HNEHTU NGAWICHAWI. BUNG 33- NA.

HNEHTU NGAWICHAWI


BUNG 33- NA.


Zacheua chuan, Sawia," kan hnu chhui lai hian kawng peng a zawh tlat mai ka ti. Mualdung lamah an kal tlat mai," Vantlang khua an lut dawn nge an hel dawn zawk le? Tianga zanthim hnuaia hnu kan in chhui chuan kan hloh palh mai ang tiru i hmanhmawh deuh ang u hmiang tiin a ke pen chu an tichak sauh sauh a.



Sawia chuan, kawlkil thleng pawn kal raw sek sek, ka thlahthlam dawn hauh lo. Ti lo thei lova min siamtu hian a bat a tlak hma loh zawng ka umzui zel ang. Tiin mualdung lam hawi chuan an han kal leh ta zar zar a.



Thui fe an kal hnu chuan kawrruamah mihring hnu chu chhui lutin sih kama zawl zau nuam deuhah chuan mihring hnu leh meipui an chhehna hnu chu an pawh nghal a, an meipui chheh chu la mit tawh mahse, Thlahtea chuan vut chu a kut chuan an dap da da a, a la lum veng veng mai, khawvar tur inṭham in min nang dawn chiah bawk nen, tiin vanvadak in boruak chu an hip kawk a.



Ralthankhuma chuan," kan nangchin dawn tho tho a, tuibur hmuamda lek i chawl lawk ang u hmiang," Vantlang khua an luh ka ring hauh lo, tlangkam aṭanga ka lo hriatdan hi a dik a nih ngai chuan, Vantlang pasalṭha te hian an ngaina lem lo tih thawm ka pa te ti ti kamliam aṭangin ka hre ru tlat an ti chhuak phawng a.



Rithanga chuan," ni e hahdamna hunṭha hi kan mamawh ve a nia," a pawng a puia kan basa ngam chuan chesual ve thei tho kan ni. Chutih rual erawh chuan kan umzui hi an ring phs hauh lo thei bawk. Keizawng, in nuai miah miah a ni ka duh tawh ni, vanglai nun a liam hma ngeia Pawi sal hruai haw ngei ka duh tlat an ti chhuak chhak a.


Tuaka chuan," Pawi sal hruai haw duh in kan hruai haw ang nga, hruai haw duh lovin kan hruai haw lovang. Tunah chuan Lentlang pasalṭhate u min lo hrethiam ula, hei keini ho Murlen tlangval te hi ramchhuah hlana kan zanriah bar tur pawh min lo buatsaih saktu nei tawh lo ṭhiau kan ni tawh mai si a, kan chan a fuh hlauh tak a leh sal kan hawn nakawngah min tung en em lovang chu an ti hniam raih a.



Chutia an chanchin an sawichhuah takah chuan Lentlang valrual te chuan an khawngaih hle nghe nghe a ni.



Rei mawi tawk an ṭhut khawmuan hnu chuan Taikulha te hnu chu an chhui leh zar zar a. Chhum leivak in khaw eng rawn mawiin sava te chuan hlimzai vawrin an aw an chhuah, an fukna thingzar aṭang chuan an hnuaia hllauhawm awmzia hre map lova mihrangvalte kal chu chik zet in a chhuk thlir a.



Vantlang khaw kawng chu hel in tlak lam an hnu chuan an pan leh ta tlat mai le. Tuaka chuan," kan nangchin dawnhnai tawh ang fimkhur takin aw tiin hma an hruai hmiah a. Kawi li an han thleng leh chiah chu lungpui lian tak pahnih kara Pawi samzial a lu chiah lang thei chu an va hmu thei ta.



Ralthankhuma chuan kei chhak lam aṭangin aw tiin ṭulpik lam an pan nghal a, Zacheua chuan engtia hma han lak tur nge tiin Sawia chu an bek bawr sar sar a, Sawia chuan," hunṭha tumah an pe lo, in malbeih in cho hle mah ila chesual thei ve kan ni tlat. An pasalṭha te sawn awlsam taka thih an phu hlawl lo. An mal em maw an dar emaw kan tum ang, ka veh phei dawna min lo veng ang che u, Tuaka," min zui la, a thlang hi kham chheng chhe tak a nih hi aw tiin hmalam an pan nghal a.



Ti chuan duh thala ṭanhmun an han siam rem hnu chuan Ralthankhuma chuan a kutzungṭang pasarih hi a rawn pharchhuak dâ a  chu chuan mipasarih an ni tih a entir.  Chutah le, Sawia leh midangho chuan hual bet nghal in, tumah kha che tawh su tiin Sawia chuan Laikunga chu an tin nghal a.


Laikunga'n Sawia an hmu zet chu a khur chhe nghal der mai le. Talikulha chuan min rawn umzui a ni maw tiin nelawmna pakhatmah nei lo chuan an enkual nghal dan dan a. Sawia chuan i hriat a hnu hunṭha tlem i la nei e. Tiin Taikulha malpui chu pawrh tuar khawp in an kah sak zet zawng. Taikulha chu ṭe ṭhawt in an ṭawng chuan an rak chhuak ta nawk nawk mai a.


