ZAN THIMAH PAWH KIR AN REL LO. BUNG-2 NA

THIM ZINGAH PAWH KIR AN REL LO

BUNG -2 NA.

Ni a vanlaizâwl-a, hram thiam chitinrengte'n an aw rawl mawi tak chhuah in Darzep ngawpui an fang. Duhthlanna lamtluang zawh a chungnunna duhtu te'n nunna hlut zia an chhui phak mawlh si lo.

Pasalṭha huaisen te hmathehna chuan Lusei leh Lusei kara in hmelmakna lanchhuah tirin duham chin lem an nei si lo. Ṭiau lui rala Tidim hnam ,"Mungtinchhawn Lal-na khuaa Pasalṭha ralhrat ,"Khamzasiam leh a aihnahphahpui Lunzakeu ten ralkhat aṭanga Lusei khua thlirin chimih vek turin funpui an er ve mek bawk a.

Phar Mau(  Mau hling nei) thelh hun hmuna Darzep mihuaisen ni tura an thinlunga tuh tlat-tu Darzep Pasalṭha Darphawka chuan a chhang chiah ,"Laiphawka leh Khawmvela, Zabiaka, Chawngzika, Dengruma", Zawlbuk kai tir te, meihnung puaka Valupa te sira an ti ti inthlahrung taka lo ngaithla ṭhin te nunchan an zirtir chuan a mit a tlungin chhuanrukna leh a thinlunga ngaihsan rukna pai chung chuan an khi leh sak a.

Darphawka chuan Mau-theia tui chu in tir khawlh khawlh in ti hian thuṭha an fah sauh sauh a.

Ṭhutbial tir ṭaih in, ka thusawi tur hi ngun takin ngaithla ang che u, Sa kap hnem ram vachal te hi Pasalṭha tia sawinan an hmang fo ṭhin a, nangni chuan chung zawng zawng aia pawimawh ber ka sawi tur hi ngun takin lo ngaithla ang che u.

Mahni khawchhan nan a mahni nunna pawh hlan ngam khawpa mihuaisen te hi pasalṭha dik tak an ni tih hi in thinlung khan thlunzawm tlat rawh se. Sa kap thei lam a ni lo va, Ram lama thangchhuah lam a ni hek lo, in rilru leh ngaihtuahna kha ngun takin seng ula, hnungtawlhna nun erawh hnuchhawn tlat ang che u.

Kan khua hi kan Lalpa leh a upa te avanga ding a ni lo va, nangni leh keimahni vanga ding a ni tih hi vawng reng ang che u, ban leh lam a hmantlak loh chuan a lehlamin vuan tlat u la, ṭhian chhan thihngam lu pu in hmalam in pan dawn nia. Aiaupa zahthiamna hian damreina a kengtel a, chu chu in thinlung ah khan khung tlat ang che u.

Kan khua hian engpawh a tawk thei reng a, chu mi hun a lo thleng pawha mahni khua leh tui tana ke pen tura huaisenna in neih phawt chuan Lusei hnam peng hrang hrangte hian Darzep khaw ropui zia an sawi fo ṭhin ang.

In tukkhum khan mit nei tel se, a pawng a puiin a sarhu laiin atso chi a ni ngai lo. Rilru fim tak pu in kan hmachhawnte ke chheh uluk zet in in zirchiang ṭhin dawn nia,  tunah chuan ka Keite rual tiin ka lam fo ṭhin ang che u an ti dap dap a.

Darphawka bawk chuan, ding ula, Laiphawk, Chawngzika nen khan in kawp ula, Khawmvela leh Zabiaka kha inkawp ula, in thinlunga in huatna nasa tak pai ang khan han in bei teh u le, tiin an hnungtawlh san a.

Darphawka chuan a bula ding Dengruma chu en kal chung hian i hliam khan ziaawm lam pan phawt rawh se, nang chu lo awl rawh an ti a.

