HNEHTU NGAWICHAWI. BUNG34- NA.

HNEHTU NGAWICHAWI

BUNG 34- NA.



Thlahtea chuan Hrantlinga chu melh rul al chung chuan," in thil tih pawi zia hi in hria em? Mahni ramvalh china duhtawk ve mai awm khan Lusei te nek chep duhna thinlung pu chungin lal ka hrawt e in tia, in thil tihman chu in hmu mawlh ang. A pawng a puia Lusei te hi nek chiam chi ka nin ngai lo ve tiin a kaihzaah chuan an tlawh thlep leh hnawk a.



Hrantlinga chu a darhliam avang  chuan khawsik in a rawn man ṭan ta a. Zacheua chuan rumal a melh pah hian thu ka zawt dawn che a ṭha taka min chhan loh chuan i chantur chu i hriatchian hle ka ring. Tunah hian in khaw lam pan turin khaw kar kawngah zan engzah nge riah la ngai dawn? Tin ralkai thei chin tlangval in khuaah engzah nge la awm tiin an zawt a.



Hrantlinga chuan," muangchang lova kan khua luttur chuan khaw kar kawngah zankhat kan bak ang. Muang changa khua lut tur kan nih chuan zan hnih lai a awh thei bawk ang. Kan khuaah chuan ralkai thei chin mi tam tak an la awm ang, chutih rual erawh chuan pasalṭha kaihruaitu sawi tur an awm lo ve tiin an chhang a.



Zacheua bawk chuan a nih leh engvanga nunau pawisawilo tam tak that kher nge in nih an tih chuan Hrantlinga chuan," Lusei ho hian kan chet thawh dan hria se," hlauh namen lova an thinlunga hlauhna kan pai tir duh vang a ni e an ti a.



Zacheua chuan a nih leh heng inthil tih zawng zawng hi in lalpa hian a hriatpui em an ti leh a. Hrantlinga chuan," hriatpui mai piah lamaah a ma remruatna vek zawk a ni. Tianga min lo umzui hi kan ring pha lo hrim hrim a, khuaah hlawhtling takin kan lut ang tia rilru kan lo siamfel lai in in lo lang ta thut sia engkim a danglam ta a ni an ti chuai raih a.



Zacheua chuan," chuti chu khaw nge i ral lak thil hlu ho chu in dah a? Tiin an zawt leh a. Hrantlinga chuan," Taikulha Sahmim  chu melh zauh pah hian tah sawn ral lak thil hlu chu a awm ang an tih chuan Sawia chuan lo dap vatin Taikulha Sahmim ah chuan thi tam tak hi diar hian a lo in fun khawm ṭeuh mai a.



Zacheua chuan hetiang thil vang hian maw nunna tam tak in suat a? Keimah ngei hian in lalpa lu chu ka tan ngei ang. Hawh u le. Kan eitur neih ang ang kha phawrh in i ṭamhnem ang u hmiang. Khaw kar kawngah zanhnih lai kan la bak bawk nen, kan chau chhe zo ang nge tiin Khamsang lalin chhunga eitur leh sarep te chu phawrh in puar takin an han ei a. Rei mawi tawk an ṭhut chawlh hnu chuan Hrantlinga dar hliam chu Tuaka chuan an melh chuan khaw khat pasalṭha ve meuh chuan ti chung pawh khan thlasik vawihnih tal chu i la hmachhawn zo ngei tur a ni.




I nunrawng man hi i tel ang nga zak takin khuaah kan chaih lut ang che. Chutih rual erawh chuan keini Lusei ho hi min lo hmachhawn ngei ang. Eng tika chet chhuah tur nge ni ang tih chu i ka aṭangin kan hre chawp chilh turah ngai ila, kal rawh le tiin an phih tho lawp a.



A kara zanhnih an han riah chuan Mualsei khaw dai a him tura an hriatna laiah chuan awmhmun an han khuar ta ran a. Sawia chuan hei khua lah a la eng ṭha hle mai a, mei rim lah han chhuah chi a ni si lo, kei leh Bulthanga hian kan sarep te hi rawhung mualah khuan kan zu thukphum lawk ang nga, kua a ruah lutuk chuan kan che chhe ve thei a ni tih hi kan hriat reng a ṭul.




Nangnin khua awlsam zawka kan luh dan tur lo ngaihtuah ula, rei kan rial lovang. Tih leh an sarep thuk phum tur chu an sahmim ṭheuh aṭang chuan an la chhuak nghal zung zung a, ti chuan an thlang rawhung lam chu Bulthanga nen chuan an pan ta a.



