HNEHTU NGAWICHAWI. BUNG 3-NA

HNEHTU NGAWICHAWI

BUNG 3- NA.

Murlen zawlbuk kianga an khaw pasalṭha chhuanvawr mei hnungpuaka lo ṭhu run chu Tlangaupa Pu Bela chuan Hualzasela hnenah chuan lalpa in a hmu duh thu a rawn hrilh chuan val upa te ho chu an beng an lo tun hra a, ti chuan lalin lam pan chuan an in zui chho ta a.

Lalin an han thlen chuan lalpa chuan" hei le, ka pasalṭha ka koh chhan che chu, thin thi a thlamuang taka mawng kan hun lai hian tui vai lui kam leh lam kan luseipui te nge ni dawn kan ningkhawng ngaithla a an lu rawn rawlh lawr te tih pawh hriat loh chuan kan ram valh china perh kan tar te an suasam chiam mai a, engtia hma han lak chi nge ni dawn le tiin lalpa chuan a mit meng fim fiah kak chuan Hualzasela chu an melh kal mai a.

Hualzasela chuan lalin chhunga lalpa leh a khawnbawl te melh tawn leh zak zak chung chuan lalpa chung thuah chuan i upa te nena hma lakna han sawiho tur ah ka lo ngai a, chutia min han koh tak ah chuan rilru fim taka kan ngaihtuahna sen a ṭul hle mai ka ti, chutiang khawp a zahpah lek lova i lalna ram rawn chingtute chuan an kuang lo an rawn dai lut a ni tih hria se, he mi kawngah hian Khamsang lam kan chi pui te an in rawlh duh erawh ka ring pha hauh lo mai a, chutih rual erawh chuan Khamsang pasalṭha Neihdura chet rawva ṭhin zia leh pawisak a neih loh zia kan hriat erawh a ṭul bawk tiin Khamsang khaw pasalṭha te chet tlatna a nih ve theih tho zia chu an chhak chhuak tel zauh a.

Chu tah, kan Teizang ho chet tlatna pawh a ni mai thei bawk, tin kan chhiatna tur leh min ti ralṭi zawnga min ṭhawn lawkna a ni thei bawk, tunah pawh kan khaw ram chinah an in khuar tawh mai thei bawk, lalpa kan zu chian vat a ngai a ni an ti a.

Lalpa chuan a lu buk nghat nghat pah chuan ka pasalṭha lung fing nge nge, i ṭawngka chhuak a fel fai fak e, ka khua leh tui ti ralṭi zawnga chet thawh tu te hian ka pawi an sawi a, khawi khua nge? An nih tiin a hniak hlauh hauh lovin in thinlungin a nemngheh na turin in chhui dawn nia. I mirin zawngte nen naktuk varṭianah chhuak nghal turin in in peih sa dawn nia an ti a. Hualzasela chuan aw le lalpa tih leh lalin aṭanga chhuah an rual a.

Hualzasela chuan zawlbuk a zu thlen chuan Sawia leh tuaka chu a mit chuan an zawng nghal zat a, Tuaka hmel an hmuh chuan an hui zauh a, Val upa Manphunga chuan thilawmzia lo man thiam mai in Hualzasela bula kal vat pah in kan pasalṭha chuan zawlbuk kai te tana pai thuhruk phawrh tur zu nei tlat a hriatna ka neih chu le an tih chuan Hualzasela chuan nia, U Man hei kan khaw boruak in lum let kual dan vel hi a mak zawng a nih hi maw le, tiin midang hriat loh tur chuan Tuaka nen chuan an hrilh nghal vat a.

Val upa chuan aw haw haw chu tiang khawp a kan perh tar rawn suasamtute chuan an lu an rawn zuar a nih der tawh chu maw le, zu chian turin varṭianah chhuak ila a ṭhat dawn chu an ti vei hmuk a.

Hualzasela chuan Sawia zawlbuk bawhbel bawh liam tur chu ko ding chat in an hui phei a, thil engkim hrilh in he thil hi sa hliam um a, chu sahliam chuan kan khaw ram chin a dai pawh a ni mai thei bawk a, kan chunga an kut lek duh ni se tawrh a hun tawh, naktuk ah engkim a chiang ang lengi runsang kai ta lo mai ila naktuk chu kan hah dawn a ni tih hriain mut zai kan rel hma dawn nia tiin an thu chu an ti tawp nghal a.

