HNEHTU NGAWICHAWI. BUNG 17- NA.

HNEHTU NGAWICHAWI.


BUNG 17- NA.


Lentlang Pasalṭha Vawmuaia chuan an lal fapa nelh run chung chuan, Ralthankhum," A pawng a puiin hmachhawn leh chem sen lek an rual nghal ngawt ngai lo ve. I pa thachhang dawltu i la ni dawn. Lal fapa mah ni la, ven hna che hi ka thawh a ngaia, ṭullo ah i la ang tawh ngai suh. Pasalṭha nun zit mek i ni a, i pa khaw mi leh sa ten an thlir reng che. Hnungtawlh hun a awm a bawh hun a awm tih hi vawng reng ang che an ti dap dap a.


Lal fapa chuan U Vawmuai ka tihpalh a ni e an tih sap a. Vawmuaia chuan, hmabak i la ngah a, khual thang hat khawp lal fapa pasalṭha ni turin hmalam pan ang che. Dawhtheihna hian vanglainun min hman am tir a, bawh huam huamna hian pialral min pan tir vat ṭhin.



I pa khua leh tui tana harsatna thlentu ni lem lo chu kalsan la, i pa khua leh tui tana mi hnawksak chu a rawp thlengin bei ang che, i mi lu lak chem hum te kha en nawn leh teh, a fawng i humpil chin kha a rual tur a ni lo, zungṭang khat bawk tal a fawng kha lawr rawh se. Murlen pasalṭha khan a duh chuan pialralah a thawn thei reng che. Ka thusawi hian i ngeng kha chhun lo se, nakin zelah chuan kan uia thla ang nga, Lentlang tana mi huaisen ral leh sapui laka ke pen tur in nunchan uluk takin i zir dawn nia. Hawh u le, hei kan boruak tawn a saisa nuaih bawk nen khaw lam pan ila lalpa hnenah kan mit hmuh te hrilh vat ang u tiin khawlam an pan ta a.



Sawia te pawh lal zelin , Val upa Dengruma chuan, hei Chhippui khaw ramvalh chin kan dai lut tawh a. Kan tukkhum pawn mit nei ran se, mei rim han chhuah ngam ni tawh hek suh, Ni mawng pawn khawthlanglam a herliam tawh nen, tah hian kan hmeh ṭhing ei bang te kha inhnang faknan i hmang teh ang u khai, tiin tukṭhuan lama an ei bang chu phawrh sap sap in an han ṭamhnem a.



Tuibur hmuamda vel an chawlh hnu chuan Val upa chuan," hei unau hmelhai vel ah khua kan lut dawn a, chutih chhung erawh chuan Chhippui khaw chhung lanchian theihna kan dap char char ang, ral beng kan ak haw thei a nih loh pawn an in engemaw zat tal chu a kang ral ngei tur a ni an ti chher chher a.



Chutah, Sawia chuan, an piah rala meichher pahnih chhia an lam lo pan te chu an kawk a, en teh u, an tih chuan Val upa Dengruma chuan, a haw haw, ka mit tlin tawk te hi a va lo tawi ta ve le, khua lah chu a unau hmeihai ṭan det det chauh nen meichher an va chhi kai hma ve le maw le, khaw nge fimkhut takin an mahni lam panin i va chian teh ang u,eng zah chiah nge an nih ang aw tiin kalzai an rel nghal zat a.



Meichher keng te pawh lo hnai zel in, hlam sawm vel chauhin an in lar kar a daidan tawh ang tih awmvel ah chuan Tuaka chuan mi pasarih lai an ni mao ka ti, an ti sap a, a bula ding ngawi reng, Khumzih chuana fawng chelhtu kan nih hi lo hnai rawh se, Chhippui khaw mi leh sa an ni em aw an ti bai bai a.



Val upa chuan ding rawh u an to chang fak a, chungmi pasarih te chu ding rualnghal ṭhap in, Val upa chuan khaw khaw mi leh sa te nge in nih an tih chuan an hruaitupa ber chuan, Chhippui khaw mi te kan ni e, in hmel pawh inlan ngam lo khawpa mihring in ti pasalṭha dawizep em ni in nih tiin an rawn ṭawng chhuak chhak a.



Val upa chuan, kan hmel a lan loh vanga dawihzep ang nga min chhuah chuan i ngai sual ngei ang le. In silai kha leiah in paihthla dawn nge, kan ngenmu tuarin pialral kawngka i nem hawng dawn le an ti chang fak a.



Chhippui pasalṭha Thangkunga chuan mahni chengrang chawilai dah tur khawpa mihring dawihzep ka ni lo e, tiin sang takah a ban an phar a. Chu ve leh Sawia chuan an chhak kil thimlai aṭang chuan, uai, Chhippui pasalṭha aw chu ka bengah a la cham reng mai ka ti, i ngenmu luhna ser pawh a damṭha tawh e tiin a awmna hmun aṭang chuab a rawn pen chhuak a.


