HNEHTU NGAWICHAWI. BUNG -21 NA.

HNEHTU NGAWICHAWI

BUNG 21- NA.

Sawia chuan Khumsih chu melh ran chung hian, ral ramvalh lei lungah i lu zuar turin ka sawm lo che an ti sak a. Khumsih chuan," min sawm em maw sawm lo em maw," ka zui tho dawn che a, i sawmna ka mamawh lem lo ve an tih chuan , Sawia chuan a nih leh le, kal ang hmiang tih pah chuan a nu lam an hawi a, Sawia chuan," kan cham hun chhung tur kan sawi thei lo a min lo ngaihtuah lutuk duh suh ang che tiin kal zai an rel ta a.

Sawiveli thlaphang lutuk awmngaihna hre lo chuan lalin an pan rawih a. Lalin a han thlen chuan Sawiveli chuan lalpa ka lo lut thei ang ngem tiin lalin-a luh chu an dil zawm zat a. Lalpa chuan aw haw, eng pawipang nge awm a, lo lut la i mawng kha a remlaiah khan han hung teh khai, Sawia nu eng thlichhia in nge ka lalin chhung ah te lo chhem lut che ni a tiin zawhna an zawt nghal a.

Sawiveli chuan lalpa," ka fapa ten Pherpui khua an pan mek asin,"
Pherpui lal fanu chhan chhuak turin an tih chuan, lalpa chuan ka ho hian mahni leido lal fanu maw? A engah chuan maw an ti he haw a. Sawiveli chuan lalpa," pherpui lal fanu leh ka fapa in kar hi thui tak sawi tur a awm asin,"

Hmangaihna vanga engkim huam tu chuan ka fapa fa a pai mek a ni an tih chuan lalpa chu chek tlak tlak hian, chu ti chu in lo pem hma thil zu nia, tlangaupa," ka pasalṭha zu ko teh khai, Sawia nu tu nen nge Pherpui khawlam an pan le an tih chuan, Sawiveli chuan Khumsih nen an ni e lalpa an ti sap a.

Sawiveli hmela hlauhthawnna lo lang chhuak chu lalpa chuan hriatthiam sak in, Sawia nu," hlauthawng mah ta che, eng em an ti lovang, ka tlangvalte'n an hnu an chhui dawn alawm, thlaphang reng reng suh. Rilru dam tak khan han awm teh khai an tih chuan Sawiveli chuan ka lawm e, lalpa," tiin lalin chu a chhuah san nghal a.

Hualzasela pawn lalin chhung a rawn dai lut ve mek bawk a. Lalpa chuan, ka pasalṭha lo hnai la i mawng kha hung teh khai, kumin zet zawng kum chhiat kum kan ti dawn nge? Buaina neuh neuh in han hmachhawn reng mai hi ka ngaih lam lam te pawh a ṭha zan lo ve tiin bul an ṭan phat a.

Hualzasela chuan, lalpa," eng lam lam in nge i beng lo luh tak le? Tiin lalpa hmel chu chik zet in an melh ran a. Lalpa chuan hei Sawia leh Khumsih chuan Pherpui lal fanu hruai turin Pherpui khaw leilung rap turin hmalam an pan mek a ni awm tak a, kan leido an ni a, ka tlangval te nen umzui ta mai ula, tiin thutlukna ka lo pawt chat mai asin an tih chuan, Hualzasela chuan, a nih chu maw le aw, khawnge hei tukṭhuan lah puar el in kan bar tawh nen Tuaka nen va umzui ila a ṭhat dawn chu an tih chuan lalpa chuan, aw le, buaina pumpelh zawng khan in ka in ang hram hram dawn nia.

Loh theih loh thilah in ralthuam lek kang lo ula, a zai dawh zawngin ṭawngka in chhak chhuak hram dawn nia, tiin an in thlah ta a.