Laiphawka leh Zabiaka che chu a nalhin Darphawka pawh chuan a awih lo hial zawk a ni. Darphawka chuan Zabiak kha le lo inring rawh aw tih leh a lama tlan rualin Zabiaka chuan Darphawka lo tlan chu a nghawng chhawk zawk tumin a mau sep ken chuan an lo vai zawk a, mahse a vai ṭhelh chiang kher mai, Darphawka chuan Zabiaka lo vai chhuah rual chiah khan kun nghal vatin leia inbin nghal in Darphawka chuan Pasalṭha i nun kha ka kut-ah a awm tih leh a chempui chuan Zabiaka tukkhum chu an tin ran a.

Darphawka chuan Zabiak, ti khan i hrethiam em? Ka duh duh nalai ka chem hriam hian i taksa kha a tai thei tih hi! Ka duh chuan i Kaihza tha pawh kha ka chat thei reng an tih chuan Zabiaka chuan a lu chu an bu nghat nghat a.

Khawmvel, i ke dinglam aikhan i ke veilam a ṭang rei thei zawk, a chhan chu i veikhawr em vang a nih kha, i taksa khawng khan i ṭuan a ti fum a, kha kha i sawizawi ṭhat a ngai a ni an tih leh dap dap chuan, Darphawka chu an hmel hmaia ngaihsanna lo lang chhuak in an thil tihlai mek ah chuan rilru an pe hlawm hle a ni.

Zanriah eirel hun awm velah chuan an khaw kawtchhuah chuangkaiin tuibur hmuamda ang vel an han chawl vang vang a, Darphawka chuan   kan Valupa ka lo bek bawr ang nga, kan in in lo chuangkai dawn nia. In Ralthuam neih ang ang lo chhuahpui ang che u, Kurung mual kan fang ang an ti chang rat mai a.

Zan a ni a, zan reh tak a ni. Lal-in Leihka sanga Lalpa leh a upa te ti ti chu a rumra kher mai le, Lalpa lu-kai chhalh tawh chuan, mahni Lalna hmun pawh a mawng hung nghet thei lo a, duham chin lem nei lo a ngam zawngte lak a hleilen tuma a nek zawng leh a tai zawnga an lu an rawn rawlh chhen hi kei zawng ka zaidamna hian tlin hek lo i, en teh u, Zawlbuka kan Valupa ṭawngka aṭangin ka Pasalṭha Darphawka chuan ka tlangval pangnga lai thlang chhuakin Nunchan zirturin khu kawtchhuah lam khu meichher an det zu nia tiin chhuang tih hriat tak mai hian an melh ding ngar a.

Kurung mual an thleng thla ṭep tih hian an thlang la hla ve fe a meichher pali lai an khaw lam pana lo chho ngiah ngiah an hmu ta tlat mai le.

Darphawka chuan, naute u, kan meichher ken kha pahnih ti mit ula, pakhat chauh kha chhi ru le, khual duhawm loh kan va thlen hmel ve, a zan zan ah. Laiphawk, i meichher ken kha i ke lamah dah rawh, tiin a silai ken chu meichher eng zawi tak hnuaiah chuan an endik a.

Meichher eng chu lo hnai zelin Zakhuma chuan a mitmeng fiah kaka melh rab chung hian kan bulṭanna tur chu a va thim dawn deuh ve an ti chhuak chhak a. Darphawka chuan, ngun takin lo ngaithla ru, kan in pawmchhilh hun a lo thlen chuan an thawk harsa turin in ke khan an pum ah in kherbet tlat dawn nia. Kan lo inhlauh palh a nih pawn khu kurung mual sir lai ah veilamah khuan kalkhan zimte a awm a, chu chu zawhin a piah mual thingse mualah kung lianṭha zet hmun zawllaiah khan kan in nghak dawn nia.  Ka thu la hmasa lovin tuman aw in pawh tur a ni lo.

Khawmvel,,Laiphawk, Zabiak in pathum khan dinglam sirah hian in rawn hual ang. A tam berah mi 10 bak an ni lovang an meichher eng aṭang khuan, in iptepuia in hrui kha ṭulpik buk lai deuhah khan hling ula, an mahni tihzamnana kan hmanrua tur a nih kha. Khai le ka tih hunah in pawt che dawn nia. Chawngzik a thlang deuh ah khuan i hrui ah kha zu hling la, hlam sarih vel in in kar ti awl ang che.

