HNEHTU NGAWICHAWI. BUNG 29- NA.

.HNEHTU NGAWICHAWI.


BUNG 29- NA.


Fanai Pawi lalpa Lalliangzinga chuan a hmaa Lusei pasalṭhate chu chik zeta melh kal pah chuan, lo hawi let tawh ngai lo tura ka in nghahna liamta khan Mualsei bak va bel suh i. An pasalṭhate thlazarna hnuaiah chuan him pawh a him mahna le. Lal Tlutpawha thlazarna hnuaiah chuan va awm poh teh se. A pasalṭha te pahnih hruanghrau na zet, Taikulha leh Hrangtlinga saw nangni lusei ho tana mi hnawksak tur an ni tih hi in vawng reng dawn nia tiin an sawi sap a.



Sawia chuan, lalpa," ka sawi ang nga ka sawinawn fo ṭhin ang. Keini Lusei bawh ram te hi it vang leh awmhlei vanga lo chuan fo te hi kan thlahthlam dawn hauh lova, eng ang pasalṭha leh ral hrat pawh lo ni raw sek sek, an hmaah kan hnungtawlh ngai hek lovang. Englai pawn pailral kai turin kan in peih reng a, mahni nun chhanhim nan kan sual bawk ang.



Pialral kan kai ta a nih pawn kan hnungah mihuaisen tam tak Lusei zingah an rawn la chhuak ang. Chungte chuan kan chanchin hi an piah lam ram hla tak thlirin an rawn la sawi ṭhin ang. Nunrawnna in a kengtel te chu kan ralthuam neih te hi an ni a, mahni khaw chhan nana kan taksa penga bet tlat an ni bawk. Lalpa tunah hian keini Lusei ang bawka buaina duh lo mi i ni tih ka hria, chu avang tak chuan lei leh van kawk a inremna siam hi kan hmabak a ni in ka hria an ti a.


Lalpa chuan, chu chu ka duh thusam alawm. Chutih rual erawh chuan buaina hian ka khua leh tui chungah thla a la rawn zar ngei dawn, chumi hunah chuan tu nge ral hmaah ka khua leh tui tana ding tur ah hian ka buairu a ni an ti sap a. Sawia chuan lalpa," keini Lusei ho hi mi dang chunga leng kan ni hauh lo, chumi hun a lo thlenga i khua leh tui tana ke pen tur chu i tlangval te an ni. An thinlungah huaisenna tuh tlat la, khualṭha ang nga i lei lunga kan tuallen theihna hun min pek phawt chuan i zawlbuk val te zirtirna pe turin kan in peih reng e an tih chuan lalpa chuan a hmela hlimna chhiarsen loh lo lang chhuakin Sawia chu an mrlh vang vangin ka lawmman pek na tur che'u kawng min dal loh hram ka beisei.


Lei leh van kawk in chhe chham meuh in he thu hi ka sawi e. Thlasik vawitam hmachhawn pawh ngai se, lei leh van a awm a, chhum a kal chhung chuan Lusei te nek zawngin kei leh ka khua leh tui te hian ke an pen lovang tih ka tiam a che an ti sak a.



Sawia chuan, i khua leh tuite chunga hlehlenna na leh duham vanga i lei lung rawn rap te chuan kei Murlen tlangval Sawiluaia hi a dam ṭek ṭek chhung chuan an hmaah ka ding zel ang. Tum in tluk hun a neih a, Chhumin thla a hliah khuh chhung chuan ka ralthuam hi in khawlam hawi hian ka leh ngai lovang an ti ve a.



Tichuan inremna thuthlungte siamin chu tlai hun hlimawm zet  chu lukai chhalhin  an hmangho ta a.