Pherpui lalpa chu a lalin chhungah vei rawn sek in, kan mihurnu mai mai chuh, i lu hi phanpui kunga tar ka nap e, a ni kher kher lah maw i lo in phal rai a? Saingur," ka sawi chu i hre lo em ni? Ka hmuh phak lo ah kha mihurnu kha va hnuk sawn rang rawh, a reng rengah ka nau pasalṭha Khawtinliana te reng reng pawh hi an va lo thleng har ve maw le, Murlen khaw pasalṭha hlauin a tawm im mai em ni aw tiin an vei tawn sek a.

Chutia a lalin chhunga a vei tawn sek lai chuan, lal tualah chuan lalpaa," Hmunzawl khaw pasalṭha te kan ni e, khual ṭha thlen in min lo chhawn thei em tih ri chuan Pherpui lalpa chu a ti hlim hle mai. Lalpa chuan Tlangaupa," va chhawn la, kan lalpa chuan khualṭha a hnar ngai lo ve a ti va ti la ka lalin chhungah hian lo hruai lut nghal ang che tiin an tir nghal zat a.


Lalin aṭanga lal fanu leh a u, Saingura chhuak tur leh Hmunzawl Pasalṭha te n lalin chhung lam an lo pan mek nen chuan an in tawk ta chat a. Lal fanu hmelṭha lutuk chutia a hmel dang lap leh a ṭahna mit bui lak chuan chu pasalṭha fing tak leh ral hrat khawkheng Khawtinliana te chuan ngaihdan a nei thiam nghal mai a.

Lalpa chuan lawm taka hah zu te an zuk hnu chuan, hei Murlen khua nena kan in hmelmak dan chu i hai hauh in ka ring lova, engtianga hma han lak tur nge ni ang tiin in kan lo in sep rawtui mek zawng a nih hi maw, nang khual pasalṭha hian i ṭawngka han chhak chhuak ta che le an ti a.

Khawtinliana chuan, Aidul," ro han relna vak chi ah pawh ka lo ruat hleinem, a rawl ralin mahni ei bel lo kawng pawh zawk ngam lek lovin kan siam ang nga a ni mai alawm, an tih chuan Aidula chuan, lalpa," kan kut ah dah hmak ang che, a mah erawh chu i lak ah phut erawh kan nei sang ang an ti sak a.

Lalpa chuan, eng nge ni ka laka in phut chu tiin an melh kur a, Aidula chuan, ka hlawhtlin phawt a nih chuan i fanu hi nupui atan min hlan hi ka phut a ni an ti chang khawl a. Lalpa chuan , aw haw haw, keia fanu ve zawng tu val han lem tlak a ni lo ve, zahna bak min va thlen hek suh, ka in phal rai e tiin hei a hmel pawh hmu peih lovin ka lalin chhung aṭangin ka hnawtchhuak a nih kha tiin an ṭawng chhuak sak a.

Aidula chuan mak ti tak mai hian lalpa chu an en ho a , chutah, Aidula chuan lalpa," a nih tak chu maw le, i fanu chung chang chu engtianga ro han rel nge i tum le tih pah chuan a thinlunga pawisak neihlohna lo lang chhuak nghalin lal fanu Saizampuii chu iai na reng a la nei chuang lo.

A rilru kap tu erawh chu a fa paina tlangval chu a ni. Khual tlangval nge khaw chhung tlangval ah chuan a rilru chu a buai ru hle mai a.

Lalpa chuan, ka hnawhchhuah tawh ah thutlukna siam a ṭulna ka hre lo ve an tih chuan Aidula chuan beiseina nei thar leh in chuti a nih chuan lalpa tu fa pawh lo pai raw sek sek, i fanu ka duhna hian engkimah ka thla a ti muangin ka pawm thei vek e.

Kan lo let leh hma loh zawng ṭha taka i lo enkawl zawm theih erawh ka phut  a ni an tih chuan Lalpa chuan mak ti taka Aidula en ha pah chuan, nang khualthang pasalṭha meuhin min phutna chu ka ti hlawhtling ngei ang an ti let ve a .