Zingkhua a lo var, Sawia chu hmanhmawh takin in lamah a tlang haw nghal a, a nu chuan ti em em nge a tlana i rawn tlan haw tak mai le? Tiin aw ka nen dam thlap chuan a lo zawt a, Sawia chuan engkim hrilh in ṭhenawm te hnena lo puangzar rih lo turin an ti nghal zat a.

Kawtchhuah ah chuan Hualzasela, Val upa, Tuaka, Aithanga leh Sawiluaia te chu kim ṭhap in tui vai lam chu an pan nghal ta par par mai le. Tumtluk mual an zu thlen chuan Tui vai lui tui luang ri pawh a rik hian a ri hum hum thei hial a ni. Hualzasela chuan aw le, hei kan perh tarna kan thleng dawn hnai tawh a, tukṭhuan bar ila muangmarin tu tih kan hriat loh te sulhnu chu kan bih ṭan mai dawn nia, tui vai lui kiang velah pawh mihring thawm kan hre mai thei a, fimkhurna kha paih hauh lo tur, tiin an chaw fun te chu an ṭhet nghal sawk sawk a.

Puar taka tukṭhuan an bar zawh chuan tuibur hmuamda awm vel an han ṭhut khawmuan hnu chuan tui vai kama an perh tarna lam chu an pan chhuk ta a. An zu thlen thlak chuan mihring sulhnu te chu an han bih kual thuak thuak a, Tuaka chuan thinrim hmel tak mai hian U Hual, an chet duh dan hi a in zah loh thlak hle mai maw, tiin an perh tar mau sep chu leia an vih phun thliah thliah chu ṭangphel chen dawn a in chhawk hmawk hmawk chu an khai kang va a.

Hualzasela chuan an hmuh meuh chuan a mitmeng rawn danglam nghalin "tuaka, khawnge mau sep bung dang ho " tiin an zawt a, Tuaka chuan an zawng leh ruaia an piah chhim lam panna kawng ṭum zimte a an perh tarna bung mau sep chu hlam nga dan velah in vit phun in an hmuh leh meuh chuan U Hual, Teizangho thil tih a ni lo tawp mai, an hnu hian chhim lam panin Khamsang khaw lam a pan tlat mai an tih chuan Hualzasela chuan a lu buk nghat nghat pah hian, "Aithang, khuaah let la, mipui ti ral ṭi lo thei ang berin lalpa hnenah Khamsang khaw lam kan pan thu hi i lo sawi dawn nia.

Tin, ni hnih hnuah khua kan lo la lut lo a nih chuan tlangval sawm nen, faisa kengin kan hnu in rawn chhui dawn nia, kan hnu in hlauh loh nan kawngṭum in rawn zawh zel dawn nia. Kal tawh rawh le an tih chuan Aithanga chu hmanhmawh takin khawlam a pan ta a.

Hualzasela chuan, aw le hei kan chunga an chet thawh duh dan hian min zah loh zia a entira, mahni lusei pui chunga tianga che duhtu pasalṭha chuan lal zilh na a dawng tlem hle tih a entir. Mahni khaw tan aw engpawh kan chungah thleng se ṭan ral raih mai tur tiin hma an hruai nghal zat a.

Chawhma ṭha zet an kal leh hnu chuan Hualzasela chuan an hmaa kawng lo in phan riak Dizawl khaw kawng ṭum leh Khamsang khaw in rina chu kawh va pah hian Sawia Dizawl khaw panna kawng khi kawi hnih vel han chhui la hnu tharlam deuh te a awm mial en tiin an tir nghal a, Sawia a lo let leh chuan mihring hnu a awm loh thu an sawi chuan Hualzasela chuan aw le, Khamsang khua kan luh nge nge a ngai dawn a nih hi. Tiin hmalam an pan nghal a.

Thui pawh an kal hma chuan Hualzasela chuan an kalna kawng lang thei china mau sep lo in vit phun chu panin an phawia, an ram valh china perh an tarna ngei phar mau a ni tih an hriat meuh chuan e he he, tiang zawng hian maw chet kan thawh dawn a? Midangho chu melh kualin tunah chuan lei do kan nei ta an ti sap a.

