THIH NGAM LU PU TEN HMALAM AN PAN. NUNG-32 NA.

THIH NGAM LU PU TEN HMALAM AN PAN.

BUNG-32 NA.

Saikhama chuan a hmaa Pasalṭha ralhrat, Lusei Lalna khaw hrang hrang a hmingchher ve tak, Sukte Pasalṭha Dohena Lu tan tu chu chik zet a en chung hian ataksa peng hrang hrang in vuah fuh zet, a aw kam chhuak leh a mitmenga thuneihna sang tak nei tih hriat tak leh a mi dip na ru zet chu chhoar hmaih miah lo hian an en bing ngar a.



Saikhama chuan kan chhak lawk tlang ngawpui lo in chhap durh khi i hmu ang nga, khi ngawpui khi Khamsang khaw chhunga rin luh a nia, tia a sawilai chuan an Arpa hluisen chu an khuang al al a.



Vuta chuan Khamsang Pasalṭha chu a ma tawka theihna sang tak nei ve tih a hai hauh lo, mahse Pasalṭha vawitam lu lo tan tawh chuan a hnuai en lo thei si lo. Vuta vek chuan a hmachhawn mek Khamsang pasalṭha dinna piah vel chu a mit sir chuan a thlithlai ngun tak zet.



Vuta chuan Khamsang khua in nih chuan in khua lo lawi lut tura lo kal kan nia, Hmunzau Lal fanu zawngin hei thleng thleng hi kan lo kal a ni, beiseina chhete kan la neih khua te zinga mi in nia, a chin chang hria in lo awm mial tak ang ka ti an tih chuan Saikhama chuan Hmunzau Lal fanu chu lo kawl ta i la an ti khauh a.


Vuta chuan chuti a nih a hnu him dam tak in Hmunzau khuaah kan hruai haw ang chu ka kawngdal zawnga hraim lek ngam chu ka dahṭha mai ta lo'ng, kan buaina hi a reh bawk ang tih pah chuan a iptepui chu a kut dinglam chuan a hlat lo hle mai.



Saikhama chuan nau te u lo chhuak ru le an tih chuan kiltin aṭang chuan a naute paruk chu chem hum far chung chuan an lo chhuak phak phak hlawm a. Saikhama chuan Hmunzau Lal fanu nen chuan eng in kungkaihna nge in neih le? Ṭhi leh dar Hmunzau Lalpa chuan a sih hmuh che'u em ni? An ti let ve fak a.


Vuta chuan a naute ho chu melh kual dun dun in a let thawk a an in tam hleihna chu chapo pui tak mai hian, chung erawh i hriat a ṭulna ka hre lo ve, tunah hian Khamsang khua kan pan dawn a, In vangkhuaa Hmunzau Lal fanu kan hmuh chuan kan hruai haw ang tia pen a tumlai tak chuan Saikhama chuan a awmna sawnin Vuta kalna lai tur takah chuan an ding nghal chat a.


Vuta chu khik hui pah hian kiang mai rawh ka chhawnin a hem ang che. Kharzawl Pasalṭha kawngdala ngawhngawl chhuah te hian pialral kawngka an nam hawng fo ṭhin an ti nghut a.


Chu tah le, an chhak aṭanga hnim pik kar aṭang chuan Za zek zek a in seh ruh ṭruh chunga Thangzika thupek nghak mektu Chhunhleia chuan tuar thei ngang tawh lo tih hriat zet hian hmun ralṭia riahrun kan rem lai lai a, mahni vangkhua chhan ngam lo khawp a kan pasalṭha i se chhuah mai ten a dik nang. Infiamna thianghlim nei tura min sawmtu ka mamawh lem lo ve. U Saikham in lo damṭha maw? Rallu khaiin kan vangkhua kan lo pan e tia hmalam rawn pan in an ti chhek chhek mai a.