Kil tin aṭang chuan silai lo puak in Tuaka chuan Laikunga chaldarah tak an verh sak siah mai zawng, a farnu thlaphang mangang chuan a u chu kuah in a ṭap ta zawih zawih mai a.



Thlahtea chuan an pasalṭha pakhat Hrantlinga dar ruh chu an kah tliahsak ve nghal zat bawk a. Sawia chuan Pu Laithang," min lo phiar ru reng a ni maw tih leh tlan puat pah in Pu Laithanga pum chu a kawlhnam hriam tak mai chuan an va zai thler duai mai a, chutah Pu Laithanga chu ṭhingṭhi nghal rap in a pum chu dawmin a kut kar aṭang chuan thisen tharlam tak lo luang chhuak in thei leh thei lo hian ka tihpalh a ni. Tiin leiah chuan a bawkkhup nghala khawvel eng a chhuahsan ta.



Sawia chuan Hei hi ka nu tan tiin Taikulha khabeah tak mai chuan a kut hrawlpui mai chuan a hnek bur mai a, leiah chuan a thal hual mai a. Tuaka chuan hei hi ka farnu tan aw tiin Taikulha kapah chuan an pet ngheng mai zawng, Taikulha chu thlanfimin rawn bual in a na ti lutuk chu ṭe ruai ruai in a nun chu lak sak a dil chuk mai a.



Thlahtea leh Bualthanga chuan Hrantlinga chu an lo thal dun ve mek bawk a. Ṭhasiama chuan Lairawki chu phih tho lawp in timna eih nei lo chuan tenawmnu tih leh a puanven chu an phih thlaksak hmiah mai chu, rinai takin a ti tuai a lo ngo puak roh a, hei hian em ni Pawi mawnghang ho hi i thlem tiin a mal kap bawr lai chu na zet hian an ṭham sak hmiah mai chu Zacheua te ho chu an lo ṭhen ṭha hlawm a.



Ralthankhuma chuan U Zacheu ka rinai daihin a ngam teh e. Kei ni ila ka khur chhe lo chauh ang tiin an nui keh hui a. Chutah le. Sawia chuan Taikulha chu phih tho lawp in awlsam takin Murlen tlangvalte hian kan thih tir dawn reng reng lo che. I lu hi Pumah ka dah ang nga malchaw ka pe ang che. Bungzar i lu hian a mawi sawn lova, phanpui kungin a mawi hek lovang. I hliam hian in khua min thlenpui ang nga, saruak in in khua i lawi lut bawk ang tiin a malpui silaimu luhna chu a kutzungṭang chuan an kawm sak pawk mai zawng, Sawia chet duh dan chu a rawva an ti lek lek hial a ni.




Thlahtea chuan Hrantlinga chu lo phuarbet in hei chu ka chanpual tih hmiah pah chuan lungpui si ran hian an lo rap bet ran a. Tuaka chuan zawhna zawh hun a ni lo. He mihurnu hi engtia han tih chi nge ni dawn an ti a. Sawia chuan Lairawki sama keh dak awrh pah chuan in chhungkua vanga Murlen khua in kan tawrh nasat zia hi i hre lo a ni tih leh a mawngtama a kawlhnam pheka hlap sak an rual nghal zat a.


Lairawki chuan min ngaidam rawh u an ti chul a, Bulthanga thinrim chuan U Sawi," tlangval a ngai tam nge tam lo ka fiah zet ang nga a lu hi ka la ang an tih chuan Sawia chuan i thu ni se tiin an kalsan hmiah mai a. Ti chuan Bulthanga chuan hnim pika phih phei rualin an sual mai zawng, midangho chuan aw haw le tiin an lo eu a.



Murlen pasalṭhate chet thawh dan hian khaw hrang hrang la deng chhuakin khaw tam tak chuan an dem a khaw ṭhenkhat chuan awm an tihpui thung a ni.



Bulthanga chuan a duh tawk a ngah hnu chuan nui sawng chung hian tlangval chu a la ngaitam lo phian e ka rinai tak chuan tih leh Lairawki chhipthlak rualin timna eih nei lo chuan a lu an tan sak hmiah mai a.



Sawia chuan," ka thu ka sut leh e tih pah chuan Taikulha lu chu hek huam khawpin an sat mai zawng, leiah tlu hnawkin a ke chuan leichar lai chu khawng dawt dawt in pialral kawng a zawh ta. Hrantlinga chu panin Thlahte," i sal kha an khua thleng i chhawm kal zo meuh ang maw an ti nem diai a."



Thlahtea chuan kha leh chen Lusei khuaa ro thil it vangin an dai lut thei alawm maw! Kal thei turah i beisei phawt ang. A ke a la ṭha e. A dar erawh chuan ngai a awh leh tawh ngai lovang tih leh phih tho lawp rualin Mualsei khaw lam an pan ta chheu chheu a.


Ka kut a kham lutuk. Duhtawk phawt ang.