PÛMAH MI LU. BUNG 47- NA.

PÛMAH MI LU


BUNG 47- NA.



Mualnuam pasalṭha Ralkhuma leh a nau pasarih te chuan an hmaah enge lo thleng dawn tih pawh ngaihtuah phak lek lovin far hmun chu an dai lut a. An thlang lawkah phuba lak chak na avanga tuihal Thantlang mihrangvalte chuan an lo nghak ṭhap a.



Saia chuan tumah hi hliam tuar hman kan awm lo. Chengrang awrawl au ri khua aṭangin an hre em lo turah ngai ila, an hruaitupa khi ka sai tlu hmasa ber anga nangnin a kianga kal te in sai tlu ve nghal ang tia a sawilai chuan an lo hnai zel a.



Ralkhua chuan an rinlawk ang ngeiin hma a rawn hruai ngei a. Chutah an hmalawk hnim pik aṭang chuan silai a rawn puak, Ralkhuma thinhnunah tak va verh siah in a hnawlna lamah a naute pahnih chu hnungzawngin an tluk pui a. Chutah zen vanlam hawia cham chho nguah nguah khawpin silai vawinga an puak leh rang taka tlan chhuak dawk zawkin Ralkhuman a tlukpui tlangval pahnih te chu Saia leh Lunga chuan nangchin nghalin dimna tel eih lovin an nghawng an han tan sak a.



Inbeihna a tawp chuan Saia chuan hlenchhuah ngai hauhtak pakhat chiah a awm ta. Lunga i puanvenah khan duhaiin thisen a kai hnem mah mah e. Khualpang zin angin khawchhung ti hian kan lut ang. Zinga hian min lo zawm ve vat turah ngai ila, ni a vanlaizawl ṭan dawn der ta mai. Hmanhmawh a ngai ruang hi chu ti hian ram pasalṭhate kaw ruak in hnawhpuar nan hnutchhiah ta mai ila, kal ang u le tiin Mualnuam khaw lam an pan leh ta chhek chhek mai le.




Tlai Ni tlak rual chuan Mualnuam khawchhung an lut a. A lo hmutute chuan phawk hra in an lo melh hra hlawm a. Lalin kawt an han thlen chuan lalpa chuan tlangaupa chu mitmei nghalin kan boruak tawn zet zawng ngaih lam lamte pawh a ti ṭha lo ve. Kan Chawnglianate chhungkaw awmdan mai mai chuan ka thin a khei zak mai , khawnge khual hnar thu awm suh. Lo luh tir teh khai an ti a.




Chutia lalin chhung an han dai luh chuan kil khata Zinga lo ṭhu ran an han hmuh chuan Saia te chu an phawk deuh hra hlawm a. Hetia lalin chhunga Zinga a lo awm chhan hi Zinga hian ka hnungah ka ṭhianten min rawn la zui a, tin in khuaa mite in phur bawr lak kawng laka an hmuh thu a lo sawi lawk diam tawh bawk a ni.




Lal pa chuan in va hlauhawm khep khup ve maw le, hei in ṭhianpa hian in chanchin a rawn sawi nual tawh a. Ka lal ramchhungah rawn tla lut in heng hengah Zodai pasalṭhate in hmel ka lo hmu hi thla te pawh a muang sawng sawng e an ti a. Saia chuan lalpa i khua leh tui nih pawh a nawm dawn hi a, i lalna khua a lianin pasalṭha pawh an katnuk ta ve ang an ti a.



Lalpa chuan pasalṭha kut thliah tham pawh ka nei law, Murlen pasalṭhaten rammu ah ka khawdaingul an rawn sawm a, Thantlang khua an runna lamah famkhua an lawi ta a nih kha. Tih loh tawp tur ka lo ti a, tun hnu hian ka inchhirna zakhua a sei thlawn zel zawng a nih hi. Mahni Luseipuite kan tana hnawksak miah lo ka lukaiin aw ka lo pawh thla ve ngawt kha a nia. Tunah te hian Thantlang khua te hi engtin tak awm ang maw?



Chutih rual erawh chuan hun kal tawh chu ni in a tlakpuia inchhirin awmze thui tak a pai lo ve. Thantlang khuaa ka tlangvalte leh ka pasalṭhate ka lo tirh na khan tun thlengin mangchhia in min la tihbuai phah zu nia. Khualpang thuthanga ka lo hriat dan phei kha chuan Thantlang lalpa leh tlem azawng la dam te khan Chhim lam khaw lal bel in hun an hmang mek tih thawm te ka lo hriaa, tin an pasalṭha Sawia leh Thlahtea chu an him hram a, an fa te erawh pialral an kai nge kai ta lo pawh tun hnu ah hian thehmeh ang maiin an reh tlawk tlawk e an tih tak kha maw le.