Thangkunga chuan, Murlen khua ho chuan in dai loh tur in dai a ni. Mahni luseipui te laka phuba lak duhna thinlung put tlat hian in tan eng nge hlawkna a neih an ti chang khawl a.



Val upa chuan, kan pasalṭha Aithanga fam ta tana lo pen chhuak te kan ni e. Mahse hei a hun takah kan in tawn a nih hi an ti sak a. Thangkunga chuan, a nih a hnu pasalṭha takin ka hmaah hian tu nge lo ding dawn che u? Mi pa chuan damrei hi kan thlahlel hlei nem tiin a silai chu an theh thla bawl a.



Khumsih chuan , finrawl chhuah hauh suh ang che. Chuti lo chu pialral pan hmasaber ah i ṭang ngei ang. I naute khan an hriam dah vek rawh se an ti leh sak a. Thangkunga chuan a fawng chelhtu i nih avang hian kan tlawm tihna lam a ni lo a, in pasalṭha vanga helai hmun in lo thleng hi a pawi a ni. Keini pawh in kut zalah pasarih lai kan in chan ve tho asin an ti nem dap a.




Tuaka chuan in lalpa khan ṭha takin kan thusawi te kha min lo dawngsawng se, kan inkarah hian buaina a thleng lo tur hi a nia, kan thu chu i nau te hian an zawm dawn nge dawn lo tiin a silai cheng chu an kau ri rap a. Chutah Thangkunga chuan naute u a fawng chelhtu an ni e, in ralthuam kha dahthla ru le an ti a.



Val upa chuan kha ti mai tur kha a nia, tih pah chuan Thangkunga chu an tin vang a. Thangkunga chuan aw le, kan tlawm e, nau te u in nun chhan nan in ralthuam kha paih thla ula, zam hauh lo khan a fawng chelhtute saw hmachhawn ru le. Hriam kenglo sai duh  khawpa mi dawihzep ho saw an ti khur dar dar a.



Tuaka chuan , kha ti mai tur kha, a tih lai chuan Sawia chuan, i lakah ka rilru ka siamfel tawh, in nau zinga boral ta ang chiah khan nang pawh khan hun min pe bik lovian ka hnunglam aṭang khan min sai a ni lawm ni? Mahse hei ka damṭha tawh e. Tuka meichher kha han chhit en tir deuh teh, Chhippui tlangval ho saw an ti sak a.



Thangkunga chuan uai, ka nau kiang mai rawh, tum duh ting suh ti in a mitmeng fiah kak chuan a hmaa tlangval la naupang tak mitkhap lek lova en ngartu chu an melh let ve sak a.


Sawia chuan inzawmna hi a chat fo ṭhin. Hnunglam aṭanga mi sai duh khawpa in la pasalṭha chuan min hmachhawn ngam na nge. I mi lu lak chem kha phawi chhuak ta che, nge ka hmaah bawkkhup in ngaihdam mindil dawn an ti let sak a.



Sawia chuan a sawizo hman tawh si, dik taka sawi chuan A pute a hi hmachhawn chu a chak hlawl lo a ni. Mahse, khua leh khua in hmelmakna chuan unau a leh thisenzawmpui a thliar hrang ve mawlh si lo.


Thangkunga chuan a farnu fa Sawia chu melh ding ngar chung hian, tlangval ka tlawm e, nangni nena buaina neih hi ka duh tawh lo ve. Nangni chuan pakhat in chan a keini lam chuan pasarih lai nunna kan chan asin, khawngaihin duhtawk rawh u tiin an ṭhingṭhi hnawk a.


Chutia an pasalṭha tlawm leh zah pawh dawn lova leia an ṭhingṭhi chu an tha a na ngang ngang hlawm hle mai le. Sawia chuan melh kal chung hian, heng zawng zawng hi in lalpa vanga thleng a ni tih hi lo hre rawh u, tih leh tlangval pakhat chu melh ding ngar pah hian nang kha lo hnai teh tiin an tin nghal zat a.


Chu Chhippui tlangval chuan hlauthawng ru tak chung chuan an pan nghal ve mai bawk a. Thangkunga bulah chuan i nau hi ti hian kan lo kawl ang nga, ni 5 chhunga palai hmel leh se chal nu pa kan hmuh loh chuan phanpui kungah a lu hi kan tar ang an ti chang fak a.



Thangkunga chuan aw le, Dawla hlauthawng hauh suh ang che. Keimah ngei hian ka rawn hruai ang che tiin khawlam an pansan ta a.


Duhtawk ang aw.