Hualzasela chuan Khamsang khua khi Lalzangenga lalna khua a nia, in zali laia inchhal khua an ni, keini aia khawlian pawh ni se kan hlau lo a ni tih kan lantirna hun ṭha a thleng ngei ang. Pasalṭha pawh an kat ve nuk bawk,  kan piah ruamah sawn an ram valh lo chin chiah chiah ah riakbuk kan sual ang tiin hma an hruai chhunzawm zat a.

An faisa kenin daih hek lo le, tumbu leh Mau zik no te chu an mei chhehah chuan thuk phum in zanriah chaw ah an han ring meuh zawng ei har ti viau hlawm mah se, hrehawm ti hmel reng reng an hmel ah chhiar tur a awm hauh lo. Hualzasela chuan a mut hmunah chuan Sawia chu ngaihtuah rauh rauhin a hringtupa khua ngei hmelma ena a en tur te chu pawi a tiin fahrah nun a lo hman tawhna te chu chhut sakin a khawngaih hle mai. Sawia lah chuan engmah a hre ve der si lo.

Zingkhua a lo var, an kaw ruak zia te chu hria in chhun chaw fak hun awm vela Khamsang lo lama feh te pur chuan an han kal leh ngat ngat a. Khamsang ho lo neihna an han thlen chuan thawm dim takin feh an awm leh awm loh beng chhi chuan thawm hriat tur a awm takin tiin an han ngaithla kar a. An piah hla deuh aṭang chuan nula leh tlangval hlim thawm leh kuk raih raih thawm an han hriat chuan thawm awmna lam an han pan ta tawp mai a.

Khamsang tlangval leh nula te chu inlawmin mi sawm leh pakhat lai hi lo khat ah an lo bung tarh tarh a. Nula pakhat, samṭawk lo a a khat tawk a, a ṭhiante hlim thawm a a biangsum lang kalh a lo nui leh seih chu hmu  in Hualzasela chuan aw chhuan in alam panin an khuh deuh khak khak a.

Nula chuan ui ka duh lo ral ral ral tiin a au ta chiam mai a, a samṭawk lawh sa chu paih darh in a ṭhian te lam-ah chuan a tlanchhe dawr dawr a. Tlangval feh ho mi paruk te chuan hmanrua chuhin an lam panin an rawn tlan phei ve mek bawk a.

Hualzasela chuan tlangval te u ral kan ni lo ve, inbengdai ru tiin a chengrang chu leiah zawimuangin an nghat riai riai a, Khamsang tlangval te chuan lungtum nen an mi lu lak chem leh thingfak nen Hualzasela te lam chu an tin ṭhap mai a. Hualzasela chuan ral kan ni lo ve, Murlen khaw mi leh sa kan ni e, hlauhawm kan ni lo, Khamsang khua lo lut tura lo kal kan ni, kan faisa kenin min daih lova in hnawhpuatna tur a awm takin tiin in thawm hriain kan rawn pan che'u a ni an tih takah chuan Khamsam tlangvalte pawh chu inbengdaiin an zinga tlangval  pakhat chuan in kham khawp chu thlam lamah chaw a awm e, tiin tlam lamah chuan an hruai phei ta a.

Val upa Manphunga chuan a va tihzia dawn ve le aw, hei kan kaw ruak lutuk hian kan tha te a ti ṭhum zo tawh a nih hi tiin a pum kal ri riai riai chu an chul a. Murlen tlangval pathum te chu Khamsang nula paruk te chuan hlauh rukna tak la nei tih hriat tak mai hian an melh leh hrek hrek zel a.

Khamsang tlangval chuan, Murlen tlangval pathum te chawbar chu thlek ha pah hian engti turin nge in lo kal le? Pawipangte a awm em lovang chu maw an tih chuan Hualzasela chuan in lalpa hmu turin kan lo kal a ni pawipang em chu thleng lo turah ngai ila, lusei leh lusei karah in hmelmakna hi chhuak lo hram hram tura hmala tu tlangval in nih ngei ka beisei, tiin thlam leihkaah chuan a kam chu an ṭhuah puat puat a.

Tlang namthlaka ṭhu awn dar dar pah chuan hei khamsang nula te pawh an hmelṭhat hi maw le tiin vaibel an pak khu tual tual a. Khamsang tlangval Zodawla chuan nia, kan khaw nula te hi kan chhuang ve teh a nia khual val lak ah pawh tiin an nui ve ho a.