Liankhuma te pathum pawh chuan thing thelh mual hring nghulh chu pel tawh in an kal chak par par bawk a, helna kawng an hriat zawng zawngah te chuan hel zel in Lentlang khua an han hel leh te te a, a karah zanhnih an han riah leh meuh chuan an hah tlang bawk a ni, Sawia chuan inthlahrung takin keimah vanga hei leh chen hah pawh sawi lova min zuinaah hian thinlung takin lawmthu ka sawi ni se, ti hian kan kal leh chuan Pherpui khaw ramvalh chin kan dai lut tawh ang nga, muangchang fanraih in aw niang an ti dam dap a.



Liankhuma chuan, Sawia," kan hmanhmawh a ngai a ni, Val upa ṭawngka aṭanga ka lo hriat danin Murlen khuaa rawl rala che turin Hmunzawl pasalṭha te a chah tih thawm ka hria asin an tih chuan,,Sawia chuan, e he heu, chuti khawpa rilru kha chuan dam rei a phu hlawl lo a nih chu tih leh kal an rual nghal a.



Pherpui lalpa chuan lalin chhunga khual pasalṭha te melh run chung chuan tunah la la hian chhuak nghal u la aṭha ang. Ka fanu leh a thurualpui chu dim hauh suh ang che u. Saingur, i pa hi i phatsan vei maw? Tiin a vaibel chu an pak khu talh talh a.




Saizampuii chuan ka u, ka hmangaih lutuk che. Ka pa nunrawn zia engkim i hre vek, hawh, khawi khua emaw bel mai ila i tan pawh a him zawk ang tiin a u chu an ṭah khum chiam a. Saingura chuan a farnu chu duat taka kuah chung hian, ka nau, lungngai mah ta che, khuannun min veng tlat dawn alawm, ka pa chu ka hmin thei em em ang, tiin an tawmna puk zimte ko tlang aṭang chuan an thlang kawr ruama kawngṭum in phan riak chu an thlir thla vauh vauh a.



Khawtinliana leh Aidula kaihhruaina hnuaia tlangval sawm leh paruk lai te chuan Saizampuii chu a nung chung ngeia khua luh pui an tum a,,Aidula ve thung chuan Saingura chu a lu tan a Phanpui kunga tar a tum ruh hle thung a.



Kawlphai khaw pasalṭha Mangkhaia leh Khawtinthanga te kaihhruaina hnuaiah mi pariat lai nen tuivai kang ngai lo rawn kai in Pherpui khaw ramvalh chin an rawn dai lut ve mek bawk a. Chutah, Liankhuma te pawh chuan Lentlang khaw ramvalh chin pel in chak takin kal zai an lo rel ve mek bawk a.


Chu mai a la ni lo, hlauhna pianpui ve lo mihrangval pahnih Hualzasela leh Tuaka chuan Sawiluaia te hnu chhuiin hmalam an pan ve par par a.


Chutah nghalchang hliam hnu thisen far thluah thluah chu Lentlang pasalṭha Vawmuaia leh Thangkunga leh Ralthankhuma leh anau te mi pali chuan an rawn chhui ve mek bawk a.


Kei ka ni in ti chin ten hmalam an pan na kawngah an chungah eng nge lo thleng dawn tih reng an hre si lo. Chungnun duhna thinlung pu chuan an vullai ni te mual liamsanin, pialralah a chungnung zawk te che tla chu lo thlir in an lo nghak dawn a ni tih hre ngat se, he Khiangmual ram, inbeihna nasa tak chhuah vanga pasalṭhate tawpna ni, a hming an phuah hial, MI LU LAK MUAL, chu Lusei thlah te thinlungah nghilhni reng a awm tawh dawn si lo.




Thing hnah kara ni vanlaizawl sa vet vawt tak chuan Mi lu lak mual chu lo en de sat sat in pangper ko aṭang chuan Thangkunga chuan, hei Pherpui khaw ram chin kan dai lut der mai a, a mak hle mai tiin Nghal chang hnu an chhui lai chu a tawp hian a tawp bul tawp mai a.