Sawia chuan Thlanglian," Thlahtea te zu lam turin in liam mai a ni ang chu tiin an tir liam nghal zat a. Sawia chuan lalpa," i khawthleng a nuamin boruak lah a nuam narawh e. In khaw nula te lah hmuh an nuam e an tih chuan, lalpa chu khik ho pah hian, ka khua leh tui te hi an fel in ka tan an ṭha em em a, chutih rual erawh chuan Sakei sual hian venghmawr lam pang a vel tlat pek ṭhin hi a ni. He Sakei hi sakei fing tak a nia ka pasalṭhate pawh hian tihngaihna vak an hre lo chu a ni e. He Sakei hian ka khua leh tui te a ti ral ṭi in feh kal tur te pawh silai kengte kiangah lo chuan kal ka remti lo a ni an ti chuar chuar a.



Sawia chuan a nih chu maw le. Kan thudanga lai chuan hei kan hruaitupa hian eng nge ngaihdan a neih ve le? Tiin Tlangthanga chu an melh ralh a. Tlangthanga chuan inremna in neih tawh a liamah, han kam keu tur vak ka hre hauh lo mai. A mah erawh chu! Nangni'n cham in la tum chuan keini lam chu ngaihṭha takin kan let angai ang, tiin thu tawp an siam a.



Sawia chuan chuti vut vut tur em ni? I hoon nunchan kan zir ang chu le, an tih pawh chuan chhuanlam siamin an hnar fi thla ṭhak a. Sawia pawh chuan han tih ngaihna vak a hriat tawh si lohah chuan ngawih a chuh ve ta a. Lalpa chuan ti hian thlenin tur dang dap ngai lovin ka khualṭhaah in awm chhunzawm nghal a niang chu an tih chuan, Sawia chuan lalpa," ni lo ve, i tlangaupa hian thlenin tur min han kawhhhmuh teh se tia a ṭan tlat avang chuan lalpa pawh chuan a hnial chhunzawm duh lem lova.



Sawia chuan lalpa chu melh ralh pah hian lalpa," thil pakhat ka zawt lawk thei che angem an tih chuan lalpa chuan thei tuk e le, min han zawt ta che an tih chuan, Sawia chuan lalpa," khaw nge i rorel ṭawmpuitute hi an hmel hmuh tur an va awm lo ve an ti a.



Lalpa chuan, damlo na deuh kan nei pek alawm le. In lo thlen hma lawk khan an liam ta a nih kha tiin an chhang a, chutia an ti ti lai chuan Thlahtea te pawh an lo thleng chawp chilh nghal zat a. Lalpa chuan hmel la naupang tak, hmel pa hrak, khabe kual deuh raih, mitmeng zim deuh san a hmel en aia a taksa phiar mawi tak chu chik zeta melh pah hian a rilru chuan hei hi a ni ang chu maw ka pasalṭha lu la tu chu tiin an thlek vang vang a.



Thlenin turte an han peihfel meuh chuan lal chhungkua te chu zandang aia tlaiah chaw an kil ve hman chauh a. Lalpa chuan Sawia leh Thanglina chu a mikhual a, midang zawng chu  khawnbawl leh upa te inlamah an semdarh thung a ni.



Dozarem chuan a suah sual chhuahin a aihnahpa boralta chhungte chu thiam taka thlemin khua chu an chhuahsan ve mek bawk a. Tuaka te pawh chuan Hmunnghak khaw ramvalh chin chu an dai lut ve mek bawk a.



Lal fanu eithleng vel sengfel chuan Sawia vaibel lakai tur chu a bekah an nghawk siah mai chu, zak,sen ṭan ṭan chung chuan ui ha ka duh thei lo a na em? Tiin nuihza ru bawk si. Lai bawk si, zak bawk si chuan an biaa, Sawia lah pek chuan khualṭha thlenin min thleng hauh lo mai ka ti, i lawmpa ka tluk loh vang mai a tiin an fiam zauh a.


Lal fanu chuan, ui ui ui, zak rawh khaih, lawmpa te zawng sawi lo mai teh khai, keini nula satliah hian khawilam lawmpa nge kan hmuhzawh teh lul ang tiin an nui ri hak hak a. Chutia a fanu hlim thawm lalpa leh a nupuiin an hriat chuan an lo khi ve suk a.



