THIH NGAM LU PU TEN HMALAM AN PAN. BUNG-22 NA.

THIH NGAM LU PU TEN HMALAM AN PAN.
BUNG-22 NA.


Zedingthang leh Mangkawla te chuan , feh kawngṭum thleng hlawl in, Zedingthang chuan, uai, ka rin ai taka khua kan han luh hma dawn chu le. Khawnge thlatla hi in nghak dai ang u hmiang tih pah chuan Sawntlung pawngah chuan Vaibel pak khuk laih laih pah chuan an ṭhu vung a.


Mangkawla chuan an chawlhna piah Mual chamdur lam chu kawh vu pah hian, a mit tlin tawk a hlaa mual let liam sang filawr tak in chherchhuan raih lo lang chu kawh va pah hian Leithum tlang pawh a lang reng mai ka ti, Leido kan nei lo a talang hian kan khaw hawi leh ṭuan pawh a ti zim raih mai ka ti. Saw ta lo lang tlang chhip in chherchhuan raih hnuai saw Lusei Lal Hualzasela Lalna ram a nih saw, Leithum khua, khua kan chuan ta rau rau, ni rei cham turin in buatsaih ula, in tha te kha a lo ṭhum zo hlauh dah ang nge.


Pasalṭha rammu chuan thlawhtlinna hlado chhama kawtchhuah lungdawh a, han chham vang vang mai te hian kan hun kal leh zel tur zu hril nia tia Lusei khuaa hleilen chu a thinlung chuan a chak ru hle a.


Chakna zawng tih puitlinna hian vanduaina a kengtel dawn a ni tih reng an hre mawlh si lo. Kal siam in Hmunzau khaw lam an han pan leh ṭham ṭham a. Kawtchhuah an han thlen chuan nu nau leh putar hnanghlai ho chuan chik zet mai hian an lo thlir dauh dauh a, chu tia an vangkhuaa Paihte sam bek zial ho minaran chunglam ṭhiau lo kal chu an thil tihlai ṭheuh chawl meuh a thlir chungin an lo kalchhan chu hriat an chak zek zek hlawm a.


Hmunzau Lalpa chuan a Lal-in lam pana Paihte ho lo kal chu ngun taka lo thlir in Tlangaupa ka pasalṭha Kawlthanga zu ko la, a ṭul thut a che chhuak thei turin tlangvalho kha i zuk bekbawr dawn nia tiin a tirliam nghal a.


Hmunzau Lal-in tuala Thaidawn hnam Paihte ho ding chu Hmunzau Khawtual tlangval te chuan rawn hnaih ṭhem ṭhem hlawmin chung zawng zawng chu Pasalṭha ral hrat Zedingthang leh Mangkawla chuan an hmuh hmaih lo chiang kher mai.


Hmunhlui Lalpa chuan, kha khawilam khua nge in nih le? Pawipangte a awm em ni? Ka vangkhua meuh lo chuangkai ta chu tia rinhlelhna mitmeng chuan zawhna an zawt a.


Mangkawla chuan Lalpa chu thip remrawma melh kul pah hian Lalpa i vankhuaah hian buaina rawnsiam tum a lo kal kan ni lo va,,kan lo kal chhan hian chhan ṭha tak a nei a, chu chu o Lal-in chhunga rel chi zawk a ni e. Khaw khat Lalpa ve meuhin khual chhawn dan chu i hriatthiam ka ring e, i Lal-in mawi tur hian Thaidawn Pasalṭhate hi min sawm dawn lo em ni? An ti a.


Lalpa chuan ka zawhna che kha i beng khan a hriat ka ring e. I mi chhanna ka nghak a nia an tih chuan, " Mangkawla chuan Lalpa chu han chansawm vek a duh rum rum tawh hial a ni.


Mangkawla chuan, Lalpa, Seipui khua Lal Lianmanga khua leh tui al ringa khawsa te kan ni e, kan hmaa tihtur awm chu khawdang Lal-in min hrilh ngai lo va, kan Lalpa hnen aṭanga thudawn nghak ṭhin kan ni an ti chang rat a.

Lalpa chuan chu ti a hnu kei Hmunzau Lalpa hian engvang fakauin nge khualṭha chhawna ka lo chhawn ngawt ang che an ti khur khur a.

Mangkawla chuan, chu ti zawng chuan kan hmuiphun kan in kam keuh hnan dawn a? Hei hi lo hre rawh, Seipui khawram chin rawn valh hi kan ke hniak thleng hian kan rawn zauh dawn a, chu mi thawt lawk nan che a lo kal kan ni tih pah a a kut dinglam chuan a hnungpuak a kawlhnam chu an hnaih deuh da da a.


Hmunzau Lal tuala khaw tlangvalte ralkai thei chin zawng chu lo pung zel in, an boruak rit ru tak chu Mangkawla chuan a kianga ding ngawireng Zedingthanga chu an mit sir zauh a.


Chu ve leh zik zak a tlang puat hian Lal leihka chu rang taka thlengchho in Lalpa inring lo lutuk lai chu chuh vat in a awm ah an tlawh hlawm nawk a, chu tah Zedingthanga chuan a kawlhnam chu phawi nghal zat in Lalpa nghawngah chuan an chuktuah nghal zat a.


Mipui thum hak chuan zia chhuah in Paihte ho chu an han hual nghal zat a. Chu ve leh Mangkawla chu Lalpa lam pan ve nghalin Lal-in chhunga Lal fanu hmelṭha ve tawk tak chu phih tho lawp hian a nghawngah chuan a Kawlhnam lianpui hriam zet chu an chuktuah ve nghal zat a.