Vawmuai chuan he Nghal chang hi kan ta tur a ni lo ve, khuavang te enkawl a nih dawn hi tiin ngaihṭha zan lo chuan an thlang Pherpui kawngṭum inphan riak chu an thlek ha a.



Chutah, an lal fapa chuan Pherpui khua aṭanga an pasalṭha kawngṭum lam bih na lam kawr ruam thuk tak chu an melh vang vang a. U Vawmuai, buaipui tur dang kan neih hmel hle mai an ti chang fak a. Thangkunga chuan, ni e mahse, kan hel zawk mai a ni ang chu, i lo ngaichang phawt ang hmiang an ti sap a.



An lei rah hnuaia Puk biru tak chhunga Saingura te unau chuan an lu chung zawna mihring thawm chu hlauthawng takin an ngaithla kar a.



Chu tah, Pherpui khaw lam aṭanga thawm dim lem lo taka lo ri phei nak nak te chu an hmu leh thuai a. Chu tah an thlang aṭanga lo chhuak pawi samzial ho chu Vawmuaia chuan e heu leh, buaina a awm dawn chiang hle mai, ti hian i lo thlir mai mai teh ang u an ti zo chiah chu, Pherpui panna kawngṭum rawn zawh ve mek Sawia te hmel chu a rawn lang ve chiah bawk, vawi lehkhatah khawthum pasalṭha te an han in ep ta  ran mai chu an hrilh hai hlawm hle mai.



Pawi pasalṭha ralhrat chuan nuih heu heu pah chuan, Mangkhai lusei thisen rim nam tlata kan hriat chu le, i kut khan i kawlhnam kha hlat suh se, naute u, kan tum aia hmain hma kan sawn dawn e, mahse, an thu leh hla ngaichang phawt ang tiin muangchangin kawng ṭum lam an lo pan ve mek bawk a.



Thangkunga chuan Sawia an ti sap a, lal fapa chuan i inrawlh chuan min rin lut ve ang che Aihnahpa an ti sak a.


Muangchang chuan Sawia te chuan an veilama Pawi samzial ho leh an hmaa Pasalṭha ralhrat tih hriat ngawih ngawih te chu an melh tawn zak zak a. Chutah  Aidula chuan kha khawilamah nge in kal dawn le an ti chang fak a.


Sawia chuan, Pherpui lal fanu lam tura lo kal kan ni e an ti chang fak mai a, chu ve leh Puk chhung a hlauthawng taka tawm reng unau te chuan chu aw chu an hmelhriat hle mai a. Saingura chu an dak thla dak dak a, chutia khaw thum in ep ṭhap te chu an melh tawn chhen a.



Chutah an chhak kopang aṭang chuan lal fanu hmelṭha Sawia fa pai tu chuan Sawia chu ring taka lo au in Sawia te chu kopang lam an hawichho rual nghal dual hlawm a.



Chutia an lei rah hnuai lawka nula au ri chuan Vawmuaia te chu a ti phu chiang kher mai, Vawmuaia chuan tumah la in lan su, an thu leh hla ngaithla phawt ang u. Thangkung ka thu hmu loin i lu rawlh hauh suh ang che. Kan hnuaiah hian puk a lo awm reng a nih hi maw an ti a.



Chutah, Lal fanu lam hawi chuan Sawia chuan tah khan tawm tlat ang che, i lu rawn lawr tir hlek suh an ti vin ṭhawt a. Lal fanu chu mittui luang zawih zawih chungin a hmangaih thihna kotlangah a ding a ni tih an hriat chuan a rilru chu a na hle mai le.



Khawtinliana chuan lal fanu khi han hruai chhuak ru an tih chuan Sawia chuan rang taka tlan khalhin a ngam chuan han pawh tum chhin teh u tiin a kawlhnam chu an phawi dawk zawk a. Aidula chuan a silai cheng kau ri rap hian vala kiang mai rawh, ka nupui tur a nih khi an tih chuan Sawia mitmeng chu a sen chhuak ta vek mai le.



