




Saia chuan, pasalṭha," thangtlawm ang nga i in ngaih tlatna chhan hian chhan dan kawng a dep kai deuh lo maw? Ti nge an hnu chu kan chhui hlauh em em a an ti let ve sak a.




Danglova chuan naua," i chaltlai hle mai maw," min hmachhawna ka lak a i dinchan zawk chuan heng Pawi ho hnu hi i chhui zui thei ang tiin an ding lak hah a. Thlahtea chuan lalpa," he i pasalṭha hian khawtlaina ringawt kawng zu dap a maw le," a lu hi sahlamah ka tar mai dawn em ni an ti chang khawl a.



Lalpa chuan Danglova chezia chu chik zeta melh kal pah hian Danglo," i lal ka ni a, ka thutlukna hnial turin i lo in la lian tawh a ni maw? Tuna i hmaa mi te hi Murlen pasalṭha te an ni asin, Saia chu kawh va pah hian ka fanu fa Saihmingliana Murlen pasalṭha Sawiluaia fapa a nih hi, Thlahtea kawh va pah hian a ni kha Khamsang pasalṭha ralhrat Piandenga lu tan tu a nih kha an tih leh chiah chuan mipuiho chu an phun ta mur mur mai a.



Saia chu melh ding ngar hian an lal tupa a lo ni reng mai leh Murlen pasalṭha ralhrat khawkheng Sawia fapa a nih thu an han hriat leh meuh chuan an ngaisangin an dah chungnung em em mai a.



Tlangvalho chuan Saia chetdan te kha chhuikir leh in a pa siar a pa siar hlauh nei lo tiin an chung en nghal hmiah a.



Lalpa chuan, ni chhip a rawn lawr e, kal ula a nungchung ngeiin ka lalinah hian Pawi ral pakhat tal in rawn thlen dawn nia an tih chuan lalin kianga ṭul pikah chuan lut thla nghalin Pawi tlanchhiate zinga mi hnu chu an han chhui zar zar a.



Tukṭhuan ei hun vel awmah chuan kawrte pawh thla in chu an chhui pa lah chuan a hnu lah chu a thup der mai si lo, a chhuitute lah chuan awlsam takin an chhui zar zar mai si.



Chutah le, Theikum mual lut thla in hnu chu chawp leh chilh in a bo ta hmiah mai si, mak ti tak hian an han in en ren rawn a, Saia chuan tlangval pakhat hnungzanga thisen khanglam tawh chu phawk fe hian melh pah hian a kut chuan tlangval pakhat hnunga thisen chu a thai zauh a.



Chu ve leh rang tak hian Theikum lian ṭha tak kung chu bih chho in a silai cheng chu an kau ri nghal rap a. Saia chuan lo chhuk rawh chuti lo chu i mawng aṭang khan i luah ngenmu hi a chhuak ang an ti ram hmak a. Chu ve leh Pawi tlangval chu hlauthawng tak mai hian muangchang hian a rawn chhuk thla a.



Lei a ke in a rawn deh rual chuan Saia chuan an hnek hlawm nghal tawl mai a. Chutah a dar zunghnih bawk vel lo hek khem hlak chu ngenmu denna tih hriat tak mai chu an melh ralh a. Saia chuan ngaihtuah let thuai in chu Pawi la naupang hmel tak chu thlek ha pah hian a rilru chuan a ngaisang ru ta tlat mai le.



Lal tuala tlan chunga lalin kianga tawm a kah kha a ni tih lah a hrechiang si, a mah leh a mah chu zawhna a in zawt hial a ni. Tinge ngenmu hliamna a dar chu hei chen chen a kalpui theih? Chu mai a la ni lo, ti nge na rawl aw pawh chhuah lova khua aṭang khan a bik bo pui theih zawk, chu a chhap ah Theikum kungah sang tak a la lawnpui leh nghal.




Saia chuan phih tho lawp chung hian eng vanga Pherpui khua kha bei nge in nih an tih chang fak a. Chu Pawipa chuan chhan zai reng a rel lo, Sawia chuan i sawi dawn khawp, luhlul chhuah lo la ka nun ang che an ti leh sap a.



Chu Pawi pa chuan a hmaa tlangval la naupang tak chu melh kal pah hian a thusawi chu sawh sawn mi a ni lo tih hria in mengdul ralh chung hian Pherpui pasalṭha khi kan thu hnuaia awm  a nih khi. Kei hi, Zachima ka ni a, Darhawih khua leh tui a cheng ka ni an tih chuan Saia chuan tu nge in lalpa leh in pasalṭhate hming an ti a.



Zachima chuan," kan lalpa chu Thangdorem a ni a, pasalṭha chu Khankimsiam , Chhawlkeuva leh Zatinthawnga an ni. Pherpui lalpa khi lal hausa tak ni in a pasalṭha Danglova khian a hausakna chu hreran chungin hneh chhuh theih a in ringa lo hneh chhuh ta ni se kan khuaa a ruka rawn pem a kan lalpa pawh tlawn lungawi a tum a, Pherpui all rohlu neih a in lak milen a tum a, mahse kan tum a hlawhtling ta lo a ni. Nangni on lo lang leh sia an tih chuan Saia chu a thinrim kher mai.



Saia chuan a nih nang ve khan chanvo eng nge i neih ve ang an tih chuan Zachima chuan kei chuan ro thil dang zawng aiin ka michhiat em vanga silai ka neih theih na kawng a nih vanga Pherpui kha lo bei ve mai chauh ka ni an tih chuan Saia chuan chu tlangval la naupang tak a mah aia naupang hmelpu mah chu a khawngaih ru ta hle mai le.



Saia chuan," ka thu zawm la kei hian ka chengrang hi ka pe ang che," an tih chuan chu Pawi pa chu a ṭhen sak a, a awih lo hmel hmai chu chhe ve tak hi a ni.  Chutah Saia bawk chuan tlangval," a nih lel Lentlang lal fanu hi in lalpa hian a kawl mial lo maw an tih chuan chu Pawi tlangval chuan Saia chu melh zak zak hian, kha nula kha nula hmelṭha tak a ni a, kan lalpa hian a kawl ngei bawk e. Murlen ho in kan chipuite sala kum kha lehchen an lo kawl hnua kan chipui te thoin inremna saui an tan pui leh si cheu kha kan lalpa chu a thinrim hle a, phuba lak nan Lentlang lal fanu kha a pasalṭhate a ruk chhuahtir a ni, mahse tunah kan lalpa hian hmei atan a duh bawk nen kan lalnu nen hian tunah pawh an in tai an in tai a, kan lalpa chuan inremna minsiampui dawn rau rau chuan he Lentlang lal fanu hian ka fa a pai tur a ni a ti bur bawk nen, tuna in chet chhuah vat loh chuan in thil tum hian kawngro a su lo hle ang an ti a.



Thlahtea chuan a nih leh in khua kan luh theihna turin min pui duh a ngem ti chuan nang leh i chhungte an him ang nga, kan khuaah in pem ang nga, sial nufa leh silai fungkhat pek i ni bawk ang an ti sap a.



Duhtawk phawt ang. Mihring fapa kut hi a kham hle.