Sawia chuan sawi sap si, midang hriat ve tham si  lo chuan, lal fanu," hmeichhe piang tawh zawng zawngah i ṭha ber awm e an tih chuan lalfanu chu zak sen ṭal chung hian i mi fakdernaah ka lawm e. Nangni ang pasalṭha khualkai hi lawm le to tur chu kan khaw nula ho hian pasalṭha te hi an ngaisang hle a nia an tih chuan Sawia chuan chuti chu nang tih loh chuan min ngaisang dawn zu nia an ti let salh a.


Lal fanu chuan tum deuh bar hian kan khaw nula zinga min rin luh leh luh loh a niang chu! Kan khaw nula ho i hmu ang nga, kei te chu he khawvela awm ve ah pawh min ngai tawp nang an tih chuan Sawia chuan, kan la hria ang chu tiin ṭhut rem pah chuan vaibel chu an pak khu hlat hlat a.


Lalpa chuan Sawia," kan thu danga lai chuan i chanchin tlangkam aṭanga ka lo hriat dan chuan Pherpui lal fanu hmelṭha Saizampuii i chhanchhuah dan ropui zet, nakin zela Lusei thlah leh keini ho thlah thlenga kan thinlunga dai tawh ngai lo tur chanchin te pawh i ka aṭanga ngeia hriat a va chakawm ve maw le an ti a.



Sawia chuan, chu tiangin lalpa thilropui ka ti a ni bik hauh lo mai a, mahni nun chhanhimna'n Pherpui lal fanu hmaah ka ding a ka ding chang zawk ta hlauh a ni an tih chuan Lalpa chuan chuti zi Sailo lalpa chuan ramhualah te a siam che lo em ni? An ti a. Sawia chuan nuih sak pah hian Murlen lalpa hian min lo tuamhlawm ta zawk a nih hi tiin a zawng zawng chu an thup a.


Lalpa chuan a nih chu maw le aw, Pherpui lal fanu hmel ṭhat thu hian khual a kai nasa hle nghe nghe a, keini lam thleng thleng pawn a kai a, eng ang fakaua ṭha nge a nih ang aw? Hmuh ve hrim hrim a chakawm alawm maw le, ka fanu hi a rukin ka chhuang ve hle mai a, Pherpui lal fanu ang em em chu iang lem lo mahse an ti a.


Kil khat aṭang hian Thlangliana hian lalpa," Pherpui lal fanu te zawng, Murlen khaw nula ho lakah chuan eng ual a ni lo ve. A beng leh lam ṭha lo leh biakrin ngai sawn tlangval te enkan a hlawh fo ṭhin asin an ti chuan lalpa chuan," uai, chu ti e law maw? Tlangkama ka lo hriat dan nen a va in per san ta ve le an tih chuan kil khat aṭang hian Sawia chu a lo nui chhuak hawk a.



Kan Thangliana mai mai chuh tiin rum zet si nuihza bawk si chuan an melh khai khai a. Thangliana chuan lalpa," kan fiamthu hluai nanga ka ṭawng lo ngaidam la, Pherpui lal fanu chu nula fel leh hmelṭha, Lusei tlangdunga hmelṭhaa sawi thang hat a ni alawm, lusei hmeichhe piang tawha zawngah chuan a ṭha ber awm hial e, mahse khiang a awi hma lutuk lam lam hi a ni a than tur anga a than loh ni an ti a.



Lalpa chuan  aw haw haw! Chu khawilam pasalṭha lakah nge khiang an awi a an tih chuan, Thlangliana chuan lalpa," i lalin chhung ngeia awm U Sawiluaia hi maw le an tih chuan lalpa leh a nupui leh a fanu chu an kã ho mai a. Thlangliana chuan sawi chhunzawm leh in nuih hak pah hian a dul pawh a kawh ve lah tawh a nia, an tih chuan lalpa chuan Sawia," mi vannei tak a nih dawn chu Sailo lal fanu chu an ti sap a.


Kil khata ngawi renga lo ṭhu thinlung no te chhunga a laimu chu chhut sawm ang mai hian a darh keh vek thei hial a ni. Vawikhat tawn hmangaihna kuhmum parchhuak tura inṭhamtu thinlung neitu chuan Thangliana aw chhuak chu a haw khet mai le.



