HNEHTU NGAWICHAWI. BUNG 18- NA.

HNEHTU NGAWICHAWI.

BUNG 18- NA.


Chhippui tlangvalte chuan an pasalṭha Thangkunga chu melh leh hrek hrek in, an zinga pakhat Zawna chuan U Thangkung," kal lalpa hnenah engtianga ṭawngka han chhah chhuah tur nge niang tiin an zawt sap a."


Thangkunga chuan pehhel miah lovin thu diktak  kan sawi dawn nia, nangni leh zel chuan min phatsan ka ring hauh lo a, ka chungah kan lalpa hi a lawm dawn lo tih hrechiangtute in ni. Keimah avanga in tawrh ve kher pawh hi ka duh lova, hei leh chen ka thlazarna hnuaiah hun in hmang tawh. Ka telloa ram ṭuan ni pawh in la nei ang, chumi hunah chuan huaisen takin in hmaa tih tur awm a piang in ti zel dawn nia tiin an lalpa in hnawhchhuah hial a tum a rin thu chu sawilang lem lo mahse rilrua kal ding tak nen hmalam hun thlir chung in an sawi a.



A nauteho chuan an pasalṭha kawng engkima an dah chungnun chu an mit sir chuan an han melh leh ralh ralh ṭhin a.



Ti chuan khawchhung an han lut, hmanhmawh takin lalin an han chuangkai a, lalpa chuan lawm thiam takin a lo dawngsawng a, chu tah thil awmzia engkim an han sawi tak ah chuan lalpa hmel chu danglam nghal in lalpa chuan Thangkunga chu rum al hian an melh tur khai mai a.


Lalpa chuan Thangkung," ka mirin ber leh ka fathang awl zinga mi i nia," Murlen tlangvalho lak ah tui ang i nem duai duai mai a maw? Chu a chhap ah ka khaw tlangval pawh i hum zo lo a maw? Eng ang fakaua chak leh huaisen nge an nih a? Tiin a tui tling lo lem hnem tawh nen, a ṭawngka chhuak chu a duh tui tang lo hle mai a.



Lalpa bawk chuan, ka khua leh tui muantu tiin lal tlang chang dangho bulah pawh ka chapo pui hle che asin, tunah chuan i lal hi i ti thangtlawm hle mai ka ti. Murlen khaw lei lung rap tur hian tumah ka khua leh tui te hian ke an pen hauh lovang. Se nufa an phut i ti maw? Se nufa aiah feikibar hmawra Murlen mi leh sa thisen zawk asin ka tem tir dawn ni.



Lo ngai tak rawh u, ṭha te te in inremna sa-ui kan tan ang chu ka tih lai laia ka khaw mi leh sa an han hrengbet vel a maw?  Thangkung," tun aṭangin fathang i chhung tawh ang nga," vantlang chunglama i nihna hi hlih sak i ni bawk ang. Tin, hei hi lo hre rawh, i chungchang thu hi kei leh ka upa ten zanin hian kan rel ang nga, ka tlangval a lu tal la let tur hian Chhim lama ka nau lalna changta pasalṭha Khawtinliana ṭhi leh dar pek tiamin ka ngen ngei ang.



Ka ṭawngka dawng hmasa lovin ka lalin kaiṭen hi i ke khan i rawn rap leh tawh tur a ni lo, kal rawh, hmuh pawh la hmu tui tang nek lova che an ti hrep a.


Thangkunga chuan aw le, lalpa ka nun min zuah avangin lawmthu ka sawi ni se, a mah erawh chu, i tlangval la let tur hian ka thawkchhuak ang an ti sap a. Lalpa chuan, uai, tu nge ka nih tih hi i theihnghilh ta em ni? Ka thu lovin khua hi i chhuahsan tur a ni lo, ka sawi chu lal thupek a ni mai tiin an hnungchhawn nghal hmak a.