Pawi ka tihna hi a zual zel zawng a nih hi. Kha ta ṭang zet kha chuan nopui pawh lukai chhalh in ka thlah phah zu nia an ti a, Saia chuan chuti fakauva lal inchhir hmel a hmela lo lang chhuak chuan khawngaihna mak tak a nei nghe nghe a.




Saia chuan lalpa, hun kal tawh hi a siam danglam theih tawh lo va, hma hun lah kan hre lawk bik hek lo. Mahni Luseipuite chunga kutthlak duhtu chu khuanu malsawmna a dawng ngai lo an lo ti ṭhin asin kan pi leh pu te famta khan an ti a. Lalpa chuan a nih zawng a ni meuh mai ka ti. Chutih rual erawh chuan min demna awka pai tlat che a kan hriat chu le an ti a.



Saia chuan a ṭhiante mitmei ran hian lalpa chu hnaih chilh nghalin lalpa tunah hian i lu hi ka la thei asin, tih leh a kawlhnama a nghawnga chuktuah an rual a. Chu ve leh tlangaupa chu Lunga chuan manbet nghalin chet thawh tum hauh suh. Tu te nge kan nih tih chu i la hre mai ang. Thawm bengchheng chhuah suh u tuman Zinga lal fanu kha i kutah kan dah e tiin lal kawngkapui hnaih chuan ṭhuthmun an bengbel nghal zat a.




Lalpa chuan tu khua leh tui nge in nih? Eng vanga tianga kan chunga khawsa duh nge in nih an ti vin ṭhat ṭhat a. Saia chuan lalpa i awka chhuak ti hniam rawh. Chuti lo zawng i lalna khua hi tunah meivapah a chang ngei ang. I pasalṭha Chawngliana leh Ralkhuma khan pialral aṭangin min lo thlir reng tawh ang an ti leh zet chu lalpa chu manganna nasa tak chuan a rawn tuam ṭan mek a.



Zinga lah nula rawp ta ngang, lal fanu hmelṭha chu kuah fet tak mai hian a awmbawr pawng lah chu a ban chuan an do lui salh a. A beng bulah thawm bengchheng i chhuah chuan i duh lo chung ka zen lui mai ang che tiin an la bau bet zui chu lal fanu chuan a hlau kher mai le.



Saia chuan lalpa, i awka chhuak khan inchhirna liantak a pai tih ka hai loh vanga i khua hi la him hram hram a ni e. Tu te nge kan nih tih chu i hre em em ang. Kei hi nichin lawka i sawi zawh chiah Sawiluaia fapa u zawk Saihmingliana ka ni ngai e. Thantlang tui tlan dik tak ka ni e. Kan dai chin a piang hi kan ram, kan ralthuamin a tinzawn tawh a hlah ngai lo ve. I fanu kianga ding khawtin thang ka nau Saizingliana a ni e.




Engvangin nge kan khua bei tura i pasalṭha leh tlangval eng emaw zat kan lam hawia in ṭek khamphei dawng tura kan lam i rawn pan tir? Mangchhia i man na chhante kha kan rawn umzui zel vang che a nia sin. Insawifiahna hun tumah ka pe ngai hauh lo. Chutih rual erawh chuan kan tawrhna khan mangchhia min man tir ve tho asin.



Murlen Thantlang khua pasalṭhate tualchaina chu eng tikah mah a ding leh tawh ngai lo vang. Chutiang ang chuan i khua leh tui te chungah hian kut kan thlak thei asin. Zinga thlah rawh. An awka chhuak a rin leh vaih chuan hmeichhia pawh ni se pialralah kan thawnliam zel ang an ti chang fak a.



Lalpa chuan ṭap ṭuau hian min ngaidam rawh u. Ka chungah hian engpawh thleng se vuina ka nei lo. Tu khua leh tui nge in nih tih ka hriathma khan ka inchhir zia in hnenah ka sawilang tawh e. Ka lu hi la ula in lal hnen thleng rawh se. Chutih rual erawh chuan ka chhungte hi chu an nun zuah hram rawh u an ti sap a.



Saia chuan awka nem dam thlap hian lal fanu chu huiin lal fanu chuan hlauthawngru tak chuan muangchangin an pan a. Chutah Zinga lah chuan lal fanu mawngtama lo nam phei chu rualin Lunga chu an nuih sak a. Lunga lah pek chuan kan Zingliana tak hi chu aw an ti sap a.




