THIH NGAM LU TEN HMALAM AN PAN. BUNG-27 NA

THIH NGAM LU PU TEN HMALAM AN PAN.
BUNG-27 NA.

Khamsang Lal-in kawngkabianga tlangval la upa lem lo tak, a biang dinglama sapui hamna hnu hma lang ser kalh, mi pa piandiktak, mitmeng fiak fel fai kak, hnarngul sang vah ngawi renga ding chuan Lal-in chhunga a hmangaih thlaphan hmel taka mitmeng dul deuh raih, zahawmna pawh sual chhuak thei lo khawpa hmeichhe der dep chu mit lasawn lek lo hian an thlir ngawih ngawih a.


Khamsang Lalpa chuan a thinlunga thinrimna meipui in phumru thup tum tih hriat tak si, aw khur deuh hlak hlak hian ka Lal-in pawh zah zo lo khawpa huaisar em ni i nih a? Tiin a hmaa tlangval chu an mrlh tur khai a.


Chu tlangval chuan Lalpa lam muangchanga hawi chhuah pah chuan, Lalpa a hmasa in i mi ngaihdamna ka dil ni se, thinlung chhungrila tur tu awm hi ka phak ni se zawng, aw pangngai takin i vangkhua hi ka lo lawi lut ngei ang.


Lalpa i kianga Hmunzau nula kha ka kiangah hian rawn kal se, ti chuan in vangkhua hi buaina siam miah lovin kan chhuahsan ang an ti chang rat a.


Lalpa chu khik sak pah hian, uai, khualval ṭawngka chhuak atan zawng ka beng hian a dawh ning dawn dawn a lan hriat chu le. Hmunzau Lal fanu hian man a nei asin. Hei hi lo hre rawh, Hmunzau Lal fanu hi Silai fawng nga in in tlan thei ang an ti let ve sak a.


Thlautea chu nui lui leh insum tih hriat tak mai hian, mahni Luseipuite pawh thin thia mutmu tuah tir thei lo tu, chu a chhapa hmeichhe derthawng laka vawk lal len tum kan Luseipui hian a tih loh tawp tur a ti a ni tia a sawilai chuan,


Thangzika chuan, mahni vangkhua pawh luahlum hman lo khawpa kan vangkhua in lo lawi luh hian chhan ṭha tak a nei tihna a nih chu. Khamsang khua hi nunna chanbelh tawh kan tum reng reng hleinem, a thu hrimah he nula hi i tan a pawimawh hle a niang maw an ti khauh a.


Thlautea chuan, a pawimawh leh mawh loh chu nanga hriat ve a ṭul na a awm lo ve tiin thangzika chu chik zet hian an melh khai khai a.


Thangzika chuan, he khua leh tui tan hian ka nunna hi ka hlan ngam ang bawk in kan vangkhua lo lawi lut te hian ka beng hriatah a chhan an sawi ve a ngai chawk ṭhin an ti leh khauh a.


Lalpa chuan a pasalṭha Thangzika chu melh  ralh pah hian, ka pasalṭha thuthlukna chu ka thuthlukna a ni fo ṭhin a, fathang ka awl te hian ka khua leh tui te tan hian an nunna pawh an hlan phal a ni tlangval an ti nem dap a.


Thlautea chuan, chu mahni Lalna khuaah pawh mahni a thutlukna siam ngam lo Lal dawihzep i ni maw an ti a.


Chu ve leh a hnunga ngawi renga ding, Piandenga chuan Thlautea kal kan chung hian a hmaah tak dingin, ka duhai chuan i ṭawnghnem hle ka ti, he nula vanga thisen a luan hnem zia hi i hre duh em ni? Nge he nula lu hi ka tan zawk dawn tiin Hmunzau Lal fanu chu an pan nghal a.


Chu ve leh, Thlautea chuan i ngam a thu pialral kawngka i tan a in hawng rang khawp ang. Tiin an vau nghal zat a. Lal fanu chuan ṭap pur chung hian, keimah vang hian nunna chan an tam tawk lutuk, Thlaute, keizawng pialral kal hi ka tan a ṭha zawk a nia nge. Pasalṭha ka lu chu i tan thei e tiin mitmenga huatna hlira en chung chuan Piandenga chu an melh tur khaia.