Thangkunga chuan a naute chu melh kual ralh ralh chung hian an mitmei hlawm a, ti chuan lalin chu an chhuahsan a. Thangkunga chuan, hei le, zanin la la hian khua kan chhuahsan dawn a, kan lal hian min mamawhna a nei tawh lova, kei leh ka chhungte hian he khuaah hian tihtur kan nei tawh bik lo ve, nangni erawh chuan pasalṭha nun tem turin hun in la nei ṭha a, min dah chungnunna hi kalsanin hmalam pan ang che u. A mah erawh chu min rawn hre ve reng ṭhin a niang chu. Dam takin mangṭha u le tiin an in lam a pansan nghal a.


Thangkunga chuan in a zuk thlen chuan a hmel hmaia lungawi lohna lo lang chhuak chu an lo hmuh hmaih hauh lo mai le. A pa Thangena chuan Thnagkung pawipang a awm em lovang chu maw? Tiin an zawt nem duai a.


Thangkunga thirim puakkeh chuan lal in min duh tawh lo ve, tiin thil awmzia zawng zawng an sawi chuan Pu Thangena chuan a hachang ṭhial rik rap rap chung hian, he ti zawng hian maw kan in tih dawn a, Thangkunga nu insiam rawh le. Lentlang lal nen hian kan tlangval laiin kan in hre ṭha em em a, min lo pawm duh mial mahna le tiin an insiam sawk sawk a.



Ti chuan Thangena te chhungkua chuan a ruk thei angber in khua chu an chhuah san ta a. A tuk fehrehsan hun awm velah khaw inhnaih an ni bawk a an ram valh chin chu an dai lut ta a. Thangena chuan ding meuh in Thangkung kan vanglai ni te kha liam tawh mahse, pasalṭha nun kan temna ramngaw ngei kan dai lut ta a nih hi, lung te lam lam a leng mang teh e.


Kan hah te a dam tawh chuan feh kawnṭum lam i pan thuai ang u, kan chhiatna duhtu te hian hnunglam aṭangin min lo sai hlauh dah ang nge tiin kal zai an rel leh ta a.


Khua an han luh meuh chuan zanriah kil hun a ni der tawh a. Lentlang khaw mipuiho chuan an lo hmu duh hle mai le. Thangena chuan meichher ken chu leia nawr eng leh zual in a hmel lang thei ang ber tur chuan an lek va va a. Chutah, " Lalpa," i khua leh tuiah ka nupui leh ka fapa nen hian min pawm thei em? Tiin lal tual aṭang chuan an auh lauh lauh a.



Lalpa chuan uai, mikhual aw thang ri ka beng hian an hriat tlat chu le, tlangaupa nang zu chhawn ta che. Khual ṭha an nih chuan lalin lamah i rawn hruai dawn nia tiin tlangaupa chu an tir nghal zat a.



Tlangaupa chuan an lam pan tuma a ke a pen tur chiah in mikhual hmel an hmu chu mak ti takin an thlir dauh dauh a, zawite chuan Pasalṭha Thangena, a hunlaia ral leh sa hmaa zam ngai lo an ti sap a. Chutah a kianga ding a mah aia lian mah, tlangval hmelṭha tak, pa hrak leh pian inkhai thli zaih mai chu en leh in hei hi em ni Chhippui pasalṭha ralhrat, Thangkunga an tih chu an ti leh sap a.



Tlangaupa chu lal thu chhuak pawh sawi lem lo chuan lalin leihka lam hawi zawnga inher vut in, lal inchhunga lo awmho chuan tlangaupa chu an melh run hlawm a. Tlangaupa chuan, lalpa, ka rei leh, ka rei leh, in phur bawr luk chungin en teh mah, enteh mah, Chhippui khaw mi leh sa te, a hming i sawi i sawi fo Thangena a hun laia pasalṭha ralhrat khawkheng leh a nupui leh a fapa an ti hlut a.