Saia chuan lal chhungkua leh tlangaupa chu ṭhut khawm tirin Saia chuan," lalpa, tunah hian thil pakhat ka ngen dawn che a, chu ka ngenna chu min pawmsak ngei ka beisei. Thinlunga sernung in tuh Thantlang tlangvalte hian pawisak kan nei lem lo tih erawh i hriat ka ring. Kan in leh lo leh kan khua hlim taka tual kan lo chaina hmun ngeiah lal hrawt in min suasam sak a, chung zingah chuan i pasalṭhate an tel ve tlat avangin kan hmachhawpah rin luh theih loh in i awm tih hi lo in hre hmasa ang che.




I pasalṭha Chawngliana erawh a la dam ngei ang Zinga han sawi teh le an ti a. Zinga chuan lalpa i pasalṭha Chawngliana khan min tur lui ngat se chuan famkhua a lawi tawh ngei ang. Pasalṭha nuntluang leh lungfing tak, pasalṭha i nei kha ka chhuang khawp mai che. I rilru sukthlek azirin i khua leh tuiah hian a la khawsa thei ang.




Ka u khan i lakah phut a nei pawh a ni mahna le. Ka u hi chuan zahngaihna sang tak a nei ṭhin a, a chang hi chuan a nem mah mah tiin ka thin pawh a ti khei zak ṭhin. Kei chuan i laka ka phut chu i fanu leh i tlangvalte leh kawng laka eirel min siam sak turin i khaw nula te panga duh kan thlang ang.  Chuan, zangnadawm nan kan kawp kim ṭheuh Se nufa leh kan pasalṭha fam changtate chhungkaw in tun nunnan ṭhi leh dar leh se nufa ka phut an ti a.



Saia pawh chuan chuti em em a Zinga ṭawngkam thiam zia leh ṭawng theihzia an hriat thar chuan a nuih lam lam te pawh a za ru in a in hum ruh hle mai a. A ngei zawk hial a ni. Lunga lam a va hawi Lunga lah midang hriat hlau takin banglam hawi chuan insum tih hriat tak mai hian a hmui a lo hup ṭut ṭut a.




Lalpa chuan in kawpkim ka lalna ramchhungah hian se nufa ka kawl dawn si lo va an ti chuai raih a. Zinga chuan sam zet hian keini bak hi kan ni lo ve an tih chuan lal chhungkua chu an phu awk thei hial a. Zinga chuan i khua leh tui lo dai lut zat i hriat vang hian min zuam phah hlauh ang nge. Murlen leh Thantlang khua ding leh ngai tawh lo tura mihrangvalte che tla chuan i khua hi awlsam taka kan rik rap theih kha ring phawt mai la an tih chuan Lalpa chuan Zinga thusawi te chu awi har ti tak chunga a awih a ngai si. An hmel enin zam hmel leh dawih aw lah an pai hauh si lo.




Lalpa chuan in thu ang ni rawh se. Ka fanu hi him dam taka a lo haw leh mintiam rawh u an tih chuan Saia chuan lalpa ka tiam a che. A tirtea kan thu leh hla in a zir vanga i khua hi la ding chauh a ni tih hi pai reng ang che. Ti hian khualṭha angin min thlen tir la, i khuaah hian buaina kan siam lo vang. I khaw mi lehsa in buaina an siam erawh chuan an lu kan la ang. Chu chu thutawp a ni e an ti a.




Lalpa chuan ni tuk e. Ka lalna khua leh tuia zah in ngaih avangin in hnenah lawmthu awm se. Chuan ka pasalṭha te chu in kut tuarin pialral an lawi ta a maw an ti nawn leh a. Saia chuan lalpa i lakah dawt kan chhak chhuak lo ve. I khua leh tuite chungah i ṭawngka chhuak tur chu i ngaihtuahna i sen ve a ngai ang.



Zinga, Chawngliana chhungte chu engtin nge ni zel an ti a. Zinga chuan an chul hluiah min lo nghak ang an tih chuan Saia chuan lalpa kan thupek hnial thei dinhmunah a din loh vanga i khua leh tui chhuahsan a inthiar fihlim tura ti kan ni. A chhan chu a farnu kan kutah a awm vang a ni e. A laka i rilru put hmang a,zirin kan khawlam kan panpuiin kan panpui lo vang an ti a.



Lalpa chuan lo let leh se, a pa chuan ka rorel min ṭawmpui rawh se. A ni tello in engin nge ka awm ang. Ka upa te aia ka dah chungnun ka khaw daingul tel loin hrehawm reng rengin ni ka vuiliam dawn asin. Lo haw rawh se an tih chuan Zinga chuan i tlangvalte pathumin min zui se kan zu hruai kir ang an tih chuan lalpa chuan aw an pawh a.