Ka fa a pai asin an ti let sak a. Chu thu midangho pawh chuan an han hriat chuan an phun deuh sup hlawm a, chu tah, Saingura chuan a silai lek kawh va chung hian ka farnu hian duh a thlang tawh, Sawiluaia hnenah hian ka hlan dawn a, ka thu hnial kalh in awm chuan in lu kha ka thlawh darh vek ang an ti chang fak a.



Aidula chuan uai, i pa ka lo tiam tawh a, lal thisenkai pawh ni raw sek sek i lu kha ka tan khawp ang an ti chang fak mai a. Saingura chuan an hmaa pasalṭha chu a hrechiang hle mai, a hneh dawn lo tih hre mah se, a farnu tan thih pawh a huam a ni.



Chutah, Pawi samzial an hotupa chuan, lal fanu chu keiman ka lo hruai haw zawk ang chu, nge inremsiamna kan nei zawk dawn, tu emaw ber khan min han hmachhawn se, a chak loh chuan lal fanu chu keiman ka lo chang ang nge tiin an rawn pen chhuak chhak a.


Chutah, Thangkunga chuan, Mangkhaia an ti sap a, thinrim takin Chhippui khua aṭanga a umdarh hnu chu an melh tur khai mai a. U Vawmuai khu pawi pa khu ka hmachhawn a ngai an tih chuan Vawmuaia chuan i thu thu le, i unaupa thlavang hauh chu i pe na hle mai maw tiin an nuih sak a.


Chu tah, kham kotlang aṭang chuan, Thangkunga chuan, he lamah pawh aw, infiamna thianghlim ka rawn chhim dawn e, kei ka ni inti chin te zalenna ramah hian ka tel loh chuan a kim lo ve, Mangkhai he lamah i hmelma, Thangkunga ka lo kal e tiin an pan thla chhat chhat a.


Lal fapa, Ralthankhuma tlangval la naupang tak, a hmel en aia a taksa in phut chawih mawi tak lo pen chhuak in, Aihnahpa kaihza veng turin Lentlang val ka lo tel ve e, an ti zo chiah chu, Sawia te hnung aṭang chuan, Hmunzawl pasalṭha kawh vu pah hian Hualzasela chuan, Khawtinlian, keimah Hualzasela, Murlen pasalṭha, kan in tawng leh dawn a maw an rawn ti chhuak chhak mai zawng, kei ka ni inti te tan hnungtawlh a thiang tawh lo ve.


Ha aiah ha, chemsen aiah mi lu, hmangaihna aiah nunchan huam, te in ep chuan huhang a ngah hle mai. Kiltin mai aṭanga kei ka ni inti chin  lo chhuak thar a piang te chu mit laksawn a thiang lo, an kut chuan an ralthuam te ṭheuh chu a hlat lo hle mai.


Thangkunga chuan, Sawia i hmangaih kiangah kal rawh le, khalai puka tawmreng lo khan Lal fanu lo chhuak rawh le, i him tawh e, an tih chuan, Aidula chuan chhuak lo ve, ka nupui tur lakah thuneihna neih lo tum duh ting suh, ka thu hnial chu thihna a nia sin an ti chang fak a.



An chhak aṭang chuan Vawmuaia chuan, mahni naute thlavang hauh ngam lo khawpa meikhup mi ka ni lo ve, Aidul," mahni kuang lo an nawrna vak ngai lo ve, arpa hluisen tuallenna mual i hai deuh lo maw rawn ti rum al chung chuan nau te u lo kal ru le, tiin kawngṭum lam chu an rawn pan thla ve chhak chhak a.



Thangkunga chuan Sawia ka sawi chu i bengah khan a lut meuh na nge? Kal la han veng rawh le i kawngdal chuan min hmachhawn a ngai ang tiin a silai chuan an tinkual chheu chheu mai a.