Nula ho chuan an kianga ngawi renga ṭhu vaibel pak khu laih laih kawlhnam sei reng ruang tak hum reng chu an han melh zawk zawk ṭhin a, Sawia lah chuan ngaipawimawh lo tih hriat tak mai hian vau lama hmin che leh laih ṭhin lam chu ngun takin a melh reng a. Nakinah chuan vau lama hnim buk che leh laih laih ṭhin aṭang chuan ṭhumi nupa niawmtak hi a zu hmu a a nui suk a, chu tia a nuih suk laia a biangsum lo lang leh kalh te chu nula ho te chuan hmuhnawm ti em em in an thlir a.

Hualzasela chuan nula pakhat hnenah chuan hei ka naua hian i samṭawk thlauh kha zu chhar rawh se tia a sawilai chuan an piahah chuan aw an hriat ṭhan em em an khaw pasalṭha aw ngei Neihdura aw chuan kha Zosiami te thlam ah mawng hunna tur a la awm lo'ng maw tiin an rawn au lauh lauh a,Zosiami chuan aw tuk e, lo chawl thlandai teh u khai U Neih an tih chuan tlangval pakhat chuan kan khaw pasalṭha U Neihdura te chu zanthum ngawt khuaah an awm tawh si lo a khawi lam lamah maw kal tak ang maw an tih chuan Hualzasela chu a lo inring pan pan hle mai le.

Neihdura leh a naute panga lai mai chuan chutia hmelhriat loh an khaw nula hmelṭha thlama an han hmu chu an mit meng aṭang chuan an lawm vak lo hle mai. Chu tah aw dam dap si,nngihnobei lem lo tak mai hian Hualzasela chuan kha Pasalṭha Neihdura leh a ho te  chu in ramchhuak in vavhlawhtling awm ve le an ti a. Neihdura chuan nia hlawhtling a ni ve mai ang chu kha khawi leh tui nge in nih le an tih chuan Hualzasela chuan i hniak i hnutchhiaha pawisak nei lek lova kan khaw perh tar i suasam hnu khua leh tui ngat le an ti chang ta fak mai a.

Chu tlam chhung boruak chu a ṭang ta at mai le. Neihdura chuan a nih tak chu maw le, in perh tar khan ka tai thi e ek e ba le min han ti khanglang pek a lawm maw le, chu avang mai mai chuan maw kan hnu in rawn chhui a an ti ha a, Hualzasela chuan niang chu maw le, chu mai chu duh tawk lovin i sam tliak a, hlam nga danah i vit phun a, kan khawram chin perh tar khan i pawi pawh va sawi hek suh, in lal hmu turin kan lo kal phah ta chu a nia an tih chuan Neihdura chuan kan lalpa hmu tura khawchhung lut tur pawh in awm tawh lo mai thei asin an ti chang fak mai a.

Hualzasela chuan, mahni lusei pui te chunga zahna lantir duh lotu chuan zilh hauna pawh a dawng khat ta ve ang, kei Murlen tlangval satliah Hualzasela hian in lal hmuh ka duhna chhan chu a la ngai renga ka hmu ngei bawk ang an ti chang ve leh fak mai a.

Chu hming an han hriat chuan Murlen pasalṭha hmingthang leh zaidam tak, a thinthawk a chhuah erawh chuan tawp mai mai thei lo a nih zia tlangkam aṭangin an lo hre ve nameuh mai le. Buaina hi kan duh lova, ti hian keini chu kan kal ang, in lal hmu tura hei chen chen lo kal kan ni e, tiin tlangval te hnenah chuan eitur an pek avangin lawmthu an sawi nghal zat a.

Neihdura chuan a silai cheng chu kau ri rap chung hian in tlai chhia va a ni e. Kei Khamsang Pasalṭha hian in kal ka la phal reng reng hleinem. In ke kha han pen leh vaih te u, a tu emaw ber hi chu pialralah ka tirliam ngei ang che u an ti chang fak mai a.

Sawiluaia chuan chu pasalṭha chezia chu a kham hle mai le. Lehhawi meuh in Hualzasela ke pen tur chu a pawt ding dat a, keiman le U Hual tiin Neihdura chu an pan mai zawng, midangho chuan mak ti takin an lo en ho a.