Piandenga chuan Kan Lal-in pawh zah zo lo khawpa huangtau chuan a chantawk a hmu ṭhin. Nula Thlautea, Khamsang khaw keite an tih chu hei hi maw lo ni? A hun takah kan in tawng e tia nuih sak pah chuan a tangkun chem kawlhnam a hnungpuak chu phawiin a kawlhnam chu thlir dauh dauh chung hian Lusei lu tan nan chuan a hriam a na mah mah a ni an ti chhuak chhak a.


Chu ve leh Lal fanu chu talpit thut in Thlautea hmaah chuan ding chat in, Lal fanu chuan khawngaihin zahngai, ka pa pasalṭha ten nunna an chan hnem lutuk tawh tih pah a thinrim taka Piandenga kawh vu pah chuan nangkha ramhuai i ni. Tiin Thlautea ban chu a hmer ngat ngat a.

Piandenga chuan, Lal fanu ve meuh si, thudik pawh puangchhuak ngam lo khawpa nula lepchiah i ni tih hi lo hria ila chuan tunah hian pialralah siang i lawi tawh ngei ang, i pa pasalṭha te vanga buaina chhuak ta te kha i hre lo em ni? An ti chang fak a.


Lal fanu chuan, chu chu in duhtawk thei mai lovem ni? Kei min tlan nan hian phut in la nei cheu a maw? Mahni Luseipui lakah in nun a va rawng ve tia zak lek lo va a an hlak hlak lai chuan, Chhunhleia tlangval lianṭha thelh thawlh chuan uai, Hmunzau Lal fanu chu, zahpah lek lo va an hram tak chiam chiam chu le, hei khawi lam savawm naute nge tiin Thlautea chu an chhuk melh run a.


Chuti a nih a hnu, kan Leido in mi tihna a nih chu, Lusei khaw hrang hrangte do rawn in ni tawh ang. Tiin Thlautea chuan Lalpa chu an melh ran a.


Lalpa chuan a nih a hnu Hmunzau Lal fanu hi vawin ni aṭangin Sal chhianchhiahna a pu nghal ang. A tlan nana ka phut kha a la ngai reng, i nun kha i la hlut a nih ngai chuan ka vangkhua hi chhuahsan rang mai rawh an ti chang khawl a.


Thlautea chuan duh lo ta i la, i pasalṭha te zinga mi hian in mal beiha min hneh chuan in vangkhua hi kan chhuahsan ang, min hneh lo a nih chuan Hmunzau Lal fanu hi kan hruai haw ang, chu chu in ngam em tiin an melh kual dan dan a.


Chhunhleia chu nuih kur kur pah hian, Piandeng, i che vel hnuh kha ka la kham lo a nia an ti zauh a, chu ve leh Piandenga chuan Lalpa a thuthlukna hi pawmsak hram mai teh, ui pui hur ang maia a rak rak na aw ka hian ka beng hriatna a ti chhe zo dawn ka ti. Lalpa i Lal tualah ngei hian ka lo nghak e tih leh chhuah an rual nghal a.


Chu ve leh Lal fanu chuan Thlautea chu chelh thuaiin zawi sap hian Thlaute, i beih mi a ni lo ve, khuanu vauhbik an sawi ṭhin ngei a nih khu, ka pa  pasalṭha te suattu a nih khu tiin hlauthawng zet chuan an hmer ngat ngat a.




Lal tuala Thlautea hruihṭhuaite pali chuan Kawlhnam vilik zauh zauh a inring taka veikual chhen Piandenga chu an melh kar a. Piandenga lah chuan Lalpa khalaia rak rak, Tlangsam Pasalṭha kha ka hmaah hian lo din tir rawh. Khamsang khaw tlangvalte hi zama tlanchhe khua kan ni lo tih hi kan lantir a hun e. Tiin a au lauh lauh tawh mai si.

Thlautea chuan ka tihtur kan ti zo lawk ang nge tih leh Lal fanu chelhna kut chu muangchangin an la thla riai riai a. Lal fanu chu mittui tla zawih zawih in Lalpa ke bulah chuan ṭhingṭhi hnawk in ngaidam rawh u ka tlan nana in phut let pawh ka pa hian a pe hnial lovang che tiin an in sut faih faih a.