Aw, ka pawh hunah khai le ka ti ang nga in pawt che dawn nia. Hlauhna thinglung khan in thinlungah hmun chang suh se, Khawmvel, in thlang lawk hlam thum vel ah khan kham chhengchhe tak a awm a nia, in fimkhur dawn nia tih leh hmalam pan an rual nghal a.

Ral nge an nih! An khaw Lal thukenga a zan zana Darzep khua lo pan tih chu Darphawka chuan a ngaihtuah rauh rauh a. An lo hnai zel, an thawm lah chu an dim lo hle mai a, Darphawka chuan lo melh kar chung hian a thlanglam aṭanga an mahni lo pan mek te chu Meichher engah chuan a hmuchiang hle mai a.

A mitmeng zimsan aṭanga lungawilohna lo lang chhuak chuan an mi chante zinga an hruaitupa chu an hmuh zet chuan thinrim avangin a taksa pengtin te chu a khur ru deuh dar dar hial a ni.

Tuithum Paslaṭha chuan hmai uang zet hian an khaw nula hmelṭha zen a chak zia leh nunau pawisawilo thlenga han rikrap a chakna chu a ka aṭang chuan an phuhchhuak zuah zuah a. Ngun taka an ṭawng lo ngaithla kartu Darphawka chuan aw ring tak mai hian ding rawh u an ti tuarh mai zawng chung ,"a rawl rala chet thawh tum te chu a ti ding chawt mai a.

Timna leh zamna nei eih lo va an mahni chechang lek lo va silai fawng chelha tin tu chu meichher eng chuan a hlimthla chu a chhun raih a. Darphawka chuan, hual beh vek in ni tawh, in ralthuam kha paih ula ṭhingṭhi rawh u tih pah chuan a silai cheng chu an kau ri rap a.

Darphawka vek chuan an hruaitupa chu enbing bik tak mai hian nang i ni maw? Ka lo beisei ang ngei a ni. Pasalṭha chuan hmeichhe awmnem te ni lovin Pasalṭha bawk a hmachhawn ṭhin. In in pe dawn nge tia a sawi lai mek chuan Chullova chuan leiah tih tuarh pah chuan a bula meichher keng chu pawt dawk zawkin a meichher ken chu ti thi turin an ti ṭuarh a, chu ve leh Darphawka Silai puak chuan a mu thlawhchhuahpui nghalin Chullova bula awm Meichher kengtu chu a nghawngah silaimu chuan a va verh siah mai chu leiah chuan a ke khawng deuh dat dat in a chatthla nghal zat a.

Darphawka chuan a chem chu phawrh nghalin Thing behchhan pah a ring leng lawnga Chullova auh pah hian, in malbeih ah min cho in awm em an ti chang rat a. Chullova chuan i mi bumna thanga awk mai mai duh turin min ring em ni? Cho chikim in ka cho che an ti let ve sak a.

Laiphawka chuan a chhak deuh aṭang hian, Darzep tlangval kan zam ngai lo, a hu ho a in sam in cho em an rawn ti ve leh lang lang a. Chullova chuan Leithum pasalṭha te kan zam chhe mai mai ngai lo, in ngam ngam kan ngam, finrawl chhuah a, min hmeh mih chu tum duh ting su an tih chuan, Darphawka chuan Pasalṭha chu a thusawiah a dingnghet tlat ṭhin, naute u, a cho ang ngei in ka pan dawn a in ralthuam kha dahthla ula, in kuthmawr erawh khan banphak rawh se an ti a.

Chulova chuan nau te u, Darzep pasalṭha lu ka khaina kawng a in hawng e. In tha kha thlahdul ula, hmalam tlem rawn pan rawh u, Pasalṭha thusawi ring ngam tur hian ka hnungtawlh ngai lo ve tih pahin Darphawka chu a rawn pan chheu chheu a.

Duhtawk ang.