Mangkhaia chuan Thangkung, nangpawh khan i kuang lo i nawr a ni an rawn ti thlarawk a. Thangkunga chuan Pawi mawnghangpa, i ka kha chip hmak rawh, tunah zawng pialral ah ka thawn liam ngei ang che an ti chang fak a. Sawia chuan Saizampuii te awmna lam a pan mek a, Sawia chuan Saingur muangchang khan lo chhuk ru, keimah Sawiluaia an ti fiak fak a.



Chutah Saizampuii chuan a hmangaih, a kianga riahrun rem tura zan hnih lai ramhnuai ṭihbaiawm tak kara a lo awm chhan chu a mittui luang zawih zawihin an kuah hnawp mai a. Sawia chuan i him tawh e, tiin an tawlh hnungpui hret hret a. Sawia chuan Saingur, tawlh rawh, fimkhur tak khan, an tih chuan Hualzasela te lamah chuan an tawlh hret hret a.



Sawia chuan, pu a, ka nupui tur i ti a maw? Nuih sak pah hian, enkual dan dan pah chuan a ngam fa chuan ka lam hawiin in silai kha han hmetpuak chhin ula, tih leh Aidula lam chu hawiin thinrim taka au chhuak in Saizampui, he mihring nen hian eng inzawmna nge in neih an ti chang fak mai a. Saizampuii chuan Sawia a ni kha ka hriat ngai mi pawh a ni lo, hmuh pawh ka la hmu ngai lo an tih zet chuan, Sawia chuan a kawlhnam hum kawh lah chung chuan a kut veilam chuan Aidula chu an hui lauh lauh mai a.



Lo kal ta che, ka hmangaih chhuhluih tumtu hi pialral thlengin ka thlahthlam ngai hauh lovang, an tih chuan Aidula chuan naupang a kha ti zawng khan maw tih leh ṭe ruai pah a Sawia chu a lama lim phei puat an rual a, Sawia nghawng zawnga a kawlhnam sei tak chu vai phei puat a, a tum a ṭhelh englai khan nge Sawia khan a lo bum hman, Aidula lo hawi phei in siamrem tuma a ke veilam an khai leh chiah chu Sawia chuan a ranga rang mangkheng hian veilama inher pah hian Aidula lo hawi phei lai tak insiamrem hman lo khup chen vela in bin phei pah chuan a kawlhnam hmawr zum hriam tak mai chuan,Aidula dulah chuan tlang zawk khawpin an thil chho a nih kha.



Aidula chuan a chem hum chu thlah in makti tak hian Sawia chu a ka aṭanga thisen luangchhuak buah buah in an melh kur a. Chu tah phawi dawk zawk in Aidula chu a kaihza tlawh thlep hnawk in a nghawng tan tur chuan an kuai dak vah a. Chutah Sawia chuan Pawi samzialpa lam chu hawi phei in, ka nupui tur lakah khan i ka kha i lo ang ve ti raw tih pah chuan Aidula nghawng chu an zai thi chik ziai ziai mai zawng, thlasik la hmachhawn tlem deuh te phei chuan an melh ṭha ngam lo chu a ni e.



Sawia chuan Khawtinliana chu melh pah hian, i kuang lo i dai lut ve duh em an ti chang fak a. Khawtinthanga chu a dinna ngaiah ding rengin a hmaa tlangval la naupang tak hmelpa tak leh taksa pian mawi tak, a aihnah phahpui lu tan tu chu a thlek ngawih ngawih mai a.


A ṭha e, kha ti mai tur kha, kan lam hawi hian in chengrang kha lo chawi suh u, an ti leh chuan  Khawtinliana chuan a nau te chu an mitmei ralh a. Ti chuan an silai chu an dahthla sap sap a. Sawia chuan Pawi pa lam chu hawiin lo kal ta che an ti chang fak mai a, pawi pa chuan e he naua leh tih leh a lama pen an rual a, Thangkunga chuan Mangkhai helamah zawk an rawn tih chuan Mangkhaia dinhmun chu a derthawng hle mai, Vaawk rama a lo ngam tawh loh han hmachhawn leh chu a thisen chuan a zuam meuh lo chu a ni.



Duhtawk phawt ang.