Lalpa chuan, ti khawp khan i nun chhan nan pawh Paihte ho hmaah ka pasalṭhate an din lai pawh in tunah tiang hian i anka i chhak chhuak a, i pasalṭha te thiam loh na pawh i la zep duh a nia, nang vang hian a ni Lusei leh Lusei kara buaina a chhuah tak ni. In duh in hmu, a tawp rat thleng kan thleng ang chu le, hmeichhe nikhua lo zet zawng i lo ni e. Ka pasalṭha khu a hneh a nih phawt chuan i pa lalna vangkhua chu i thleng ngei ang an ti hmak a.


Lal fanu chuan Lalpa khawngaihin zahngai, ka thiam loh vek a ni, Ka hmangaih awmchhun a nia sin, i pasalṭha khu ko kir hram rawh, i pasalṭha avanga ka hmangaih hian a nun a chan ka phallo, tia uak deuh ṭhat ṭhat chung hian a ruak lo a ni tih lo hre ru kartu khumpui lama mittui tlahliam chunga lo thlir rengtu Lalnu chuan a khawngaih hle a ni.


Lalpa pawh chuan khawngaihna hle mahse, a rilru sukthlek tenawm tak avang chuan a khawngaihna chu huatna in a hmun a chang tam zawk tlat a tin ni.


Lal fanu chuan banglaia chempui inthiat chu phawi dawk phutin a nghawng chu zai a tum ta mai. Tuman min lo hnaih suh u, in lo hnaih vaih chuan kei leh ka pumchhunga naute hi an thi nghal an tih zet chuan Lal-in chhunga awm ho chu an meng kawk nghal a.

Lal tuala tlangval duhawm zet, pasalṭha nun tem hneh em em pahnih, an naupan ai maha thuak fing leh remhria, an hmanraw ken chu a bu ang thlapa hmangthiam pahnih te chu dinchan zawk tum chuan an in veh ta ṭhem ṭhem mai le.


Piandenga chuan muangchanga panhnai hret hret in a ke chheh te chu an thlak thleng leh zauh zauh ṭhin a. Thlautea ve thung chuan ngawi reng leh a din ngaia la ding rengin a chet hun chu a lo nghak ve thung a.


Piandenga chu dawk chhuak phut in Thlautea lamah chuan a kawlhnam chu vai chhuak nghal zawk in a nghawng chu sak chhum hmawk an tum a, a tum chu a thelh chiang hle mai, Thlautea chu lo kun nghal zawk in leiah chuan a inbin nghal thuai a.



Piandenga chuan nuih sak pah hian a hmahruaitu a nih kha an ti khauh a. Thlautea chuan, i cherang ve phian mai ka ti, kha aw tih leh zik zaka tlan chung chuan a chem chu Piandenga kawng zawnah chuan an vai phe ve fua a, Piandenga chu a lo tawlhsawn hman hram a, a him phah zaw lel a.


Piandenga chuan kan in tluk e. Tia kun chung chuan a chem chu an vai phei pawp pawp a, Tlautea chu tawlhhnung zel in, a ke dinglamin lei a rah chiah chuan lungte chu a ke artuiin rap pial in a sir tluk ṭhelh a, chu mi remchang chu Piandenga chuan nangchin nghal vat in dinglam sirah tlan dawk zawkin Thlautea veilam a awn tlu ṭep malpui chu a kawlhnam chuan an va tai thler duaih mai zawng, Thlautea chu leiah ṭhingṭhi hnawk in a malpui chu an melh zauh a.


Piandenga chuan a thawh leh nghakin a sirah chuan a ding kak hah mai a. Thlautea chuan i vannei hle mai, khawnge in ti tak tak ang hmiang, tia a malpui hliam chu ngaipawimawh lem lo tak chuan an tho chhuak a, mahse a mal kak duaih thisenin a ke ṭang thlenga a bual huh zuih chuan a chet chu a timuang tih a hriat hle mai a.


Tlautea chuan bai deuh saih saih pah hian an veh leh ṭhem ṭhem a. Chu tah Lal leihkapui sang aṭang chuan Lalpa chuan a tawk tawh e, Piandeng, khuanu remruat a ni e, Hmunzau Lal fanu i fa paina pa hliam khu zu tuamsak rang rawh, a nun zuahin a awm ang tia nelawmna nei lek lo chuan Hmunzau Lal fanu chu an melh tur khai a.