Sawiluaia chuan "pu a, kan kawngdal lo hram mai rawh, i lung a awi ngang loh a nih chuan i ngenmu kha ka taksaah hian luh tir mai ta che, ṭha te te in kan in thlah ang chu maw le tiin a mitmeng fiah tak chuan an en kal a. Neihdura chuan naupang, lo hnai suh, i vanglai hun i hmang hman lo hlauh dah ang nge an tih chuan Sawia chuan zawi fiah tak si hian pialralah tu te pawh an lawi a, a ṭhen an lawi hmaa, a ṭhen ten khawvel eng an la hmachhawn mai alawm an tih khum sak a.

Neigdura chuan a hmaa tlangval la naupang tak, a hmel ai maha a pian nalh tak te, a mit menga hlauhna chhiar tur awm miah lo mai te, a mah ang tiat lai ni si, a hmela naupangte hmel la pu si chu mak ti tak hian a silai chuan a la tin reng a, lo hmutu te chuan Sawiluaia chu mak ti takin an lo en kar hlawm a.

Neihdura chuan naupang ti khan em ni aia upa i chhan ṭhin, zilh loh fa ang mai, tiin a naute ho chu an mitmei a, chu ve leh a nau te chuan an mi lu lak chem te chu phawrh chhuakin an lo inring hlawm hle tawh mai le. Sawiluaia chuan khawngaihin ti suh u, helai hmunah hian thisen a luang hnem lutuk ang nge tiin an melh kual dan dan a, chu ve leh Hualzasela chuan Neihdur ti duh suh, in khaw nula te hian i naute thisen chhuak tur hi an hmuh i duh loh chuan inbengdai mai teh an ti a.

Neihdura chuan ka sawi tawh ka sut ngai lo ve in khaw lamah let leh nghal mai rawh u ka sai thluk hma che'u hian an la ti chher chher a. Hualzasela chuan Neihdura chu pan in ti duh suh, nunna hlutzia hrechiangtu i nih kha, tu emaw ber hi chuan i ngenmu kan dawng ngei ang, mahse i tlangval te ruang a tamzawk hlawm turin lamkal i tir ngei ang,nang ngei pawn pialral i pan ve thei bawk an tih chuan, Neihdura chuan aw le, kan khaw nula ho leh ka tlangval te ka hmaizah vang chauhin ka thu ka sut leh e. Mahse, i nau hi ka infiampui phawt dawn, aia upa zahna chang a hre lo tlat, an ti leh hram chuan Hualzasela chuan a nih a hnu i silai kha dah  thla ta che mi pa fa i nih ngai chuan an ti chang fak a.

Neihdura chuan ni ang hmiang, naute u tumah kha lo inrawlh hauh suh ang che u. He naupang hi ka kuai phar tak tak teh ang tiin a silai chu dah pah in a mi lu lak chem chu an phawi zal zal a. Hualzasela chuan tlangval te u in pasalṭha thusawiah khan in dingnghet em an tih chuan Neihdura chuan ka thu an hnial ngai lo ve, naua i hmachhawn mek hi i hrechiang dawn chauh tiin chapo takin a hmaa tlangval la naupang tak chu an melh kur a.

Sawiluaia chuan a hnungpuak kawlhnam Kamzarem ta ngei chu an phawi chhuak zal zal a, chu tah an chhak aṭanga van vawr zawnga silai puak ṭhuaiin, tumah kha che tawh suh u tia Khamsang lal fapa Pasalṭha ni bawk Piandenga leh a ho te panga lo kal chu lo en ṭhap in, Piandenga chuan Neihdur eng nge in thu leh hla? Tiin chang angreng takin an zawt a, Neihdura chuan thiam tak mai hian dawt tlem an belh hlak a.

Sawia chuan khatiang zawng khan maw i sawi chhawn dawn a, a va pasalṭha zia lo ve an tih chuan Neihdura chuan khanglang che chuan lal fapa ka tiam tawh thil hi ka tipuitling dawn an ti leh hram a, Piandenga chuan Hualzasela hnenah chuan Hualzasel, ka pa mi leh sa te ti thlabar zawnga kan ram leia in lo khawsak danah hian in thiam lo hul hual, Neihdur naupang lakah hriam an lek ngai lo e insum rawh, ka pa hnenah an duh chu thlen mawlh rawh se, eng ual ah an lo ngai lo ang nge an ti a.