Lalpa chu tho hluai in aw haw hawi! Ka vangkhua a rawn dai lut a maw tih leh kaiṭen lam an pan nghal ruak ruak a. Lentlang lalpa chuan hui lauh lauh in Thangen, ka khua leh tuiah hian thlamuang kain i inbengbel dawn zu nia, kha kha em ni i fapa Thangkunga tia a hming an koh chu le tiin an zawt a.


Thangena chuan aw , lalpa i khua leh tuia min rawn pawm turin i vangkhua kan rawn lawi lut rawih a nih hi an ti sap a.Lalpa chuan, a hmel ena a thinlung chhunga thinrim rukna lo lang chu Lentlang lalpa chuan a hmuh hmaih loh chiang kher mai. Lalpa chuan, ka vangkhua ah hian thlamuang takin awm rawh u khai tiin lalin chhung lama an lo pem chhan chu sawihona nei turin an hui nghal a.



Murlen khaw lalpa chuan Chhippui tlangval an man chu an en vang vanga, chutah, Val upa lam hawiin nithum chhung hun kan pe ang nga, a nunna em hi chu kan zuah sak ang, nithum chhunga palai hmel kan hmu lo a nih chuan lal sutpui vuanah kan rin lut ang nga, ka thlah lo la awm  tur thlengin an chhawn ang, tiin thu an ti thlu ta rup mai a.



Hualzasela chuan Sawia bek bawr ru sar sar chung hian, Sawia," kan lal fanu hian a melh danah che hian a haw hauh lovang che." I tan hun ṭha a inherah ngai hmiah la, tlasik boruak kan hmachhawn hma ngei hian i mipatna ṭangkaiah hmangin han zen tum chhin teh tih pah chuan an nui kur kur a.


Pherpui lalin chhunga lal fanu chetla chu a nu chuan uluk zet hian an thlek leh ha ha ṭhin a, a pheikhai zangvah ṭhinte chu bo ta duak hian a hre tlat mai le. Midang hriat loh tawk lek tur si hian, ka fanu duatlai, tlangchang dang kan hian i lawi luh mai zawngin hrehawm ka va ti dawn em? Thil awmzia hrelo turah min ruat hlauh dah ang nge. Thisen pal ka nihna erawh hi hre reng ang che.



Hun ṭha i neihlai hian i ngaih lai i D chu ka hriat tur hian ka beng hi han fah ta che an ti sak a.



Pherpui lal fanu hmelṭha, Saizampuii chuan zak tih hriat taka a nu lam in her pah chuan, a nu chu an kuah thlawp a, a nu chuan ka chemte, engah nge i lungngaiaha i hlauh ang le. Sailo lal thisenkai an zam ngai hauh lo a nia. Mahse, i khawsa zia hian ka thin hi a ti ur ṭhin tih erawh vawng reng ang che.



Dai ngai loh i daia i tlusual palh a nih pawn mahnia chinfel theih loh thilah i nu ka awm a, i thuruk emgkim hi ka kawl ve tur a nia sin an ti dam dap a.



Saizampuii chuan Murlen pasalṭha ralhrat khawkheng leh a nunna humhimsaktu Sawiluaia chu ngaiin zan tam a mut hilh theih loh phah fo a, rinhlelhna phena ngairukna a thinlunga lo lang chuan insual tir fo in Hmangaihna zawk chuan hnehna changin chu a hmangaiha chu englai pawn a thlahlel si.



Siamtu hian thiam takin hringfa te a duan chhuaka, chu a duan chhuahte chuan hlim loh rukna an pai ve fo a ni tih hi a tawngte lo chuan an hrethiam phak si lo. Saizampuii hmangaihna hian engtiang chiahin nge lusei leh lusei karah buaina a chhuah dawn le? A naupai leh a mah chawpa that tumtu te hian mihrangval Sawiluaia leh a unaupa Thangkunga an hmachhawn tel dawn a nih tih reng an hre si lo.


Lo chang reng la, lo dam la, kei,  LALMUANKIMA KHIANGTE hian zanin atan ka thlah leh phawt ang che u.