Chutia khual val pasalṭha rual tih hriat ngawih ngawih leh an lal chhungkaw ho va khaw chhung an fang an han hmuh chuan an thil tihlai chawl meuh in makti takin leihkapui sang aṭangin an lo thlir ṭhap a. Lal fanu hmelṭha leh Zinga a ṭhianga an han kaldun an han hmuh chuan inhmeh hi an han ti hlawm em em lah tak a.




Ti chuan le Zinga leh Mualnuam khaw daingul te inphur bawr luka khawchhung an rawn pan leh an hmuh chuan khaw mipuite chuan an khaw boruak tawn chu mak ti takin an rindan an sep an sep hlawm a.




Zingkhua a lo var. Saia chuan a naute chu ko khawmin tiang khawpa ka danglam chhan chu nizan ka mang lamah a tawk tawh lawm ni tia min rawn be tu kha ka thinlungah a cham tlat vang a ni. Tunah chuan kan unaute thlarau pawh a hahdam tawh turah ngai ila, hlim takin kan khawlam kan pan tawh dawn nia.



Mualnuam lal laka i thil ngiat kha i ti tak tak em ni zinga an ti a. Midangho chu an lo nui ṭha hlawm a. Zinga chuan boruak tih ziaawm nana ṭawngka rawn zep ve mai ka ni. Ka u, hruaitu i ni a, chutih rual erawh chuan kan ṭhiante laka ṭhi leh dar ka phut erawh kha chu a la ngai reng an ti chhuak sap a.



Saia chuan aw le. An khaw mi leh sa in min rawn zui ve a ṭulna ka hre hauh lo va ti hian rem kan ruat ang. Zasira chhungte tan ṭhi leh dar kan phut ang nga. Kan lalpa tan lalpa darbu kan ngiat bawk ang. Famchangtate tan an chhungte ṭheuh hnenah ṭhi leh dar kan ngiat ang nga. Kan phal tawk bak erawh kan paruk hian kan insem tawh ang.


Kuala vawin ni aṭangin hruaitu i ni e. I kalna lam lamah kan zui ang che tiin a dah pawimawizia an chhak chhuak zauh a.



Lalpa hnena an thil ngiat i he lo leh lalpa in sawibuai hauh lo va a pek tuk chuan kawtchhuak thleng thlah in an lan theih chhung lal leh a chikawi ten an vailiam a. Lalpa chuan an ni ang renga pasalṭha nuntluang ka la hre ngai lo ve. An hmel hmaiah lah zamna chhiar tur pai hek lo. An leido ka ni lo hlauh chu khuanu zahngaihna a ni e ti sap in khawchhung lam an pan ta a.




Kum a vei, ni a liam, Builukham in parmawi tak a chhuah. Thantlang khuate pawh pung ve zelin in za nufa an in chhal ve ta reng mai.



Zinga chuan a fapa thlasik vawikhat hmachhawn ve mek, chu daisulep in ka fapa hian khuatin thang se khuanu hian hual him rawh se. Tiin chhaih nui har harin a fap duhawm zet SAIZINGPUIA chu an sep lauh lauh a. A nupui Mualtinkhumi chuan em em ṭhin a che khawnge i thloh palh ange tih leh lak an rual a.




Saia te pawn inhrang changin fapa kum li mi a nei mek a. Lunga leh Thlahlova pawh ṭhiansabeng ni chho ve zelin Thantlang pasalṭha leh khawdaingula rin luh ni in Thlahtea leh Sawia pawh chuan lal thu leh hla te thlawp zatin lal kaihza an veng ve ran a.




Pelpawltlang aṭanga Thantlang khaw lan theihnaah chuan Lalpa leh Sawia, Thlahtea leh Saiate unau, Lunga leh Tlhahlova chuan thlirin lalpa chuan van lam hawi vang vangin kan sul i hnu, chui tlak awm lo mahse, lungawina tlangah thih leh ruam khatah, dam leh tlang khatah nangni hi a ni ka hmaa lo ding reng ṭhin cheu chu.




Ṭiau lui kana hriat ngai loh ram min chuantirtute chuan pialral aṭangin  min lo thlir e. Awhawmna leh huaisenna zawng zawng kawltu ka khawdaingul te u. PÛMAH MI LU malchaw pe turin khawchhung i pan ang u hmiang tiin kal zai an rel ta a.



A TAWP TA.