Neihdura chuan lal fapa hei chauh hi i thu ka hnial ni teh se tiin Sawia chu an pan hnai leh sauh a, Sawia lah chu nui suk pah hian a duh chu han ti hlawhtling teh se a tihlai chuan, Piandenga chuan chu tlangval la naupang tak chu thlek vang vangin a ngaihtuahna chu hmun hla takah a cheng thung daih lawi si.

Hualzasela chuan Neihdur ti duh ting lo mai rawh i hlauh em em Tidim pasalṭha,Kamzarem lu tan tu a nih kha, a hriam lek kha en nawn leh teh, Kamzarem kawlhnam ngei a nih kha. Tin, Khamsang lal fapa ka keite khu han en vang vang teh, danglamna in nei tlem asin, Pherpui khaw lal fanu nunna a chhanchhuah sak a lawm taka ruanga Pherpui khua aṭanga an hnawh chhuan Sawiveli fapa neih chhuan i thisenzawm ngei i fapa ngei a nih hi an tih meuh chuan midangho chu an thinlungah mak tihna lo lang chhuak in Khamsang lal fapa leh an hmaa tlangval hmelṭha tak, pa hrak chu an thlek tawn zak zak a.

Hualzasela chuan Neihdur, ka keite kha hmachhawn rawh le, Sawia i tih tur chu han zo fel thuai teh, khua kan tlai lutuk hlauh dah ang nge an tih chuan Neihdura chu chhantu tur zawngin an hawi kual zuk zuk a. An lal fapa lah a lo in kuangkuah than mai bawk si nen. A mangang chuan thawk leh khat ah an vawh pawp mai zawng, chu erawh a tihsual lian tak a ni ta, a mi lu lak chem vai phe vuai chu Sawia chuan lo bum in an kun zauh a leiah in bin thak in a kawlhnam chuan Neihdura kaihza tha an chhah sak zauh a, Neihdura chem lo vai let chiah chu a kawlhnama lo dang tleu in rang taka a nghawnga reh pah chuan pu a che tawh suh tih leh a ban her thutin a kaihza ah chuan tlawh thlep hnawk in a kawlhnam chuan a nghawngah zai mai thei tur chuan an chuktuah nghal zat a.

Sawia chuan in pasalṭha lu hi ka lak loh na chhan tur hria in awm em? Tu nge ka hmaah hian lo ding leh dawn che'u an tih leh meuh chuan a hmaa naupang en a an lo en kha tunah zet chuan an leido nih a chakawm fahran tawh loh hle mai. A chet dan an hmu vek tawk bawk si nen, chutah an lal tupa a nih thu an han hriat leh lek phei chuan thlam chhunga nula ho phei chuan an runsang kai turin  an duh hlawm hle tih an melh danah chuan a lang chiang kher mai.

Piandenga chuan a tawk tawk viau a ni an tih chuan Sawia chuan ,"Neidura beng bulah chuan pu a, ti hian i damchhungin min hrereng tawh ang keimah avanga khaw eng hmu la hmu thei i ni tih hi tiin nambu lawp chuan Piandenga chu an melh kara."

Sawia chuan," Piandenga hnenah chuan ti khan kan inrul e," mahni lusei pui te ram valh chin pawh zahna chang hre lova suasam ching in lalpa in pasalṭha a nei hi ka dem hle mai che u. Tunah chuan in leido kan ni ta e, an tih chuan Hualzasela chuan ti hian kan in ṭhathen ang,in khawlam ah kan lut lovang, englaipawn kan in peih reng e, mal leh mal ang zawng pawn, thing luang zawh ang zawng pawn, a ruk a rala chet thawh ang zawng pawn tiin Khamsang lal fapa chu an melh kal a.

Piandenga chuan aw le, hei leh chen in lo kal tawh ka pa hmel pawh in hmu tur a ni. An tih chuan Hualzasela chuan i pa pasalṭha ten pawi an khawihna hi  lei inchawi dawn phawt chuan an tih chuan Piandenga chuan kan sawi fel ang, tiin a fapa Sawia chu an melh vang vang a, Piandenga chuan Sawiveli a damṭha maw an ti thamchhal a.

Sawiluaia chuan hrehawm tak tak kar ata min enkawl seiliana tunah chuan fapa tlangval a nei tawh a, a damṭha tawh e. An ti ve ngat a.