An awmna hmun chu khawthim chuan rawn tuam ṭanin mihrangvalte chuan chet chhuah hun tur chu nghakhlel takin an awmhmunah an in sawh an in sawh a. Thosi leh tho mitchhaih te chuan vir kualin an ning ru tawh hle a ni tih an hmel aṭang chuan a chhiar theih awm e.



Ti chuan zanriah atan chuan sarep thuk phum chu an han ring a, an puar chu a famkim lovin buh  tel lova ei an ni bawk a, a ruk tak chuan ei har an ti ngang ngang hlawm hle a ni.



Zacheua chuan an mi manpa chu zawhna an zawt ṭan ta a. A nih lah khawsik in man in a khur ru dar dar bawk nen, men pawh a meng peih lo chu a ni e. Zacheua chuan khaw khat pasalṭha ve meuh ngenmu pakhat avanga kha ti fakaua in tuar nat chu le, tiin a sam zialah chuan an pawt ṭhawt a.


Zacheua chuan pasalṭha lungfing tawh leh tawnhriat ngah pahnih lek pawn khaw khat mai mai a tihbuai theih zia chu i lo hre ve tawh fo ang nga, in khua hi meivap ah a chang vek dawn. In kan hal chhungin in lalin helna kawng dap rawh le. Naute u in chengrangte kha a dik em enfel nghsl ula, rei kan rial chuan chesual ve thei kan ni tlat. Lalin luh dan tur sawi rawh le tiin an zawt a.


Hrantlinga chuan, chuti maia awlsam chuan lalin chu in lut hauh lovang. Kan chet chhuah hlana lalin leh khaw mipui veng turin kan tlangvalte an in ral ring reng a, chu loh ah i zawhna min zawh hian ka beng a ti kham hle bawk. Pualral kal tho tho tur ka aṭang hian i hriat duh zawng zawngte hriat inbeisei duh ting suh. I chil per kha a thlawn mai mai a ni an tih khum siah a.



Zacheua chuan a nih a hnu kha le a ka kha lo veng ru tih leh a kawlhnam chu phawi rual in a vaihlo fun chu a kut hrawlpui mai chuan an ṭham ta nghek mai zawng. Na a tiin a ke an leng bat bat a. Chutah Zacheua chuan i Vaihlo fun hmawr vun hi ka hlep dawn a ni tiin an tin to mai a. Hrantlinga chuan a hlau kher mai, meng phar awn awn chung chuang a hawi â ruai mai a.



Thangkunga chuan," sawi mai ta che reilote i mit  men pawh i tan a thlakhlelhawm viau a nia," an ti a. Chutah Zacheua chuan Thlahtea chu melh ralh pah hian i chanpual a ni e an tih chuan Thlahtea chuan kawng dang a awm lo. A ni khi khaw chhung ka luhpui dawn a paliin min zui ula, a dang zawngin in in lo hal mai dawn nia, kawng dang a awm hlawl lo tiin an phih tho lawp a. Ti chuan an silai te chu endik in hlauh nei lo mihrangvalte chuan khaw chhung an lut dawn ta.



Thlahtea chuan a mi chhawmpa beng chu an hleh sak mai zawng a ka hup sak nghalin hei hi ka chhungkua leh kan khaw tan a ni tih sap pah in thisen kai nuaih chung chuan khaw chhung an lut a.


Sawia leh Thangkunga leh Rithanga leh Bulthanga chuan Thlahtea hnung chu an han zui ta a. Khawchhung an han dai lut chiah mai chu a lo hmu a piangin an bulhnaia hmanrua an neih ang ang chu chuh in an au ruai ruai hlawm a. Chutia an khaw pasalṭha beng thi hnuang leh hliam na tak tuara Lusei paliin khaw chhung an luhpui an han hmuh chuan an thinrim hlawm hle mai.



Sawia chuan tum duh ting suh u tih leh a lo hnai ber chu a lu hek huam in an kap siah mai zawng. A silai pakhat a hnungpuak kau sa chu lek chhuak in an tin zawm leh nghal zat a. Chutah Bulthanga silai a puak ve nghal ṭhuaia Pawi pakhat chu a hlawm leh tawl mai a. Sawia chuan ring leng lawng hian Pawi mawnghang ho kiang mai rawh u. Hual beh vek in ni tawh luhlul chhuah su tiin an tinkual leh chheu chheu hlawm a.