Vuta chuan a mah hlau miah lo leh zamna a hmel hmaia chhiar tur awm miah lovin ngam sarh mai a chutia ṭawngka a rawn chhak chhuah takah chuan mak a tiin chu tlangval la naupang tak, Zawlbuk kai tgar tir chauha mawi, a hmel en ai pawh a a taksa lian ṭha tak, thahrui a ngah tih hriat zet in hlau miah lo va a ma lam rawnpantu chu mit la sawn lek lo hian a lo tuipui thlir ngawt ngawt a.


An piah hlam sarih dawn awm vel aṭang chuan Thangzika chu a lo pen chhuak ve mek bawk a, Khamsang khaw ram chin paltlang tur hian khawkhat pasalṭha chuan in ngaihtlawmna nen a khaw neitute chu a be mai tur a ni. A kawi zawnga mahni hringmi pui ten min nek hi chuan rilru sukthlek te hi a dang chawk reng a nia tia aw dam dap chhuah si a, a mitmenga pawisak a neih lohna chu chulai ngawpui chhunga mihrangval rual te chuan an hai lo chiang kher mai.



Saikhama chuan ka lo beisei miah lo che u tiin a hmel a hlimna chhiar tel theih si, a thinlunga Khamsang khua a hmangaihna leh chutia elsen taka an vangkhua kal tlang tura ruahmanna siamtu Pasalṭha a huatna erawh a thup hram hram a.


Thangzika chuan kan tluang e, Piandenga erawh chuan a nun humhim nan hliam chhete a nei e chu zawng chu a ni mai, tia Vuta lam en pah chuan Kharzawl khua maw in nih a, ka bula ding ka aihnah phah pui hi ngsihdam dil u la kan vangkhua chu him dam takin in lawi lut thei mahna tia a thinlunga Saikhama a dah pawimawh zia chu an chhak chhuak zauh a.


Vuta thinrim lutuk deuna ṭawngka a beng hriat a Thangzikan an sawi chhuah chuan a chil chhak phurh phurh chung chuan a nih a hnu tuma hnenah ngaihdam hi la dil hek lovang, ka hmaah hian tu nge lo ding dawn che u tiin an melh kual dan dan hlawm a.


Thangzika lam chu hawirual nghal ṭhap in Thangzika lah chu a lo in kuangkuah then a, Thangzika chuan aw dam dap si, a aw chhuaka thuneihna sang tak nei tih hriat tak mai hian, Vuta chu melh kar chungin, i thil tum hi sut rang rawh, chuti lo chu helai hmun aṭang hian damkhaw chhuak in awm lovang an ti a.



Vuta chuan, dam khaw chhuah nan ka hmaah hian tu nge lo ding dawn che u, tiin a chempui chu an phawrh chhuak nghal zat a.


An mahni hnungchhawn zawnga Kawlhnam hnungpuak chuan a kut veilama a ral lu tan Suaka lu ngri mai chu khai chung hian hei nen hian inzawmna in lo nei mial lo maw? Tih pah chuan Suaka hmel lan chian theih dan tur ber chuan inher duh miah si lo chung chuan a lu chung zawnah chuan an khai chho vah mai zawng.


Vuta chu rak ṭhawt in tu nge i nih an ti vin ṭhawt a. A naute ho pawh chu ka ho hian an thinlunga thinrimna chu lo irh chhuak nghal in an chempui chu an han phawi dawk nghal zawk hlawm a.


Piandenga chuan Khamsang keite Piandenga Kharzawl Pasalṭha Suaka lu tan tu ka ni e tiin an pan hnai chhek chhek mai zawng, Thangṭhianga chuan a tawmna aṭanga lo pen chhuak in keimah Thanṭhianga, thih ngam lu pu a hmalam pantute zinga mi, Khamsang tlangval zam ngai lo ka ni ngai e an rawn ti ve lauh lauh mai a.


An piah aṭanga Aivela lo ṭawng chhuak ve leh in Piandeng nang chu lo awl rawh, khalai Pasalṭha lak tlak loh zet kha ka chanpual a ni e tiin hnim pik kar aṭang chuan a lo pen chhuak ve nghal a.