Sawi lo law law se a zan hun hman pawh a tluang mahna le. A vawikhat tawnna mahni se'ng, thinlungin a zawm tawh chu thamralan a phal dawn si lo, hmelduhna kuhmum lo par chhuah tir chaktu thinlung chu rum mahse, a,Fanai lunglian chuan a hnawl phal i khaw lo mai le. Pasalṭha te hlut zia leh to zia hre ru khiautu chuan a bul lawka pasalṭha huhang ngah tak chu thlahthlam a tum hauh lo.



A thinlungah a duh mi pa chu awlsam taka thlah mai a tum lohna chuan khualkai pasalṭha chu bualat in a awm mai angem? A zawng zawng pawh hlan huam khawpa bual â tu nula hmelṭha leh duhawm zet chu a fa pai mek tu Saizampuii thlahthlamin hun leh ni te a tiampui mai ang ngem le?


Ralvawn lal fanu hmelṭha Kawizingi rilru tawt lutuk chuan a ṭhian ve ber te inlam panin an chhuak tharh a. Chik zeta lo melh ru kartu Sawia chuan lal fanu awmdan chu a hai mawlh lo. Inthiar chhuanlamin an chhuak ve nghal zat a. Chutah lal fanu kal lai chu au dingin khawilama kal tur nge a nih an zawt a, lal fanu chuan lei lam bih ngar chung hian ka ṭhiani te in lamah tiin an chhang a.


Sawia chuan zanin chu kan inkawm ang chu ka lo tia, lal fanu hmelṭha kianga zan hun han hman te chu a chakawm alawm maw le an tih chuan lal fanu chua," khaih khaih keni nula satliah te bulah chuan khualkai pasalṭha te an awm duh tawp nang, chu lo rengah i nupui te reu reu in min lo thik palh ang nge an ti hlak a.



Sawia chu nuih hak pah hian", lal fanu hmelṭha te chu tu pawn an runsang kai an chak ang chu," nupui lo nei hman lo ila chuan an ti sap a. Lal fanu chuan en ha pah hian, ti nge kan khuaah hian i lo lan an ti tawng mai a. Sawia chuan chuti chu haw leh turin min duh em ni an ti a.


Lal fanu chu ngawi vang vangin a rilru te te chuan Lusei pasalṭha," ka hmuh phakah awm reng la, nirei cham an ka beisei lo che", i theih chin leh phak chinah ka khaw hawina lam a piangah i hmel lo in lan la, kum khuaa ka thinlunga cham reng turin ka duh che an ti vawng vawng a.



Lal fanu chu lo hawi chhuak in thla eng hnuaia thlifim leng thaw delh delh in a sam dum hlap ngil sei,sang chu chhem leng siau in a sam kara a mitmu dum fiah kak lo lang chuan Sawia chu melh kal chung hian, haw leh turin ka ka hian chutiang thu a chhak chhuah lo asin, i hrethiam lo a ni tih pah chuan an piah tlangdung sei zet mai, thla eng hnuaia thing ding sei bik langsar tak lam chu an thlir vawng vawng a.



Chutah lal fanu chuan," ti tak zet mai hian, keizawng ka vullai ni a liam thleng hian ka duhthlanna hian mual min liamsan zel dawn zawng a nih hi. Ka banin a bân a, ka hmu asin, mahse ka bâ n chuan a banphak si lo, chhum rei lo te lo langa ral leh ang mai hian hunbi ka chhiar liam dawn zawng a nih hi an ti chuai raih a.



Sawia chuan lal fanu thinlung chu a puakchhuah tir fuh hle mai le. A tana a awlsam tur zia pawh a hmu tlang ta vek mai le. Sawia chuan," hawh teh he tah zawng mi mitmei ven a ngai bawk nen rem i tih chuan tiin hmunbiru lam chu an melh a. Lal fanu chuan nula lehchiah ang leka i laka awm tura min duh a hnu kal ta poh che, tiin hnar tum eng ang mahsw a thinlung chuan zah pawh dawn lo in a hnar thei mawlh si lo.



Duhtawk leh phawt ang aw.