Mangkawla chuan a ngam chu han che u la, a thi hmasa tur chu Lal chhungkua hi an ni tih pah chuan Lal fanu chu a kut hrawlpui mai chuan a dar chu an hrawmsak nawk mai a. Lal fanu hlau thawng lutuk leh thlabar chu a khur chhe ta der mai le. Zawi hnawkin Lal leihkapuia a tlu tur chu a kawngah Mangkawla chuan a lo dawm nghal zat a.


Muangchanga Leihkapuia nghat in an ṭhing,hit hnan sauh sauh a, chutia Lal fanu puanbih phelh hning hneng kara a mal no nalh tak lo lang paw phek chu Mangkawla chuan nuih sak pah hian an khi nui vur vur a.


Zedingthanga chuan khaw mipuiho hnenah chuan, in ralthuam kha dah rawh u chuti lo chu in Lalpa hi a thi nghal ang tih leh nawr nat an zual sauh a. Lalpa lah mi huaisen zawk zawk lo ni lo nen, Lalpa chuan a aw ṭial ruan chhuah pah chuan a khaw tlangvalho chu an hriam dah turin an ti a.


Ti chuan Lalpa chuan ka fanu kha khawih hlek suh tenawm pa, an ti vin ṭhat a, Lalpa thusawi ngaipawimawh hauh lo tih hriat ngawih ngawih chuan Mangkawla chuan Lal fanu chu a bianga sam kai chip chep te chu a kut hrawlpui mai chuan an hui kian sak vel a.


Mangkawla chuan ka duh chu ka hmu e. Kan ram valh rawn zauh nana a ruk a rala chet in chhuah chuan i fanu hian khaweng a hmu tawh lovang, kan him nan i fanu leh nang hi khawdai thleng kan rualin in lo kal ve ang, ti rawh le, hma hruai la, i tlangvalte hi kiansawn tir nghal rawh tih pah chuan a naute pahnih chu ko nghalin Lal fanu chu veng tlat turin an ti nghal zat a.


Ti chuan khawchhung mawng lam pan thla in pan thla in khaw mipuite chuan chutia Lalpa lrh an Lal fanu an han kawl chu ngaithiam si lo, chet la ngam si lo chuan an awmhmunah an in sawh an in sawh a.


Hmunzau Pasalṭha Kawlthanga chuan remruat nghal zing zungin tunah kan zui nghal mai hi a rem dawn lo va, losul haw hun awm velah kan che chhuak ang tiin ro an rel nghsl zung zung a.


Thangzika leh Piandenga leh Papawnga, chhunhleia te pawn Sanghal hnu chu an chhui char char a. Piandenga chuan fuh chu a fuh ngei alawm, Chhunhlei, en ta che hei a thi far pawh tih pah chuan hnahthela a thi far chu a kut zungṭanga nem hnan chu kawh va pah hian Chhunhleia awmah chuan an tat hnan kher a.


Chhunhleia chuan kher kher a che, tipah chuan a tukkhumah chuan an nem bu lawp a. Piandenga nuiza insum bawk si chuan kan thin ngah a hi a, kha en teh a mu leh lam a lawr a nia tih pah chuan Chhunhleia Kap zawn chu an kawk a, chutia Chhunhleia a kap en a a zukun lai tak chuan Piangdenga chuan a hnar chu an pen sak leh fawk mai zawng an in ta ziai ziai mai a.


An in um zawnga Chhunhleia hnar aṭanga thisen lo luang chhuak ngiai ngiai chu Thangzika chuan lo hmu vat in a nui lai chu tawp chawt hian, a tawk e an ti vin ṭhawt a. Chu ve leh Piandenga leh Chhunhleia in um lai pawh chu tawp chawt in, Thangzika chuan a mitmeng nelawmna reng reng nei hauh lo, mahse aw dam dap si hian Piandeng, fiamthu chintawk neih hi a ṭha ngai e. Kha i Aihnahphahpui thisen i chhuah der kha tih pah chuan Chhunhleia chu an pan hnai a.


Piandenga zak leh in thiamlo lutuk chuan, min ngaidam rawh, Chhunhlei ka tihpalh a ni kha a thungrulhnan tih pah chuan a bek veilam chu an dawh a. Chhunhleia chuan mitmeng nelawmna reng nei si lo, a la na a ni tih hriat ngawih ngawih aw khur deuh dar dar hian, a tawk e. Ka leido ni la zawng, mahse ka aihnah phahpui i nia ngaihdam ngaiin i khawsa lo ve ab tih chuan Papawnga chuan kut lo beng in Ku Thangzik, a mak mang teh e kan sahnu awmdan hi an tih chuan.


Thangzika chuan ai leh ai karah lehlam pangah hmuh ṭha kan hmu mai thei a ni, hrtianga kan sahnu kan bo hian malsawmna dawng tlak kan nih leh nih loh khuanu hian min fiah chawk zel a nia.


A mah erawh chu, kan hmaah hian kan tawn tur kan hre lo. Hei Hmunzau khaw ram chin kan thleng der dawn e. Fimkhur hle ang che u, ti hian kan sahnu hi kan rin chhui thlak ang nga, Hmunzau khaw perh tar hi hel in Lui mawnglam kan hrut thla ang, kan sahnu hliam chhui erawh in beisei ti sang lo ula tih pah a, a taksa khur ru deuh dar dar chuan eng emaw an tawk dawn a ni tih hrilhchawp kher ngai lo chuan a mah chuan a hrechiang hle mai a.



Chutah leh an piah muala, nula aw hian ka duh lo khawngaihin min thlah ru, tih thawm chuan Khamsang mihrang valrual beng chu a luh chiang kher mai le.

Duhtawk ang aw.