Zakhama, Dawla leh Thansiama pawh chu lo chhuak nghal in, an din hual ti tih ta mai Vuta thachhang dawltu Aikhama chuan ngun zet in chung lo lang thar tlangval tuaitirte te ho chu  an thlek tawn sek a. Thangzika chuan Hmunzau Lal fanu chu kan kawl e. I thu i sut dawn nge a khamphei zawnga haw in duh? In ṭhianpa ṭawng chaltlai zet lu erawh Khamsang khaw bungzar mawi turin kan lo kawl ang nge. I mi chhanna ka nghak e an tih chuan Vuta chuan Thangzika en lem lo chuan a hmazawna Suaka lu khai chunga ding tlangval hmel hmai ṭha zet mai, a taksa pian phiar fat, a mitmeng a zamna chhiar tel tur awm miah lo leh, a chala hliam leh a ban puam kak diai avanga ramhnim damdawi sawrtui rawng val deuh kalh chu a thinlunga huatna tinrenga khat chung chuan an thlur bing ngar ngar a.


Vuta chuan hnungtawlh deuh hrat hrat chung chuan kan kal ang, a fawng chelhtu in nihna angin kan kiang ang nge, mahse kan la intawng leh mawlh ang an ti ram hmak a.


Thangzika chuan, kha ti mai tur kha a nia, kan khawram chhungah hian in ke hniak hi in ngam chuan in rawn hnutchhiah leh dawn nia, he lai hmun hi kan khawram china rin luh ni lo mahse kan rah chin a piang hi kan khawram chin a ni tih hi in lo hre dawn nia an ti ram hmak a.


Chutia, Khamsang tlangval rual ho an han in hmuhkhawm meuh chuan, Saikhama chuan Thangzika chu mimal taka biak a duh avangin an ko hrang nghal zat a.


Lalpa rilru sukthlek dan zawng zawng chu an hrilh a, Thangzika chuan hman aṭanga ka lo rin lawk ruk tawh a nia, ti hian Tiau lui kan hnaih dawn zu nia a ṭha phian ang chu an ti sam et a.



Khamsang tlangval ho chuan Piandenga chu en hrek hrek in an chung en nghal hmiah mai bawk a.


Vuta chuan an chetla chu en ru kar chung chuan Ṭiau lui a nauten an thlen awm velah chuan a Silai chu kau ri rap chung chuan an tin vang vang a, chu chengrang puak ri chuan tlangval tuai tir, Pasalṭha nun tem ṭan mek Thansiama thinhnun tak a mu chuan va deng siah in midangho chu leiah chuan an han bawk nghal vat a.



Thansiama chu thaw ang bawrh bawrh in a ka aṭang chuan thisen lar tak lo chhuak in a bul lawk a bawk phek reng Piandenga chu nui lui tih hriat tak mai hian a hrawk a dawmna a ka aṭanga thisen lo luangchhuak a kut kara kai hnuang chuan Piangdenga darah a va bang hnawp a, a kr khawng dat dat in a chatthla fel nghal der a.



Vuta chu hmanhmawh tak chungin Ṭiau lui chu dai nghal in pum maua siam hmang chuan Lengsir khaw lam Taizeng Paihte lam khua chu an pan nghal a.


Piandenga mit aṭanga mittui lo luangchhuak ngiai ngiai chunga a mit no te fiah kak aṭanga pawisak neih lohna lo langchhuak kawp chuan a mittui hnam chu a hui kiang sawk a.



Ring taka au khawk rum rum in a bul hnai vela awm te chuan Piandenga awrawl chu an rap lek lek hial a ni. Thanṭhianga chuan ṭhianpa a ni thei lo a la hun lo tia rawn kuah nawk nawk in a ni pawh chuan ring taka a awrawl chhuahin a au teh reng a nih kha.

Thangzika chuan, muang hman kan ni lo ve, tumah zuah loh tur. An lu kim kan tan hma loh zawng, pialral thleng rawk in aw. Saikham i nau te nen khan Thansiama ruang hi lo han haw pui mai ta che u tiin a chhanna pawh nghak hman lo khawpa dawk chhuak nghal zawk in Vuta te tlanna lam chu an han pan nghal vang vang a.