Chutia hlauh neilo taka Lusei te an khuaa an rawn che chu thinrim eng ang mahse hlauh rukna lian tak an thinlungah chuan a in phum hlawm a. Kal zel in an hnung lam aṭang chuan nutling thlaphang au rawl lo chhuak in in a kang ral ral ral tiin lalin lamah hlau thlaphang mangang chung chuan a rawn tlan chhe dawr dawr a.



Sawia chuan in tuhrah in seng mek a ni. Kiang rawh u tia a sawi zo chiah chu Thangkunga silai a puak leh ta dur mai. Duh loh paih ang mai hian Pawi tlangval pakhat chu a hlawm leh tawp mai a. Chutah le! Veng mawng aṭang chuan in pathum lai a rawn kang kai ta. Ral lo lut nen in kang nen Mualsei khaw mipuiho chu an mang a ang takzet tawh .



A ṭhen lalin lamah an tlankhawm, a ṭhen inkang ṭhelh turin an tlan. Veng mawng aṭang chuan silai a puak dur dur renga inkang ṭhelh tura tlang thla te chu an lo sai miah miah nen. Naupang ṭap, nutling rum ri chuan khua luh hneh kher mai le.



Zacheua te chuan hma rawn sawn chho zel in silai fung hnih ṭheuh keng ta na na na chu tuman hnaih ngam hek lo le. A hnai hnai a piang in pialral an kai zel mai bawk nen. Silai lah a puak reng bawk nen, an kah ruah lah in veng tawn zel in a mu an sawh nghal zel bawk si.



Mualsei tlangval mi sawmhnih dawn nunna nei tawh lo te chu an chhungte chuan ṭah in Lusei ho chu anchhia an lawh mawlh mawlh bawk a. Mualsei khaw tlangval te chuan pawh ngam tawh lovin mahni sahimna zawngin dai lam an pan sap sap hlawm a. Chutah le lal tual an han thleng chho chutih lai chuan Mualsei zawlbuk chu a alh kai leh ṭan der tawh. Veng mawng aṭanga in lo kang chuan a dang kang kai zelin a rawn alh chho hlep hlep ta mai le. Mei alh lah chuan thli man in thli lah chuan a duh lam lam zawngin mei alh chu a herkualpui hem hem bawk nen, lungngai rumri chuan khua chu a luh hneh kher mai le.



Lusei Mihrangval rual te hlaua dai lam pan ta tlangvalte chuan khawchhan a hnekin ṭik pawh ti ngam lovin ramhnuai lam an pan san hlawm vek a.



In kang lah chuan venglai rawn tuam chho in in dang a kang kai zel si. Lal tual chu pan khawm in chutia lenglen hun awm vela ngampa taka an khua lo hala an tlangvalte tamtak that tu Lusei pasalṭha ho chu an hua in huaisen an ti hle bawk a. An pasalṭha kai tu tlangval tuaitirte chuan an mit a la hlawm hle mai le.



Zacheua chuan in tuhrah in seng e tih leh lalin chhunga chhuah pawh chhuak ngam lova tawm tlat lal chhungkua chu han luhchilh in lalin chhung aṭang chuan silai a rawn puak ṭhuai a. Zacheua chuab a dar chu dawm vang vangin lal leihka sang aṭang chuan a rawn hlawm thla nawk mai a. Chu ve leh Thlahtea chu rang taka lalin lama lim chho puat in lalpa silaimu sawh leh mek chu nangchin in hei hi aw tih leh a kawlhnam chu vai phe vuai in lalpa taksa leh a lu chu a hrangta nawlh mai le.


Lalin kianga in tih loh chu a kang fai ta leng mai le. Mipui ho lah chuan an thlangvalte hmel hmuh tur beiseiin an han hawi ruai a, mahse hmuh tur reng an awm si lo. Thlahtea chuan lalin chhunga nutling leh nula la naupang tak pahnih hmel fai veng vawng tak leh hmelṭha tak te chu melh in kan tawrhna aiin a nep chuang lo ve. Tiin an phih tho lawp a.



Ti chuan le lal leihkasang ah chuan din chhuahpui in an lal pa lu chu tuallaiah chuan an theh thla bawl mai chu mipui ho chu an ṭe ṭhawt a. Zacheua chu Tuaka leh Sawia chuan lalin lamah zawn chho in bawlpu an ko turin an han tia, mahse khaw mi pa hmel reng reng hmuh tur an awm lo.


Ti chuan Sawia chuan lal fanu ni ngei tur pahnih te chu enkual dam thuai ang che u tiin thip zet hian an melh khai a. Zacheua chuan ring leng lawng hian an khuaa an chet chhan zawng zawng chu a bul aṭangin an sawi dap dap a.


Duh tawk ang.